ئەڤرۆ، ئاکرێ:

د. سەباح محمود ئاغا زێباری، سەرۆکێ لێژنا تەندروستی ل پەرلەمانێ کوردستانێ د دیدارەکا تایبەت دا بۆ رۆژناما ئەڤرۆ دیار کر مە وەک فراکسیونا (پ.د.ک) ل پەرلەمانێ کوردستانێ و نڤێسنگەھێن پەرلەمانتار نەراوستیاینە بۆ گەھاندنا پرسێن ھاولاتیان ل دەڤەرا بەھدینا و تایبەت ئاکرێ و  بەردەڕەش بۆ لایەنێن پەیوەندیدار و گۆت:

پەرلەمانتار د. سەباح زێباری بۆ ئەڤرۆ دیار کر، وەکو سەرۆکێ لێژنا تەندروستی مە ھەولێن بەردەوام داینە بۆ گەھاندنا کێشەیێن ساخلەمیێ بۆ لایەنێن پەیوەندیدار، ل دەمێ پەتایا کورونا بەربەلاڤبووی ب ھەماھەنگی دگەل وەزارەتا تەندروستی و لایەنێن پەیوەندیدار تاقیگەھا پشکنینا کورونایی ل ئاکرێ دانین، تا رادەیەکی باش فشار ل سەر پارێزگەھا دھوکێ کێم کر و بۆ ھاریکار ژی بۆ پارێزگەھێ، ھەروەسا شیاین رەزامەندیا بوردێ  تەندروستی کوردستان ل ئاکرێ و زاخۆ ڤەکەین و نھا قوتابی ھاتینە وەرگرتن ل ئاکرێ و ئەڤە پێنگاڤەکا باشە بۆ بلندکرنا ئاستێ زانستی یێ پزیشکێن مە و پڕکرنا وێ ڤالاتیا ھەی ل دەوروبەران د بوارێ ساخلەمیێ دا.

ھەر ل سەر کورونایی ناڤبری گۆت “وەک دیار پێلەکا دی یا ھاتنا پەتایا کورونایی بەرەڤ مە دھێت، ژ بەر کو سنور دڤەکرینە و بازار ژی یێ ڤەکریە، ھەروەسا خەلکێ مە ژی پێگیر نیە ب رێنمایێن تەندروستی، لەوما داخازێ ژ خەلکی دکەم پابەندی رێنمایێن تەندروستی بن، ھەتا کو خوشتڤیێن خوە ژ دەست نەدەن، ھەروەسا دا دیارکرن حکومەتا ھەرێمێ رەوشا ئابووریا ھاوولاتیا بەرچاڤ دگریت و نەڤێت بارێ وان قورس بکەت و بازار و دامو دەزگەھێن میری بگریت، لێ ئەگەر ب ڤی شێوازی بیت چ چارەیێن دیتر نینن، ھیڤیدارم خەلکێ مە پابەندی رێنمایان بیت و دەمامک ئەرزانن بلا کەس نەبێژیت یا نەخوشە، بەرکەفتنا وێ گیان ژ دەستدانا وێ نەخوشترە، ژبلی سەنتەرێ پارێزگەھا دھوکێ دێ سەنتەرێ لێدانا ڤاکسینێ ل ئاکرێ ھێتە ڤەکرن.

سەبارەت رەوشا ئاکرێ و ھەر ھندەک ژ ئالیێ خوڤە ددەنە دیار کرن کو ئاکرێ ھاتیە ژبیرکرن و یا بێ خودانە؟

د. زێباری گۆت “ئەز نزانم بێ خودان، یان ھاتیە  ژبیرکرن، ب راستی ئەڤ ئاخفتنە یا بوویە کلتور و نھا بچیە دھۆکی دێ  بێژن دھوک یا بێ خودانە، سلیمانییەک ژی  دبێژیت ھەمی ھەولێرە ئامیدیەک ژی دێ وەبێژیت؛ ئەرێ بێ خودانی یان ژبیرکرن یەعنی چ بۆ نموونە ھەر سێ نوونەراتیا ھەرسێ دەزگەھێن دەستھەلاتێ ( دادگەە و نڤیسنگەھا پەرلەمانی وحکومەت) یێ کارێ خو دکەن و ئاسایش یا بەرقەرارە و حزب و پەرلەمانتار و ئەندامێن ئەنجوومەنێ پارێزگەھێ ھەمی یێن کارێ خو دکەن، ئەز نزانم ژ چ روویەکی ڤە ھاتیە ژبیرکرن؛ دیارە خەلک چاڤدێریا راگەھاندنێ ناکەن و ب تنێ د ھەیڤا کانونا دویێ یا شوباتێ دا سێ وەزیرێن حکومەتا ھەرێما کوردستانێ سەردانا ئاکرێ و بەردەرەش کریە و شاندەکێ بلندێ سەرۆکاتیا پەرلەمانێ کوردستانێ سەردانا ئاکرێ و بەردەرەش کریە و ھەمی گلەوگازندەیێن خەلکی گەھاندینە لایەنێن پەیوەندیدار. رۆژانە دووڤچوونێ ل سەر کاروبارێن ئاکرێ دکەین، ل ھەیڤا ٣ / ٢٠١٩ مە کونفرانسەک ئەنجامدا ل سەر ڤەژاندنا ئاکرێ و زۆرینەیا لایەنێن پەیوەندیدار ئامادەبوون و راسپاردەیێن کونفرانسێ ددەنە ھەرسێ سەرۆکاتیا، بیرا مە دھێت جارا تنێ رادیویەک ھەبوو یان ھەیڤێ جارەکی دا رۆژنامەک ھێتە دەڤەرێ شوکر نھا سەدەھان کەنالێن گەھاندنێ یێن پەیدابووی، سوشیال میدیا تنێ تێرێ ھەموو یێ ھەیە.

ودرێژە ب ئاخفتنێن خو دان وگوت” ژمارە و پیڤەر راستیا ڤان ئاخفتنا دیاردکەن، بەری سەرھڵدانی ل ئاکرێ وبەردەرەش چار ئامادەیی ھەبوون نھا ٧٠ ئامادەیی یێن ھەی دوو پەیمانگە و سێ کولیژ و بوردێ تەندروستی ئەڤ ژلایێ زانستی ڤە نەخوشخانا گولان دەستکەفتەکا زۆر مەزنە سنورێ شارەوانیا ئاکرێ بەری سەرھلدانی ئێک کیلومەتر و نیڤ بوو نھا ١١٣ کم دووجایە ھژمارا دانیشتوانا  ٧٠ ھەزار کەس بوون نھا تنێ ئاکرێ ١٨٠ ھەزار کەسە، بەری نوکە ھەمی دام و دەزگەھێن ئاکرێ د قشلێ دابوون و نھا ٥٦ رێڤەبەری و فەرمانگەە ل ئاکرێ ھەنە و پێنگاڤێن باشتر ب رێڤەنە و کارێن جدی ل سەر دھێنە کرن.

ھەروەسا ئاماژە ب گرنگیا تەمام بوونا ھێلا ئاڤا ئاکرێ قەندیل کر و گۆت” حکومەت ل سەر خەتە بۆ چارەسەرکرنا ڤی پڕوژێ ستراتیژی لێ کێشا مەزن یا حکومەتێ نھا کورونایە وبودجەیە وتوپباران ژی زێدەبووە داخازێ ل خەلکی خو دکەین سەبر وتەحەمول ھەبیت ژبەرکو کورونا بارەکی زۆر قورسە و پاراستنا ژیانا وە گرنگترە ژ ھندەک تشتێن دی.

ل دووماھیێ گوت “مە درێغی نەکریە و دێ بەردەوام بین ل سەر کارێ خویێ پەرلەمانی و ئەم ھەرگاڤ دگەل خەلکێ خوداینە و پشتگیریا ھەمی داخازێن وانین، و ب ئانەھیا خودێ ئەڤ چەندە ژی دێ دەرباز بیت.

د. سەباح محمود ئاغا ل سالا ١٩٥٧ ل ئاکرێ ژ دایک بوویە و خاندنا پزیشکی ل نەمسا ب دووماھی ئینایە و د خولا پێنجێ پەرلەمانێ کوردستانێ بۆیە پەرلەمانتار و نھا سەرۆکێ لێژنا تەندروستی مافێ بکاربەر و ژینگەھە و بەرپرسێ نڤیسینگەھا پەرلەمانێ کوردستانە ل ئاکرێ.

دھۆک، ھەیفا دۆسکی:

ژنێن بێ زەلام بیژن پتر ژ زەلامان تووشی نەخوشیا دبن و گۆتنێن جڤاکی پتر ل سەر ژنان ھەنە ژ زەلامان ھەتا ئاریشە و کاودانێن ئەو دکەڤنە تێدا ی زەحمەتترن ژ یێن زەلامێن بێ ژن، چالامڤانەکا جڤاکی ژی دبێژیت: ژبەرکو ھێشتا ئەو ھزرا توز گرتی د جڤاکی دا ھەیە لەوا ژنان زێدەتر شکەستی و پاشڤەیی مایی دبینن.

زێرین بەھدین خودان زارویە وەسا دیار دکەت کو ئەو پێدڤی ب کەسەکی یە زارویێن وێ ب خودان کەت، چونکی ھەموو د بچووکن و ئەو یا بێ مووچەیە، لەورا نەشێت ھەموو کاران بکەت ھێشتا دەوروبەرێن وێ ب نیەتەکا جودا بەرێ خوە دەنە کەساتیا وێ و شەرم دکەت ھند تێکەلی جڤاکی بیت، چونکی دبێژنێ تو یا بو خوە ل مێرەکێ دگەری و گۆت: ھەکە من مووچەک ھەبایە چو جارا من داخوازا مێران نە دکر، چونکی و ژیانا زارویێن من گرنگترە.

ئیسماعیل عەلی شەش سالە ھەڤژینا وی چوویە بەردلوڤانیا خودێ و گۆت: ئەڤە چەند جارە من ژن دیتن بو خوە ب خوازم، بەلێ ژمن بچووکترن و من ئێکا ل دووڤ ژیێ خوە دڤێت، بەلێ بو من یا ئاسانە ھەکە پرسیارا ژنەکێ بکەم بو خو بینم بەلێ ژنەکا بێ مێر گەلەک کریتە د جڤاکی دا پرسیارا مێرەکێ بکەت، ھەرچەندە گەلەک جارا چکیێن نەخوش بو من ژی دھێن بەلێ جڤاک پتر رێکێ ددەتە زەلامێن بێ ژن ژ ژنێن بێ مێر و ئەڤ نە دادیە.

ل دور ھەمان بابەت شێرزاد  ئەحمەد ژ وان زەلامانە یێن بێ ژن و بەحسێ خوە دکەت و دبێژیت: ژیان بو مە ژی ھەتا رادەیەکی نە یا ئاسانە بەلێ پتر بو مە تشت درۆستن و ناڤێن خراب ھند ل سەر مە نینن تایبەت ھەکە مە بەگرەوەندەکێ خراب ژی ھەبیت ئەم دشێین ب ئاسانی ژیانا خوە ل گەل خێزانێ و جڤاکی ب رێڤە بەین، ئەڤە ھەکە ژلایێ خێزانداریێ ڤە بیت ئەم دشێین چ کچا دەستێ خوە درێژ کەینێ بخوازین د رازی نە شوو ب مە بکەن.

ل دوور بابەتی چنار مستەفا رێکانی چالاکڤان د بیاڤێ جڤاکی دا  دیار کر کو ئەو ژنا دناڤ جڤاکی دا دبیتە بیژن ھێشتا ل دووڤ ھزرێن توز گرتی رەفتار ل گەل دھێتە کرن و ئەڤ چەندە نەیا ئەرێنی یە چۆنکی ھندەک کاودان پەیدا بوینە ھەتا کو ئەڤ ژنە تووشی ئەڤێ رەوشێ بیت، بتایبەت ژی ناڤێ بیژن ب پەیڤەکا نە جوان ھاتیە پێناسە کرن ئەڤە ژی بەلکو ژ حالەتەکی پەیدا بویە و د جڤاکێ مەدا بویە پێڤەر و کارتێکرن کریە سەر ھەموو ژنان و گۆت: ئەڤە ژی د زانستێ جڤاکی دا ستەمە ل تەخا ژنان بەلکو ژن و زەلام ھەردوو د وی کاودانی دا دەرباز بوینە لێ پتر ل سەر کەساتیا ژنێ دھێتە ھژمارتن کەسەکا جودا و خۆدان بەگرەوەندەکێ خراب د چاڤێ خەلکی دا.

چنارێ ئەو چەندە ژی دیار کر لێ دبنیات دا ژیان د گۆھورینێ دایە و ھەردو رەگەز دبنە قوربانی گۆھورینێن جڤاکی، تایبەت ژی دەمێ ژن دبیتە بیژن و زەلام دبیتە بێ ژن ئەڤ چەندە لڤی دەمی پتر ھاتیە گوھۆرین و ئەو ناڤێن خرابێن ژن پێ دھاتە پێڤە کرن ئێدی ھاتیە گۆھورین و ھەتا رادەیەکی رێز ل ژنا بیژن ژی دھێتە گرتن چونکی دبیتە خودانا زارویا و ب چاڤێ دلوڤانیێ بەرێ خوە ددەنێ و گۆت: لێ بو زەلامی ژی دەمەکی دا کەسەکێ نەرێنی بو و ئەو پیروزی و بھا بو زەلامی ژی نەبو بەلێ د ئەڤرو دا پتر ھەر تاکەک مژوولی ژیانا خۆیە

چالاکڤانێ تەکەزت ل ھندێ ژی کر کو پێدڤیە ھەر کەسەک بھایێ مرۆڤان بزانیت  نەک چ کەسێ ما بێ ھەڤژین ئەڤجا ب چ شێوە بیت گرنگە بەگرەوەندێ وان ھند نەھێتە بەلاڤ کرن و گۆت: چونکی ھەر کەس د گۆھورینا ژیانێ دایە و مرۆڤ ھەموو خەلەت دبن.