ڤیلاده‌میر پوتین سه‌رۆكێ روسیا راگه‌هاند كو مخابن ژ به‌ر ره‌وشا سیاسی یا ناڤخوه‌یی یا ئه‌مریكا چه‌ند سالن كو به‌رپرسێن ئه‌مریكا ب ره‌نگه‌كێ جودا سه‌ره‌ده‌ریێ ل گه‌ل روودانێن ل جیهانێ دكه‌ن ب تایبه‌تی ژی په‌یوه‌ندیێن روسیا و ئه‌مریكا نها باش نینن و گۆت: (دڤێت به‌رپرسێن ئه‌مریكا راستیا نها ل جیهانێ قه‌بوول بكه‌ن، گه‌له‌ك مه‌ترسی ل سه‌ر جیهانێ هه‌نه ب تایبه‌تی ژی بابه‌تێ چه‌كێن پێشكه‌فتی و دڤێت روسیا و ئه‌مریكا پێكڤه كار بۆ هندێ بكه‌ن دا چه‌كێن پێشكه‌فتی نه‌بنه مه‌ترسی ل سه‌ر جیهانێ).
سه‌رۆكێ روسیا ئه‌و یه‌ك ژی دیار كر كو دڤێت په‌یوه‌ندیێن روسیا و ئه‌مریكا ئاسایی ببن دا ئه‌و یه‌ك كارتێكرنا خوه ل جیهانێ ژی بكه‌ت، چونكو نها گه‌له‌ك ئاریشه ل جیهانێ هه‌نه كو دڤێت بهێنه چاره‌سه‌ركرن، لێ مخابن به‌رپرسێن ئه‌مریكا بابه‌تێ په‌یوه‌ندیێن ل گه‌ل روسیا بۆ مه‌ره‌مێن خوه یێن سیاسی بكار ئینان و ژ به‌ر هندێ ژی هه‌تا نها كار بۆ چاره‌سه‌ركرنا گه‌له‌ك ئالۆزیان نه‌هاتیه كرن.
سه‌باره‌ت ب ئالۆزیێن ل گه‌ل ئوكرانیا ژی پوتینی راگه‌هاند كو دڤێت ئه‌مریكا و وه‌لاتێن ئێكه‌تیا ئورۆپا ده‌ستێوه‌ردانێ د كاروبارێن ناڤخوه‌یی یێ ئوكرانیا و وه‌لاتێن دی یێن قه‌فقاسیا دا نه‌كه‌ن، چونكو هه‌ر مه‌ترسیه‌ك ل سه‌ر ئاسایشا نشتیمانی یا روسیا دروست ببیت دێ روسیا خوه‌دان هه‌لویست بیت، ژ به‌ر هندێ ژی مه گه‌له‌ك جاران دیار كریه كو دڤێت ئه‌مریكا و وه‌لاتێن ئێكه‌تیا ئورۆپا كار بۆ ئارامیێ بكه‌ن نه كو ببنه پشكه‌ك ژ ئالۆزیان و گۆت: (مه ده‌ست ب قۆناغه‌كا نوو ل گه‌ل ئوكرانیا كریه و دێ په‌یوه‌ندیێن خوه ل گه‌ل ئوكرانیا باشتر لێ كه‌ین و دڤێت وه‌لاتێن دی ژی هاریكار بن و نه‌بنه ئه‌گه‌رێ ئالۆزیان).
نيشاندان