هەولێر، قائید میرۆ:

سكرتێرا ئێكەتیا لاوێن دیموكراتا كوردستانێ ئاماژەكر، ئێكەتیا لاوان بۆیە پرەك دناڤبەرا لاوێن كوردستانێ و جیهانێ، چونكە ل چەند سالێن بۆری دا پەیوەندیێن باش هاتینە گرێدان دگەل لاوێن زۆربەیا وەلاتێن جیهانێ و بڕیارە ل نێزیك شاندەكێ ئێكەتیا لاوان سەرەدانا وەلاتێ چینێ بكەت هەروەسا گۆت، ئێكەتیا لاوان دێ ستایلەكێ سەردەمیانە درێژیێ ب خەباتا خوە بدەت.
مەیسەر نهێلی، سكرتێرێ ئێكەتیا لاوێن دیموكراتا كوردستانێ بۆ رۆژناما ئەڤرۆ دیار كر چالاكیێن ئەڤ سالە یێن ئێكەتیا لاوان جوداهی هەبوو ل گەل چالاكیێن سالێن بۆری یێن ب هەلكەفتا 18ی شوباتێ هاتینە گێڕان، چونكە ئەڤرۆ چەندین پیلان دژی مللەت و وەلاتێ مە یێ دهێنە گێڕان و پێدڤیە لاوێن كوردستانێ هشیار بن ژ ئەڤان پیلانێن هەی، بێگومان زۆربەیا نەیارێن كوردان ب رێیا تەخا لاوان دخوازن پیلانێن خوە بجه بینن، لەوڕاژی ئەڤ سالە درووشمێ ئێكەتیا لاوان جوداهی هەبوو ل گەل سالێن بۆری و گۆت: (چونكە ئەم گەهشتینە ڤێ باوەریێ هەكە مە وەلاتەك نیشتیمانەك نەبیت ئەم وەكی مرۆڤ و وەلاكی لاو نەشێین هەبین و چالاكیێن خوە بكەین، هەموو ژیانا مرۆڤی یا گرێدایی وەلاتێ مرۆڤیە هەكە مرۆڤی هەموو تشتەك هەبیت و وەلات نەبیت هەروەكی چ تشت نەیی، بەلێ هەكە مرۆڤ خودان نیشتیمان و وەلاتەك بیت هەموو تشت دێ هەبن).
نهێلی دیار كر ژی كو ئێكەتیا لاوان هەر ژ سەردەمێ هاتیە دامەزراندن هەتا نوكە شیایە ببیتە قوتابخانەك بۆ پێگەهاندنا و كادر و سەركردەیێن لاو، نوكە پڕانیا سەركردەیێن لایەنێن سیاسی ل ئێكەتیا لاوان هاتینە پەروەردەكرن و پێگەهاندن و گۆت: (مرۆڤێن سەنگین و نیشتیمان پەروەر دناڤا رێكخراوا ئێكەتیا لاوێن دیموكراتا كوردستانێ دا هاتینە پەروەردەكرن، هەتا سەرۆك بارزانی چەندین جاران گۆتیە (ئێكەتیا لاوان قوتابخانا نیشتیمان پەروەرایە)، نەك تنێ سەركردەیێن ناڤا پارتی دیموكراتی كوردستان، بگرە هژمارەكا زۆر یا سەركردەیێن لایەنێن دیژی ل قوتابخانا ئێكەتیا لاوان دەستپێكریە و هاتینە پێگەهاندن ئەڤەژی شانازیەكا مەزنە بۆ ئەڤێ رێكخراوا دایك).
مەیسەر نهێلی ئاماژە پێ‌ كر، د چار سالێن بۆری دا ئێكەتیا لاوان پشكداری د چەندین كۆنفڕانس و كۆنگرە و چالاكیێن جیهانی دا كریە و ئەم شیاینە دەنگێ لاوێن كوردستانێ بگەهینینە لاوێن جیهانێ، ل نێزیك دێ شاندەكێ ئێكەتیا لاوێن دیموكراتا كوردستانێ سەرەدانا وەلاتێ چینێ كەت و ل گەل رێكخراوێن لاوێن چینێ دێ پەیوەندیێن خورت هێنە گرێدان و گۆت: (ئەم شیاینە پەیوەندیان ل گەل چەندین رێكخراوێن جیهانی یێن گرێدایی تەخا لاوان گرێ دەین و بووینە پرەك دناڤبەرا لاوێن كوردستانێ و یێن جیهانێ، نوكە ئێكەتیا لاوان یا كار دكەت بۆ گۆهۆڕینا سیستەمێ كاركرنا خوە و ب ستایلەكێ سەردەمیانە دێ درێژیێ دەینە كاروانێ خەباتێ، هەموو ئەو مەترسیێن نوكە ل سەر لاوێن كوردستانێ هەین مە كار ل سەر كریە و دێ بەردەوامیێ ژی دەینێ، چەندین ڤەكۆلین هاتینە كرن لدۆر وان ئاریشەیێن نوكە تەخا لاوان هەنە و لایەنێن پەیوەندیدار هاتینە ئاگەهدار كرن).

دیدار، سالار محەمەد دۆسكی

2-4

خانم فەزیلا سلێمان زێوەی زێدەتر چیرۆكێن هەڤژینێ‌ خوە ل سەر دەمێ‌ شۆرەشا گولانێ‌ ڤەگێران و گۆت: هەڤژینێ‌ من ل گەل (عەریف یاسین) بوو وی دگۆت گەلەك جاران مە چەك بۆ پێشمەرگەی سنور سنور ژ ئیرانێ‌ و بەرەف توركیا و بەرەف ئیراقێ‌ و هەمی ب رێكێن نەقانوونی ڤە دگوهاست وی دەمی مەنزانی هەر مرن هەیە یان نە و ئەو هەمی رۆژ گەلەك سەخت و دژوار بوون هەتا ناڤ تەنگێ‌ بەفر بوو و سڕو سەقم بوو و گەلەك سەقایەكێ‌ نەخوش بوو لێ‌ ڤیان و حەزا كوردینیێ‌ گەلەك ژ هندێ‌ مەزنتر بوو و بتنێ‌ كوردستان د مێشكێ‌ مەدابوو و چ دی نە و مەزانی كورژەكێ‌ خودێ‌ داینە سەر دونیایێ‌ و دێ‌ رۆژەكێ‌ وەغەركەین لێ‌ وەغەركرنا ب سەرفەرازی ژی جهێ‌ سەربلندیێ‌ یە، لەوما زێدەتر ل وەرزێ‌ زڤستانێ‌ مە چەك بۆ پێشمەرگەی ژ ئیرانێ‌ ڤە دگوهاستە ئیراقێ‌ بۆ پێشمەرگەی و چەكێ‌ سڤك و گران و هەمان دەم بەردەوام ل گەل گرۆپێن پێشمەرگەی و ئەنجامدانا چالاكیان دژی حوكمەتا بەعس و ئەڤە بەردەوام بوو هەتا شەرێ‌ ئیراق و ئیرانێ‌ و زێدەتر چالاكیێن پێشمەرگەی بەرفرەه بووین ل دەڤەرێ‌ و زێدەتر دەڤەر ئازاد بووی و كەفتیە دەستێ‌ پێشمەرگەی، هاتن و چوونا پێشمەرگەی ژ ئیرانێ‌ بۆ ئیراقێ‌ خوشتر لێ‌ هات و گەلەك جاران پسمامێ‌ من دا هێتە گوندی و هەمان دەم ژی پێشمەرگە گەلەك ب هشیاری دهات و گەلەك جاران ب شەڤ دا بەرەكی هاڤێنە مالا مە و برایێ‌ من دا دەركەڤیت و دا بێژنێ‌ ئەم پێشمەرگەی نە و هەمان دەم پێشمەرگە نەچوو هەمی مالان و بتنێ‌ مالەك نەبا باوەری پێ‌ نەهاتبا چونكە وی دەمی گەلەك مرۆڤێن خائین ژی هەبوون و پێشمەرگە گەلەك ب هشیاری هاتن و چوون دكرن و گەلەك جاران من خوارن بۆ پێشمەرگەی چێكریە و بریە و دەمێ‌ چوونێ‌ دا كولانەكێ‌ را چم مرۆڤەكی بینم و من خوە ڤەدشارت هەتا ئەو زەلام بەرزە ببا و شنی من خوارن بۆ پێشمەرگەی دبر و گەلەك جاران دا چینە ناڤ رەزی دا پێشمەرگە هێتە ناڤ رەزی و دا خارنێ‌ دەینێ‌ و نەبتنێ‌ خوارن و بەلكو هەر تشتەكێ‌ پێدڤی یێ‌ رۆژانە مە بۆ پێشمەرگەی دابین دكر و پێشمەرگەی مال هەبوون ئەوێن باوەری پێ‌ دهات و زێدەتر ئەوان چاڤدانا وی پێشمەرگەی دكر وی دەمی مەزانی ئەڤە كیش عەشیرەت و كیش گوندە بتنێ‌ مە خزمەتا پێشمەرگەی دكر و نە زێدەتر، ڤیان و حەزا كوردینیێ‌ ژ هەر تشتەكی مەزنتر بوو.
هەمان خانم گۆتژی: هەڤژینێ‌ من گەلەك شەر و داستانێن پێشمەرگیێن بناڤ و دەنگ پشكدار بوویە و رەنگە گەلەكا ئەز نوزانم یان نەمابنە ل بیرا من و بیرا هەڤالێن وی دهێت لێ‌ ئەوێن وی گۆتین و من بیر دهێت، شەرێ‌ كەلا شێخو ل گەل تاهر زێوەی بوو و دەمێ‌ چوویە قەندیلی دەنگ و باسێ‌ شەهید بوونا وی هات بوومە و گەلەك پێشمەرگە دهاتنە دەف مە و دگۆتن ئەم نیاسین و باوەربكە یێ‌ شەهید بووی و نە گۆتنە مە لێ‌ مەزانی كو یێ‌ وەبێژن و هەڤژینێ‌ من ل گەل سەید سەفو و پێشمەرگەكێ‌ دی بۆ ماوێ‌ 40 رۆژا مانە دناڤا هندەك كەڤران و كوپان را و حوكمەتێ‌ دورپێچ كربوون و گۆت پێشتر مە نان قوتا و هویرك مە دكرە پاخلێن خوە دا و مە خوار و مە گیا دخار ژ برسا دا و (40) رۆژا ئەم ئاسێ‌ بووین و هەمی خەلكی گۆت شەهید بوویە و هەشت هەیڤان مە چ دەنگ و باسێن وی نەزانین و مانا وا دناڤا وی كەڤری دا گەلەك پێشمەرگە ژ هێرشێن دوژمنی قورتالكرن، وی دەمی هەڤالێن وا ل پشت بوون.
هەمان خانم گۆتژی: رۆژا دەواتا من بەری هەوا ئەنفالا بوو و گەلەك یا بزحمەت بوو و هەما ب شەڤ ڤەگوهاستم و هەر كەسەكێ‌ نەزانی و بێ‌ دەوات و بێ‌ دەست قوتان و هەمی بێ‌ دەنگی بوو و دەمێ‌ ب شەڤ ڤەگوهاستیم، رۆژا پاشتر شنی خەلكێ‌ گوندی زانی هاتیمە ڤەگوهاستن و رۆژا پاشتر گوندێ‌ زێوێ‌ هاتە دورپێچكرن و حوكمەتێ‌ گۆتی شڤێدی پێشمەرگەكی ل گوندی دەواتا خوە كریە و ئێكسەر هەڤژینێ‌ من چوو ناف بەرواری یا و حەفتیەكێ‌ نەهاتە مال.
خانم فەزیلا گۆت: ل هەوا ئەنفالان (47) زەلام ل گوندێ‌ زێوێ‌ هاتنە دەستەسەركرن و هاتنە بێ‌ سەرۆشینكرن كو برایەكێ‌ من ل گەل حەفت پصمامێن من هاتنە بێ‌ سەرۆشینكرنن ل دەمێ‌ ئەنفالان ژی من چ زارۆك نەبوون وی دەمی بتنێ‌ بووم و خودێ‌ زارۆك دامە و وغەركر و دەمێ‌ ئەو زارۆك فن و نێزیك دا ئەو زارۆك خودێ‌ دەتە مە، پێشمەرگەی چالاكیەكا لەشكری هەبوو و داخاز هاتەكرن كو هەر رێكخراوەكا پێشمەرگەكی كەسەك بهێتە ژێگرتن و بۆ وێ‌ چالاكیێ‌ بهێـە بەرهەفكرن و رێكخراوا هەڤژینێ‌ من زەلامێ‌ من هاتە هەلبژارتن و ئەو چالاكی یا پێشمەرگەی ل قەندیلی بوو و هەڤژینێ‌ من خواست نەچیت و گۆتێ‌ هەڤژینا من یا نەخوشە و ئەوا گۆتێ‌ ڤێت تو بێی و هەڤژینێ‌ من چوو و گۆت ئەگەر خودێ‌ زارۆكەك دامە و كور بوو دێ‌ ناڤێ‌ وی كەینە (مەنال) و ئەو زارۆك خودێ‌ دامن و هەر ئێكسەر وەغەركر و پشتی (12) سالان جارەكا دی خودێ‌ زارۆك دانە مە.