دهێتە چاڤەڕێ‌ كرن سوبەهی هەتا شەمبییا بهێت یاریێن گەڕا 17ێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌ ل یاریگەهێ جودا بهێنە ئەنجامدان، دهۆك ل باژێرێ‌ بەسرا و هەرئێك ژ زاخۆ، هەولێر و نەورۆز دێ‌ د ناڤ ئەرد و جەماوەرێ‌ خوە دا شەڕی بۆ سێ‌ خالێن یاریێ‌ و پێشڤەچوون د رێزبەندییا خولێ‌ دا كەن.
دهۆك گەشبینە ریكۆردەكا سەركەفتنا تۆماربكەت
سوبەهی پێنج شەمبی ل دەمژمێر پێنجێ‌ ئێڤاری تیما یانەیا دهۆك ل باژێرێ‌ بەسرا دێ‌ بیتە مێڤانا یانەیا مینا د یارییەكا ب هێز و هەڤڕكی دا، ئەلهۆیێن چیا ئەوێن هەتا دووماهی گەڕ ل سەر ئاست و ئەنجامێن خوە یێن باش بەردەوامە تایبەت هەتا نوكە هەشت سەركەفتن و سێ‌ وەكهەڤی دگەل پێنج خوسارەتی هەنە و ب كۆمكرنا 27 خالان رێزا سێیێ‌ ل سەر لیستا خولێ‌ دهێت، ژلایەكێ‌ دووڤە گۆلپارێزێ‌ تیمێ‌ محەمەد سالح خودانێ‌ 10 كلین شیت هەنە ل رێزا دویێ‌ ل سەر ئاستێ‌ خولێ‌ دهێت وەكو باشترین گۆلپارێز، بۆ یارییا سوبەهی دێ‌ بزاڤێ‌ كەت سەركەفتنا خوە یا نەهێ‌ بینت و رێزبەندییا خوە یا سێیێ‌ پارێزیت، دیسان بشێت بەردەوامییا سەركەفتنان ریكوردەكا نوو تۆماربكەت، لێ‌ بەرانبەر دا تیما مێڤان ژی یا ب سانەهی نابیت ئەوا نوكە دا 17 خال كۆمكرین و رێزا 12ێ‌ دهێت د یارییا بۆری دا تووشی خوسارەتیێ‌ بوو بەرانبەر زاخۆ دێ‌ بزاڤێ كەت تۆلێن خوە ژ دهۆكێ‌ ڤەكەت.
ل دۆر دووماهی بەرهەڤیێن دهۆكێ‌ جاسم محەمەد حاجی رێڤەبەرێ‌ تیمێ‌ بۆ رۆژنامەیا ئەڤرۆ گۆت: سەرباری هەبوونا گڤاشتێن یارییان كو دناڤبەر هەر سێ‌ رۆژان یارییەكە و گەشت ژ دهۆكێ‌ بۆ بەسرا ژ دهۆكێ‌ بۆ بەغدا، لێ‌ ئەم رژدین ب هەر شێوەیەكی بەردەوامیێ‌ بدەینە ئەنجامێن سەركەفتی و پاراستنا رێزبەندییا خوە، وەكو كارگێری هەر تشتەكێ‌ پێدڤی بۆ تیمێ‌ هاتییە بەرهەڤكرن ب هیڤییا وێ‌ چەندێ‌ بشێن سەركەفتنێ‌ بینن. زاخۆ دێ‌ ب پشت گەرمییا جەماوەرێ‌ خوە جەنگیت
ژلایێ‌ خوەڤە تیما یانەیا زاخۆ ل شەمبییا بهێت دەمژمێر پێنجێ‌ ئێڤاری د ناڤ ئەرد و جەماوەرێ‌ خوە دا دێ‌ مێڤاندارییا یانەیا زەورا كەت ئێك ژ یاریێن كۆپیتكێ‌ یێن ڤێ‌ حەفتیێ‌، كوڕێن خابۆری ئەڤە بۆ ماوەیێ‌ چار یارییە ژی بەردەوامە ل سەر دەستڤە ئینانا ئەنجامێن باش و خالان، ب سەركێشییا راهێنەرێ‌ خوە یێ‌ قەتەری تەلال ئەلبلۆشی شیا سەركەفتنا خوە یا شەشێ‌ د خولێ‌ دا بینت و یا چارێ‌ ل دووڤ ئێك پشتی دووماهی خوسارەتییا وێ‌ دگەل یانەیا كارەباد گەڕا 12ێ‌ دا، دێ‌ بزاڤێ‌ كەت دناڤ یاریگەهـ و پشت گەرمییا جەماوەرێ‌ خوە سەركەفتنا حەفتێ‌ بینت و یا سێیێ‌ د ناڤ یاریگەها خوە دا، د نوكە دا تیما كوڕێن خابووری ب 25 كۆمكرینە ژ ڤەرێژا شەش سەركەفتن و حەفت وەكهەڤییان ل رێزا حەفتێ‌ دهێت، گەشبینە سەركەفتنێ‌ بۆ جەماوەرێ‌ خوە بكەتە دیاری، ژلایێ‌ خوە تیما مێڤان یا بەغدایی ب سانەهی نابیت بۆ كوڕێن خابووری ئەوا 26 خال كۆمكرین رێزا شەشێ‌ دهێت و دێ‌ بزاڤێ‌ كەت قەرەبوویا خوسارەتیێن یاریێن بۆری بكەت.
دلژار عەدنان ئەندامێ‌ كارگێرییا یانەیا زاخۆ بۆ رۆژنامەیا ئەڤرۆ دیاركر بوو پشتی خوەجهییا ئاستێ‌ تیمێ‌ ئەو گەشبینن د یارییا ئەڤجارە دگەل زەورا دلێ‌ جەماوەرێ‌ خوە خوەشبكەن و سەركەفتنێ‌ د ناڤ ئەردێ‌ خوە دابینن، ئەركێ‌ تیمێ‌ ب سانەهی نابیت لێ‌ باوەرییا هەیی دێ‌ ئەنجامەكێ‌ باش ب دەستڤە ئینن.
هەولێر و نەورۆز بەرانبەر ئاستەنگێن یانەیێن بەغدایی نە!
هەردو یانەیێن دی یێن كوردستانی سوبەهی پێنج شەمبی دێ‌ یاریێن خوە ئەنجامدەن، تیما یانەیا هەولێر ل دەمژمێر پێنجێ‌ ئێڤار دێ‌ مێڤاندارییا یانەیا ئەمانەت بەغدا كەت، كوڕێن كەلهە و منارە تا رادەیەكی گوهۆڕینێن باش د ئاست و ئەنجامێن خوە دا كرینە، ب چار سەركەفتن و پێنج وەكهەڤییا 17 خال كۆمكرینە و رێزا 11ێ‌ دهێت، بەرانبەر دا تیما ئامانەت بەغدا خودانا 12 خالانە ل رێزا 18ێ‌ دهێت، دبیت مێڤانا هەولێرێ‌ ئاستەنگ نەبیت لێ‌ د تەپاپێی دا هەموو پێشبینی هەنە، ژلایێ‌ خوەڤە ژی یانەیا نەورۆز بەرانبەر تاقیكرنەكا ب هێز دایە خودانا ناسناڤێ‌ وەرزێ‌ بوری یانەیا شورتە، تیما نەورۆز د نوكە 26 خال كۆمكرینە و رێزا چارێ‌ دهێت و دێ‌ شەڕی بۆس ێ‌ خالان كەت پێخەمەت بەردەوامییا پێشڤەچوونێ‌ دا، لێ‌ یانەیا شورتە ئەو تیما ب سانەهی نابیت خالان ژ دەستبدەت هەرچەندە یاری دناڤ ئەرد و جەماوەرێ‌ نەورۆز دایە.
ژ یاریێن دی، رۆژا پێنج شەمبی، تەلەبە- حدود، رۆژا ئەینی، كەرخ- نەجەف، نەفت میسان- نەفت، جەوییە- نەفت ئەلبەسرا، ئەلقاسم- كەربەلا، كارەبا- نەفت ئەلوەسەت.
هەلوەستێ‌ گشتی یێ‌ رێزبەندییا خولا ستێرێن ئیراقێ‌ بڤی رەنگی یە، جەوییە 40 خال سەرێ‌ لیستێ‌ دهێت، شورتە ب35 خال، دهۆك 27 خال، نەورۆز 26 خال، تەلەبە 26 خال، زەورا 26 خال، زاخۆ 25 خال، نەفت 23 خال ژ رێزێن دویێ‌ هەتا هەشتێ‌ دهێن، هەروەسان، نەفت میسان 22خال، حدود 20 خال ، هەولێر 17 خال، مینا17 خال، نەفت ئەلبەسرا 17 خال، نەجەف 17 خال، كارەبا 16خال، كەرخ 14خال، كەربەلا 13 خال ژ رێزا نەهێ‌ هەتا 17ێ‌ دهێن، هەروەسان ، ئەمانەت بەغدا 12 خال، ئەلقاسم 11 خال و نەفت ئەلوەست 7 خال ژ رێزا 18ێ‌ هەتا 20ێ‌ و دووماهیێ‌ دهێن.

شاهۆ فەرید:

د داخویانیەكێ‌ دا د.هاریوان عەبدی سەرۆكێ یانەیا سێمێلێ بۆ رۆژناما ئەڤرۆ نووترین دەنگ و باسێن كۆمەلگەها وەرزشی دیار كرن و گۆت: پشتی جهێ ئاڤاكرنا یاریگەها فوتبۆلێ‌ هاتیە دەستنیشانكرن 48 دونەمێن ئەردی نە كو 30 دونەم دێ بۆ یاریگەهێ بن، هێشتا دەمێ ئاڤاكرنێ نە هاتییە دەستنیشانكرن لێ ل دووڤ ئەوا ئەم هاتینە ئاگەهداركرن دێ زووترین دەم دەستپێكەت، كوژمەیێ پێنچ ملیار و پێنچ سەد ملیۆن دیناران هاتینە خەملاندن، ئەگەر رێك بهێتەدان ژلایێ حكومەتێ ڤە ب كاربینین بۆ وەبەرهێنانێ تێدا بهیًتەكرن دێ بیتە ژێدەرەكێ‌ دارایی یێ‌ باش بۆ یانەیێ و پێدڤی هاریكاریا نابین.
زێدەتر ناڤهاتی گۆت: دیزاینا یاریگەهێ دێ یێ‌ ب شێوەیی نێڤدەولەتی بیت و تارتانێ غاردانێ و یاریێن گورەپان و مەیدانێ یێن تێدا، قۆناغا ئێكێ دو لایان دێ هێنە چێكرن و هەردو كڤان دێ مینن بۆ قۆناغا دووڤدا، جهێ زێدەتری پێنچ هزار پشتەڤانا دێ دناڤ یاریگەهێ دا هەبیت، راستی ئەز ژی دگەل وێ زوریا ئەردی نینم بتنێ بۆ یاریگەهی بیت، دیزاینێ كومەلگەهێ ژلایێ رێڤەبەریا شارەوانیێ‌ هاتیە دانان، بۆ مە هاتیە گۆتن قۆنتەرچیەكێ ژی هاتیەدان بۆ دورستكرنا رابیت، ئەڤ یاریگەهە دێ گەلەك خزمەتا كەنج ولاوێن دەڤەرێ كەت، ئەگەر كومەلگەه هەمی هاتە چێكرن دێ خزمەتا هەمی یاریێن تاك و كوم دابیت.

چاڤەڕێ‌ دهێتە كرن ل دەستپێكا حەفتییا بهێت تیما باسكێت بۆلا یانەیا زاخۆ دو یاریێن چارەنڤیس یێن هەڤڕكیێن خولا پلا نایابا ئیراقێ‌ ئەنجامدەن ژبۆ دەربازبوون بەر ب قۆناغا پلەیی ئۆف ئەوا بڕیارە ژ 11 یانەیان هەشت یانە دەربازبن.
ل دووڤ لیستەیا یاریێن مایی یێن تیما زاخۆ ل پێنجێ‌ ئادارا بهێت دێ‌ بیتە مێڤانا یانەیا حللە، یارییا دویێ‌ بڕیارە ل نەهێ‌ ئادارێ‌ ل هۆلا گرتییا وەرزش و لاوان ل باژێرێ‌ زاخۆ مێڤاندارییا یانەیا غاز ئەلشیمال بكەین د دو یاریێن ئێكلاكەر دا بۆ تیما كوڕێن خابووری.
ب كۆمكرنا 25 خالان زێدەباری خالەكا تازەپێگەهشتییان تیما باسكێت بۆلا زاخۆ ل رێزا حەفتێ‌ دهێت ب ئەنجامدانا 18 یارییان ئەوا 11 یانە شەڕی بۆ هەشت رێزێن ئێكێ‌ یێن دەربازبوون بەر ب قۆناغا دویێ‌ یا پلەیی ئۆف دكەن، ل دۆر یاریێن مایی یێن نوونەرا بەهدینان د داخویانیەكێ‌ دا جوتیار عەلی هاریكارێ‌ راهێنەرێ‌ زاخۆ دیاركر سەرباری نە پشكدارییا هەردو ستێرێن تیمێ‌ محەمەد موحسن و موراد عەلی و زێدەباری راهێنەرێ‌ تیمێ‌ یێ‌ كرواتی میلان نسیج ئەوێ‌ وەكو راهێنەر دگەل هەلبژارتیێ‌ ئیراقێ‌، لێ‌ ئەم بەردەوامبووینە ل سەر راهێنان و بەرهەڤیێن خوە، هەردو یاریێن مایی بۆ مە گەلەك گرنگن و چارەنڤیسن بەر ب قۆناغا دویێ‌، ئەم گەشبینن ب دەستڤە ئینانا پلێتا دەربازبوونێ‌ بەر ب قۆناغا پلەیی ئۆف.
بۆ زانین دیفاع ئەلجەوی ب34 خالان سەرێ‌ لیستێ‌ دهێت، كەرخ ب33 خالان، نەفت ب32 خال، شورتە ب28 خال، حەشد ئەلشەعبی ب28 خال، دیجلە ئەلجامعە ب26 خالان رێزێن دویێ‌ هەتا شەشێ‌ دهێن، زاخۆ ب25 خالان رێزا حەفتێ‌، كارەبا ب هەمان خال رێزا هەشتێ‌ دهێت، حللە ب24 خالان، نەفت ئەلشیمال و غاز ئەلشیمال ب23 و ب22 خالان رێزێن نەهێ‌ هەتا 11ێ‌ دهێن.

ئەڤرۆشاهۆ فەرید:

داخویانیەكێ دا یاریزانێ هێلا ناڤین یێ‌ یانەیا دهۆك هارون ئەحمەد د بۆ رۆژناما ئەڤرۆ دیار كر: ئەگەرێن هاتنا من بۆ یانەیا دهوك و پشكداری د گەل تیما فوتبۆلێ‌ د خولا ستێرێن ئیراقێ‌ دا ب تنێ هاریكارییا تیمێ بكەم لێ‌ پشتی ب دووماهیك هاتنا خولا ئیراقێ ئەگەر یانەیا دالكورد یا سویدی پێدڤی ب من هەبوو دێ ڤەگەرمە وێ‌ یانەیێ‌، ئەز بریارێ ل سەر ئاستێ خوە نادەم كا هاتیە خوارێ یان بلند بوویە، لێ‌ هەردەم بزاڤێ‌ دكەم ئاستێ خوە پێشبێخم و ل سەر شیان و جەستەیا خوە كاردكەم و پێش دئێخم، ئاستێ تیمێ هەتا رادەیەكێ باشە و ئەز پێشبینی دكەم تیما مە دێ ئاستەكێ وێ پتر پێشكەڤیت.
زێدەتر ناڤهاتی گۆت: خولا ستێرێن ئێراقێ گەلەك پێشەكەفتن بخوە ڤە دیتیە ژ وەرزێن بوری تایبەت ژلایێ یاریگەهێ‌ و رێكخستن و هەبوونا سیستەمێ‌ ڤارێ‌ و تا رادەیەكی ژلایێ‌ تەكنیكی ڤە و سوشال میدیایێ ژی ڤە پێشكەفتن خوەڤە دیتیە، تیمێن باش هەنە ڤی وەرزی و نە یا ب ساناهییە وەرزێ‌ ئەڤ سالە، ئەز یێ ل وێ باوەریێ هەكە خودێ تەوفیقا مە بدەت دێ رێزبەندیێن پێشیێ‌ دابین و هیڤی و ئارمانجێن مە ب گەهینە چامپیۆنزا ئاسیا یان قارەمانییەكا دەرڤە.

دوهی ل باژێرێ به‌غدا پشككێشانا قۆناغا 16ێ یا قاره‌مانییا كۆپا ئیراقێ یا فوتبۆلێ هاته‌ كرن، هه‌ر سێ یانه‌یێن كوردستانی زاخۆ، هه‌ولێر و نه‌ورۆز كه‌فتنه‌ به‌ر یانه‌یێن به‌غدایی ئه‌وا‌ ژڤانێ هه‌ڤڕكیێن وێ نه‌ هاتینه‌ دیاركرن.
ل دووڤ پشككێشانێ تیما زاخۆ دێ ل یاریگه‌ها خوه‌ مێڤاندارییا یانه‌یا شورته‌ كه‌ت د یارییه‌كا ئاگرین دا، یانه‌یا هه‌ولێر دێ بیته‌ مێڤانا كه‌رخ و یانه‌یا نه‌ورۆز ژی دێ ل به‌غدا بیته‌ مێڤانا كاره‌با، ژ یاریێن دی، مینا- حدود، نه‌فت ته‌له‌به‌، جه‌وییه‌- نه‌جه‌ف، نه‌فت میسان- ئه‌لكه‌رمه‌، كه‌ربه‌لا- زه‌ورا.
بۆ زانین تیما زاخۆ ده‌ربازبوو ڤێ قۆناغێ پشتی د قۆناغا 32ێ دا ب دو گۆلێن پاقژ سه‌ركه‌فتی ل سه‌ر یانه‌یا عه‌فك، نه‌ورۆز سه‌ركه‌فتن ل سه‌ر یانه‌یا ئه‌لقاسم ئینابوو ب2-1 گۆلان، ژلایێ خوه‌ڤه‌ یانه‌یا دهۆك پلێتا ده‌ربازبوونێ ژ ده‌ستدابوو پشتی ب لێدانێن په‌نه‌لتیێ دگه‌ل نه‌فت ئه‌لمیسان تووشی خوساره‌تیێ بوون ب 7-8 گۆلان ئه‌وا یاری ب گۆله‌كێ وه‌كهه‌ڤبووین.
بۆ زانین ل دووڤ سیستەمێ‌ قارەمانیێ‌ شەش یانە ‌ پێشوەخت ده‌ربازبوونه قۆناغا 16ێ‌ ئەوژی هەولێر، زەورا، شورتە، تەلەبە، جەوییە و كارەبا، ئه‌وێن ل وەرزێ‌ بۆری رێزێن ئێكێ‌ هەتا شەشێ‌ هاتبوون.