ئەڤرۆ، زنار تۆڤی:

خانما سترانبێژ رۆژبین کزل، کو ئەڤە چەندین سالە ل وەلاتێ ئەلمانیا دژیت، د دیدارەکێ دا بۆ رۆژناما ئەڤرۆ دیار کر: ل ڤان رۆژێن بوری وێ سترانەکا نوو ب ناڤێ باران باری بەلاڤکرییە، کو ئەڤ سترانە ژ پەیڤ و ئاوازێن وێ ب خوە و وێ ئەڤ سترانە ل وەلاتێ ئەلمانیا کلیپ کرییە و ل تۆرێن جڤاکی بەلاڤ کرییە.

ناڤھاتیێ گۆت ژی: نوکە ئەو مژوولی تۆمارکرنا سترانەکا نوویە و وێ لبەرە ل ڤان نێزیکان وێ سترانێ ژی کلیپ بکەت و بەلاڤ بکەت، ھەروەسا ھەر ژ دەمێ دەرکەفتنا ڤایرۆسێ کۆرۆنایێ ھەتا نوکە، وێ چو ئاھەنگ و کۆنسێرت نە گێراینە، لێ ب تنێ وێ سترانێن سینگل و کلیپ بەلاڤ کرینە، دیسان نوکە ئەو پشکا مۆزیکێ ل زانکۆیێ دخوینیت و یا مژوولە ب خواندنا خوەڤە، ھەروەسا پرانیا سترانێن ئەو چێدکەت، ژ پەیڤ و ئاوازێن وێ ب خوە نە.

ئەڤرۆ، ھەرھین محەمەد:

مۆزیک ئێک ژوان چارەسەریایە کو تایبەتمەندێن جڤاکی بۆ چارەسەریا دەرونی ب کاردئینن بۆ وان کەسێن تووشی نەخوشیێن دەرونی و بێزاریێ دبن ل دۆر ڤی بابەتی ژی ڤەکۆلەرەکێ دەرونی دبێژیت: گوھداری کرن و ژەنینا  مۆزیکێ ب شەڤێ دەرونی ئارام دکەت و مرۆڤی بەر ب جیھانەکا ئارام دبەت.

ڤەکولەرێ دەرونی نەجمەدین زێباری د دیدارەکێ دا بۆ بەرپەرێ ھونەری یێ رۆژناما ئەڤرۆ دیار کر کو مۆزیک ئێک ژچارەسەریێ دھێتە ئەنجام دان ژ لایێ ڤە کۆلەرێن دەرونی ڤە و ب کارئینانا مۆزیکێ بۆ وان نەخۆشان یێن تووشی بێزاریێ  خەموکیێ و ھەست ب ماندی بوونێ و تورەبوونێ و بھێزیێ دکەن ب تایبەتی گوھداریا وێ مۆزیکێ بکەن یا نەرم، چونکو ئەڤ جورێ مۆزیکێ دەرونێ وی نەخۆشی زوو ئارام دکەت و ھەست ب ئارامیێ دکەت و تێکچوونێن وی یێن دەرونی کێم دبن و دبیتە ئەگەر د ناڤ بیرھاتنێن خوە یێن خوەش دا بژیت و ھەست ب خۆشیێ بکەت و ھەر زوو ژ وێ جیھانا نەخۆش و نە ئارام دەرکەڤیت و ھەر دو رەگەز گوھداریا مۆزیکێ دکەن، بەلێ زووتر دچیتە د ناڤ دەرونێ ئافرەتێ دا و زووتر ھەست ب ئارامیێ دکەت، بەلێ دەمێ زەلام گوھداریا مۆزیکێ دکەت ئەڤ ھەستە پتر ل دەڤ وی دمینت ژ ئافرەتێ و ئەڤ جورێ مۆزیکێ ناڤ ناخێ وی دا دمینیت و کارتێکرن و ئارامکرنا دەرونی پتر ژ ژنێ دمینیت، چونکو ناخێ وی پتر پێڤە دھێتە گرێدان، بەلێ ژن ھەست نازکترە.

نەجمەدین زێباری گۆت ژی: ھەر کەسەک حەز ژ جورەکێ مۆزیکێ دکەت و چ گوھداریا وی دکەت چ حەز ژ کەسایەتیا وی مۆزیکژەنی دکەت، یان حەز ژ ھونەرێ وی دکەت و پتریا جورەکێ مۆزیکێ دەستنیشان دکەت بۆ ئارامکرنا دەرونێ مرۆڤی وی مۆزیکژەنی تشتەکێ ھەی د ناڤ ناخێ مرۆڤی دا دژیت حەز و ھیڤی و خەونێن وی نە و ئەڤە بۆ مرۆڤی دگرنگن، لەورا مرۆڤ حەز ژ جورەکێ مۆزیکێ دکەت و ل گەل گوھدانا وێ مۆزیکێ بتنێ بیرھاتنێن خوەش دھێنە ھزرا مرۆڤی و مرۆڤ خوە ژبیرڤە دکەت و دەرونێ مرۆڤی ئارام دبیت و ھەر دەمەکێ مرۆڤی ھەست ب نەئارامیێ کر مرۆڤ گوھداریا مۆزیکێ بکەت باشە، بەلێ ب شەڤێ پتر مرۆڤ ھەست ب نەخۆشیێ دکەت و ھزرێت نەخۆش دکەت، لەورا یا گرنگە دڤی دەمی دا پتر گوھداریا مۆزیکێ بھێتە کرن دا کو ژوان ھزرو نەخۆشیان دوور بکەڤیت، چونکو د شەڤێ دا ھەکە مرۆڤ ل سەر وان ھزرێن نەخۆش بنڤیت د خەوێ دا دبنە کابیس و کارتێکرنێ ل مێشکێی مرۆڤ  دکەت و رۆژا پاشتر مرۆڤ یێ ئالوزە و ھەست ب نەئارامیێ دکەت ژبەر وێ خەونێ، بەلی َھەکە مرۆڤ بەری بنڤیت گوھداریا مۆزیکێ بکەت دێ خەوەکا خوەش کەت و خەونێت خوەش ژی بینیت و دێ دەرونێ وی ژی یێ ئارام بیت و گەلەک ڤەکۆلەرێن دەرونی ڤەکۆلین ل سەر ڤێ یەکێ کرینە گوھدانا مۆزیکێ ب شەڤی بەری نڤستنێ ھزروبیرێن مرۆڤی چالاک دبن و دبیتە ئەگەر کو ھەموو چالاکێن مێشکی ب کەڤنە کاری زووکا مێشک دکەڤیتە کاری و ھزرێن وی بەرفرەە دبن.

ھەمان ڤەکولەرێ دەرونی ئەو چەندە ژی گۆت: ھەکە ئەو کەسێ تووشی نەخۆشیا دەرونی بیت، یان ھەست ب نەئارامیی َبکەت ئامیرەکێ مۆزیکێ ب ژەنیت دێ زووتر مێشکێ مرۆڤی ئارام کەت و مرۆڤ دێ پێڤە مژوول بیت و خوە ژبیرڤە کەت و مرۆڤی ژ جیھانا نەخوەش دوور ئێخیت و مرۆڤی بەر ب جیھانا ئارام دبەت و لەورا ھەموو دەمان نۆشدار و ڤەکۆلەرێن دەرونی دووپاتیێَ ل سەر گوھداریکرنا مۆزیکێ دکەن، چونکو یێ ئازار شکێن و خەم رەڤینە و یێ ھاریکارە بۆ خوە گونجاندنێ و باشترین شێوە سەرەدەریێ ل گەل ژیانێ و دەوروبەران دکەت  و دیسان گوھداریکرنا مۆزیکێ یا باشە بۆ وان کەسان ژی یێن نشتەگەریان ئەنجام دەن و پتریا وەلاتان ڤی یەکێ دکەن دەمێ نشتەگەریەکێ بۆ کەسەکی ئەنجام دەن پشتی نشتەگەریێ گوھداریا مۆزیکێ دکەن و ھەروەسا گوھدانا مۆزیکێ بۆ وان نەخوشان یا باشە یێن کو نەخۆشیا (زھایمەر) ھەی و ھزروبیرێن خوە ژبیرکرین، ژبەرکو مێشکێ وان نەشێت چ وەرگریت ژبلی مۆزیکێ و مۆزیک دێ ھزرو بیرێن وی ئارام کەت.

ئەڤرۆ، زنار تۆڤی:

دەرھێنەر حەیدەر ئەحمەد سالح، یێ ناسیار ب حەیدەر ئارت، ل سالا ١٩٩٠ ل باژێرێ کەرکوکێ ژ دایک بوویە، د دیدارەکێ بۆ رۆژناما ئەڤرۆ گۆت: “ل سالا ٢٠٠٧ ئەز چوویمە پەیمانگەھا ھونەرێن جوان ل کەرکوکێ و من پشکا شانۆیێ خواندیە، پشتی من پەیمانگەە تەمام کری، من بەردەوامی دایە خواندنا خوە، پاشی ئەز چوویمە زانکۆیا سەلاحەدین، من کۆلیژا ھونەرێن جوان پشکا سینەمایێ خواندیە، پشتی من خواندنا کۆلیژێ ب دووماھی ئینای، ئەز چوویمە وەلاتێ تورکیا ب مەرەما خواندنا ماستەرێ، بەلێ ژبەر چەند ئەگەران ئەز نەشیام درێژیێ ب خواندنا خوە بدەم و تەمام بکەم”.

ناڤھاتی گۆت ژی: “دەمێ من ل پەیمانگەھێ د خواند، ب رەنگەکێ بەردەوام من کارێ ھونەری کریە، نوکە من تایبەتمەندیەک وەرگرتیە ئەو ژی وێنەگرتنە د سینەمایێ و ریکلامکرنێ و چێکرنا کلیپان دا، من ئەڤ وارە ھەلبژارتیە، چونکی ئەڤە خەونا من یا زارۆکاتیێ بوویە، من ھەردەم بزاڤ کرینە ب رەنگەکێ باشتر کار بکەم، دیسان دەمێ من ل زانکۆیێ دخواند، من دەست ب کارێ دەرھێنانێ کریە، من فلمەکێ سینەمایی ژی چێکرییە ب ناڤێ ( جیژوان )، من کارێ دەرھێنانێ ژی بۆ کریە، ھەتا نوکە ڤی فلمی پشکداری د شەش فلمە فیستەڤالێن نافخۆیی و دەرڤە دا کریە، من کارێ دەرھێنانێ بۆ چەندین کلیپان ژی کریە، نوکە ژی رێڤەبەرێ، میدیایی یێ رێکخراوا کۆمەلا ھەوارھاتنا کوردستانێ مە”.

حەیدەری ئەو ژی گۆت: د ١٢ کارێن شانۆیی دا من رۆلێ سەرەکی گێرایە، ھەروەسا من کارێ ئەکتەریێ ژی د چەندین فلمان دا کریە، من پشکداری د دو درامایان دا کریە، ئەو ژی درامایا ( کەرکوک چار )، کو ژ دەرھێنانا ناسر حەسەنی بوویە، ھەروەسا درامایا (لاپەرێن کەرکوکێ)، کو ژ دەرھێنانا جیھاد دلپاکی بوویە، من رۆلێ سەرەکی تێدا گێرایە ب ناڤێ ( ئامانج )، ھەروەسا من رۆلێ سەرەکی د چەندین فلمێن سینەمایی ژی گێرایە، کو ئێک ژ وان ل تورکیا ھاتیە بەرھەمئینان، من رۆل د چار کلیپان ژی دا گێرایە، ل گەل ھندێ کارێن ریکلامێ ژی دکەم، نوکە پتر حەز ژ کارێ دەرھێنانێ دکەم، ب رەنگەکێ گشتی، ئاستێ ھونەرێ کوردی، ل وەلاتێ مە دا گەلەک یێ لاوازە، نەبوونا فلتەری بوویە مەزنترین کێشە دناڤا ھونەرێ کوردی دا”.