بارزان، رەمەزان زەكەریا:

ل سنوورێ دەڤەرداریا مێرگەسۆرێ‌ ل دەڤەرا بارزان، دەڤەرداریا مێرگەسۆرێ‌ ب هەڤكاری ل گەل زانكۆیا سۆران كار ل سەر ئەنجامدانا كۆنفرانسێ‌ ژینگەهێ دكەن ل مێرگەسۆر و ئەنجامدانا ڤەكۆلینێن زانستی و دروستكرنا ناشیۆنال پاركا جیهانی ل دەڤەرێ.
غەفور ئەحمەد، دەڤەردارێ مێرگەسۆر ل دەڤەرا بارزان بۆ ئەڤرۆ گۆت: «شاندەكێ زانكۆیا سۆران ب سەرۆكاتیا پرۆفیسۆرێ‌ هاریكار دكتۆر شێروان شەریف قورتاس، سەرۆكێ زانكۆیێ و شاندێ د گەل دا سەردانا دەڤەرداریا مێرگەسۆر كر و د كۆمبوونەكێ دا بەحسێ دروستكرنا هەڤكاریێ و دارشتنا پلانەكا مەزن هاتە كرن بۆ چەندین كارێن هەڤپشك د ناڤبەرا زانكۆیا سۆران و دەڤەرداریا مێرگەسۆرێ‌ دا».
ناڤهاتی گۆتژی: «د كۆمبوونێ‌ دا بەحسێ كارێ هەڤپشك و ئەنجامدانا كۆنفرانسێ‌ زانستیێ‌ جیهانی ل سەر ژینگەهێ ل دەڤەرداریا مێرگەسۆرێ‌ هاتە كرن، هەروەسا كاركرن ب هەڤپشكی ل سەر دروستكرنا ناشیۆنال پاركەكا جیهانی ل دەڤەرێ‌ و ئەنجامدانا چەندین ڤەكۆلینێن زانستی».

دهۆك، لەزگین جوقی:

دەزگەهێ‌ خێرخوازی یێ‌ بارزانی ل گەل رێكخراوەكا نەرویجی دەرمان و پێدڤیێن نۆشداری ب گوژمێ‌ 16 ملیۆن دۆلاران بۆ ساخلەمیا پارێزگەها دهۆكێ‌ دابین دكەن، دیسا هەموو پارێزگەهێن هەرێما كوردستانێ‌ دێ‌ ژ ڤێ‌ هاریكاریێ‌ مفادار بن.
د. ئەفراسیاب موسا، رێڤەبەرێ‌ گشتی یێ‌ ساخلەمیا پارێزگەها دهۆكێ‌ د كۆنگرەكێ‌ رۆژنامەڤانی دا دیار كر، ئەو دەرمان و پێدڤین نۆشداری یێن دوهی بۆ وان هاتینە رادەستكرن ب گوژمێ 16 ملیۆن دۆلاران بووینە و ب رێژەیا 80% دەرمانێن نەخۆشیا پەنجەشێری نە و گۆت: «دەزگەهێ‌ خێرخوازی یێ‌ بارزانی و رێكخراوا ماین یا نەرویجی شیاینە هەڤكاریا ساخلەمیێ‌ بكەن، ئەم هیڤیدارین ئەڤ جۆرە هاریكاریە د بەردەوام بن».
موسا ئەحمەد، سەرۆكێ‌ دەزگەهێ‌ خێرخوازی یێ‌ بارزانی د وی كۆنگرەیێ‌ رۆژنامەڤانی دا گۆت: «35 كەمپێن ئاوارە و پەنابەران ل هەرێما كوردستانێ‌ هەنە و پتر ژ ملیۆن ئاوارە و پەنابەر ل هەرێما كوردستانێ‌ ماینە و هاریكاریێن رێكخراوان كێمبووینە و حوكمەتا هەرێما كوردستانێ‌ و خەلكێ‌ كوردستانێ‌ ب گشتی پێگیر بووینە ب مافێن مرۆڤی و هەتا ئاوارە و پەنابەر مابن دێ‌ هەڤكاریا وان كەن، ئەركێ‌ بەغدایە هەڤكاریا ئاوارەیان بكەت، ژ بەركو گەلەك بارگرانی ل سەر دام و دەزگەهێن حوكمەتا هەرێما كوردستانێ‌ چێبوویە».
موسا ئەحمەد گۆتژی: «پێدڤیە وەزارەتا كۆچ و كۆچبەران ل ئیراقێ‌ هاریكاریا ئاوارەیان بكەت، چونكی ئاوارە وەلاتیێن ئێراقێ‌ نە و ئەركە ل سەر ئیراقێ‌ هەڤكاریا وان بكەت هەتا ڤەدگەڕنە سەر جهێن خوە، هیڤدارین سالا بهێت ئاوارە د ڤێ‌ رەوشی دا نەمینن».
د. لەزگین، نوونەرێ‌ رێكخراوا ماین یا نەرویجی دیار كر، ئەڤ جۆرە هاریكاریە دێ‌ د بەردەوام بن و پلان وەسایە هەتا دووماهیا ئەڤ سالە ب گوژمێ‌ 30 ملیۆن دۆلاران دەرمان و پێدڤیێن نۆشداری بەگەهنە كوردستانێ‌.

ئامێدیێ، مەحمود نهێلی:

ژ بۆ گێرانا فیستەڤالەكێ ل سنوورێ دەڤەرداریا ئامێدیێ ل بیرەوەریا وەغەكرنا هەلبەستڤان بەكر بەگێ ئەرزی بەرهەڤی دهێنە كرن.
وارشین سەلمان، دەڤـــــــەردارێ ئامێدیێ بۆ رۆژناما ئەڤرۆ دیار كر، وان ل گەل ئەمیر عەلی، رێڤەبەرێ گشتی یێ رەوشەنبیری و هونەری ل پارێـــزگەها دهۆكێ و شانــــدەكێ د گەل دا بــــەحسێ بەرهەڤیێن دوومــــاهیێ كرن، ئەوێن بۆ گێڕانا فیستەڤالا بەكر بەگێ ئەرزی دهێنە كرن، كو بڕیارە ل ناوچەداریا بامەرنێ ل سنوورێ دەڤەرداریا ئامێدیێ بهێتە گێــڕان.
وارشین سەلمان گۆت: «مە هەردو لایان ساخكرن و بیرئینانا بەكر بەگێ ئەرزی هەلبەستڤانێ ناڤدارێ دەڤەرێ و دیاركرنا لایەنێن ڤەشارتی یێن بــەرهــەم و ژیــانــا وی ب گرنـگ زانین، ب گێرانا ڤێ فیستەڤالێ، پشكەكا زۆرا ژیان و بەرهەمێن ڤی هەلبەستڤانێ دەڤەرێ دێ‌ هێتە ئاشكراكرن، دیسا یا د شیانێن مە دا بیت دێ هاریكار بین بی ساخكرنا بیرەوەریێن هەلبەستڤانان».

پەیڤدارێ وەزارەتا شەهید و ئەنفالكریان ئاشكرا كر، بڕیارا سەرۆكایەتیا جڤاتا وەزیران ل دۆر ئاڤاكرنا شوقەیان بۆ كەسوكارێن شەهیدان كەفتیە د بیاڤێ بجهئینانێ دا و ژ نوكە وێڤە پارچەیێن ئەردی ل سەر خێزانێن شەهیدان ناهێنە بەلاڤكرن.
عادل حەمە سالح، پەیڤدارێ وەزارەتا شەهید و ئەنفالكریان بۆ رۆژناما ئەڤرۆ دیار كر، وەزیرێ شەهید و ئەنفالكریان پێشنیارا ئاڤاكرنا شوقەیان بۆ كەسوكارێن شەهیدان پێشكێشی سەرۆكایەتیا جڤاتا وەزیران كر و گۆت: «پشتی هاتیە پەسەندكرن رێكارێن بجهئینانا ڤێ بڕیارێ د دەمێ نوكە دا كەفتیە د بیاڤێ بجهئینانێ دا و وەزارەتا شەهیدان ل گەل دەستەیا وەبەرهێنانێ هەماهەنگیێ دكەت بۆ ئاڤاكرنا شوقەیان و پشتی تەمامبوونا رێكاران دەست ب ئاڤاكرنا شوقەیان دێ هێتە كرن».
عادل حەمە سالح گۆتژی: «ژ نوكە وێڤە هەر خێزانەكا شەهیدی بڕیارا پارچەیێن ئەردی بۆ بهێتە دەركرن ناهێتە بجهئینان، بەروڤاژی ل جهێ پارچەیێن ئەردی دێ شوقە بۆ هێنە ئاڤاكرن و ل سەر كەسوكارێن سەربلندێن شەهیدان هێنە بەلاڤكرن».

لەزگین جوقی:

قایمقامێ‌ قەزا سێمێلێ‌ راگەهاند، ب رێژا 60% پرۆژەیێن وەبەرهێنانێ‌ یێن پارێزگەها دهۆكێ‌ ل قەزا سێمێلێ‌ دهێنە بجهئینان و نوكە 120 پرۆژەیێن وەبەرهێنانێ‌ ل سێمێلێ‌ هەنە و گۆت: مەزنترین پرۆژەیێ وەبەرهێنانێ‌ یێ‌ خودانكرنا مریشكا ل قەزا سێمێلێ‌ هاتیە دانان و مەزنترین پرۆژەیێ‌ خۆدانكرنا چێلا ل رۆژهەلاتا ناڤەراست ل دەڤەرا سێمێلێ‌ دهێتە دروستكرن.

خەلیل مەحمود، قایمقامێ‌ قەزا سێمێلێ‌ بۆ رۆژنامەیا ئەڤرۆ دیار كر، پرۆژەیێن وەبەرهێنانێ‌ یێن گەلەك گرنگ ل دەڤەرا سێمێلێ‌ دهێنە چێكرن، نوكە ل سەر ئاستێ‌ هەموو عیراقێ‌ مەزنترین پرۆژەیێ وەبەرهێنانێ‌ یێ‌ خودانكرنا مریشكا ل قەزا سێمێلێ‌ هاتیە دانان و مەزنترین پرۆژەیێ‌ خۆدانكرنا چێلا ل رۆژهەلاتا ناڤەراست ل دەڤەرا سێمێلێ‌ دهێتە دروستكرن، ئێكەم پرۆژەیێ‌ وەبەرهێنانێ‌ یێ زۆر گرنگ و مەزنە ب هزارەها دەلیڤێن كاری بۆ خەلكی پەیدا دكەت و هژمارەكا زۆر یا كارگەهێن ئاری دەڤەرا سێمێلێ‌ هەنە.
ئاشكرا كر: د كەرتێ‌ وەبەرهێنانێ‌ دا سایلویەك ل باتێلێ‌ نوكە دهێتە چێكرن و چەندین كارگەه د ناڤ سایلۆیێ‌ دا دهێنە دروستكرن بۆ بەرهەمهئینانا ئار و ساڤاری و گەلەك گرنگیێ‌ د واری وەبەرهێنانێدا ب سێمێلێ‌ دهێتە دان و گۆت: حوكمەتا هەرێما كوردستانێ‌ گرنگیەكا مەزن ب هەموو دەڤەرێن هەرێما كوردستانێ‌ دایە، ب تایبەتی ژی پارێزگەها دهۆكێ‌ ل قەزا سێمیلێ‌ 157 پرۆژە هاتینە بجهئینان و نوكە چەندێن پرۆژە ل ژێر بجهئینانێدانە.
خەلیل مەحمود زێدەتر گۆت: گوژمێ‌ 12 ملیار دینار هاتینە تەرخانكرن بۆ بجهئینانا هژمارەكا پرۆژەیێن نوی یێن خزمەتگوزاری، 23 پرۆژە هاتبوونە پێشكیشكرن بۆ ئیدارا پارێزگەها دهۆكێ‌ و پتریا وان پرۆژەیێن شارەوانی بوون و رازەمەندی ل سەر 20 پرۆژەیان هاتیەكرن و پتر ژ 17 كیلۆمەترین جادەیان دهێنە چێكرن و رێیێن گۆندان ژی دهێنە دروستكرن و تۆرین ئاڤا ڤەخوارنی بۆ گوندان دهێنە چێكرن و حەفت قوتابخانە ل سنۆرێ‌ سێمیلێ‌ دهێنە نووژەنكرن و د كەرتێ‌ كارەبێ‌ دا ژی، چەند پرۆژە دهێنە بجهئینان ب تایبەتی ژی ل سنۆرێ‌ ناحیا خانكێ‌ و مسێریكێ‌ دێ‌ رۆناهیا جادەیان هێتە چێكرن.
ئاشكرا كر:» ل سنۆری باژێرڤانیا تەناهی ژی چەندین پرۆژە دهێنە بجهئینان و ڤەدیتن ل سەر چێكرنا پرۆژان هاتیە كرن گەلەك پرۆژەیێن گرنگ ل سێمێلێ‌ دهێنە بجهئینان».

هەولێر، قائید میرۆ:

بسپۆرەكێ تاوان ناسیێ ئاماژە بڤێ چەندێ كر كو تاوانێن وەرگرتنا پارەی ب فێل بەر ب زێدەبوویە و پارەیێ چەندین وەلاتیان هاتیە خوارن و زەرەرمەند بووینە و گۆت: ل گورەی قانوونێ سزا بۆ وان كەسێن ڤێ‌ تاوانێ‌ دكەن هاتیە دیار كرن، بەلێ زۆر جاران ژی تاوانباری رێیێن جودا بۆ خوە قورتالكرنێ بكار ئیناینە، ئەڤجا دڤێت وەلاتی یێ هشیار بیت دەمێ پارەی یان هەر تشتەكی رادەستی كەسەكی دكەت بلا ب رێیا فەرمانگەها بجهئینانێ گەرەنتیێ وەر بگریت.

دكتۆر عەلی سەلیم بەگ، بسپۆرێ تاوان ناسیێ بۆ رۆژناما ئەڤرۆ دیار كر، تاوانێن فێلكرنێ بشێوەیەكێ بەرچاف زێدە بوینە و بەرێ حالەت بون، لێ‌ نوكە بۆیە دیاردە و رۆژانە داخوازكار هەنە و سكالا دهێنە كرن ل سەر وان كەسێن ب فێلا پارەی پەیدا دكەن و چەندین رێك دهێنە بكار ئینان و گۆت: (هەر تاوانەكا فێلكرنێ‌ بهێتە تۆمار كرن دناڤا قانوونا سزایێن عێراقی سزا بۆ هاتینە دیار كرن، بتایبەتی قانوونا هژمارە 11 یا سالا 1969ێ ماددێ 458ێ ئەو قانوون نوكە ل هەرێما كوردستانێ ژی دهێتە بجهئینان، ئەو مادە ئاماژە بڤێ چەندێ دكەت تایبەتە بۆ وان كەسێن ب رێیا فێلكرنێ‌ وەلاتیان سەردا دبەن، هەر كەسەكێ تاوانەكێ بكەت و ب رێیا سەردابرنێ بیت دێ هێتە سزادان بۆ دەمێ پێنج سالان دێ‌ هێتە زیندان كرن).
بسپۆرێ تاوان ناسیێ دیار كر ژی نها خەلك فێری ئەنجامدانا وان تاوانان بوویە و كەیس لدەف مە هەیە نێزیكی 100 دەفتەرێن دۆلاری قەردار بویە و دەستپێكێ دێ مولك و مالێن خوە ل سەر ناڤێ‌ خوە راكەت، ژبەركو هەكە بهێتە حوكم كرن ژی مولك و مالێ وی دێ‌ بو مینیت، ژبەركو هندەك وەلاتی دەمێ تووشی قەرداریێ دبن مالێ خوە ل سەر ناڤێ خوە ڤەدگوهێزن بۆ سەر ناڤێ كەسەكی، دا هەكە هاتە سزادان ژی پشتی زیندان كرنێ ڤەگەڕیتە سەر مال و مولكێن خوە، بەلێ تاوانبار ل هەمبەر دادگەهێ دبێژیت من چ مولك و مال نینە و تنێ هندەك تشتێن بەسیت و كێم هەنە و من شیانێن ڤەگەڕاندنا پارەی نینن، لەوڕا دێ بۆ دەمێ سالەكێ یان زێدەتر هێتە زیندان كرن و هەیڤانە بتنێ‌ دێ 100 هزار دیناران ڤەگەڕینیت و گۆت: (چەندین كەیس هەنە تاوانباری 70 دەفتەرێن خەلكی خوارینە و خوە ل هەمبەر دادگەهێ ژی قورتال كریە).
د. عەلی بەگ گۆت: (ئەز پێشنیار دكەم بۆ وەلاتیان ب چو شێوەیەكی پارە و كەلوپەلێن گران بها رادەستی چو كەسەكی نەكەن هەتا مافێن خوە دابین نەكەن، گەرەنتیا ڤێ ژی ئەوە بۆ نموونە كەسەك پارەی یان تڕۆمبێڵێ یان خانی رادەستی كەسێ بەرامبەر نەكەت هەتا گەرەنتی نەهێتە وەرگرتن بۆ نموونە پارچەكا ئەردی وەكی رەهین دانیت و ل فەرمانگەها بجهئینانێ بهێتە تۆمار كرن).
دكتوری ئەو چەندە ژی دیار كر،مخابن زۆربەیا وەلاتیان شارەزایی د قانوونێ دا نیە و ب دلەكێ ساف مامەلە دهێتە كرن زۆر جاران گرێبەستەكا ئاسایی ژی دناڤبەرا واندا ناهێتە نڤیسین و گۆت: (بدیتنا من هەتا مولكەك نەهێتە رەهین كرن چ پارە و مامەلە نەهێنە كرن، ژبەركو دێ تووشی ئاریشان بیت و پارێ چەندین وەلاتیان بڤی شێوەی هاتیە خوارن، ل گورەی ئەڤی پارێ دهێتە رادەستكرن گەرەنتی بهێتە وەرگرتن و ل فەرمانگەها بجهئینانێ بفەرمی بهێتە تۆمار كرن نەك بتنێ دناڤبەرا واندا بیت).