كه‌مال یاسین ڕێكانی
دایكا ده‌لال پر شیرینێ
سه‌ر مه نه‌كه چو گرینێ
په‌یڤێن نازك هه‌ژی ته‌نه
گیان و سامان گۆری ته‌نه
گاڤا كه‌تینه به‌ر تایێ
به‌رمه دبێژی لایه لایێ
ده‌نگێ دایێ خۆش زێماره
به‌ر دلێ من وه‌ك كباره
وه ناكه‌تن دوور بكه‌ڤم
ل ناڤ شه‌را قه‌ت ناڕه‌ڤم!
لاڤا بكه .. دایكا منێ
تویی تاجا ئه‌ڤێ دنێ
ژ مه‌را بۆ ته سلاڤ و رێز
تو یی بۆ من ئۆمێد و هێز
شیلان یونس
ژ گه‌رمێ خه‌وا وێ نه‌دهات، په‌نجه‌را ژوورا وێ دكه‌فته د كولانێدا، ئاخ ژ بۆ فره‌كا بایێ هوین.
“خخخخ… ڕڕڕڕ… تفففففف…”
ئاوازا هه‌ر شه‌ڤا جیرانه‌كێ وان بوو… هه‌ر شه‌ڤ و سپێدێ دهاته د كولانێدا و ب هه‌می هێزا خوه هندی به‌لغه‌م د ڕۆژێدا كۆمكری فرێدا د كولانێدا… وه‌كی سه‌مفۆنیه‌كا ڕێكخستی… ژ نافكێ بۆ مه‌عدێ و مه‌عدێ پالدا بۆ حه‌فكێ و ل دووڤدا بۆ چه‌ند چركا بێهنا خوه د سیهاندا ئاسێ دكر و شووووووته‌كا وه‌كی زه‌لاما بۆ سه‌ر ئه‌سفالتی….
دزانی شووتا دویێ یا برێڤه: وه‌عد بیت ئه‌ڤ شه‌ڤه بۆ ته نه‌هێلم…
ب ئێك لڤین خوه گه‌هانده ل به‌ر په‌نجه‌رێ. له‌شێ وێ هه‌می بوو گوه، ده‌نگ د حه‌فكا خوه‌دا كۆمكر… یا ئاماده بوو…
” خخخخ… ڕڕڕڕ… تفففففف…”
به‌ری به‌لغه‌م بگه‌هیته سه‌ر ئه‌ردی ب قێرینا “قۆزۆلقۆرت”ه‌كێ هه‌ست ب ئارامیێ كر.
ژ ده‌نگێ خوه ما حێبه‌تی… هێدی هێدی خوه چه‌ماند و گه‌ڤزی د ناڤ جهێن خوه‌دا…
ب “ما كی دزانیت ده‌نگ ژ مالا مه بوو” خوه ڕازی كر.
پشتی تێشتا سپێدێ؛ دو چا تێكر و ل ده‌ف دایكا خوه ڕوونشت و پێكڤه سه‌حكرنه ته‌له‌فزیۆنێ. په‌یامنێری بۆچوونێن چه‌ند خوه‌پێشانده‌ران وه‌ردگرت.
فره‌ك ل چایا خوه‌دا و گۆت: دادێ، ده‌مێ سپێدا زوو تو به‌ر ده‌رگه‌هی دمالی ته كه‌سه‌ك دیتیه به‌لغه‌مێ خوه دهاڤێته د كولانێدا؟؟
دایكێ چا خوه تێكڤه‌دا و گۆت: ئه‌رێ، لالۆیێ ئێخسیره، یێ كه‌ر و لاله!!!….
* میزۆفۆنیا Misophonia ئه‌ڤرۆ دا دچیته د خانا جۆره‌كێ وه‌سواسان وه‌سواس یان بێزاریان توره‌بوون ژ هنده‌ك ده‌نگێن دیار كری مینا: فڕفڕا ڤه‌خوارنێ، پس پسا ئاخفتنێ، ملچ ملچا ده‌نگێ خوارنێ، فین فین و كف كف…. هتد.
* من ژی میزۆفۆنیا هه‌یه؟
به‌رپه‌رێ ساخله‌میێ:
رێڤه‌به‌رێ پشكا ئایتی ل وه‌زاره‌تا ساخله‌میا حكۆمه‌تا ھەرێما كوردستانێ ڕاگه‌هاند، حه‌فتیا بهێت كارتا ڤاكسینێ دێ ده‌رچیت، ل هه‌موو پارێزگه‌هان ژی نڤیسینگه‌ه بۆ پێدانا كارتا ڤاكسینێ دێ هێنه ڤه‌كرن.
حه‌ربی كه‌تۆ، رێڤه‌به‌رێ پشكا ئایتی ل وه‌زاره‌تا ساخله‌میا حكۆمه‌تا ھەرێما كوردستانێ ڕاگه‌هاند: “حه‌فتییا بهێت وه‌زاره‌تا ساخله‌میێ دێ ڕێنمایێن پێدانا كارتا ڤاكسینێ ده‌رئێخیت، ل هه‌ولێر، دهۆك، سلێمانی و هه‌له‌بجه دێ نڤیسینگه‌ها بۆ پێدانا وێ كارتێ ڤه‌كه‌ت”.
گۆتژی: “ئه‌و كارت ل ڕوویێ ئه‌منی و ھاككرنێ گه‌له‌ك یا ب ھێزه و چ كه‌سه‌ك نه‌شێت سه‌خته بكه‌ت، ژبه‌ركو ھەموو داتایێن وی كه‌سی كو ژه‌ما ئێكێ و دوێ یا ڤاكسینێ وه‌رگرتین، تۆماركرینه، ل ھەر جهه‌كێ دونیایێ ژی بیت، ئه‌وێ كارتێ باركۆد ل سه‌ره و ب سكانكرنێ دێ شێت پێزانینان بینیت”.
رێڤه‌به‌رێ پشكا ئایتی ل وه‌زاره‌تا ساخله‌میێ به‌حس ل وێ چه‌ندێ ژی دكه‌ت، ئه‌و كارته دێ‌َ بیته ئاسانكاریه‌ك بۆ گه‌شتكرنێ و ل وی وه‌لاتێ گه‌شتێ بۆ دكه‌ن، كێمتر پشكنینا كۆرۆنایێ دێ بۆ هێنه‌كرن، هه‌ر سێ جۆرێن ڤاكسینێ تێدا د تۆماركرینه، كو هه‌ر كه‌سه‌كی كیش ڤاكسین وه‌رگرت بیت، ئه‌و جۆر دێ بۆ هیته تۆماركرن.
به‌رسڤا هنده‌ك پرسیارێن گرنگ ل دۆر ڤاكسیندانا دژی كۆرۆنایێ
ئه‌ڤرۆ:
1/ هه‌كه من ڤاكسینا دژی ڤایروسێ كۆرۆنایێ وه‌رگرت پشتی چه‌ند رۆژا له‌شێ من دێ به‌رگریێ دژی ڤایروسێ كۆرۆنایێ په‌یداكه‌ت؟
به‌رسڤ: پشتی سێ حه‌فتیا له‌شێ ته دێ به‌رگریێ په‌یداكه‌ت، دژی ڤایروسێ كۆرۆنا.
2/ هه‌كه تووشی ڤایروسێ كۆرۆنابێ بووم كه‌نگی ڤاكسینا دژی كۆرۆنایێ وه‌رگرم؟
به‌رسڤ: پشتی چار حه‌فتیا ل ده‌ستپێكا ده‌ركه‌فتنا نیشانێن كۆرۆنا یانژێ ئه‌گه‌ر كۆرۆناته گه‌له‌كا بهێزبوو دێ سه‌ره‌دانا نۆشدارێ خوه كه‌ی ئه‌وێ تو چاره‌سه‌ركری و ل دووڤ رێنمایێن وی دێ دانی.
3/ هه‌كه من قورچا ئێكێ یا ڤاكسینێ وه‌رگرت و پشتی وه‌رگرتنا قورچا ئێكێ تووشی ڤایروسێ كۆرۆنا بووم ئه‌رێ دێ شێم قورچا دوێ وه‌رگرم؟
به‌رسڤ: به‌لێ دێ شێ قورچا دوێ یا ڤاكسینێ وه‌رگری، به‌لێ پشتی چارحه‌فتیا ژ ده‌ركه‌فتنا نیشانێن ڤایروسێ كۆرۆنایێ، هه‌كه ژڤانێ ته‌یێ دانانا قورچا دوێ یێ نێزیك دێ پاش ئێخی.
4/ پشتی من قورچا دوێ یا ڤاكسینێ دژی كۆرۆنا وه‌رگرتی من پشكنینا خوینێ یا (IGG) كر به‌لێ به‌رگری دژی ڤایروسێ كۆرۆنایێ نه‌چێكربوو؟
به‌رسڤ: مه‌رج نینه پشتی ته ڤاكسین وه‌رگرت به‌رگری دناڤ خوینێ بهێته‌چێكرن، به‌لێ چاوا ڤایروس ب رێكێن دی دژی به‌رگریا له‌شێ مروڤی یه ڤاكسین ژی ب هه‌مان شێوه ب رێكێن دی دێ به‌رگریێ دژی وێ دروستكه‌ت بو نمونه (هنده‌ك جارا ل شه‌ری مروڤ هه‌مان ته‌كتیكا دوژمنی ب كارنه‌ئینیت بو سه‌ركه‌فتنێ راسته هه‌ردو شه‌رن به‌لێ ته‌كتیكا شه‌ری جودایه هه‌ر ئێك بو سه‌ركه‌فتنێ ته‌كتیكێن نوی ب كاردئینیت).
5/ ئه‌رێ پشتی ڤاكسینا پشكنینا خوینێ هشكبوونێ بكه‌م؟
به‌رسڤ: هیچ ژێده‌ره‌كێ زانستی به‌حس نه‌كریه و نه‌گرنگه تو پشكنینا بكه‌ی.
6/ من نه‌ساخیێن دومدرێژ هه‌نه و گه‌له‌ك ده‌رمانا دخووم ئه‌رێ دێ شێم ڤاكسینێ دژی كۆرۆنا وه‌رگرم؟
به‌رسڤ: به‌لێ بێگومان دێ شێی وه‌رگری و چ زیانێ ناگه‌هینیته‌ته، ژبلی مفا گه‌هاندن بو ساخله‌میا ته.
به‌رپه‌رێ ساخله‌میێ:
به‌رپرسا پرۆگرامێ ڤاكسیندانێ ل رێڤه‌به‌ریا كارۆبارین خۆپاراستنا ساخله‌میا دهۆكێ دیاركر:” هه‌تا نوكه پتر 78 هزار كه‌سان ڤاكسین وه‌رگرتینه و هنده‌ك ژوان هه‌ردو قورجێن ڤاكسینێ وه‌رگرتینه وهنده‌ك ژی بتنێ قورچه‌ك وه‌رگرتیه و ل ژڤانێ وه‌رگرتنا قورچا دوێ نه.
د. لوما حازم، به‌رپرسا پرۆگرامێ ڤاكسیندانێ ل رێڤه‌به‌ریا كارۆبارین خۆپاراستنا ساخله‌میا دهۆكێ دیاركر: چو جوداهی دناڤبه‌را هه‌ر سێ جۆرێن ڤاكسینێ دا نینه و هه‌ر سێ جۆرێن ڤاكسینێ نوكه بۆ وه‌لاتیان دهێنه دانان و كاریگه‌ریه‌كا باش هه‌یه، نوكه ڤاكسینێ ئه‌سترازینیكا و سینوفارم و فایزه‌ر ل به‌رده‌ست هه‌نه و بۆ وه‌لاتیان دهێنه دانان.
ئاشكرا كركو هه‌ر كه‌سی َ تووشی كۆرۆناییێ ببیت پشتی چاره‌سه‌ربیت ل دووڤ رێنمایێن ساخله‌میێ پشتی 14 رۆژان ژ چاره‌سه‌ربوونێ دشێت ڤاكسینێ وه‌ربگریت و ئه‌و كه‌سێن قورچا ئێكێ یا ڤاكسینێ وه‌ردگرن و تووشی كۆرۆنایێ دبن دێ خوه گرن هه‌تا چاره‌سه‌ر دبن و پشتی 14 رۆژان ژ چاره‌سه‌ربوونێ دشێت قورچا دوێ وه‌ربگریت.
د. لوما حازم، ئه‌وژی دیاركر كو: ڤاكسین كارتێكرنا كۆرۆنایێ ل سه‌ر مرۆڤی كێم دكه‌ت ده‌مێ تووشی كۆرۆنایێ دبیت و ره‌نگه كه‌سه‌ك ڤاكسینێ وه‌ربگریت و تووشی كۆرۆنایێ ببیت، به‌لێ دبیت پێدڤی ب نه‌خۆشخانێ نه‌بیت و ره‌وشا وی مه‌ترسیدارنه‌بیت، به‌لێ تووشبوون دێ هه‌ر هه‌بیت، ڤاكسین دێ رێژا تووشبوونێ و گیان ژده‌ستدانی َ كێم كه‌ت، ژبه‌ر ڤێ چه‌ندێ ئه‌م ئاموژگاریان ل وه‌لاتیان دكه‌ین ماسكێ بكاربینن و قه‌ستا جهێن قه‌ره‌بالغ نه‌كه‌ن.
زێده‌تر گۆت: هه‌تا نوكه دۆرین 160 هزار قورچێن ڤاكسینێ گه‌هشتینه دهۆكێ و به‌رده‌وام ڤاكسینێ دژی كۆرۆنایێ بۆ دهۆك دهێته دابینكرن هه‌تا نوكه 78 هزار و 533 كه‌سان ڤاكسینێ دژی كۆرۆنایێ وه‌رگرتیه، ژوانژی 44680 كه‌سان هه‌ردو قورچ وه‌رگرتینه و 32368 كه‌سان ژی قورچه‌ك وه‌رگرتیه، ئانكو ب شێوه‌یه‌كێ گشتی 115000 قورچێن ڤاكسیندانێ هاتینه دان و ئه‌ڤرۆ ژی گه‌ره‌كا دی یا ڤاكسینێ دێ گه‌هیته دهۆكێ.
دهۆك: له‌زگین جوقی :
به‌رپرسا سه‌نته‌رێ چاره‌سه‌ری و پشته‌ڤانیا كچ وژنان ل دهۆكێ دیاركر هه‌تا نوكه دناڤ سه‌نته‌ری دا چاره‌سه‌ریا 1427 كچ وژنان هاتیه كرن كو دوارێ ده‌رونی و جڤاكی دا ساخله‌میا پارێزگه‌ها دهۆكێ پشته‌ڤانی و هاریكاریا كچ وژنێن رزگاربووی دكه‌ت.
داخاز محه‌مه‌د، به‌رپرسا سه‌نته‌رێ چاره‌سه‌ری و پشته‌ڤانیا كچ وژنان ل دهۆكێ دیاركر:” چاره‌سه‌ریا كچ وژنان دناڤ سه‌نته‌ری دا دهێته كرن ب رێیا نۆشدارێن تایبه‌تمه‌ند و چاره‌سه‌ركاریێن ده‌روونی هه‌ر كچ و ژنه‌كا قه‌ستا سه‌نته‌ری بكه‌ت، پێدڤیه ژلایێ نۆشدارا ئافره‌ت ڤه بهێته دیتن و هه‌موو خزمه‌تیێن پێدڤی بو هه‌موو رزگاربوویان دهێنه ئه‌نجامدان و هه‌ر ئێك ژوان كارته‌ك هاتیه دروستكرن ده‌مێ قه‌ستا سه‌نته‌ری دكه‌ن وێ كارتێ وه‌ردگرن وخزمه‌تێن ده‌روونی و جڤاكی دناڤ سه‌نته‌ری دا دهێنه پێشكیشكرن بۆ كچ وژنان”.
داخاز محه‌مه‌د، ئاشكرا كركو:” گه‌له‌ك خزمه‌ت بۆ رزگاربوویان دناڤ سه‌نته‌ری دا دهێنه پێشكیشكرن وبه‌رده‌وام پشته‌ڤانیا كچ وژنان دهێته كرن بۆ وێ چه‌ندێ ئێش و ئازارێن وان بهێنه چاره‌سه‌ركرن، چونكو تووشی زۆرداریێ بووینه و ۆت: ئه‌م هه‌ول دده‌ین ب هه‌موو شێوه‌یان خزمه‌تان پێشكیشی وان بكه‌ین.
دیاركر ژی” ل ناڤ كه‌مپان ژی پشته‌ڤانی و هاریكاریا كچ وژنێن رزگاربوویێن ده‌ستێن تیرۆرستێن داعش دكه‌ن و گۆت: هه‌تا نوكه چاره‌سه‌ریا 1427 رزگاربوویان هاتیه كرن وبه‌رده‌وام چاره‌سه‌ریا هنده‌كان ژی دهێته كرن هه‌تا بو په‌یداكرنا ده‌لیڤێن كاری ژی ئه‌م پشته‌ڤانی و هاریكاریا كچ وژنان دكه‌ین.
داخاز محه‌مه‌د، زێده‌تر گۆت: هه‌تا نوكه باشترین خزمه‌ت بۆ كچ وژنان یێن هاتینه پێشكیشكرن دناڤ سه‌نته‌ری دا دواری ده‌روونی و جڤاكی و خزمه‌تكرنێ دا ل ناڤ سه‌نته‌ری ب خوه دا جهێن چاره‌سه‌ریێ هاتینه ئاماده‌كرن و ئه‌و كچ و ژنێن پێدڤی روونشتنێن چاره‌سه‌ریێ دبن هه‌ر ل ناڤ سه‌نته‌ری دا ئه‌ڤ خزمه‌تا وان دكه‌ین.
گلاوێژ جه‌عفه‌ر، چاره‌سه‌ركارا ده‌روونی ل سه‌نته‌رێ چاره‌سه‌ری و پشته‌ڤانیا كچ وژنان ل دهۆكێ دیاركر:” كچ وژن تووشی گه‌له‌ك نه‌خۆشیان بووینه و ئه‌م ب هه‌موو شێوه‌یان پشته‌ڤانیا وان دكه‌ین، هه‌ر ژ سالا 2014ێ ساخله‌میا پارێزگه‌ها دهۆكێ ده‌ست ب كارێ چاره‌سه‌ریا كچ وژنان كریه، نۆشدارێ ده‌روونی حاله‌تی ده‌ستنیشان دكه‌ت و ئه‌م پلانێ بۆ چاره‌سه‌ریێ د دانین و گۆت: یا من دیتی د ده‌مێ كاركرنێ دا كچا ئێزدی گه‌له‌ك یا بهێز بوویه وهه‌رده‌م ڤیایه كاربكه‌ت و پشتبه‌ستنێ ل سه‌ر خوه بكه‌ت و ئه‌و شیانێن كچێ هه‌ین گه‌له‌ك مه‌زن بووینه.
ناڤهاتی ئه‌وژی گۆت:” كچ و ژنێن رزگاربووی هه‌ول دده‌ن زوو فێری كاری ببن وهه‌ول دده‌ن وان دیمه‌نێن نه‌خۆش بكه‌نه تابلۆ ونیشا جیهانێ بده‌ن ئه‌وژی وه‌كو نامه‌كێ ئاراسته‌ی جیهانێ بكه‌ن.
دهۆك، زنار تۆڤی:
شێوه‌كار هه‌كار مسته‌فا، یێ ناسیار ب هه‌كار ئارتێست، د دیداره‌كێ دا بۆ رۆژناما ئه‌ڤرۆ دبێژیت: من پشكا شێوه‌كاری ل په‌یمانگه‌ها هونه‌رێن جوان دهۆك، كۆلیژا هونه‌رێن جوان ل دهۆكێ خواندییه، ئه‌ڤه 15 ساله د وارێ شێوه‌كاری دا كار دكه‌م، ئه‌ز ژ بابێ خوه فێری ڤی كاری بوویه.
ناڤهاتی گۆت: ل باژێرێ دهۆكێ وه‌كو پێدڤی گرنگی ب هونه‌رێ شێوه‌كاری نا هێته دان، شێوه‌كارێن مه ژی نه‌شێن داهاتیه‌كی ب رێیا ڤی هونه‌ری ب ده‌ست خوه‌ڤه بینن، هه‌ر چه‌نده مه شێوه‌كارێن گه‌له‌ك باش ل دهۆكێ هه‌نه، چو جۆداهی دناڤبه‌را وان و شێوه‌كارێن جیهانی دا نینه، لێ مخابن چو هاریكاری بۆ شێوه‌كارێن مه ناهێته كرن، بۆ زانین ناڤه‌رۆكا پرانیا كه‌ڤالێن من ل سه‌ر كلتۆرێ كوردی و مرۆڤێن دناڤ ڤی گه‌ردونی دانه، ئه‌ز گه‌له‌ك یێ سه‌رسامم ب وان ره‌نگێن دناڤ كلتۆرێ كوردی دا هه‌ین، و ل ده‌مێ بۆری ب رێیا سۆشیال میدیایێ ئه‌ز شیایمه كه‌ڤالێن خوه بفرۆشم، هه‌تا نوكه من پتری هزار كه‌ڤالان فرۆتینه، ئه‌ز ل دووڤ داخوازییا خه‌لكێ چێدكه‌م، هه‌روه‌سا خه‌لكێ مه وه‌كو پێدڤی گرنگیێ ب كه‌ڤالێن خۆمالی ناده‌ن، هه‌تا نوكه خه‌لكێ مه دروست د هونه‌ری نه گه‌هشتییه داكو كه‌ڤالێن خۆمالی بكرن، دیسان خه‌لكێ مه هونه‌رمه‌ندێن خوه نانیاسن، لێ یێن بیانی دنیاسن، نوكه پتر فۆكسا خه‌لكێ مه ل سه‌ر هونه‌رمه‌ندێن بیانی یه، و ب دیتنا من ڤه‌كرن و نه‌ڤه‌كرنا پێشانگه‌هێن شێوه‌كاری چو گرنگیا خوه نینه، چونكو چو داهات بۆ هونه‌رمه‌ندان ژ وان پێشانگه‌هان ناهێت، دیسان میدیایا كوردی ژی وه‌كو پێدڤی گرنگیێ ب هونه‌رمه‌ندان ناده‌ت.
دهۆك، نه‌وزادهلۆری:
نازه‌لین، كچه‌كا ئێزدی یا خه‌لكا شنگارێ یه و ل كه‌مپا شاریا وه‌كو ئاواره‌د ژیت، بۆ ئێكه‌م جار ل پارێزگه‌ها دهۆكێ وه‌كوكچ بازاره‌كێ گوهۆرینا پاره‌ی ڤه‌كر و ل به‌ره كارێ خوه به‌رفره‌هتر لێ بكه‌ت.
ناڤهاتیێ بۆ ئه‌ڤرۆ گۆت: ئه‌ڤه هه‌یڤه‌كه من ده‌ست ب كاره‌كێ كری كو ئه‌و ژی بازارێ گوهۆرین اپاره‌ی و ڤه‌گوهاستنا پاره‌یه ل ناڤخوه و ده‌رڤه‌دا، سوپاس بۆ خودێ كارێ من یێ باشه ویێ بوویه جهێ باوه‌ریا خه‌لكی و دڤێت مرۆڤی شاره‌زایه‌كا باش هه‌بیت، چوو ئاسته‌نگا بۆ خوه نه‌كه‌ته بهانه، خه‌لكێ مه زۆر یێ هاریكاره، به‌ری نوكه بۆ ده‌مێ چار سالان من ل به‌نكه‌كێ كار دكر، من ل به‌ره كارێ خوه به‌فره‌هتر لێ بكه‌م و ل دهۆك و زاخۆ و شنگارێ نڤیسینگه‌هان ڤه‌كه‌م.
ناڤهاتی كو ل سالا 1992 ژ دایكبوویه، دیاركر ژی كو ژبلی گوهۆرینا پاره‌ی، كارێ ڤه‌گوهاستنا گه‌شتو گۆزار و فرۆكه‌ڤانی ژی دكه‌ت و رێڤینگان بۆ پرانیا وه‌لاتێن جیهانێ ڤه دگۆهێزیت.
ئه‌ڤرۆ، هه‌رهین محه‌مه‌د:
سترابێژێ گه‌نج هه‌وار بازرگان، د دیداره‌كێ دا بۆ رۆژناما ئه‌ڤرۆ دیاركر كو به‌ری هه‌یامه‌كێ وی دو كلیپ به‌لاڤ كرن، ئێك ژوان ب ناڤێ (هه‌بێ نه‌بێ) وسترانا دویێ یا هونه‌رمه‌ند یونس خه‌تات ب ناڤێ غه‌ریب قالدیم.
هه‌روه‌سا گۆت: گه‌له‌ك ستران من ل به‌ر ده‌ست هه‌نه و یێن كوردی و توركۆمانی و ل نێزیك دێ هه‌موویان به‌لاڤ كه‌م و گه‌له‌ك حه‌زدكه‌م سترانه‌كا كرمانجی چێكه‌م و هه‌كه چێكه‌م ژی دێ سترانه‌كا هونه‌رمه‌ندێ نه مر ته‌حسین تاهای نوو كه‌م، ئه‌و ژی سترانا (من تۆ نه‌ڤێی) و هه‌ر هونه‌رمه‌نده‌ك ب هونه‌رێ خوه په‌یاما خوه دگه‌هینت و ئه‌ز ژی ب سترانگۆتنێ په‌یاما خوه دگه‌هینم چ ب سترانێن كوری بیت، یان توركۆمانی بیت و گه‌له‌ك حه‌زژ سترانێن نشتیمان په‌روه‌ری دكه‌م و ب ئاخا خوه و ب هه‌ولێرێ و كوردستانێ ب گشتی بێژم و پاشان حه‌ز ژ سترانێن ئه‌ڤینی دكه‌م، چونكو و ئه‌ڤینی تشته‌كێ گرنگه دژیانێ و ئه‌و كه‌سێ ئه‌ڤینی نه كربیت ب مرۆڤ نادانم ب تایبه‌تی هونه‌رمه‌ند و دشێم هه‌تا شه‌ش ده‌مژمێران پتر سترانا بێژم و نه راوه‌ستم و نوكه ژی دچمه ئاهه‌نگ و شه‌هیانان
دهۆك، له‌زگین جۆقی:
كچه‌كا كوردا ئێزدی ب ناڤێ (هویدا) كو ل چه‌ند رۆژێن بۆری ژ ده‌ستێن تیرۆرستێن داعش رزگاربوویه، هه‌موو ئێش و ئازار و نه‌خۆشیێن خوه ب چێكرنا كه‌ڤاله‌كی دیاركرن و ئه‌و كه‌ڤال ل سه‌نته‌ره‌كی هاته نیشادان.
ناڤهاتیێ گۆت: ئه‌و ئێش و ئازار و نه‌خۆشیێن من و خێزانا من ل بن ده‌ستێن داعش دیتین من هه‌موو كرنه كه‌ڤاله‌ك و نیشادان، هه‌ر چه‌نده ئه‌وا وان ب سه‌رێ مه ئینای گه‌له‌كا مه‌زن بوو ب كه‌ڤاله‌كی و ب هزار كه‌ڤالان ده‌ڕبرین ژێ ناهێته كرن، لێ من ڤیا ب رێیا ڤی كه‌ڤالی هه‌تا راده‌كی خه‌م و ژانێن خوه ژبیر ببه‌م و ئه‌و كه‌ڤال ل ب هه‌لكه‌فتا كاره‌ساتا شنگارێ هاته نیشادان.
ئه‌ڤرۆ:
دوهی 1/8/2021 مه‌حموود محه‌مه‌د ئه‌ندامێ مه‌كته‌با سیاسی و به‌رپرسێ ده‌زگه‌هێ ره‌وشه‌نبیری و راگه‌هاندنێ یێ پارتی دیموكراتی كوردستان، پێشوازی ل (ئه‌راكاوا میكیهیرۆ) كونسۆلێ وه‌لاتێ ژابۆنێ ل هه‌ولێرێ كر.
مه‌حموود محه‌مه‌د د وێ دیدارێ دا به‌حسێ راگه‌هاندنا پارتی و رۆلێ كه‌نالێن راگه‌هاندنێ یێن پارتی د گه‌هاندنا په‌یاما پارتی دیموكراتی كوردستان سه‌باره‌ت هه‌ر روودان و پێشهاته‌كێ و شێوێ كارێ ئۆرگانێن راگه‌هاندنا پارتی ب به‌راورد ل گه‌ل راگه‌هاندنا حزبێن سیاسی یێن دی و راگه‌هاندنا سه‌ربخوه كر.
ل دۆر رێككه‌فتنا ستراتیژی د ناڤبه‌را ئیراقێ و ئه‌مریكا دا و هه‌لویستێ پارتی دیموكراتی كوردستان، مه‌حموود محه‌مه‌د ئاماژه ب بۆچوونا فه‌رمی یا پارتی دیموكراتی كوردستان كر كو ب رێیا به‌یاننامه‌یه‌كا مه‌كته‌با سیاسی یا پارتی خوه‌شحالیا خوه دیاركر سه‌باره‌ت وێ رێَككه‌فتنێ چونكی ب دیتنا پارتی هێشتا گه‌فێن مه‌زن ل سه‌ر ئیراقێ یێن هه‌ین و ئه‌مریكا دشێت رۆله‌كێ مه‌زن هه‌بیت د هاریكاریا ئیراقێ داب ۆ به‌رهنگاریا وان گه‌فان، پاشی به‌حسێ ره‌وشا نوكه یا ئیراقێ و هه‌لبژارتنێن پێشوه‌خت یێن ئیراقێ كر و ئاماژه كر كو پارتی دیموكراتی كوردستان ل گه‌ل ئه‌نجامدانا وان هه‌لبژارتنان دایه و به‌رهه‌ڤیێن دروست یێن بۆ كرین، هه‌روه‌سا به‌حسێ هه‌لبژارتنێن جڤاتێن پارێزگه‌هێن ئیراقێ كر كو بریاره ل سالا داهاتی بهێنه ئه‌نجامدان.
ل درێژیا دانوستاندنێن د ناڤبه‌را هه‌ردولا، به‌حسێ خواستا چاره‌سه‌ركرنا كێشێن ئیراقێ ب گشتی و كێشا هه‌رێما كوردستانێ ب تایبه‌تی ژ لایێ حوكمه‌تێن ئیراقێ ڤه، كو ب درێژیا دیرۆكا دامه‌زراندنا ئیراقێ و پشتی نه‌ماما رژێما به‌عس ژی ئه‌و كێشه نه‌هاتینه چاره‌سه‌ركرن.
ئه‌ندامێ مه‌كته‌با سیاسی و به‌رپرسێ ده‌زگه‌هێ ره‌وشه‌نبیری و راگه‌هاندا پارتی ئاماژه ب پشكداریا سه‌ركردایه‌تیا سیاسی یا كوردستانێ و سه‌رۆك مه‌سعود بارزانی د دارێشتنا دستوورێ به‌رده‌وام یێ ئیراقێ ل سالا 2003 و بزاڤ و هه‌لویستێ پارتی دیموكراتی كوردستان كر سه‌باره‌ت چاره‌سه‌ركرنا كێشان د ناڤبه‌را به‌غدا و هه‌ولێرێ دا ب گۆره‌ی دستوورێ ئیراقێ و په‌یداكرنا ره‌وشه‌كا سیاسی بۆ ئیراقێ كو به‌رسڤا خواستێن ئیراقیان بیت و تێدا مافێن گه‌لێ كوردستانێ ژی د پاراستی بن.
نيشاندان