دهێتە چاڤەڕێ‌ كرن ئەڤرۆ تیما یانەیا سەنحاریب ب كەڤیتە د هەڤڕكیێن قارەمانییا ئیراقێ‌ بۆ یارییا ڤۆلی بۆلێ‌ ل سەر ئاستێ‌ كچان ئەوا دێ‌ هۆلا گرتییا یانەیا ئەكادی ل هەولێرا پایتەخت مێڤاندارییا وێ‌ كەت.
ل دۆر بەرهەڤی و هیڤی ئۆمێدێن نوونەرا پارێزگەهێ‌ راهێنەرێ تیما سەنحاریب هەكار بەرقی بۆ رۆژنامەیا ئەڤرۆ گۆت: بەرهەڤیێن مە گەهشتینە ئاستەكێ‌ باش و ئەڤرۆ د بەرهەڤین بۆ هەڤڕكییا ناسناڤی بكەین سەرباری گەلەك یانەیان پێشتری مە بەرهەڤی كرینە ژبەكو یانەیا سەنحاریب ب تیما باسكێت بۆلێ‌ ڤە ژی یا گرێدایی بوو، لێ‌ هەمی یاریزانێن مە د ئاستێ‌ پێدڤی دانە و ژێ‌ رازیمە، پشكدارییا مە بۆ پاراستنا ناسناڤێ‌ خوەیە ئەڤەژی ب سانەهی نابیت ژبەركو هەر یانەكا بەرانبەری مە یاریێ‌ بكەت دێ‌ بهێز و هەر بزاڤەكێ‌ ناهێلیت ئەم خالان تۆماربكەین.
ژلایەكێ‌ دووڤە ناڤهاتی دیار كر ئەو ئاریشەیا هەبوونا دو یاریزانێن دگەل مە دا بەری ماوەكی فیدارسیۆنا ڤۆلی بۆلا ئیراقێ‌ رێك دابوو ئەم مفایی ژ دو یاریزانێن یانەیەكا هەولێری وەربگریت لێ‌ پشتی گوهۆڕینێن ئیداری یێن فیدارسیۆنێ‌ ئەوێن نوو ڕەدكرینە دگەل مە بن ئەڤچەندە بوویە جهێ‌ نەرازیبوونا مە و ئەم رژدین ل سەر مافێ‌ خوە و دیارە ژی ئەو یانەیێن پشكدار ژی ئەڤ پێنگاڤە هاڤێتییە ژبەر لایەنێ‌ دەرۆنی كو كارتیكرنێ‌ ل سەر تیما مە بكەت ئەم ناهێلین و دڤیابا فیدارسیۆنا ناڤهاتی رێنما بەری هەیڤەكێ‌ دیاركربان نەك بەری قارەمانیێ‌ ب دو رۆژان.
هەكار بەرقی گەشبینی و رژدییا خوە دیاركر تیما وان دێ‌ شەڕی بۆ ناسناڤی كەت و گۆت: پلان و بەرنامەیێ‌ مە یێ‌ پشكداریێ‌ د قارەمانییا ئیراقێ‌ دا پاراستنا ناسناڤێ‌ خوەیە سەرباری ب سانەهی نینە ژبەركو یانەیێن دناڤ هەڤڕكییان دا ژی هیڤیێن هەین، لێ‌ تیما مە ب كچێن پارێزگەهێ‌ خودان شیان و شارەزانە لەوما ب كارەكێ‌ كۆم یێ‌ كادرێ‌ راهێنانێ‌، یاریزان و كارگێرییا یانەیێ‌ گەشبینن ب گەهینە ئارمانجا خوە و ب سەرفەرازی وەكو نوونەرا پارێزگەها دهۆكێ‌ ناسناڤی ب دەستڤە بینن.

ژبۆ ساخكرنا بیرەوەرییا ریفراندۆما سالا 2017ێ‌ و دوپاتكرن ل سەر مافێ‌ گەلمێ‌ كوردستانێ‌، ب چاڤدێری و پشتەڤانییا د. عەلی تەتەر پارێزگارێ‌ دهۆكێ‌ نوونەراتییا دهۆك یا لژنەیا ئۆلمپی دێ‌ كۆمەكا چالاكیێن وەرزشی ل سنۆرێ‌ پارێزگەها دهۆك و ئیدارەیا سەربەخوەیا زاخۆ رێكئێخیت ئەوا بڕیارە ل دەمژمێر نەهی سپێدێ‌ هەتا شەشێ‌ ئێڤاری بەردەوامبن.
ل دووڤ بەرنامەیێ‌ هاتیە دانان ئەوا دێ‌ چەندین یاریێن وەرزشی ب خوەڤە گریت، ژ وانا ئەنجامدانا هەڤڕكیێن جۆدۆیێ‌ ل دەمژمێر نەهی سپێدێ‌ ل هۆلا گرتییا یانەیا ئاكرێ‌، ڤۆلی بۆل ل دەمژمێر 11:30 یاریگەها پەیمانگەها وەرزشییا دهۆكێ‌، یارییەكا هەڤالینی یا فۆتسالێ‌ دناڤبەرا تیما كورتەبالا و تیما كچان یا كۆلیژا پەروەردەیا چەستەیی و زانستێن وەرزشی ل زانكویا دهۆك دەمژمێر 12ێ‌ نیڤرۆ ل هۆلا گرتییا كۆلیژا ناڤهاتی هێتە كرن، دەمژمێر دو یێ‌ نیڤرۆ ل ئاكرێ‌ یارییا بادمینتۆنێ‌ هێتە كرن، ل زاخۆ دێ‌ نیشاندانێن یارییا لەشجوانیێ‌ هێنە دیتن، هەروەسان ل دەمژمێر سێ‌ بەری ئێڤاری سێ‌ چالاكیێن جودا ل باژێرێ‌ دهۆك هێنە ئەنجامدان ئەوژی، ل بنگەهێ‌ لاوێن دهۆكێ‌ یارییا شەترەنجێ‌، تەپا مێزێ‌ ل یانەیا دهۆك، تەپا پێی و نیشاندانێن یاریێن تایكواندۆیێ‌ ل یاریگەها یانەیا گارە هێنە كرن.
دیسان درێژەپێدانا فەستیڤالا وەرزشی بۆ پشتگێرییا ریفراندۆمێ‌ دێ‌ بڤی شێوەیی بەردەوامبیت، ل دەمژمێر چارێ‌ ئێڤاری چەند چالاكیێن وەرزشی ل جهێن جودا هێنە كرن بڤی رەنگی، پاركا نەورۆز دێ‌ مێڤاندارییا یاریێن جەنگی یێن كیك بۆكسێنگ، تایكواندۆ، تایكوانچیتسۆ، كۆنگفۆ و كیۆكۆشینگایی، ل یانەیا دهۆك یارییەكا باسكێت بۆلێ‌، ل هۆلا مەلەڤانیان یا فێنس خولا راهێنانێ‌ هێتە كرن، ل یاریگەها بچووك یا پیرس یارییەك دناڤبەرا دێرینێن دهۆك سێمێلێ‌ بیت دیسان ل باژێرێ‌ زاخۆ دێ‌ یارییا باسكێت بۆلێ‌ هێتە كرن و یاریگەها سێمێل دێ‌ مێڤاندارییا چەند یارییان كەت، هەروەسان د بەرنامەیێ‌ چالاكییاندا دەمژمێر پێنجێ‌ ئێڤاری رێپیڤانەكا پایسكلان ژ ئەنجوومەنێ‌ پارێزگەهێ‌ بۆ پاركا نەورۆز هێتە كرن، هەروەسان نیشاندانێن یارییا باسكێت بۆلێ‌ و چەند چالاكیێن دی ژی هێنە ئەنجامدان، دیسان دهەمان دەمدا ل زاخۆ دێ‌ یارییا خوەلێگدانێ‌ هێتە كرن.
د. ئەحمەد قاسم سەرۆكێ‌ نوونەراتییا دهۆك یا لژنەیا ئۆلمپی ئەڤ چالاكییە ب فەستیڤالەكا تایبەت و گرنگ دا زانین و دیاركر ژبۆ ساخكرنا بیرەوەرییا ریفراندۆمێ‌ پێخوەشحالن ب ئەنجامدانا چەند چالاكیێن وەرزشی ل سنۆرێ‌ دەڤەرا بەهدینان و ئەڤ پێنگاڤەك بۆ دەربرینە ل سەر پیرۆزییا ریفراندۆمێ‌ و دۆپاتی ل سەر بەلێ‌ یا وەرگرتنا مافێن گەلكێ‌ كوردستانێ‌.

بڕیارە ئەڤرۆ د چارچووڤێ‌ فەستیڤالا یاریێن وەرزشی یێن سەخكرنا بیرەورەییا ریفراندۆمێ‌ ئەوا دێ‌ ژلایێ‌ نوونەراتییا دهۆك یا لژنەیا ئۆلمپی سەرانسەری پارێزگەها دهۆك و ئیدارا سەربەخوەیا زاخۆ ب ئەنجامدانا چەند چالاكییان هێتە كرن، ژ وانا ب دووماهی هاتنا خولا راهێنەران بۆ یارییا مەلەڤانییان ئەوا بۆ ماوەیێ‌ سێ‌ رۆژە ژلایێ‌ فیدراسیۆنا پارێزگەها دهۆكێ‌ یا یارییا ناڤهاتی ب هەڤكاری دگەل نوونەراتییا دهۆك هاتییە رێكخستن.
ژبۆ زێدەتر زانیاری كیڤی خەلەف سكرتێرێ‌ فیدارسیۆنا مەلەڤانییان ل پارێزگەهێ‌ بۆ رۆژنامەیا ئەڤرۆ گۆت: ل دووڤ بەرنامێ‌ مە یێ‌ سالانە ژبۆ بەرهەڤكرنا راهێنەرێن ئەكادیمی و شارەزا خولەكا راهێنانێ‌ ب پشكدارییا 25 راهێنەرێن پارێزگەهێ‌ و ئیدارا سەربەخوە ل هۆلا مەلەڤانگەها ڤینێس هاتبوو رێكخستن ب دانا باوەرنامەیا سی ئەوا ژلایێ‌ وانەبێژێ‌ نێڤدەولەتی د. وەلید سالم ب شێوەیێ‌ تیۆری و پراكتیكی ل سەر دووماهی پێشهاتە و وەرگرتنا زانستی یا فێركرنێ‌ دهاتە شرۆڤەكرن، هەروەسان هەر ئێك ژ د. یوسف رەشید هەڤكارییا زمانی بوو، د. وارهێل عاسم وانەبێژێ‌ دەرۆنی، م. هۆگر لەزگین وەكو هاریكار و زمان وەرگێر و د. دلشاد عەبدولئەمیر وانەیێن هاوارهاتنا دەستپێكی بۆ پشكداران شرۆڤەدكر.
ژلایەكێ‌ دووڤە ناڤهاتی گۆت: پێنەڤێت پشكدارییا 25 راهێنەران پێنگاڤەكا گرنگە بۆ پێشكەفتنا وەرزشا مەلەڤانییان ل پارێزگەها دهۆك و ئیدارا سەربەخوە وەكو درێژەپێدانە د بەردەوامییا خولێن مە یێن راهێنانێ‌ دا و ئەڤ خولە بۆ جارا دویێ‌ یا باوەرنامەیا سی دهێتە ڤەكرن، وەكو فیدراسیۆنا پارێزگەهێ‌ ب هەڤكارییا نوونەراتییا دهۆك گەشبینن دێ‌ پێنگاڤێن باشت هێنە هاڤێتن ژبۆ بەرفرەهكرنا بنیاتێ‌ یاریێ‌ و ئاستێ‌ یاریزانی ژی پێشكەڤیت.

ستێرێ‌ ئنگلتەرا و هێرشبەرێ‌ یانەیا بایرن میۆنخ یا ئەلمانی هاری كین چەند هژمارێن سەرنجراكێش دگەل یانەیا خوە تۆماركرن پشتی شیایین سەركەفتنەكا مەزن ل سەر مێڤانا خوە بۆخۆم ب حەفت گۆلێن پاقژ ژ چارچووڤێ‌ گەڕا پێتجێ‌ یا خولا بۆندسلیگایێ‌.
ب تۆماركرنا سێ‌ گۆلان و هاتریك هاری كین بوو ئێكەم یاریزانێ‌ بایرنێ‌ حەفت گۆلان ژ پێنچ یارییان تۆماربكەت و نمرا پیڤایی یا ستێرێ‌ بەرێ‌ یێ‌ بافاری جیرۆ مۆلەر بشكێنیت، هەورەسان ئێكەم یاریزانە د دیرۆكا خولا ئەلمانیا دا دبیتە ئەگەرێ‌ تۆماركرنا 10 گۆلان د پێنچ گەڕان دا، حەفت گۆل تۆماركرن و سێ‌ بۆ هەڤالێن خوە چێكرینە.
دیسان هاتریكا وی یا دگەل یانەیا بۆخۆم دبیتە یاریزانێ‌ چارێ‌ یێ‌ ئنگلتەرایێ‌ د خولا ئەلمانیا دا تۆماربكەت پشتی كیڤین كیغان دگەل هامبۆرگ، تۆنی وودكۆك دگەل كۆلن و جادۆن سانچۆ دگەل بورۆسیا دۆرتمۆند، هەروەسان ئەڤ هاتریكە بوو ئەگەر دۆبارە هاری كین ڤەگەڕێت پشتی دووماهی هاتریك ل 2017ێ‌ دگەل یانەیا خوە تۆتنهام د خولا ئنگلتەرایێ‌ دا ئینایی، بۆ زانین یاریزانێ‌ ناڤهاتی ب كۆژمەیێ‌ 100 ملیۆن یۆرۆیان هاتییە دناڤ یانەیا ئەلمانی دا.

یاریزانێ‌ گەنج و تیما لاوێن یانەیا زاخۆ یا تەپا پێی سیداد حەجی باجلۆری شیا هەرزو جهێ‌ خوە دناڤ رێزێن هەلبژارتیێ‌ ئیراقێ‌ یێ‌ لاوان دا بكەت پشتی شیایی د هەڤڕكیێن وەرزێ‌ بۆری یێن خولا پلا نایابا ئیراقێ‌ دا ببیتە جهێ‌ باوەرییا راهێنەرێ‌ ئیراقێ‌ عیماد محەمەد.
بابێ‌ سیدادی كو ئێك ژ وەرزشڤانێن دێرینێن پارێزگەها دهۆكێ‌ یە بۆ رۆژنامەیا ئەڤرۆ گۆت: د نوكە دا سیداد یێ‌ پشكدارە د كەمپێ‌ راهێنانێ‌ یێ‌ هەلبژارتیێ‌ لاوێن ئیراقێ‌ دا ئەوا ل باژێرێ‌ بەغدا دهێتە كرن پشتی ژلایێ‌ راهێنەرێ‌ وی عیماد محەمەد هاتییە داخوازكرن، ئەڤچەندە ژی دەرئەنجامێ‌ ئاستێ‌ و شیانێن وی دگەل یانەیا زاخۆ د خولا پلا نایاب دا بوو، دیسان كادرێ‌ راهێنەری پێدڤی نە دەیت پشكداری تاقیكرنان بیت ژبەركو ئاستێ‌ وی د زانی ب گۆرەیی دیتنا چەند یاریێن د خولێ‌ دا، پشكدارییا وی دگەل هەلبژارتیێ‌ لاوێن ئیراقێ‌ ئێك ژ هیڤی و ئارمانجێن سیدادی بوو.
ژلایەكێ‌ دووڤە حەجی باجلۆری گۆت: ل سەر ئاستێ‌ تازەپێگەهشتییان سیداد دگەل تیما یانەیا دهۆك بوو، لێ‌ ژبەر نەبوونا تیما لاوان بەر ب یانەیا زاخۆ چوو و دەلیڤەكا باش بۆ پەیدابوو، سەرباری هاتنۆچوونێ‌ لێ‌ پشتەڤانییا یانەیا زاخۆ شیا بەردەوامبیت ل سەر راهێنانان و بلندكرنا ئاستێ‌ خوە بدەت، د نوكە دا یاریزانێ‌ یانەیا زاخۆ یە بۆ وەرزێ‌ بهێت ژی دێ‌ پشكداریێ‌ كەت.

دهێتە چاڤەڕێ‌ كرن ئەڤرۆ تیما تازەپێگەهشتیێن یانەیا پیرس ل یاریگەها ئارارات بەرانبەر دەستكەفتەكێ‌ دیرۆكە یێ‌ كوردستانێ‌ یە دەمێ‌ ل دەمژمێر 3:30 ئێڤاری دبیتە مێڤانا یانەیا هەولێر، ژ چارچووڤێ‌ یارییا پێش دووماهییا خولا كوردستانێ‌ یا تەپا پیێ بۆ ژیێن ل بن 18ی سالی دا هێتە ئەنجامدان.
بۆ زانین تیما پیرس و زاخۆ دەربازبوونا خوە بۆ خولا پلا نایابا كوردستانێ‌ مسۆگەر كربوون، ئەوا ب فەرمی د ماوەیێ‌ هەڤڕكیێن خولێ‌ دا رێزێن ئێكێ‌ و دویێ‌ یێن هەر كۆمەكێ‌ هاتبوون، خولا كوردستانێ‌ ب پشكدارییا 20 یانەیێن هەرێمێ‌ بووینە و هاتبوونە بەلاڤكرن ل سەر چار كۆمان و یاریێن وان ب شێوەیێ‌ خول ئێك قۆناغ د هاتنە كرن و دو یانە ژ هەر كۆمەكێ‌ دەربازبوونە قۆناغا دووماهیێ‌.
راهێنەرێ‌ پیرس هەرژەنگ ئەبابەكر گەشبینییا خوە دیار كر تیما وی ئاستەكێ‌ باش نیشان بدەت و ئەركێ‌ تیمێ‌ ب سانەهی ژی نابیت و ئەوچەندە ژی خویاكر یا گرنگ شیاینە تیمەكا رێكخستی و ب هێز درۆست بكەن ژ كوڕێن باژێرێ‌ خوە و پشت گەرمییا خوونێن گەرم یێن یاریزانان بكەن ئەوێن بۆ ماوەێ‌ چەند سالە ل ئەكادیمییا پیرس كارەكێ‌ رێكخستی دهاتە كرن.
بڕیارە ئەڤرۆ یارییا دویێ‌ یا قۆناغا پێش دووماهیێ‌ دناڤبەرا هەردو یانەیێن شۆجە و پێشمەرگەیا سلێمانیێ‌ هێتە كرن.