هەولێر، قائید میرۆ:

بەرپرسەكێ وەزارەتا بازرگانی ئاشكرا كر، ل دەستپێكا مەها نیسانێ تۆماركرنا ناڤان بۆ پشكا خوارنا مەها دێ بیتە ئەلكترۆنی و دبێژیت: نوكە سیستەم هەموو بوویە ئەلكترۆنی و مەها بهێت ئەرزاقێ كەسێن ناڤێن وان دهێنە تۆماركرن گیرۆ نابیت.
حسێن سەبری، نوونەرێ هەرێما كوردستانێ‌ ل وەزارەتا بازرگانیا ئیراقێ بۆ رۆژناما ئەڤرۆ دیار كر، ل گورەی بڕیارا وەزارەتا بازرگانیا ئیراقێ‌، ل دەستپێكا مەها نیسانێ وێڤە تۆماركرن و لادانا ناڤان ل فۆرما ئاهێن خوارنێ دێ بیتە ئەلكترۆنی و گۆت: «پێدڤیە وەلاتی ب شێوەیەكێ ئەلكترۆنی ناڤێن زارۆكێن خوە بۆ ئاهێن خوارنێ ب سیستەمێ ئەلكترۆنی تۆمار بكەن و ئەگەر كەسەك ژی بهێتە لادان وەكی ئەو كەسێن وەغەر دكەن، دیسا دێ ب شێوەیێ ئەلكترۆنی بیت».
حسێن سەبری گۆتژی: «هەر ناڤەكێ ب سیستەمێ ئەلكترۆنی دهێتە تۆماركرن، مەها د دووڤ دا دێ بەهرا ئەرزاقێ وی هێتە دابینكرن و گیرۆ نابیت، چونكی نوكە سیستەمێ ئاهێن خوارنێ ل ئێراقێ بوویە ئەلكترۆنی و بریكارێن ئاهێن خوارنێ ژی ژ نوكە پێڤە دڤێت مەهانە ئەو پارێ بەرامبەر بەهرا خوارنێ دهێتە وەرگرتن ب شێوەیێ ئەلكترۆنی رادەستی بازرگانیا ئێراقێ بكەن».

لەزگین جوقی:

رێڤەبەرێ شوونەوار و كەلەپوورێن پارێزگەها دهۆكێ دیار كر، ب پشتەڤانیا حوكمەتا هەرێما كوردستانێ و كابینا نەهێ و ل سەر داهاتێ وەزارەتا باژێرڤانی و گەشتوگوزارێ‌ دەست ب نووژەنكرنا هەردو قەسرێن دولبێ و كەمبەلانی (كەمبەرلاند) هاتە كرن.
د. بێكەس بریفكانی، رێڤەبەرێ شوونەوار و كەلەپوورێن پارێزگەها دهۆكێ بۆ ئەڤرۆ گۆت: «دەست ب نووژەنكرنا هەر دو قەسرێن دلبێ و كەمبەلانی، ل سەر داهاتێ وەزارەتا باژێرڤانی و گەشتوگوزارێ‌ و ل ژێر چاڤدێرییا رێڤەبەریا گشتی یا شوونوار و كەلەپووری ب هەماهەنگی ل گەل رێكخراوا (The lotus flower) و ب پشكداریا 35 كرێكاران هاتە كرن، كو ژ لایێ وێ‌ رێكخراوێ‌ ڤە هاتینە دابین كرن».
گۆتژی: «ئاڤاهیێ قەسرا كەمبەلانی ئێك ژ ئاڤاهیێن گرنگە، كو دكەڤیتە سەنتەرێ باژێرێ دهوكێ، دهۆكا كەڤن خودان تەلارسازیەكا بالكێشە، ل سالا 1927 ژ لایێ (روجر كرێغ كەمبەرلاند) هاتیە ئاڤاكرن، د كەڤن دا وەكو نەخۆشخانە هاتبوو ب كارئینان و پاشی چەند سالەكا وەكو بنگەهەكێ سەر ب رێڤەبەریا پوستە و گەهاندنێ هاتە ب كارئینان، د نوكە دا رێڤەبەریا شوونوار و كەلەپوورێن دهۆكێ دەست ب نووژەنكرنا ڤی ئاڤاهی كریە بۆ پاراستنا ڤێ تەلارسازیێ و د پاشەرۆژێ‌ دا بۆ مەرەمێن شوونواری مفا ژێ‌ بهێیە وەرگرتن».
ناڤهاتی ئاشكرا ژی كر، ئاڤاهیێ (قەسرا دلبێ) كو دكەڤیتە گوندێ دلبێ سەر ب دەڤەرداریا سێمێلێ ڤە، ئاڤاهییەكە ب شێوازەكێ جیاواز هاتیە ئاڤاكرن ژ لایێ تەلارسازی ڤە، ئەڤ ئاڤاهی یە د ناڤبەرا سالانێن 1900 و 1905 ژ لایێ (ئەلحاج محەمەد سلێمان ئەلنائب) یێ ناڤدار ب (حەجی محەمد ئەفندی ئەلنائب) هاتیە ئاڤاكرن، كو ئێك ژ كەسایەتیێن ناڤدار بوویە ل دەڤەرێ و خودان پێگەیەكێ‌ جڤاكی بوویە و پەیوەندیەكا مكوم ل گەل مەلكێ ئیراقێ هەبوویە و نووژەنكرنا ڤی ئاڤاهی دێ مفایەكێ‌ گرنگ هەبیت بۆ مەرەمێن گەشتیاریا شوونواری.

زاخۆ، دلۆڤان هالۆ:

دەزگەهێ خێرخوازی یێ بارزانی د مالپەڕێ خوە یێ فەرمی دا دیار كر كو دوهی نوونەراتیا زاخۆ یا دەزگەهێ خێرخوازی یێ بارزانی ل سنوورێ ئیدارەیا سەربخوە یا زاخۆ هاریكارییا 300 خێزانێن زیانڤێكەفتیێن لەهیان ل زاخۆ كر.
دەزگەهێ خێرخوازی یێ بارزانی، ئاماژە ب وێ چەندێ ژی كرییە، كو ئەڤ هاریكاریە پێكهاتی بوون ژ چار بەتەنیان و چار دۆشەكان و كارتوونەكا جلوبەرگان و كارتۆنەكا ئەرزاقی بۆ هەر خێزانەكێ.
وەكو دیار ل 19ی ڤێ مەهێ‌ پێلەكا مەزن یا باران بارینێ ل زاخۆ هاتبوو و بۆ دەمێ چەندین ڕۆژان ڕێژەكا زۆر یا بارانێ باری، لەوما ئەڤ چەندە بوو ئەگەر، كو ئاستێ ئاڤا خابیری بۆ چەند مەتران بلند ببیت و بۆ ئەگەرێ دروستبوونا لەهیان و زیانێن ماددی یێن مەزن ب وەلاتیێن زاخۆ كەڤت، ب تایبەت ئەو مالێن نێزیك خابیری.

ئامێدیێ، مەحمود نهێلی:

هندەك كەسێن نەنیاس ب مەرەما لێگەڕیانێ ل گەنجینەیان ل گورستانێن كەڤنار ل سنوورێ ناوچەداریێن دێرەلۆكێ‌ و شێلادزێ و جهێن دیتر كۆلاینە و دەستكاری كرینە.
سەردار هێتووتی وەك شوونەوارناسەك ل دەڤەرا ئامێدیێ بۆ رۆژناما ئەڤرۆ دیار كر، هند جهـ ل دەڤەرا ئامێدیێ ب تایبەت ل سنوورێ هەر دو ناوچەداریێن دێرەلۆكێ‌ و شێلادزێ هاتینە كۆلان و دەستكاریكرن و گۆت: «پتریا وان جهان ل گورستانێن ناوچەداریا دێرەلۆكێ نە، گۆمان دهێتە كرن، ئەڤان كەسان ب مەرەما دیتنا گەنجینەیان ئەو جهـ كۆلا بن».
گۆتژی: «گەلەك جاران ئەڤ جۆرە كریارە دهێنە دیتن و گورستان و جهێن شوونواری ل دەڤەرێن جودا جودا دهێنە كولان و دەستكاریكرن، ئەم داخوازێ‌ ژ لایەنێن پەیوەندیدار دكەین، ب ڕژدی ل سەر ڤی بابەتی راوەستن و خوە ل ڤان جهان بكەنە خودان، بۆ وێ یەكێ بهێنە پاراستن و كەسانێن تێكدەر ژی بهێنە راوەستاندن».