زنار تۆڤی:

بریكارێ وەزارەتا چاندنێ یێ حكومەتا هەرێما كوردستانێ دیار كر، ئەڤ سالە بارانێن باش بارینە و بەرهەمێ گەنمی گەلەكێ باشە و ل دووڤ وێ رێپیڤانا هاتیە كرن، دو ملیۆن و 700 هزار تەنێن گەنمی دێ هێنە بەرهەمئینان و ئەم ل گەل حكومەتا ئیراقێ ل سەر هێلێینە، داكو ئەڤ سالە رێژا هەرە مەزن یا گەنمی ل هەرێما كوردستانێ بهێتە وەرگرتن.
كەریم سلێمان، زێدەتر بۆ رۆژناما ئەڤرۆ دبێژیت: هەتا نوكە بارانێ چو كاریگەریێن خراب ل سەر بەرهەمێ چاندنێ نەبووینە، ب تایبەتی ژی بەرهەمێ گەنمی، دیسا ژ ئەگەرێ باران بارینێ ئاڤا ژێر ئەرد دێ بلند بیت و سكر و پۆند ژی تژی ئاڤ بووینە، بەلێ ب رەنگەكێ گشتی بارانبارین زۆر یا باشە و ئەڤ سالە چاندن دێ یا بەرهەمدار بیت.
ناڤهاتی گۆت: «هەر ل دەستپێكا چاندنا گەنمی، ئەم ل گەل وەزارەتا چاندنێ و بازرگانیا ئیراقێ كار دكەین و ب رێیا نوونەراتیا حكومەتا هەرێما كوردستانێ ل سەر چەند بابەتێن گرێدایی چاندنێ ل سەر هێلین، ئەڤ سالە بهایێ هەر تەنەكا گەنمی دێ 850 هزار دینار بن و ب رەنگەكێ‌ گشتی ل ئیراقێ شەش ملیۆن تەنێن گەنمی دێ ژ جۆتیاران هێنە وەرگرتن، ئاریشا مە ل هەرێمێ ئەوە، كو ئیراق گەنمێ مە هەموویێ وەرناگریت و پار ژی ب تنێ 500 هزار تەنێن گەنمی وەرگرت بوون، نوكە ئەم ل سەر هێلین بۆ هندێ ئەو رێژە بهێتە زێدە كرن».
بریكارێ وەزارەتا چاندنێ خویا كر، ئەڤ سالە نێزیكی دو ملیۆن و 700 هزار دۆنەمێن ئەردی كرینە گەنم.

بێوار حەمدی:

گەنجەكێ كورد د قوناغێن بۆری دا شیایە رۆلەكێ مەزن ببینیت و ب تایبەت د بابەتێن ئابۆریدا شیایە ببیتە پشكەك ژ پەیداكرنا دەلیڤێن كاری. ئابۆرناسەكی ژی گۆت: گەلەك یا نورمالە هەتا ئابۆرێ خێزانێ ژی د دەستێ گەنجی دابیت، ژبەركۆ ئەگەر گەنج یێ تێگەهشتی و ژیربیت، نە ب تنێ ئابۆرێ خێزانێ، بەلكۆ دشێت ئابۆرێ وەڵاتەكی بڕێڤەببەت.

د.كاوە عەبدولعەزیز، ئابۆرناس و ماموستایێ زانكۆیێ د دیدارەكێ دا بۆ ڕۆژناما ئەڤرۆ گۆت: د زانستێن ئابۆریدا گەنج دهێتە هەژمارتن ژ گرنگترین تەخ و چینا جڤاكی و وەك ئامیرێ بەرهەمئینانێ ل سەر ئاستێ تاكێن هەر جڤاكەكی و گۆت: (گەلەك یا فەرە گرنگیەكا مەزن ب تەخا گەنجان بهێتەدان، چونكی گەنج بڕبڕا پشتێ یە بۆ ئابۆرێ هەر وەڵاتەكی، نەخاسمە ل وەڵاتێ مە، پێدڤیە مفا ژ هێزا وان بهێتە وەرگرتن و ب تایبەت ئەوێن خودان باوەرنامە، هەر چو نەبیت ل كەرتێن تایبەت دا رێ بۆ بهێتە خۆشكرن).
ئابۆرناسی زێدەتر گۆت: گەنجێ كورد د قوناغێن بوریدا شیایە ڕولەكێ مەزن ببینیت و ب تایبەت د بابەتێن ئابۆریدا، شیایە ببیتە پشكەك ژ پەیداكرنا دەلیڤێن كاری و شیایە ببیتە بارسڤكیەك ژی بۆ خێزانا خۆ، لێ ژ ئەگەرێ ڤان قەیرانان هەر لایەنەك و هەر تاكەك یێ باجێ ددەت، بەلێ یێ ژ هەموویا پتر باجێ ددەت گەنجە، چونكی پتریا وان یێن بێزاربوین و هەتا تووشی نەخۆشیێن دەروونی بوینە و ب مخابنیڤە پتریا وان گەنجێن ژ وەڵاتی كۆچ دكەن ژ ئەگەرێ قەیرانان بوویە، لێ د راستی دا گەلەك ژ گەنجان ژ دەرڤە ژی شیایە داهاتەكێ باش پەیدابكەت و هاریكاریا خێزانا خۆ ژی بكەت.

د بەردەوامیا ئاخفتنا خۆدا كاوە عەبدولعەزیزی گۆت: ب دیتنا من گەلەك یا نورمالە ئابۆرێ خێزانێ د دەستێ گەنجی دابیت، ژ بەر كۆ ئەگەر گەنج یێ تێگەهشتی و ژیر بیت، نە ب تنێ ئابۆرێ خێزانەكێ، بەلكۆ دشێت ئابۆرێ وەڵاتەكی بڕێڤە ببەت و گۆت (گەلەك ڕێ هەنە بەرێ گەنجی بكەڤیتە هندێ بەرپرسایەتیا خێزانێ هەلبگریت، بۆ نموونە: هەر ژ دەسپێكا وی دایك و باب وی فێری بازاركرنێ بكەن و ئەو بچیتە بازاری تشتان بكریت و هندەك بەرپرسیاریان بدەنێ، دیسان باب ژی ئەگەر خۆدان كاربیت كۆڕێ خۆ دگەل خۆ ببەت و فێری كاركرنێ و ئەتەكێتێن كاری بكەت، ئەگەر كچ ژی بیت دایك دشێت فێری هندەك كاران بكەت وەكو، كارێن دەستی، دروینا جلكان، زێدەباری ڤان هەموویان بەشداریكرنا گەنجان د خۆلێن جوراوجوردا گەلەكا هاریكارە بۆ وان).

پەروین سەلاح:

ڤەكۆلەرەكێ‌ جڤاكی دیار كر، رێیا ژ هەموویان گرنگتر ئەوە گەنجێ مە بەرەف تەكنولوژیایێ‌ بچیت و ب شێوەیەكێ باش ب كاربینیت، چونكو هەر گەنجەكێ دڤێت د هەر بوارەكی دا پێشبكەڤیت دێ‌ ب رێیا تەكنولۆژیایێ‌ بیت.

ڤەكۆلەڕێ جڤاكی هیوا كامیران بۆ رۆژناما ئەڤرۆ گوت: دڤێت گەنج د گەلەك بەرنامان دا خوە پێشبێخن، ب تایبەتی بەرنامێ یوتیوبی گەلەك شیانێن خوە پێش بێخیت، د ڤێرە دا خالا سەرەكی بۆ گەنجی تەكنولۆژیایە، ب شێوازەكێ گشتی سۆشیال میدیا ب هەمی بەرنامێن خوە ڤە تێدا فێربیت.
ناڤهاتی گۆت ژی: هەر گەنجەكێ‌ ئارمانجەك هەبیت ل دووڤ وێ ئارمانجا خوە پێدڤیە بەردەوام بیت و دەستان ژێ بەرنەدەت، قوناخ ب قوناخ یێ بەرهەڤ بیت و قوربانیا بدەت بۆ وێ ئارمانجا وی هەی و هەر دیسان دەمێ خوە ژی بدەیێ و هندەك تشتان ژ دەست بدەی، دا كو ب گەهیە ئارمانجاخوە.
ناڤبری ئاشكرا كر: دڤێت هەر گەنجەكێ پلانەكا ستراتیجی هەبیت بۆ ئارمانجا خوە و ئارمانجەكا دەست نیشانكری هەبیت و پلانەكا رێكخستی بیت و بزانیت دێ چاوا كار ل سەر كەت، تو رێكا راست بزانی بۆ ئارمانجا خوە، كا بەرەڤ كیڤە دچیت و ئارمانجا خوە ل دەسپێكا هەر كارەكی بدانی، نەك ئارمانجا خوە قوربانی هندەك تشتێن دی ببن و بێ رامان بكەی.
هیوا گۆت ژی: دا كو گەنجەك بشێت كارێت خراب بهێلیت، خالا ژ هەموویان گرنگتر ئەو هەڤالێن وی ئەوێن وان كارێن خەلەت دكەن دڤێت وان هەڤالان بهێلیت و هندەك هەڤالێن دی یێن باش بۆ خوە پەیدابكەت، دا بشێت كارێن خراب دەست ژێ بەردەت، هەروەسا ب شێوازەكێ گشتی دڤێت ئەو وێ ژینگەهێ دا نەمینت یا ئەو ژینگەها ژینگەهەكا گونجای بۆ وی دروست بكەت كو وان كارێن خەلەت تێدا بكەت.
ژلایەكێ دی ڤە بریار دان ل دەف وی هەبیت دا كو ئەو كارە نەمینن ل دەف، پێدڤیە ئەو كەسێن هەنێ دانپێدانێ ب خرابیا خوە بكەن و خرابیا رەفتارێن خوە بزانیت و پاشی رەفتارێن باش ل دەف خوە پەیدا بكەت.
زێدەتر گوت: دەمێ گەنجی دەرفەتا كاری ل دەف كێمتر هەبیت كو شیانێن خوە تێدا ب مەزێخیت كارتێكرنێ ل شیانێن وی دكەت، بۆ نمونە پارێزگەها دهۆكێ رێژا بێكاریێ تێدا یا كێمە، گەنجێن خودان شیان گەلەك یێن هەین بەس دەرفەتا كاركرنێ بو وان گەنجان نینە و كارتێكرن یا ل شیانێن وان كری، بێ گومان رێژا بێكاریێ كارتێكرنێ ل شیانێن گەنجی دكەت كو شیانێن وی د كاری دا كێم ببن.
ل دووماهیێ جڤاكناس هیوا گۆت ژی: ئەو كەسانێن كاردكەن چ تشیت كارتێكرنێ ل شیانێن وان دكەن بۆ نمونە نە گرنگیپێدانا خودانێ كاری ب وی كەسی هەتا وەلێ دهێت كارتێكرنێ ل شیانێن وی دكەن كو وی كاری بهێلیت، هەر دیسان گەنج ب خوە فاكتەرێ سەرەكیە شیانێن وی كێم ببن دەمێ باوەری ب خوە نەبیت و بێ هیڤی دبیت ژ ئایندەیێ كارێ خوە.