ھەولێر، قائید میرۆ

لھەرێما کوردستانێ ٣٠ زانکۆیێن ئەھلی و سەر ب حوکمەتێ ڤە ھەنە و بەردەوام گازندە ل ئاستێ ھندەک زانکۆیان دھێتەکرن جێگرێ سەرۆکێ لیژنا خواندنا بلند و ڤەکۆلینێن زانستی ژی ئاشکراکر، کو ئاستێ ھندەک زانکۆیان لاوازە و پێدڤیە کار بۆ بلندکرنا ئاستێ وان بھێتەکرن ھەروەسا دبێژیت، نابی تچو بڕیار بھێنەدان لدۆر چارەنڤیسێ خواندنا بلن دبێی بەرچاف گرتنا رەوشا خواندنێ و چارەنڤیسێ قوتابیێن زانکۆ پەیمانگەھان.

مسلم عەبدولا، جێگرێ سەرۆکێ لیژنا پەروەردە و خواندنا بلند لپەرلەمانێ کوردستانێ بۆ رۆژنانا ئەڤرۆ گۆت” لھەرێما کوردستانێ ٣٠ زانکۆیێن تایبەت و حوکمەتێ ھەنە و ھەمووژی گورەی قانوونێ کار دکەن و ل وەزارەتێ ئێک بڕیار و رێنمایێ بسەردا تێتە بجە ئینان، بەلێ مخابن ئاستێ ھندەک زانکۆیێن ھەرێما کوردستانێ وەکە پێدڤی نینە، ھژمارەک زانکۆیان سەربخۆیەک ھەیە و ژلایێ وەزارەتا خواندنا بلندڤە دەستھەلات ب ئەڤان زانکۆیان ھاتیەدان، مخابن سالا بۆری چەند بڕیارەک ھاتنە دەکرن بۆ ئەرزانکرنا کریا خواندنێ و ھژمارەک زانکۆیێن ئەھلی بەرھەڤنەبوون پێگیریێ ب بڕیارا حوکمەتا ھەرێما کوردستانێ بۆ دەوام و ئاستێ زانستی و مەعریفی ژی ھەمان بابەتە و زانکۆ ھەنە ئاستێ وان زۆرێ نزمە، بەلێ ئەڤە تشتەکێ ئاسایە، چونکە ل ھەموو جیھانێ وەسایە ئاستێ ھەموو زانکۆیان وەکی ئێک نینە، پەرلەمانێ کوردستانێ بەردەوام چاڤدێریا زانکۆیان دکەت و دوفچوون بۆ ئاریشەیێن زانکۆیان ھەنە، ھەروەسا مە ھەماھەنگیەکا باش دگەل ھەردو وەزارەتێن پەروەردە و خواندنا بلند ھەنە لدۆر پڕۆسا خواندنێ، بتایبەتی لسەردەمێ نوکەدا کۆرۆنا ھێشتا مەترسیە لسەر قوتابی و مامۆستا.

مسلم عەبدولا گۆتژی” بۆچوونا لیژنا خواندنا بلند ئەڤە پڕۆسا خواندنێ یا بەردەوامبیت ل زانکۆ پەیمانگەھان ھەتا وی دەمێ ئەم بزانین کۆرۆنا زێدەتر بوویە مەترسی، ل ھەموو زانکۆ پەیمانگەھان دەوام ب ھەردوو شێوەی ناڤا ھۆلێن خواندنێ و رێکێن ئەلکترۆنی یا بەردەوامە، رێنمایێن خۆپارێزیێ دھێنە بجە ئینان و قوتابی ھاتینە ئاگەھدارکرن، کو پێگیریێ ب خواندنێ بکەن بمەرجەکی رێنمایێن خۆپارێزیێ ژبیر نەکەن، راستە ڤایرۆسا کۆرۆنا یا گۆھۆڕی بەلاف بوویە و گەھشتیە ھەرێما کوردستانێ، بەلێ ئەم دگەل راگرتنا دەواما زانکۆ و پەروەردێ نینە و ھەر بڕیارەکا بھێتەدانژی پێدڤیە رەوشا خواندنا بەرچاف بھێتە وەرگرتن، داتایێن لدۆر رێز بەندیا زانکۆیان تێنە بەلافکرن ئەگەر ژلایێ وەزارەتا خواندنا بلندڤە نەھێتە سەرپەرشتی کرن ئەڤە چو راستی بونینە، نابیت ئاستێ زانستیێ زانکۆیان ژ لایێ تۆڕێن کۆمەلایەتی بھێتە ھەلسەنگاندن، راستە رێزبەندی بۆ ئاستێ زانکۆیان تێتەکرن، بەلێ ھەموو ھەلسەنگاندن فەرمیی نینە، چونکە پێدڤی ب ھندەک پیڤەران ھەیە بۆ زانینا ئاستێ مەعریفی و زانستیێ زانکۆیان، نابیت ھەرکەس و دەزگەھەک ب حەزا رابیت بڤی کاری، بێگومان زانکۆیێن باش مە ھەنە ل ھەرێما کوردستانێ و یێن خراپژی ھەنە، بەلێ تنێ خواندنا بلند ماف ھەیە رێزبەندیێ بۆ ئاستێ زانکۆیان بکەت.

ئەڤرۆ، ھەرھین محەمەد:

جیگرا رێڤەبەری سەرپەرشتی پەروەردێ دیارکرکو باخچە ل پارێزگەھا دھۆکێ و قەزایێن وێ دکێمن، لەورا وەزارەتێ پتر گرنگی دا یە  ئاڤاکرنا قوتابخانا و نوکە ل سەرانسەری دھۆکێ  حەفتێ و چار باخچێن حکومی و ئەھی ھەنە و یا گرنگە ل ھەر گەرەکەکێ باخچەک ھەبیت و دئەڤ سالە ژی دا دو کومەلگەھێن نەحکومی ھاتینە سزادان ژ ئەگەرێ نە پێگری کرن ب رێنمایێن پەروەردێ .

ناھیدا رەشید دۆسکی، جیگرا رێڤەبەری سەرپەرشتێ پەروەردێ بۆ بەرپەرێ پەروەردە و زانکۆ گۆت: نە ڤەکرنا باخچان دێ کارتێکرنا خوە یا نەرێنی ھەبیت، چونکو ئەڤ قوناغە دھێتە نیاسین قوناغەکا گەشەکرنێ و فێربوون و دورست بوون و پیکھات و تایبەتمەندی و کەسایەتی و پاشەرۆژا زارۆی و باخچە زارۆی بەرھەڤ دکەت بۆ قوناغا بنەرەتی  ب رێیا دەستڤە ئینانا شارەزایێن بیرکاری و زانستی و کومەلایەتی و ھونەری و ئینگلیزی و دبنە ئەگەرێ گەشەکرنا لایەنێ ھزری و ھەستی و کومەلایەتی ل دەڤ زارۆیی، چونکو ئێک ژبنەمایێن فێرکرن و فێربوونا زارۆیی ل باخچەی و راستەوخو پشت بەستنێ ل سەر ھزرێن و رێکێن سەرەدەری کرنا زارۆی دکەت ل گەل مادە و دەوروبەران بۆ فێرکرنێ و پشت بەستێ دکەت ب رێیا لیڤینێ و دەربرینا زمانی ھەروەسا زارۆ فێری ژینگەھا پەروەردەیی یا رێکخستی دبیت و فێری قانونێ دبیت و دەم بۆ دھێتە دانان و پتر حەزا وی بۆ یاریان بھێتە تێرکرن وەرگرتنا پەیڤێن نوی و دەولەمەندیا زمانی و فێکرنا رەوشتێن باش وەکو سلاف کرن و گیانێ ھاریکرنێ و لێبورینێ و لدووڤ ڤان کاودانێن ھەرێما کوردستانێ تێدا دەرباس دبن پاراستنا گیانێ زارۆیان ژ ھەرتشتەکێ دی گرنگترە.

ناڤھاتیێ گۆتژی: گومان تێدانینە ھەر ھەڤرکیەکا ئاڤەکەربیت  ھەبیت دجڤاکی دا دبیتە ئەگەرێ پێشکەفتنا جڤاکی و ئەڤ جوداھیە ھەڤرکیە ژی پشکەکە ژ ھەڤرکیا ئاڤاکەر و دێ پتر خزمەتا زارۆیی ھێتە کرن و دھندەک تشتان ژی جوداھی ھەیە دناڤبەرا باخچێن تایبەت و یێن حکومی بۆ نمونە ئاڤاھێن باخچێن حکومی ل سەر ھندەک پیڤەرو مەرجان دھێنە ئاڤاکرن و ھەموو لایەنا بخوە ڤە دگریت، چونکو بودجەیەکێ پەروەدەیی و فێرکرنێ دھێتە ئاڤاکرن و قوناغەکا ھەستیارە و ب رێکا یاری و پرۆگرامێن وان دھێنە گۆتن ژورێن وان ل سەر ھولانە و لدوڤ ستاندەرێن جیھانی نە و ل بەرچاڤ وەرگرتنا تیشکا رۆژێ بۆ ژورو لێناگەھێن وان و جھێن بھیژَن ڤەدانێ و ھەکە تەماشەی باخچێن ئەھلی بکەین پتریا وان دخانیا ڤە نە، چونکۆ وان چو رێکێن دی نین ژبلی کرێکرنا خانیا  و ئەو خانی ژی ژبۆ ئاکنجی بوونێ ھاتینە ئاڤاکرن .

زێدەتر گۆت: پارێزگەھا دھۆکێ ب ھەر نەە قەزا یێن خوە ڤە مە حەفتێ و چار باخچە ھەنە ، بەلێ دکێمن و ئەڤ ئەگەرە ژی بۆ وێ چەندێ دزڤریت کو خەلکێ مە کو چو گرنگی نە دا باخچێن زارۆیان و حکومەتا مە ژی نە یا نەچارە جھەکی ئاڤاکەت و ئەو جھەیێ ڤالا بیت، لەورا وەزارەتێ گرنگی ب قوناغێن دی یێن خاندنێ دا، بەلێ پتشی جڤاکێ مە ھشیار بووی ل سەر گرنگیا باخچان نوکە پتریا دایک و بابان زارۆیێ خوە فرێدکەنە باخچان و وەل حکومەتێ کریە پتر ھزرا خوە دئاڤاکرنا باخچان دا بکەن و ھەکە ئەڤ کاودانە نەبان دبیت حکومەتێ گەلەک باخچە ئاڤاکربان، چونکو ل ڤی دەمی پتریا زارۆیان حەزا چوونا باخچەی یا ھەی و یا پێدڤیە ل ھەر گەرەکەکێ باخچەک ھەبا ئاڤا کرن وەکو قوتابخانێن بنەرەتی گۆت: دئەڤ سالە دا دو کومەلگەە ھاتینە سزادان ئەو ژی قوناغا باخچەی و بنەرەت و ناڤنجی و ئامادەیی تێدا بون ب کوژمێ دەە ملیوون دیناران ھاتنە سزادان ژ ئەگەرێ نە پێگێری کرنا رێنمایێن پەروەردێ.

ئەڤرۆ، سالار محەمەد دۆسکی:

جێگرێ سەرۆکێ ئێکەتیا مامۆستایێن کوردستانێ دیارکر کو جارا دووێ یە کێر بەرامبەر مامۆستا دھێـتە بکارئینان، بۆ رێگرتن ل ئەڤان بوویەرێن نەخوش پرۆژە قانوونا پارێزبەندی یا مامۆستا ل پەرلەمانی یە و خواندنا ئێکێ بۆ ھاتیەکرن.

عەبدواحد حاجی جێگرێ سەرۆکێ ئێکەتیا مامۆستایێن کوردستانێ بۆ بەرپەرێ پەروەردە و زانکۆ ل رۆژناما ئەڤرۆ ئاشکراکر کو مامۆستایێ کێر ڤێ کەفتی ھاریکارێ ئامادەیا (زوزان) یا کوران بوو، موبایلا ژ قوتابی ھاتیە وەرگرتن کو نابیت ئەف ئامیرە ل قوتابخانێ بھێتە بکارئینان وەک سازیەکا پەروەردێ، مامۆستای گۆتیە قوتابی بابێ خوە بینە دا ئەف کارە دووبارە نەبیت و مامۆستایی چ توند و تیژی بەرامبەر قوتابی نەکریە و گەلەک ب رێکەکا جوان ل گەل قوتابی رەفتار کریە، ئینانا (موبایل، بوکس، کێرا) رەفتارێن نەقانوونی نە، قوتابی ل جھێ لێبورینێ ژ مامۆستای کێر بکارئینایە  و مامۆستا بریندار کریە و ئەو روودانا بەرامبەر مامۆستایێ ھەولێرێ ھاتیەکرن تاوانەکا مەزن و نەبتنێ بەرامبەر مامۆستایەکی بەلکو بەرامبەر ھەموو مامۆستایێن کوردستانێ، ب توندی ئەو کارێ ھاتیە شەرمزارکرن و ھەمان دەم راگەھاندنەک ھاتیە بەلاڤەکرن و دیڤچوونەکا ھویر ھاتیەکرن و دڤێت ئەو کەس ب توند بھێتە سزادان و پشتەڤانێن داخازیێن وی مامۆستاینە دچارچووڤێ قانوونێ دا.

عەبدوالواحد حاجی زێدەتر ژی گۆت: بەری دو سالان پروژە قانوونەک بناڤێ ( پارێزبەندی یا مامۆستان) بۆ پەرلەمانێ کوردستانێ وەک ئێکەتیا مامۆستایێن کوردستانێ بەرھەفکربوو کو ژ (٩) مادا پێک دھات وی دەمی مە پێشکێشی سەرۆکاتیا پەرلەمانێ کوردستانێ کر و خواندنا ئێکێ بۆ ھاتەکرن، بەلێ پشتی گوھورین ل پەرلەمانی ھاتینەکرن کار ل سەر وی پرۆژەی ھاتە راوستاندن، گرنگە کار ل سەر وی پرۆژە قانوونی بھێتەکرن، ئارمانجا ڤێ پرۆژە قانوونێ ئەو بوویە پرۆسێسا پەروەردێ ب شێوەکێ باش برێڤەبچیت و بەردەاومیێ بدەنە کارێ خوە، دیسا مافێ قوتابیان ژی بھێتە بەردەستکرن و نەبتنێ مافێ مامۆستا بوو بەلکو بۆ قوتابیان ژی بوویە، لێ مخابنی ڤە خولا پەرلەمانی ئەو پرۆژە قانوون نەئێخستە بەرنامێ کاری، رۆژێن بوری ژی مە دیفچوون ل سەر بابەتی کریە.

جێگرێ سەرۆکێ ئێکەتیا مامۆستایێن کوردستانێ زێدەتر ژی گۆت:  چنکو پرۆسێسا خواندنێ ل کوردستانێ ژ بەر ڤایرۆسێ کورونایێ ھاتبوو راوستاندن، توند و تیژی بەرامبەر مامۆستا یا کێم بوویە، ئەف حالەتێ ل ھەڤلێرێ ھاتیە روودان یا ب مەترسی بوو و دڤێت ئەم ھەمی کار بکەین کو رێک ل ئەڤان جورە روودانا بھێتەکرن.

ناڤبری گۆتژی: ب ھەموو جوران توند و تیژی بەرامبەر مامۆستا ھاتیەکرن چ ئاخفتنێن نەخوش یان لێدان بوویە و گەلەک جاران کەس و کارێن قوتابیان ھێرش کرینە مامۆستا و دیسا بکارئینانا کێرێ سالێن بوری ژی بەرامبەر مامۆستا ھاتبوو بکارئینان و ئەف سالە ژ نەڤەکرنا دەرگەھێن قوتابخانا ژ بەر پەژیکا کورونایێ توند و تیژی گەلەک یا کێم بوو و داخاز دکەین ھەر نەبیت و مامۆستا و قوتابی ب ھەڤرا وەک تەمامکەرێن ئێک ھەفکاربن بۆ بەردەوامی یا  پرۆسێسا خواندنێ.

ناڤبری گۆتژی: ھەموو وەلاتێن جیھانێ ب پرۆسێسا پەروەردێ پێش دکەڤن و پەروەردە ب مامۆستایەکێ خەمخور  و خودان ھزر و کەسایەتی برێڤە دچیت و دڤێت ھەموو ئالی ھەفکاربن چ پەروەردە یان وەزارەتا پەروەردێ و خواندنا بلند و رێکخراوێن مەدەنی ھەموو کار بکەن بۆ پاراستنا کەسایەتی یا مامۆستان و دیسا توند و تیژی بەرامبەر مامۆستا نەھێتەکرن .

عەبدوالواحد حاجی زێدەتر گۆت: ل سەر پرۆژە قانوونێ پێشتر ھاتیە بەرھەفکرن رۆژێن بوری مە جێگرێ سەرۆکێ پەرلەمانی دیتی یە و دووپاتی ل سەر وی پرۆژە قانوونێ ھاتیەکرن کو ئەف خولا پەرلەمانی کار بکەت ئەو پرۆژە قانوون بھێتە پەسەندکرن و مامۆستا ب سەرڤەرازی و دو دلی ئەرکێن خوە بجە بینن.