قائید میرۆ:
گوره‌ی قانوونا چاكسازی دێ پێداچوون ب ده‌رمالێ فه‌رمانبه‌رێن حوكمه‌تا هه‌رێما كوردستانێ بهێته‌كرن و مه‌ترسیا بڕینا 150 هزار دینارێن مامۆستا هه‌یه، ئه‌ندامه‌كا لیژنا په‌روه‌ردێ ژی ئاشكراكر، راسته پێداچوون دێ ب ده‌رماله‌یێن فه‌رمانبه‌ران و مامۆستاژی هێته‌كرن، به‌لێ هێشتا دیارنینه دێ ده‌رمالێ وان هێته كێمكرن یانژی وه‌ك خۆ بمینیت.
ژێده‌ره‌كێ ئاگه‌هدار ل وه‌زاره‌تا په‌روه‌ردێ بۆ رۆژناما ئه‌ڤرۆ دیاركر” به‌ری چه‌ند سالان حوكمه‌تا عێراقێ ده‌رماله‌یه‌كێ 150 هزار دیناری بۆ مامۆستا مه‌زاخت و پشتی بزاڤێن زۆر یێن مامۆستایێن كوردستانێ حوكمه‌تا هه‌رێما كوردستانێ ژی بڕیاردا ده‌رمالێ 150 هزار دیناری بۆ مامۆستا بهێته مه‌زاختن، به‌لێ ئه‌ف ده‌رماله ب مه‌رج هاتبو هاتیه مه‌زاختن، كو هه‌ر مامۆستایه‌كێ حه‌فتیانه 24 حسه هه‌بن دێ ده‌رماله‌ی وه‌ربگرن به‌رۆڤاژی مامۆستایێن وانه‌یێن وان د حه‌فتیه‌كێ دا كێمتربن ل 24 حسا مفادار نابن، له‌وڕا نوكه د چوارچوڤێ پێداچوونا ده‌رمالێ فه‌رمانبه‌ران مه‌ترسی هه‌یه ئه‌و 150 هزار دینارێن مامۆستاژی بهێنه بڕین.
حه‌سیبه گه‌ردی، ئه‌نداما لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ گۆت” راسته دێ پێداچوون ب ده‌رمالێ فه‌رمانبه‌راندا هێته‌كرن و مامۆستاژی دێ ڤه‌گریت، به‌لێ هێشتا دیار نینه دێ چو ده‌رماله‌ك هێته بڕین، ئه‌و ده‌رماله‌یێن ب قانوون هاتینه گرێدان ناهێنه بڕین وه‌كی مه‌زاختنا كریا ڤه‌گوهاستنێ یانژی دبێژنێ جهێ جوگرافی، هه‌روه‌سا ئه‌و 100 هزار دینارێن هه‌مبه‌ر مه‌ترسیێن ته‌باشیری بۆ مامۆستا دهێته مه‌زاختن، ئه‌م وه‌كی په‌رله‌مان و لیژنا په‌روه‌ردێ بتایبه‌ت دێ به‌ڕه‌ڤانیێ ل ته‌خا مامۆستا كه‌ین و دگه‌ل بڕینا چو ده‌رماله‌یه‌كێ قانوونی نینه، هه‌گه‌ر مافێ مامۆستای بیت.
لدۆر بڕینا ده‌رمالێ 150 هزار دیناری ئه‌ڤێ ئه‌نداما لیژنا په‌روه‌ردێ ئاشكراكر” ئه‌م دگه‌ل راستڤه‌كرنا ده‌رمالێ مامۆستا و فه‌رمانبه‌رانین، به‌لێ ب مه‌رجه‌كی مامۆستایێن هه‌ژی ده‌رمالێ وانا نه‌هێته بڕین، چونكه مه دڤێت ئێكسانی و عه‌داله‌ت هه‌بیت و گه‌نده‌لی نه‌مینیت، ئه‌و مامۆستایێن حه‌فتیانه 24 حسه هه‌ی نابیت ده‌رمالێ وان بهێته بڕین و دێ به‌ڕه‌ڤانیێ ژێكه‌ین، به‌لێ مامۆستایێن پشكا وانێن وان نه‌گه‌هنه 24 حسا نابیت مفاداربن ل ده‌رمالێ 150 هزار دیناری، چونكه بۆچی هنده‌ك مامۆستا لسه‌ر حسابا هنده‌كێن دی مفادارببن.
حه‌سیبه گه‌ردی دبێژیت” پڕۆژه قانوونا په‌روه‌ردێ ژلایێ وه‌زاره‌تا په‌روه‌ردێ پێشكه‌شی سه‌رۆكایه‌تیا جڤاتا وه‌زیران هاتیه‌كرن و ئه‌م چاڤه‌ڕێ دكه‌ین بگه‌هیته په‌رله‌مانی،چونكه ئه‌م دخوازین ب رێیا ئه‌ڤی پڕۆژه قانوونی مامف بۆ هه‌موو مامۆستایه‌كی بهێته ڤه‌گه‌ڕاندن و ده‌رماله و شایسته‌یێن مامۆستا وه‌كی خۆ ب قانوونی بهێنه مه‌زاختن، هه‌روه‌سا ده‌رمالێ ناڤونیشانێن زانستی بۆ مامۆستا بهێته گرێدان، بتایبه‌تی ئه‌و مامۆستایێن باوه‌رنامه‌یێن بلند بده‌ستڤه ئینای، چونكه ئه‌م باوه‌رین ب ئه‌ڤی پڕۆژه‌ی دێ گۆهۆڕینێن به‌رچاف د كه‌رتێ په‌روه‌ردێ دا بهێنه‌كرن نه‌خاسمه پرسا مووچه و ده‌رمالێ مامۆستا بهێته رێكخستن و جێهگیركرن و مافێن وانا د پارستی بن.
نيشاندان