ئه‌ڤرۆ، هه‌رهین محه‌مه‌د:

سترانبێژێ‌ كوچكو دیوانا بیرهات گه‌رماڤی د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ به‌حسێ‌ ژیانا هونه‌رمه‌ند (محه‌مه‌د ته‌یب)ی دكه‌ت و گۆت:  ل سالا 1946 ژدایك بوویه‌ و هه‌موو ژیانا خوه‌ ته‌رخان كربوو بۆ مۆزیكێ‌ و ستران گۆتنێ‌ و ب سترانا (جانێ‌ سه‌میرا) و (ئه‌زدێ‌ چم ب خاترا ته‌) و (عه‌لو فاتمێ‌) و (هوین بخودێ‌ وێ‌ نه‌خوازن) و (توهاتی لێڤ شرینا من) و (بویكێ‌ ده‌لالێ‌) و (كوچه‌رێ‌)  پتریا سترانێن خوه‌ ب كوردینیێ‌ دگۆتن وه‌كو (بارزانی تو نامری تو ژ مرنێ‌ مه‌زنتری) و (هه‌ی وه‌لات وه‌لات) و ل سالا 2009 من محه‌مه‌د ته‌یب دیت و كه‌یفا وی گه‌له‌ك ب من هات كو سترانان وه‌كو سترانبێژ خه‌لیل باكوزی دبێژم و من گۆتێ‌ تو بۆچی ناهێ ئه‌ز و تو سترانان پێكڤه‌ بێژین گۆتی بلا من ل گه‌ل خوه‌ بره‌ ستودیویێ‌ و من و وی ستران پێكڤه‌ گۆتن و جاران ژی بوومه‌ كورس ل گه‌ل وی سترانێن خوه‌ دگۆتن و من ژی یێن خه‌لیل باكوزی دگۆتن.

بیرهاتی گۆت ژی: گه‌له‌ك سترانبێژێن گه‌نج سترانێن وی دبێژن و نوی دكه‌ن وی گه‌له‌ك كلیپ و به‌رهه‌م هه‌نه‌، به‌لێ‌ نه‌هاتینه‌ نووكرن و سترانێن وی نێزیكی ژ هه‌شت ئه‌لبۆما پتر ل ده‌ف منن و نه‌به‌لاڤ بووینه‌ و پاراستینه‌ و هنده‌ك ستران ژ وان من ل ستودیویێ‌ نوی كرینه‌ و من ژی ل گه‌ل گۆتینه‌ و من لبه‌ره‌ به‌رهه‌مه‌ك ژوان كو ژ هه‌شت تراكان پێك هاتیه‌ به‌لاڤ بكه‌م هه‌روه‌سان وی ژی ستران ل گه‌ل هونه‌رمه‌ند عیسا به‌رواری و محه‌مه‌د عارف جزیری و سه‌عید گاباری و ئه‌رده‌وان زاخۆیی گۆتینه‌ و دیسان محه‌مه‌د ته‌یبی گه‌له‌ك ئاهه‌نگ ل دهۆكێ‌ و ژده‌رڤه‌ی وه‌لاتی گێراینه‌ و خودانێ‌ تیپا دیلان بوو

ناڤهاتی ل دۆر نووترین ده‌نگوباسێن خوه‌ یێن هونه‌ری گۆت: دبه‌رنامێ‌ من دایه‌ و نوكه‌ ل سه‌ر كلیپه‌كا نوی كاردكه‌م كو ئه‌و ژی فلكلۆره‌ و ژڤانه‌ ل سه‌رێ‌ سالا نوی به‌لاڤ بكه‌م.

ئه‌ڤرۆ، زنار تۆڤی:

هونه‌رمه‌ند عه‌بدوللا سلۆپی، ئه‌ڤه‌ پتری 26 سالانه‌ ل وه‌لاتێ‌ به‌لجیكا دژیت، د دیداره‌كێ‌ دا بۆ رۆژناما ئه‌ڤرۆ دیار كر: ل سالا 1972 وی ده‌ست ب گۆتنا سترانان كریه‌ و هه‌تا نوكه‌ ب ره‌نگه‌كێ‌ به‌رده‌وام سترانان دبێژیت، بابێ‌ وی بره‌هیمێ‌ عه‌گید، ئێك ژ ده‌نگبێژێن ناڤدار بوویه‌ ل باكوورێ‌ كوردستانێ‌، وی هه‌موو سترانێن فولكلۆری بۆ خوه‌ ژ بابێ‌ خوه‌ گرتینه‌، دیسان بابێ‌ وی پشته‌ڤانی ل وی كرییه‌، كو ئه‌و ژی سترانان بێژیت، هه‌روه‌سا ئه‌و نه‌شێت ڤه‌گه‌ریته‌ وه‌لاتێ‌ خوه‌ و ئه‌و ژبه‌ر زۆلما ده‌وله‌تا تورك ژ باكۆرێ‌ كوردستانێ‌ ده‌ركه‌فتییه‌ چوویه‌ وه‌لاتێ‌ به‌لجیكا.

ناڤهاتی گۆت ژی: سلۆپیا تایبه‌تمه‌ندیا خوه‌ د وارێ‌ هونه‌ری و سترانگۆتنێ‌ دا هه‌یه‌، هه‌روه‌سا د نوكه‌ دا ئه‌ز گوهداریا سترانبێژێن گه‌نج دكه‌م، ل ده‌مێ‌ ئاهه‌نگ و داوه‌ت و هه‌لكه‌فتان، كو هنده‌ك ژ وان د پێنج خوله‌كان دا، حه‌فت سترانان د گوهۆرن، ئه‌ڤه‌ ژی كاره‌كێ‌ خرابه‌، ئه‌ڤه‌ نابیته‌ ستران گۆتن و ئه‌ڤه‌ زیانێ‌ دگه‌هیننه‌ سترانا كوردی و ئه‌ڤان جۆره‌ سترانبێژان سترانا كوردی خراب كر، دیسان ئه‌و ریتما سترانێن فولكلۆری ژی خراب دكه‌ن.

عه‌بدوللا هێشتا دبێژیت: ل سالێن هه‌شتێیان ل سه‌دێ‌ بوری من ده‌ست ب گۆتنا سترانێن داوه‌ت و دیلانان كریه‌ و ئه‌ز دچوومه‌ ده‌واتێن كوردان ل باكوورێ‌ كوردستانێ‌، دیسان ل ئورۆپا ژی ئه‌ز دچمه‌ ئاهه‌نگ و هه‌لكه‌فتێن كوردان، هه‌تا نوكه‌ من پتری 80 كاسێتان چێكرینه‌، لێ‌ من به‌لاڤ نه‌كرینه‌ و هه‌تا نوكه‌ هه‌موو ل ده‌ف من د پاراستینه‌، دیسان پتری هزار سترانان من گۆتینه‌ و گه‌له‌ك ژ وان سترانان ژ په‌یڤ و ئاوازێن من ب خوه‌نه‌، هه‌روه‌سا ئه‌ز ئامیرێ‌ سازبشێ‌ دژه‌نم و نكه‌ ژی هژماره‌كا كارێن نوو لبه‌ر ده‌ستێ‌ من هه‌نه‌، ئه‌ز حه‌ز ناكه‌م چ جاران كلیپان چێكه‌م، چونكی ئه‌ز حه‌ز ژ چێكرنا كلیپان ناكه‌م، هه‌ر چه‌نده‌ من پشكداری د گه‌له‌ك به‌رنامێن ته‌له‌ڤزیۆنی دا كریه‌.

ناڤهاتی ئه‌و چه‌ند ژی ئاشكرا كر: پرانیا سترانێن فولكلۆری هاتینه‌ خرابكرن و ب ره‌نگه‌كێ‌ نه‌باش ژ ئالیێ‌ سترانبێژێن گه‌نج ڤه‌ دهێنه‌ گۆتن و دیسان ئه‌ز گۆهداریا چو سترانبێژان ناكه‌م و كارتێكرنا چو سترانبێژان ژی ل سه‌ر من نه‌بوویه‌، ب تنێ‌ یا بابێ‌ من ل سه‌ر من بوویه‌، هه‌روه‌سا خه‌لكێ‌ جیهانێ‌ مفای ژ هونه‌ر و فولكلۆرێ‌ مه‌ دبینیت، لێ‌ ئه‌م ب خوه‌ مفای ژ هونه‌رێ‌ خوه‌ نابینین و ئه‌م دچین مۆزیكا توركی عه‌ره‌بی و فارسی دئێخینه‌ ناڤا هونه‌رێ‌ كوردی، ئه‌ڤه‌ ژی زیانه‌كا مه‌زن دگه‌هینیته‌ هونه‌ر و سترانا مه‌ یا كوردی، دیسان پرانیا سترانبێژێن توركی سترانێن مه‌ یێن فوكلۆری دزینه‌ و كرینه‌ توركی، هه‌روه‌سا ل سالا  1985 ئیبراهیم تاتلیسی سترانه‌كا كوردی كربوو توركی، من ژی ئه‌و سترانه‌ ل ده‌واته‌كێ‌ ب كوردی گۆت، پشتی ده‌مه‌كێ‌ كورت پۆلیس هاتن ئه‌ز گرتم و ئه‌ز گه‌له‌ك ئه‌شكه‌نجه‌دام و گۆت نابیت تو ڤێ‌ سترانێ‌ ب كوردی بێژی، من ژی گۆتێ‌ ئه‌ڤ سترانه‌ یا كوردی یه‌، لێ‌ وان قه‌بوول نه‌كر، مخابن مه‌ چو سازی نینن، كو هونه‌رێ‌ مه‌ بپارێزیت، به‌رگریێ‌ ژ مافێ‌ مه‌ بكه‌ت.

ئه‌ڤرۆ:

كه‌هی تیته‌ب، گه‌نجه‌كێ‌ دهۆكێ‌ یه‌، كارێ‌ وی چێكرنا كورته‌ فلمێن دیكیۆمه‌نتی یه‌، ل ڤێ‌ دووماهیێ‌ ب فلمه‌كێ‌ خوه‌ ل بن ناڤێ‌ (زارۆكینیا پشتی جه‌نگێ‌) پشكداری د به‌ریكانا كه‌نالێ‌ ئه‌لجه‌زیره‌ دیكیۆمێنتدا كریه‌، به‌رهه‌مێ‌ وی سه‌رهاتیا قوربانیه‌كی جه‌نگێ‌ و په‌نابه‌ر هه‌مبێز دكه‌ت.

پشتی ڤی به‌رهه‌می چه‌ندین قوناغ ده‌ربازكرین نوكه‌ گه‌هشتیه‌ هه‌ڤركیا 10 باشترین فلمێن به‌ریكانێ‌، و هه‌موو ژی ل كه‌نالێ‌ یوتیۆبی ل سه‌ر لینكێ‌ (     ) هاتیه‌ به‌لاڤكرن و هه‌كه‌ كورد پشته‌ڤانیێ‌ لێ‌ بكه‌ن دبیت ئه‌ڤ به‌رهه‌مه‌ بگه‌هیته‌ ئارمانجا خوه‌ و دڤێ‌ به‌ریكانێ‌ دا سه‌ربكه‌ڤیت، له‌ورا داخوازا هاریكاری و پشته‌ڤانیێ‌ بۆ ڤی گه‌نجی دهێته‌كرن.

كه‌هی ژ دایكبوویێ‌ سالا 1990یه‌، نوكه‌ قوتابیه‌ ل پشكا راگه‌هاندن و سینه‌مایێ‌ ل زانكۆیه‌كا وه‌لاتێ‌ توركیا.

دهۆك، شاكر ئه‌تروشی:

ناڤه‌ندا خانی یا ره‌وشه‌نبیری و راگه‌هاندنێ‌، ب به‌رهه‌ڤبوونا ئیحسان ئامێدی به‌رپرسێ‌ ناڤه‌ندێ‌، رۆژنامه‌ڤان به‌یار زاویته‌ی خه‌لاتكر، ئه‌و ژی ژبه‌ر وی رۆلێ‌ وی یێ‌ كارا ل رێڤه‌به‌ریا نیۆز رۆمێ‌ و خانی نیۆز، هه‌روه‌سا د پێگه‌هاندنا كارمه‌ندان دا.

به‌یار سالح نعمه‌ت، به‌رنیاس ب (به‌یارێ‌ زاویته‌یی) ژ دایكبوویێ‌ سالا (1973) یه‌ ل دهۆكێ‌، ل سالا 2000 ل رادیۆیا دهۆك و ل 2001 ل ته‌له‌فزیۆنا دهۆك كارێ‌ كارێ‌ راگه‌هاندنێ‌ كریه‌، ل  200 په‌یوه‌ندی ب رۆژناما ئه‌ڤرۆ كریه‌ و د ماوێ‌ كاركرنێ‌ دا ل رۆژنامێ‌ سه‌رپه‌رشتیا چه‌ندین به‌رپه‌ران كریه‌، ژوانا ( نافخوه‌، بۆچوون، هونه‌ری، هه‌مه‌ره‌نگێ‌ جیهانی، ئه‌ده‌بی) ل 1/10/2020 بوویه‌ سه‌رنڤیسكارێ‌ مالپه‌رێ‌ خانی نیۆز، به‌ری دو حه‌فتیان بۆ رادیۆیا دهۆك هاتیه‌ ڤه‌گوهاستن و نوكه‌ وه‌ك نڤیسه‌رێ‌ ده‌نگوباسان به‌رده‌وامیێ‌ بكارێ‌ خوه‌ دده‌ت.

دهۆك، شاكر ئه‌تروشی:

ده‌مێ‌ شه‌ڕێ‌ داعش ده‌ستپێكری هژماره‌كا خێزانان ل دهۆكێ‌ خوارن ل مالێن خوه‌ چێدكرن و بۆ پێشمه‌رگه‌ی د برنه‌ به‌رۆكێن شه‌ری، پشتی بۆرینا چه‌ند حه‌فتیان ئه‌و هژمار زێده‌تر لێ‌ هات و ئێدی وه‌ك گرۆپه‌كێ‌ خۆبه‌خش كاركرن و هه‌تا نوكه‌ ژی د به‌رده‌وامن.

مریه‌م حاجی ئوسمان، ژنه‌كا (56) سالی یه‌، ئێك ژ ئه‌ندامێن وی گرۆپی یه‌، د دیداره‌كێ‌ دا بۆ رۆژناما ئه‌ڤرۆ دبێژیت: ده‌مێ‌ ل سالا 2014 شه‌ڕێ‌ داعش ده‌ستپێكری و باب و برایێن مه‌ یێن پێشمه‌رگه‌ چووینه‌ شه‌ڕی و نه‌هێلاین نێزیكی ئاخا مه‌ بن، ل وی ده‌می مه‌ هزر دوێ‌ چه‌ندێ‌ دا كر ئه‌م پشته‌ڤانیێ‌ ل پێشمه‌رگه‌ی بكه‌ین، له‌ورا هه‌ر ل رۆژێن ئێكێ‌ مه‌ خوارن وه‌ك ترشك و ئیپراخ ل مالا خوه‌ چێكرن و هنارته‌ سه‌نگه‌رێن شه‌ڕی، پشتی ده‌مه‌كی گه‌له‌ك و كچ و ژنێن دی ژی ئه‌ڤ كاره‌ كرن و ئێدی هژمارا مه‌ زێده‌بوون و خانم (فائیزا سه‌لیم) ئه‌م هه‌موو وه‌ك گرۆپه‌كێ‌ خۆبه‌خش كومكرین و ئه‌و سه‌په‌رشتیا كارێ‌ مه‌ دكه‌ت.

هێشتا گۆت: هه‌تا نوكه‌ گرۆپێ‌ مه‌ (674) جاران سه‌ره‌دانا سه‌نگه‌رێن پێشمه‌رگه‌ی كرینه‌ ل هه‌موو میحوه‌ران و هه‌ر جاره‌كێ‌ بۆ (600) هه‌تا هزار كه‌سان مه‌ خوارن برینه‌ و ئه‌م ڤێ‌ چه‌ندێ‌ ب ئه‌ركێ‌ خوه‌ دزانین و چو منه‌تان ل برایێن خوه‌ یێن پێشمه‌رگه‌ی ناكه‌ین و ئه‌م هه‌موو قه‌ردارێن واینه‌ـ بۆ زانین ئه‌و خوارنێن مه‌ دبرن پتریا وان ئه‌ندامێن گرۆپی ئه‌رزاق ژ كیستێ‌ خوه‌ دكرین و هنده‌ك جاران ژی خێرخوازان بۆمه‌ دئینان، له‌ورا وه‌ك رێزگرتن بۆ وان خانمان دێ‌ گه‌له‌ك باش بیت خانیه‌ك بۆ هاتبا دابینكرن دا پتر كارێ‌ مه‌ خورتر لێ‌ هێت، هه‌روه‌سا وه‌كو پێشنیاز هه‌كه‌ مووچه‌ك ژی هه‌تا پاره‌كێ‌ كێم ژی بیت بۆ ئه‌ندامێن گرۆپی بهێته‌ دان دێ‌ بیته‌ پالده‌ره‌ك كو ئه‌و هه‌ست ب وێ‌ چه‌ندێ‌ بكه‌ن وان كو نه‌هاتینه‌ ژبیركرن.

دهۆك، هه‌رهین محه‌مه‌د:

به‌سنا خه‌لیل، كچه‌كا ده‌ست ره‌نگینا باژێرێ‌ دهۆكێ‌ یه‌، ئه‌ڤه‌ بۆ ده‌مێ‌ چه‌ندین سالایه‌ كارێ‌ ده‌ستی دكه‌ت، د دیداره‌كێ‌ دا بۆ رۆژناما ئه‌ڤرۆ گۆت: ئه‌ڤه‌ بۆ ده‌مێ‌ هه‌شت سالایه‌ كارێ‌ ده‌ستی دكه‌م و پتریا كارێن من ب گولا ڤه‌ دگرێداینه‌، ئانكو ب گولا چێدكه‌م و دیسان ب سوفی شالا و مه‌دالێن تررمبێلان و رستك و بازنكێن ژنان چێدكه‌م.

ناڤهاتیێ‌ گۆت: بۆ هه‌ركاره‌كی دو هه‌تا سێ‌ رۆژان ل سه‌ر كاردكه‌م گه‌له‌ك ب كارێ‌ خوه‌ یا كه‌یفخۆشم، چونكو حه‌زا من ل سه‌ر هه‌یه‌   و هه‌موو هزر و حه‌زێن خوه‌ من بۆ كارێن ده‌ستی مه‌زاختی نه‌ و دبه‌رنێ‌ من من دایه‌ ل ده‌مێ‌ بهێت دا ئه‌ز ژی پێشانگه‌هه‌كێ‌ بۆ كچ و ژنێن به‌هره‌دار ڤه‌كه‌م.

زاخۆ، عه‌لی حاجی:

ئه‌كته‌را گه‌نج (تابان خه‌لیل) كو خه‌لكا پارێزگه‌ها سلێمانیێ‌ یه‌، د دیداره‌كێ‌ دا بۆ رۆژناما ئه‌ڤرۆ دیاركر كو ده‌ستپێكا وێ‌ یا كارێ‌ ئه‌كته‌ریێ‌ شیا پێنگاڤێن باش پاڤێژیت، لێ‌ خواندنا وێ‌ بۆ ئه‌گه‌ر بۆ ده‌مه‌كی ژ كارێ‌ ئه‌كته‌ریێ‌ دوور بكه‌ڤیت

تابانێ‌ گۆت: ل سالا 2018 بۆ جارا ئێكێ‌ من ده‌ست ب كارێ‌ ئه‌كته‌ریێ‌ كر ل گه‌ل گرۆپه‌كی، هه‌ر ل گه‌ل وی گرۆپی رابووین ب چێكرنا كورته‌ فلمه‌كێ‌  ب ناڤێ‌ رۆزا كو د ڤیسته‌ڤاله‌كێ‌ دا هاته‌ نیشادان و چه‌ندین خه‌لات وه‌رگرتن، پشتی وی كاری من پشكداری د كورته‌ فلمه‌كێ‌ دی دا كر بناڤێ‌ ئاوازا بێ‌ دووماهی و ل چو كاره‌كێ‌ كر یا په‌شیمان نینم، ژبه‌ركو هه‌ر كاره‌كێ‌ پشكدار ببام ژمن باش هزرێن خوه‌ تێدا دكرن ژنوو پشكدار دبووم، و نوكه‌ مژوولی خواندنێ‌ مه‌ د بۆارێ‌ راگه‌هاندنێ‌ دا و وێ‌ چه‌ندێ‌ وه‌كری یه‌ ژ ئه‌كته‌ریێ‌ دوور بكه‌ڤم و هه‌كه‌ ده‌لیڤه‌ هه‌بیت دێ‌ ده‌ست بكاری كه‌م د بۆارێ‌ راگه‌هاندنێ‌ و سینه‌مایی دا ژبه‌ركو نوكه‌ من حه‌زه‌كا زێده‌ ل سه‌ر وی كاری هه‌یه‌

دهۆك شاكر ئه‌تروشی:

هونه‌رمه‌ند مه‌ئمون دۆسكی، د دیداره‌كێ‌ دا بۆ رۆژناما ئه‌ڤرۆ دیاركر، كو ده‌مێ‌ ل سالا 1995 ئه‌و هاتیه‌ دناڤ بۆارێ‌ هونه‌ری دا په‌یڤ و ئاواز بۆ سترانبێژان چێدكرن، هنده‌ك جاران ب كارێ‌ ده‌رهێنانا كلیپێن وان رادبوو، لێ‌ ئه‌ڤه‌ ده‌مه‌كه‌ وه‌ك ئه‌كته‌ر خوه‌ دده‌ته‌ نیاسین و ئه‌و دبێژیت ئه‌كته‌ری بۆمن خۆشتره‌.

ناڤهاتی گۆت: ستران داینه‌ گه‌له‌ك سترانبێژان هنده‌كان په‌یڤ و ئاواز، هنده‌كان ژی به‌س په‌یڤ، هنده‌كێن دی ژ به‌س ئاواز، ژوانا فه‌رسه‌ت حسێن، دلنیا قه‌ره‌داغی، سه‌میر عه‌بدوللا و ئیسماعیل سیاری و گه‌له‌كێن دی، لێ‌ لڤێ‌ دووماهیێ‌ من شیانێن خوه‌ دبۆارێ‌ ئه‌كته‌ریێ‌ ژی دا دیتن و وه‌ك ئه‌كته‌ر و رێڤه‌به‌رێ‌ رۆناهیێ‌ پشكداری د زنجیره‌ دراما (ته‌حل و شیرین) دا كر، هه‌روه‌سا درامایه‌كا دی ب ناڤێ‌ (ئاخ و تاخ) كو هێشتا ئه‌و نه‌هاتیه‌ نیشادان ئه‌ز دوێ‌ ژی پشكداربوویمه‌، و نوكه‌ مژوولی نڤیسینا چه‌ند سینابۆیامه‌ بۆ هنده‌ك خه‌له‌كێن درامایه‌كێ‌ و كاركرن وه‌ك ئه‌كته‌ر بۆ من خۆشتره‌.

مه‌ئمون حه‌جی محه‌مه‌د ئه‌مین، به‌رنیاس ب مه‌ئمون دۆسكی، ژ دایكبوویێ‌ سالا 1976 یه‌، نوكه‌ ل دهۆكێ‌ دژیت.

دهۆك، زنار تۆڤی:

سه‌لاح عه‌بدولكه‌ریم محه‌مه‌د، یێ‌ ناسیار ب سه‌لاح گۆلی، ل سالا 1982 ل ناحیا باتیفا سه‌ر ب قه‌زا زاخۆ ڤه‌ ژ دایكبوویه‌، د دیداره‌كێ‌ دا بۆ رۆژناما ئه‌ڤرۆ گۆت: ژ زارۆكاتییا خوه‌ من ده‌ست ب هنده‌ك كارێن جۆدا كریه‌، و هه‌تا نوكه‌ یێ‌ به‌رده‌وامم، ژ وان ژی گرتنا ترۆمبێلا بیكابێ‌ و پالدانا ترۆمبێل مه‌زن و بارهه‌لگران و دیسان ترۆمبێلێن بچووك ژی من راوه‌ستاندینه‌، بۆ پاشه‌رۆژی ژی من ل به‌ره‌ چه‌ندین كارێن دی ئه‌نجام بده‌م.

ناڤهاتی گۆت: هه‌ر د زارۆكاتییا خوه‌ دا من دزانی من هێزه‌كا تایبه‌ت هه‌یه‌ و گه‌له‌ك جاران ده‌مێ‌ من ل گه‌ل هه‌ڤالێن خوه‌، خوه‌ دئێخسته‌ ئاڤێ‌، پتری پازده‌ هه‌ڤالان داهێن من هاڤێژنه‌ د ئاڤێ‌ دا، لێ‌ من ده‌ستێ‌ خوه‌ دهاڤێته‌ قۆرمه‌كێ‌ یان تایێ‌ داره‌كێ‌، هه‌موو نه‌ دشیان ده‌ستێ‌ من ژ وی داری ڤه‌كه‌ن و من بهاڤێژنه‌ د ئاڤێ‌ دا، پشتی هنگی بۆ من شاره‌زایه‌كا باش چێبوو، من د هنده‌ك واران دا كار و من هنده‌ك لڤێنێن تایبه‌ت دكرن، هه‌تا نوكه‌ من شییایه‌ كارێن باش ئه‌نجام بده‌م، لێ‌ مخابن ژ ئالیێ‌ مادی ڤه‌ هه‌تا نوكه‌ كه‌سێ‌ هاریكاریا من نه‌كرییه‌، ئه‌وێن گۆتین دێ‌ هاریكارییا ته‌ ژی كه‌ین، وان ژی چو نه‌كریه‌، لێ‌ ده‌مێ‌ ئه‌ز د چمه‌ جهه‌كێ‌ بۆ برێڤه‌برنا كارێن خوه‌، ئه‌و كارمه‌ندێن ل وی جهی كار دكه‌ن، رێزه‌كا تایبه‌ت ل من دگرن، ب تایبه‌تی ژی خه‌لكێ‌ باتیفا رێزه‌كا تایبه‌ت ل من دگرن، من ل به‌ره‌ بچمه‌ فرۆكخانا هه‌ولێرێ‌ یا نێڤده‌وله‌تی و ل وێرێ‌ فرۆكه‌كێ‌ پالده‌م ، هه‌روه‌سا من ل به‌ره‌ هژماره‌كا ترۆمبێلان پێكڤه‌ پالده‌م، هه‌ر ژ سالا 2004 هه‌تا نوكه‌ من چه‌ندین ترۆمبێلێن بارهه‌لگر و ترۆمبێلێن دی كێشاینه‌ و پالداینه‌، دیسان من ترۆمبێله‌كا 28 ته‌نی یا سه‌ربازی و ل گه‌ل سێ‌ ترۆمبێلێن دی كو كێشا وان دگه‌هشته‌ 66 ته‌نان پێكڤه‌ پالداینه‌.