چاڤەڕێ‌ دهێتە كرن ل شەمبییا بهێت دەمژمێر 9:30 شەڤ یاریگەها زاخۆ یا نێڤدەولەتی دێ‌ یارییەكا ئاگرین دناڤبەرا خودانێن ئەردی زاخۆ و مێڤانا وێ‌ دهۆك ژ هەڤڕكیێن گەڕا 21ێ‌ یا خولا ستێرێن ئیراقێ‌ بهێتە كرن.
جەماوەرێ‌ هەردو یانەیان چاڤ ل ڤێ‌ یاریێ‌ هەیە ژبەر تایبەتمەندییا وێ‌ ل دەڤ وان ژبەركو دێربییەكێ‌ پارێزگەهێ‌ یە و تامەكا ب هەڤڕكی بۆ دهێتە كرن، هەردو یانە ل رێزێن سێیێ‌ و چارێ‌ دهێن، هەرچەندە دیدارێن وان یێن بەری نوكە ژ 20 یارییان 13 یارییان وەكهەڤی ئەنجامێ‌ دووماهیێ‌ بوویە بەرانبەر پێنج سەركەفتن بۆ دهۆكێ‌ و دو بۆ زاخۆ، لێ‌ یارییا ڤێ‌ گەڕێ‌ پێشبینیین وەكهەڤیێ‌ بزەحمەتن ژبەركو هەردو یانە بهێز شەڕی بۆ رێزێن پێشیێ‌ دكەن، ئەوا پێشبینی دهێتە كرن زێدەتری 23 هزار كەسان دناڤ یاریگەهێ‌ دا بەرهەڤبن.
ل دۆر ڤێ‌ یەكێ‌ وەحید رەشید شرۆڤەكارێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: یاریێن دهۆك و زاخۆ تایبەتمەندییا خوە یا هەیی ل سەر ئاستێ‌ كوردستانێ‌ و ئیراقێ‌ و بۆ جەماوەرێ‌ هەردو یانەیان، هەڤڕكییەكا بهێز دهێتە كرن تایبەت بۆ یارییا ڤێ‌ گەڕێ‌ ژبەركو هیڤیێن وان دەستڤە ئینانا سێ‌ خالانە و هەردو یانە خودان ئەنجام و رێزبەندیێن باشن، سەرباری زاخۆ خودانا ئەردی و یاریگەهێ‌ یە لێ‌ ئەركێ‌ وێ‌ ژی ب سانەهی نابیت بەرانبەر دهۆكێ‌ د بەرانبەر دا ئەركێ‌ دهۆكێ‌ ژی ب زەحمەتە، یا گرنگ بۆ مە ئەم یارییەكا ب گیانێ‌ براینیێ‌ و پشتەڤانییا جوان و شارستانی ببینن دوور ژ ئەنجامی، گەشبینین دێ‌ گیانێ‌ براینیێ‌ و روویەكێ‌ جوان یێ‌ وەرزشا بەهدینان نیشاندەن، ئەڤ یارییە دێ‌ بیتە خودیكا رەوشتێ‌ پاقژ ژبەركو دێ‌ گەلەك كەنالێن نافخوە و ئیراقێ‌ و دەرڤە ڤەگۆهێزن.
بۆ زانین سوبەهی پێنج شەمبی دێ‌ دەست ب هەڤڕكییان هێتە كرن بڤی رەنگی خوارێ‌، نەفت میسان- نەفت ئەلبەسرا، نەورۆز- ئەمانەت بەغدا، زەورا- كارەبا، نەجەف- نەفت، رۆژا ئەینی، تەلەبە- جەوییە، نەفت ئەلوەسەت- شورتە، رۆژا شەمبی، هەولێر- ئەلقاسم، حدود- كارەبا، مینا- كەرخ.

قەیس وەیس:

چاڤه‌ڕێ دهێته‌ كرن سوبه‌هی هه‌شت یاری ژ چارچووڤه‌یێ هه‌ڤڕكیێن گه‌ڕا 28ێ بۆ یانه‌یێن پلا نایابا كوردستانێ یا ته‌پا پێی‌ ل ده‌مژمێر سێیێ پشتی نیڤرۆ هێنه‌ كرن، هه‌رسێ یانه‌یێن، ئاكرێ، زاخۆ و دهۆك ژ ده‌رڤه‌یی یاریگه‌هێن خوه‌ دێ به‌رانبه‌ر تاقیكرنێن ب زه‌حمه‌ت دابن.
ل هه‌ولێرا پایته‌خت تیما یانه‌یا ئاكرێ خودانا سه‌رێ لیستێ دێ ب هه‌موو چه‌كێ خوه‌ به‌رانبه‌ر خودانێن ئه‌ردی یانه‌یا برایه‌تی بیت، یارییه‌كا ب سانه‌هی نابیت بۆ كوڕێن پایته‌ختێ نه‌ورۆزێ ئه‌وێن شه‌ڕه‌كێ مه‌زن دكه‌ن پێخه‌مه‌ت پاراستنا رێزبه‌ندیێ ‌ و ده‌ستڤه‌ئینانا ناسناڤێ ئه‌ڤ ساله‌، ئاكرێ 47 خال كۆمكرینه‌ و رێزا ئێكێ دهێت و نێزیكی ناسناڤی بوویه‌ لێ دڤێت د سێ یاریێن مایی دا ب سه‌ركه‌ڤیت هه‌تا بگه‌هیته‌ دیرۆكێ، له‌وما دڤێت سه‌ركه‌فتنێ ل سه‌ر برایه‌تی و ئارارات و چوارقۆرنه‌ بینت هه‌تا بگه‌هیته‌ ناسناڤی، دبه‌رانبه‌ردا تیما برایه‌تی پێدڤی ب خالێن یاریێ هه‌یه‌ ژبۆ خوه‌ پاراستن ژ داكه‌فتنێ ئه‌وا نوكه‌ ب 32خالان رێزا 12ێ دهێت.
ژلایێ خوه‌ڤه‌ تیما یانه‌یا زاخۆ پشتی هیڤیێن ناسناڤێ خولێ ژ ده‌ستداین دێ بزاڤێ كه‌ت دگه‌ل خودانێن ئه‌ردی یانه‌یا چوارقۆرنه‌ ژ ده‌ستدانا خالان ب راوه‌ستینت پشتی دگه‌ل برایه‌تی و ئارارات تووشی خوساره‌تیێن لدیڤ ئێك بووی، كوڕێن خابووری 35 خال هه‌نه‌ رێزا هه‌شتێ دهێت، خودانێن ئه‌ردی هه‌مان خال هه‌نه‌ رێزا نه‌هێ دهێت، شه‌ڕێ ڤێ یاریێ دێ بۆ رێزبه‌ندیێ بیت.
ژلایه‌كێ دیڤه‌ تیما یانه‌یا دهۆك ئه‌وا هێشتا د هێلا مه‌ترسییا داكه‌فتنێ دا دێ بیته‌ مێڤانا شه‌قلاوه‌ د یارییه‌كا ب زه‌حمه‌ت دا بۆ ئه‌لهۆیێن چیا، ژبه‌ركو شه‌قلاوه‌ ژی دێ شه‌ڕێ سێ خالان كه‌ت پێخه‌مه‌ت خوه‌ دووركرن ژ داكه‌فتنێ، دهۆك ب33 خالان رێزا 10ێ دهێت، شه‌قلاوه‌ ب30 خالان رێزا 15ێ و به‌ری دووماهیێ دهێت.
ژ یاریێن دی یێن ئه‌ڤرۆ، هندرین- رانیه‌، شێروانه‌- سه‌ید سادق، ئارارات- ده‌ربه‌ندیخان، سیروانی نوو- پێشمه‌رگه‌یا هه‌ولێر، هه‌ولێر سۆران.
هه‌لوه‌ستێ گشتی بڤی ره‌نگی یه‌.
1- ئاكرێ 47 خال.
2- پێشمه‌رگه‌یا هه‌ولێر 45 خال.
3- شێروانه‌ 43 خال.
4- رانیه‌ 38 خال.
5- سیروانی نوو 38 خال.
6- هندرین 37 خال.
7- ده‌ربه‌ندیخان 35 خال.
8- زاخۆ 35 خال.
9- چوارقۆرنه‌ 35 خال.
10- دهۆك 33 خال.
11- سه‌ید سادق 32 خال.
12- برایه‌تی 32 خال.
13- هه‌ولێر 31 خال.
14- ئارارات 31 خال.
15- شه‌قلاوه‌ 30 خال.
16- سۆران 27 خال.

شاهۆ فەرید:

د داخویانیەكێ دا دادڤانێ دویێ و نوونەرێ ئێكانە یێ پارێزگەها دهۆكێ د خولا ستێرێن ئێراقێ یا تەپا پێی دا ئەدهەم عیسا سلێمان بۆ رۆژنامەیا ئەڤرۆ گۆت: ئەڤ سالە شانازی ڤە وەكۆ تاكە دادڤان ژ پارێزگەها دهوكێ مە و د قۆناغا ئێكێ دا شیایمە چوار یاریێن خولا ستێرێن ئێراقی پشكداربم وەكو دادڤان، سیستەمێ ڤارێ خولا ستێرێن ئێراقێ پێشكەفتیە و ئاریشە و ئالوزیێن دادڤانا چارەسەر كرینە، ئەڤە دو سالە ژی دادڤانێن دهوكێ ژ خولا نایاب و ئێك و دو ڕێڤەبرینە لێ بۆ ب ڕێڤەبرنا خولا ستێرێن ئێراقێ پێدڤی دەمیە.
زێدەتر ئەدهەمی گۆت: د ماوەەیێ ڤان حەفت سالێن دادڤانێن دا ل پارێزگەها دهوكێ رێژا وان زێدەبووینە، هەتا رادەكێ باش فێدراسیونا پارێزگەها دهۆكێ هاریكارە ل گەل مە، لێ پێدڤیا مە پتر هاریكاریێ هەیە چونكۆ ئارمانجێن مەزن مە هەنە بشێن بۆ ناڤ و وەرزشا دهوكێ كارەكێ باش بكەین، ژبەر هەبوونا رێژەكا زۆرا دادڤانان ل ئێراقێ و نەبوونا پشتەڤانیكرنێ ژلایەنێ بەرپرسان دادڤانێ دهوكێ كێم دهێتە دیتن، نوكە هندەك خولێن جودا ب رێڤەدبەن لێ ئارمانج خولا ستێرایە، خولا كوردستانێ ژی بەر ب باشبوونێ دچیت لێ ئاستەنگ هەنە، رێڤەبرنا یاریێن خولا كوردستانێ زەحمەترە ژ یێن ئێراقێ.

عەلی حاجی :

د داخویانیەکێ دا سەرپەرشتێ تیما تەپاپێی یا یانه‌یا زاخۆ ئەوا پشکدار د خولا نایابا کوردستانێ دا بۆ رۆژناما ئەڤرۆ دیار کر وان سەرکەڤتنێ دڤێت د یاریێن مایی دا ژ خولێ و ئارمانجا كۆپا کوردستانێ ژی دڤێت بجهـ بهێت.
زێدەتر سەردار عومەر گۆت: یاریا بەرامبەر برایەتی و ئارارات ئاستێ بەرەڤانێن مە د لاوازبوون مە ئەو تێبینیە گەهاندیە یاریزانێن خوە پێدڤییە چارەسەربکەن ژبه‌ركو ئەو خالا لاوازیێ بوو ئەگەرێ دو خوسارەتیێن لدویفئێک، مە یارییەکا گرنگ بەر چوارقورنە هەیە و ئەم دێ بۆ سەرکەڤتنێ بەرب یاریگەها وان چین، ئەم گرنگیەکا تایبەت ب وێ یاریێ ددەین و پێدڤیە هەمی یاریزان ژی ئاستێ خوە پێشکێش بکەن دا کو تیما مە بکەڤیتە ل سەر رێکا سەرکەڤتنان، هەرچەندە مە مانا خوە د خولێ دا مسوگەر کریە لێ مە دڤێت ب دروستی یاریێن خوە بکەین و هەیبەتا خولا کوردستانێ پارێزین و مە شیان هەنە کو بشێن چوارقورنە د یاریگەها وێ دا تووشی خوسارەتیێ بکەن لێ هەکە یاریزانێن مە د رۆژا خوە دا بن.
ناڤبری گۆت ژی: دەستەیا کارگێریا یانێ و دەستەیا ڕاهێنەران و یاریزانێن تیمێ گرنگییەکا تایبەت ب كۆپا کوردستانێ ددەن و نابیت ئەو دەلیڤەیا بۆ مە هاتیە پێش ژ دەست بدەین و ئەم یێ ب شێوەیەکێ رژد کار دکەین داکو وێ ئارمانجێ بجهبینن.

كارگێرییا یانه‌یا دهۆك به‌رسڤا به‌یاننامه‌یا یانه‌یا جه‌وییه‌ دایه‌ ئه‌وا ب گۆتنێن دوور ژ راستیێ یانه‌ و جه‌ماوه‌رێ دهۆكێ ب دورستكرنا توندوتیژیێ د ناڤ یاریگه‌هێ دا تومه‌تباركرین و دیاركر ئه‌و حێبه‌تی ماینه‌ ل سه‌ر ناڤه‌رۆكا به‌یاننامێ و مافێ وانایه‌‌ به‌ره‌ڤانیێ بكه‌ن و دهۆك و پشته‌ڤانێن وێ دوورن ژ وان ئاخفتنان.
د به‌رسڤا به‌یاننامێ دا هاتییه‌: یانه‌یا دهۆك ده‌ستپێشخه‌را ئێكێ بوویه‌ یا ماركتینگێ بۆ خولا ستێرێن ئیراقێ ب ڕێكا ئاهه‌نگا ده‌ستپێكرنێ و هه‌می ده‌مان یا پێشه‌نگ بوویه‌ ژبۆ سه‌رئێخستنا خولێ و باوه‌شا خوه‌ بۆ هه‌ر كاره‌كێ باش ڤه‌كرییه‌، ژلایه‌كێ دیڤه‌ دیاركر ئه‌و روودانێن دناڤا یاریگه‌هێ دا په‌یدابووین هه‌ر ژ خوله‌كا 92ێ بوو ب به‌لگه‌ كو ئه‌گه‌رێ تێكدانی كی بووینه‌ تایبه‌ت ئه‌و ئێرشا سێ ژ كارگێرێن تیما جه‌وییه‌ ل سه‌رهه‌لگرێ ته‌پێ یێ 12 سالی ب توندی ئێشاندییه‌ بوو ئه‌گه‌روه‌كو نه‌رازیبوون پێنج ژ جه‌ماوه‌ری هاتنه‌ دناڤ یاریگه‌هێ دا، د به‌رانبه‌ردا یاریزانێن جه‌وییه‌ ئه‌و جه‌ماوه‌ر ژی ئێشاندینه‌.
ژلایه‌كێ دووڤه‌ یانه‌یا دهۆك دیاركرییه‌ كو سه‌رۆكێ یانه‌یێ په‌یوه‌ندی ب سه‌رۆكێ یانه‌یا جه‌وییه‌ كرییه‌ ل سه‌ر ئه‌ڤان روودانا و دلگرانییا خوه‌ بۆ دیاركرییه‌ وئه‌و كه‌سێن تێكدان كرین هاتینه‌ ده‌سته‌سه‌ركرن و سكالا ژی هاتییه‌ تۆماركرن، د هه‌مان به‌رسڤ دا ل سه‌ر به‌یانناما جه‌وییه‌ گۆتییه‌: د رسته‌كێ دا دلێ مه‌ ئێشاندیه‌ ئه‌وژی (ئه‌م ل ژێر گه‌فابووین و دا هێنه‌ كۆشتن) چو راستی بۆ نینه‌ و هه‌تا ژ پارێزگه‌هێ ده‌ركه‌فتین چو روودان په‌یدانه‌بووینه‌ و هێزێن ئه‌مینی پارستنا وان كرییه‌.

پشتی ئەوان ئیرشێن ل هۆلەكا ئاهنگا یا ل پایتەختێ‌ رۆسیا مۆسكۆ ژلایێ‌ چەند چەگداران ڤە هاتیە كرن، حوكمەتا فرەنسا داخواز ژ 45 وەلاتێن جیهانێ‌ كرییە كو هاریكارییا وان بكەت بۆ بەرهەڤكرنا لەشكەر و پۆلیسا پێخەمەت پاراستنا چالاكییا ئۆلمپیادا پاریس 2024ێ‌ ئەوا بڕیارە ل 26ێ‌ تیرمەهێ‌ بهێتە ئەنجامدان.
د راگەهاندەكا فەرمی دا فرەنسا ژ ترسا هەبوونا ئیرشان هەمی بەرهەڤیێن بەرگێریێ‌ و پاراستنا ئاسایشا وەلاتێ‌ خوە كرییە و داخواز ژ 45 وەلاتان كرییە لەشكەرێ‌ خوە بۆ فرێكەت و هەرزو وەلاتێن ئەمریكا، بریتانیا، ئیتالیا و 32 وەلاتێن دی بەرهەڤییا خوە دیاركرینە كو پارستنا رێورەسمێن ئۆلمپیادا هەتا ب دووماهی هاتنا وێ‌ بكەن، ئەڤ ترسە هات پشتی ئالۆزیێن دناڤبەرا رۆسیا و ئۆكراینا خورتر لێهاتین و ترسا هەبوونا كارێن تیرۆرستی دهێتە كرن.