سەباح زوهێر:
هەبین حسێن، كچەكا هەڤدە سالی یە ل گوندێ شەرمن سەر ب قەزا ئاكرێ ڤە، د دیدارەكێ دا بۆ رۆژناما دیاردكەت كو ئەو هەر دو زمانێن كۆری و ئینگیزی دزانیت ب خوینیت و بنڤیسیت ب تەمامی و دگەل هندێ كارێ شێوەكاریێ ژی دكەت.
ناڤهاتیێ گۆت: زمانێ كۆری یێ ب ساناهی یە بۆ فێربوونێ و من چەندین كەس ل كوردستانێ فێری زمانێ كۆری كرینە، سوپاسیا دایك و بابێن خوە دكەم كو هەردەم پشتەڤانیا من دكەن، من پۆلا دوازدێ تەمام كر دێ پتر كار و چالاكیان ئەنجام دەم.
سولین سلێمان:
ئەكتەرێ دێرین (قادر جەلال) كو ب (ئەبو ئەركان) یێ بەرنیاسە و ل چەند سالێن بۆری وەك ئەكتەر پشكداری د هژمارەكا فلم و دراما دا كریە، ژوانا زنجیرە دراما (گەردەلۆل) د دیدارەكێ دا بۆ رۆژناما ئەڤرۆ دیاركر كو ل چەند رۆژێن بهێن فلمێ وان یێ سینەمای (1988) دێ ل چەند هولێن سینەمایی یێن هەرێما كوردستانێ و ئیراقێ هێتە نیشادان و ناڤەرۆكا فلمی ل دۆر كارەسات و نەهامەتێن گەلێ كوردستانێ یە، ب تایبەت ژی كیمیابارنكرنا باژێرێ هەلەبچە.
ناڤهاتی گۆت: هندەك ئەو ئەكتەرێن پشكداری دفلمی دا كرین ئەڤەنە (حەمید یوسف، دلنیا محەمەدی، شەمالی عەبە رەش، ئەیام ئەكرەم) و گەلەكێن دی.
سەرۆك مەسعود بارزانی ل سەلاحەددین پێشوازی ل شاندەكێ بلند یێ ئیئتیلافا نیشتمانی یا ئیراقی ب سەرۆكایەتیا ئەیاد عەلاوی كر.
ب گۆڕەی بارەگەهێ بارزانی» د دیدارەكێ دا باس ل دۆر ڕەوشا سیاسی یا ئیراقێ و دوماهی پێشهاتان هاتە كرن».
هەروەسا گرێدای ب كێشەیێن د ناڤ پڕۆسەیا سیاسی و پەیوەندیێن هەرێما كوردستانێ و حوكمەتا فیدرال هەردو ئالیان دوپاتی ل پێدڤیا چارەسەركرنا گرفتان كر بەری وێ چەندێ گرفت كوورتر ببن، ئەوژی ب گۆڕەی دستووری و ب ڕێكا دانوستاندنێن بەردەوام.
سەرۆكێ حوكمەتا هەرێما كوردستانێ، مەسرۆر بارزانی، پێشوازی ل پڕۆفیسۆر لیۆناردۆ جیالۆریتی، ڕێڤەبەرێ پشكا ڕۆژهەلاتا ناڤین و ئاسیا یا كۆمەلا سانت ئیگیدیۆ كر كو ڕێكخراوەكا مرۆڤی یە و بنگەهێ وێ ل ڕۆما پایتەختێ ئیتالیا یە.
د كۆمبوونەكێ دا پڕۆفیسۆر جیالۆریتی كورتیەك سەبارەت كار و چالاكیێن كۆمەلا خوە بەرچاڤكر. هەروەسا ڕەوشا پێكڤەژیانا ئاشتیانە یا پێكهاتەیێن جودا و ئازادیا ئایینی و میهڤانداریكرنا سەدان هزار پەنابەر و ئاوارەیان ل هەرێما كوردستانێ بلند هەلسەنگاند.
سەرۆكێ حوكمەتا هەرێما كوردستانێ پێزانینێن هەرێما كوردستانێ بۆ پڕۆژە و كار و چالاكیێن كۆمەلا ناڤبری دیاركر و هیڤیا سەركەفتنێ بۆ خواست.
سەرەدانا سەرۆكێ حوكمەتا هەرێما كوردستانێ و شاندێ بلند یێ حوكمەتا هەرێمێ بۆ بەغدا و ئەنجامدانا دیدار و كۆمبوونێن گرنگ ل گەل سەرۆك وەزیرێن ئیراقێ و سەرۆك كۆمار و سەرۆكێ جڤاتا نوونەران و سەركردەیێن ئالیێن سیاسی یێن دی یێن ئیراقێ ل سەر پرسێن بودجەی و شایستەیێن دارایی یێن هەرێما كوردستانێ و ئەو پرسێن كو ب هەلاویستی د ناڤبەرا هەردو ئالیان دا ماینە، ل سەر ئاستێ ڕاگەهاندنا ئەرەبی و جیهانی كارڤەدانا خوە ئینا و ب گرنگی دنێرنە سەرەدانێ و ئەنجامێن وێ.
پەیمانگەها واشنتۆن بۆ ڕۆژهەلاتا ناڤین د ڕاپۆرتەكێ دا ڕۆناهی ئێخستە سەر سەرەدانا سەرۆكێ حوكمەتا هەرێما كوردستانێ مەسرۆر بارزانی بۆ بەغدا و بەلاڤكر» مەسرۆر بارزانی ئومێدەوارە د دانوستاندنێن ل گەل هەرسێ سەرۆكایەتیێن ئیراقێ چارەسەریەك بۆ كێشەیێن هەلاویستی د ناڤبەرا بەغدا و هەولێرێ دا بهێتە دیتن».
هەروەسا ئاماژەكر» د دیدارا د ناڤبەرا مەسرۆر بارزانی و محەمەد شیاع سۆدانی دا باس ل وان دۆسێیان هاتە كرن كو جهێ ناكۆكیا هەردو ئالیانە ب تایبەتی پرسا شایستەیێن دارایی یێن هەرێما كوردستانێ».
ڕۆژنامەیا (الیوم السایع) یا مسری ب گرنگی دنێریتە سەرەدانا مەسرۆر بارزانی بۆ بەغدا و بەلاڤكر» د كۆمبوونا سەرۆكێ حوكمەتا هەرێما كوردستانێ و سەرۆكێ كۆمارا ئیراقێ دا، دوپاتی ل باوەریێ د ناڤبەرا هەردو ئالیان بۆ چارەسەریا هەموو كێشەیێن هەلاویستی ب گۆرەی دستووری و قانوونێ هاتە كرن، كێشەیان كەركووكێ ژی پرسەكا دی یا كۆمبوونێ بوو».
مەسرۆر بارزانی و محەمەد شیاع سۆدانی دانوستاندن ل دۆر چارەسەریا كێشەیێن قانوونی و دارایی د ناڤبەرا بەغدا و هەولێرێ دا ئەنجامدان، ئەڤە ناڤونیشانێن ڕۆژنامەیا (الزمان) یا ئیراقێ بوون و ب كو سەرەدانا مەسرور بارزانی بۆ بەغدا ب گرنگ هەژمارت و بەلاڤكر ژی» هەردو حوكمەتێن بەغدا و هەولێرێ دوپاتی ل سەر دیتنا چارەسەریان بۆ كێشەیێن قانوونی و دارایی د ناڤبەران خوە دا ب گۆرەی دستووری و قانوونێ كر».
پێگەهێ (بەغداد تایمز) یێ ئیراقێ ژی ب گرنگی ڤە باس ل دیدارا دناڤبەرا محەمەد شیاع سودانی، سەرۆك وەزیرێن ئیراقێ و مەسرۆر بارزانی، سەرۆكێ حوكمەتا هەرێما كوردستانێ دكەت و ئاماژە ب وێ چەندێ كر كو» هەردو حوكمەتێن فیدرالی و هەرێما كوردستانێ دانوستاندن ل دۆر چارەسەركرنا بنەرەتی بۆ كێشەیێن دارایی و قانوونی یێن ل بەردەم شایستەیێن دارایی یێن هەرێما كوردستانێ كریە».
پشتی بڕیارا دوهی ئێكشەمبی 17/9/2023 یا جڤاتا وەزیرێن ئیراقێ ب مەزاختنا 700 ملیار دیناران بۆ هەر مەهەكێ و بۆ دەمێ سێ مەهان بۆ مووچەیێن فەرمانبەرێن هەرێما كوردستانێ، سەرۆكێ حوكمەتا هەرێما كوردستانێ د پەیوەندیەكا تەلەفۆنی دا ل گەل محەمەد شیاع سۆدانی، سەرۆك وەزیرێن ئیراقێ ئەنجامدا.
ب گۆڕەی بەیاننامەیەكا حوكمەتا هەرێما كوردستانێ» د پەیوەندیا تەلەفۆنی دا، سەرۆكێ حوكمەتا هەرێما كوردستانێ سوپاسیا پشتەڤانیا سەرۆك وەزیرێن فیدرالی كر بۆ گەهشتنێ ب ڕێككەفتنێ ل دۆر دابینكرنا مووچەیێن فەرمانبەرێن هەرێما كوردستانێ».
مەسرۆر بارزانی، هەڤدەم» هیڤی خواست ئەڤ ڕێككەفتنە ببیتە بنەمایەك بۆ چارەسەركرنا هەموو كێشەیان د ناڤبەرا هەرێما كوردستانێ و حوكمەتا فیدرال دا ب ڕێكا دانوستاندنێ و ب گۆڕەی دستووری و ڕێككەفتنان».
ژ ئالیەكێ دی ڤە مەسرور بارزانی، سەرۆكێ حوكمەتا هەرێما كوردستانێ د پەیامەكێ دا ئاماژەكر: مە شیا بەرگریێ ژ مافێ خەلكێ كوردستانێ بكەین و ل گەل سەرۆك وەزیرێن فیدرالی محەمەد شیاع سۆدانی بگەهینە ڕێككەفتنەكا گونجای بۆ دابینكرنا مووچەیێن وەلاتیان.
مەسرۆر بارزانی، سەرۆكێ حوكمەتا هەرێما كوردستانێ پەیامەك ل دۆر مووچەیێن فەرمانبەرێن هەرێما كوردستانێ بەلاڤكر و د پشكەكا وێ دا هاتیە» ب پشتبەستن ب خودایێ مەزن و ئیرادەیا ب هێز یا گەلێ مە، مە شیا بەرگریێ ژ مافێ خەلكێ كوردستانێ بكەین و ل گەل سەرۆك وەزیرێن فیدرال محەمەد شیاع سۆدانی بگەهینە ڕێككەفتنەكا گونجای بۆ دابینكرنا مووچەیێ وەلاتیان».
مەسرۆر بارزانی سوپاسیا هەدارا وەلاتیێن خۆڕاگر كر كو باوەری ب حوكمەتا خوە ژ دەست نەدای و گوت» سوپاس بۆ سەرۆك بارزانی كو پشتەڤان و ڕێنیشادەرێ مە بوو د زالبوونێ ل سەر كێشەیان دا. سوپاس بۆ پشتەڤانی و ڕۆلێ سەرۆكێ هەرێما كوردستانێ د پشتەڤانیكرن و سەرئێخستنا پرۆسەیا دانوستاندنان دا ل گەل حوكمەتا فیدرال، سوپاس بۆ ئالیێن سیاسی یێن ئیراقا فیدرال كو پشتەڤانێن مە بوون، سوپاس بۆ ئالیێن سیاسی یێن كوردستانی و فراكسیۆنێن كوردستانی ل جڤاتا نوونەرێن ئیراقێ كو پشتەڤان و هەڤدەنگ بوون د پرسا بدەستڤەئینانا مافێ فەرمانبەرێن هەرێما كوردستانێ دا. سوپاس بۆ شاندێ حوكمەتا هەرێما كوردستانێ كو بێ وەستیان و هەستەكێ پڕ ژ بەرپرسیارەتیێ شیاین د ڤی ئەركێ گران دا سەركەڤن».
هەروەسا دوپاتكر « ب پشتەڤانیا خودایێ مەزن دێ بەردەوام بین د خزمەتكرنا وەلاتیێن خوەشتڤی و ڕێكێ ب بزاڤێن نەزۆك نادەین سەقامگیریا هەرێما كوردستانێ تێك بدەن».
ل ڕۆژا پێنجشەمبیا بۆری 14/9/2023 شاندەكێ بلند یێ حوكمەتا هەرێما كوردستانێ ب سەرۆكایەتیا مەسرۆر بارزانی سەرۆكێ حوكمەتا هەرێمێ دگەلدا قوباد تالبەانی جێگرێ سەرۆكێ حوكمەتا هەرێمێ سەرەدانا بەغدا كربوو و 14 كۆمبوونێن جودا ل گەل هەرسێ سەرۆكایەتیێن ئیراقێ و ئالیێن سیاسی یێن ئیراقی و فراكسیۆنێن كوردستانی ل جڤاتا نوونەرێن ئیراقێ ئەنجامدا بوون.
ل گەل گەهشتنێ بۆ بەغدا، مەسرۆر بارزانی، سەرۆكێ حوكمەتا هەرێما كوردستانێ ل تۆرا جڤاكی یا ئێكس (تویتەر یا بەرێ) پەیامەك بەلاڤكربوو و تێدا ڕاگەهاندبوو» ئەڤرۆ ل بەغدا مە بۆ دانوستاندنێ ل گەل سەرۆك وەزیران و سەركردەیێن دی یێن ئیراقێ بۆ داكۆكیكرنێ ژ مافێن دستووری یێن خەلكێ كوردستانێ و چارەسەركرنا كێشەیان».
د دووماهیا سەرەدانا خەوە ژی دا، د كۆنفرانسەكێ ڕۆژنامەڤانی دا، مەسرۆر بارزانی ل دۆر سەرەدانا شاندێ حوكمەتا هەرێما كوردستانێ بۆ بەغدا و دیدار و كۆمبوونێن شاندی ل گەل بەرپرسێن حوكمەتا فیدرال و سەركردەیێن سیاسی ڕاگەهاندبوو كو سەرەدان بۆ داكۆكیكرنێ بوو ژ ماف و شایستەیێن هەرێما كوردستانێ، هەڤدەم سوپاسیا فراكسیۆنێن كوردستانی كر بۆ وێ ئێكڕێزیا ل بەرامبەر ماف و شایستەیێن هەرێما كوردستانێ نیشاندای.
سەرۆكێ حوكمەتا هەرێما كوردستانێ ئاشكراكر بوو ژی كو مە دو پێشنیازێن كورتخایەن و درێژخایەن بۆ چارەسەركرنا كێشەیا شایستەیێن دارایی یێن هەرێما كوردستانێ بەرچاڤكرینە، كو پێشنیازا درێژخایەن گرێدایە ب قانوونا بودجەی و ڕاستڤەكرنا پشكەك ژ مادە و بڕگەیێن وێ. كو ئەڤێ چەندێ دەمێ پتر پێدڤیە و ل پاشەڕۆژێ دێ ل سەر ئاخڤن. هەروەسا ڕۆهنكربوو ژی كو ل دۆر پێشنییازا كورتخایەن دێ ل ڕۆژا ئێكشەمبی 17/9/2023 ژ ئالیێ جڤاتا وەزیرێن ئیراقێ ڤە بڕیار ل سەر وی بابەتی هێتە دان و هیڤی ژی خواست ئەو بزاڤە ببنە بڕیار و خەلكێ هەرێما كوردستانێ بگەهنە مافێن خوە.
شرۆڤەكارەكێ سیاسی یێ ئیراقی سەبارەت سەرەدانا شاندێ حوكمەتا هەرێما كوردستانێ ب سەرۆكایەتیا مەسرۆر بارزانی، سەرۆكێ حوكمەتا هەرێما كوردستانێ بۆ بەغدا سەبارەت مووچەیێن فەرمانبەرێن هەرێما كوردستانێ، ڕادگەهینیت ئەوا سەرەدانا ڤێجارێ یا شاندێ هەرێما كوردستانێ ژ سەرەدانێن دی جودا دكەت، ئێكگرتنا د ناڤبەرا هەولێرێ و سلێمانیێ و هەموو ئالیێن سیاسی یێن هەرێما كوردستانێ بوو، كو ئەڤە ژی وەرچەرخانەكا گرنگە ل ناڤخوەیا هەرێما كوردستانێ.
محەمەد خەزعەلی، شرۆڤەكارێ سیاسی یێ ئیراقێ دبێژیت» حوكمەتا فیدرالی ل بەردەم بجهئینانا ئەركێ خوە یێ دستووری دا بۆ هنارتنا مووچە و شایستەیێن هەرێما كوردستانێ و نەهێلانا چاڤەڕێكرنا فەرمانبەرێن هەرێمێ بۆ مووچەیێن خوە».
خەزعەلی گوت ژی» پێدڤیە حوكمەتا فیدرالی ب ئەركێ خوە یێ دستووری ڕابیت و ل گەل حوكمەتا هەرێما كوردستانێ كێشەیێن خوە ب ڕێكا دستووری چارەسەر بكەن و ئێدی خەلكێ هەرێما كوردستانێ باجا وێ قەیرانێ نەدەت».
ناڤبری دیاركر ژی» حوكمەتا هەرێما كوردستانێ یا ڕژدە ل سەر كاركرنێ ل گەل بەغدا و ڕێككەفتنێ ل سەر بنەمایێ دستووری و ڕێككەفتنێن سیاسی بۆ پێكئینانا حوكمەتا ئیراقێ».
هەروەسا ئاماژەكر» ئێكگرتنا ئالیێن سیاسی یێن هەرێما كوردستانێ پەیامەك بوو بۆ حوكمەتا ئیراقێ، كو كورد ب ئێك دەنگ داخوازا مافێن خوە دكەن».
محەمەد خەزعەلی سەرنج بۆ وێ چەندێ ژی ڕاكێشا» شاندێ هەرێما كوردستانێ پێشتر ب جودا سەرەدانا بەغدا دكر و هەر ئێك جودا ل گەل ئالیێن سیاسی و ئالیێن پەیوەندیدارێن حوكمەتا فیدرالی كۆم دبوو، لەوما هیچ ئەنجامەك بدەستڤە نە دئینا، بەلێ ڤێجارێ كو سەرەدان ب ئێكگرتی بوو، دێ ئەنجامێن ئەرێنی بۆ هەبن» .
بەری دو رۆژان پەرلەمانێ ئۆرۆپا سەبارەت ب رەوشا تورکیا کۆمبوو و راپۆرتەک ژی سەبارەت ب رەوشا تورکیا هاتە خواندن و تێدا هاتە دیار کرن کو پرسا کوردی پرسا هەری مەزن و گرنگ یا تورکیا یە و دڤێت ل تورکیا دەست ب قۆناغەکا نوو یا چارەسەرکرنا پرسا کوردی بهێتە کرن و ژ بۆ هندێ ژی دڤێت هەموو ئالیێن سیاسی تێدا پشکدار بن.
بەری دو رۆژان پەرلەمانێ ئۆرۆپا سەبارەت ب رەوشا تورکیا کۆمبوو و کۆمیسیۆنا ئێکەتیا ئۆرۆپا ژی راپۆرتەک سەبارەت ب رەوشا تورکیا پێشکێشی پەرلەمانێ ئێکەتیا ئۆرۆپا کر و تێدا بەحسێ گەلەک خالان هاتە کرن، ب تایبەتی ژی د راپۆرتێ دا بەحسێ پرسا کوردی هاتە کرن و تێدا هاتیە دیار کرن، پرسا کوردی نها پرسا سەرەکی یا تورکیا یە، مخابن هەتا نها پرسا کوردی ل تورکیا نەهاتیە چارەسەرکرن، هەرچەندە بەرپرسێن تورکیا دبێژن پرسا کوردی هاتیە چارەسەرکرن لێ چو راستی بۆ هندێ نینن، ب هزاران گرتیێن کورد ل زیندانێن تورکیا دانە، گەلەک سیاسەتمەدارێن کورد ژ بەر کارێن وان یێن سیاسی د زیندانان دانە و ئەو یەک ژی نیشا ددەت هەتا نها ژ بۆ چارەسەرکرنا پرسا کوردی ل تورکیا چو نەهاتیە کرن.
د راپۆرتێ دا ئاماژە ب هندێ ژی هاتیە کرن، کو هەتا نها گەلەک سازیێن جودا جودا ل تورکیا راپرسی کرینە، د ئەنجاما راپرسیان دا دیار بوویە وەلاتیێن کورد دخوازن پرسا کوردی ل تورکیا دوور ژ شەری و ب رێیا دانوستاندنان بهێتە چارەسەرکرن، بەری نها ژ بۆ هندێ چەند جاران حوکمەتا ئاکپارتیێ دەست ب هندەک بزاڤان کر، لێ بزاڤێن وێ بێی ئەنجام مان و جارەکا دی سیاسەتا توندوتیژیێ ل دژی کوردان دهێتە بکارئینان و ژ بەر هندێ ژی ئەڤرۆکە پرسا کوردی ل تورکیا هەر وەکو خوە مایە و نەهاتیە چارەسەرکرن و ژ بەر هندێ ژی دڤێت ل تورکیا دەست ب قۆناغەکا نوو یا چارەسەرکرنا پرسا کوردی بهێتە کرن، گرنگە هەموو هێز و ئالیێن سیاسی ل تورکیا پشکداریێ د قۆناغەکا وەسا دا بکەن، دڤێت پەرلەمانێ تورکیا ببیتە ناڤەندا چارەسەرکرنا پرسا کوردی، چونکی هەتا پرسا کوردی نەهێتە چارەسەرکرن، تورکیا نەشێت ببیتە ئەنداما ئێکەتیا ئۆرۆپا.
ل ئالیێ دی رەجەب تەیب ئەردۆغانێ سەرۆک کۆمارێ تورکیا سەبارەت ب راپۆرتا پەرلەمانێ ئۆرۆپا بۆ رۆژنامەڤانان دیار کر، ئەو وەکو تورکیا راپۆرتا پەرلەمانێ ئۆرۆپا قەبوول ناکەن، بەری نها ژی پەرلەمانێ ئۆرۆپا راپۆرتێن وەسا ل دژی تورکیا بەلاڤ کرینە، هەکە وان نەڤێت تورکیا ببیتە ئەنداما ئێکەتیا ئۆرۆپا بلا ب رەنگەکێ ئاشکرا بۆ مە بێژن، لێ نابیت هەر جارێ تشتەکێ بکەنە بەهانە و بێژن هەتا تورکیا وێ نەکەت نەشێت ببیتە ئەنداما ئێکەتیا ئۆرۆپا، چونکی چەندین سالن ئۆرۆپا هەر مە گیرۆ دکەت و هەر جارێ ژی تشتەکێ دبێژن.
سەرۆک کۆمارێ تورکیا ئەو یەک ژی دیار کر، ل تورکیا ئازادیا رادەربڕینێ یا هەی، دیموکراسی و مافێن مرۆڤی ژی د ئاستەکێ بلند دانە، زۆرداری ل کەسێ نەهاتیە کرن، لێ دادگەه ژی کارێن خوە دکەن، نابیت ل ژێر ناڤێ ئازادیێ کارێن تێکدانێ بهێنە کرن، ئەو یەک ئازادی نینە، ژ بەر هندێ ژی هندەک تشتێن د راپۆرتا پەرلەمانێ ئۆرۆپا دا سەبارەت ب تورکیا هاتینە، ناهێنە قەبوول کرن و بەهانە نە، هەکە ئێکەتیا ئۆرۆپا هەلوەستێ خوە ل هەمبەر تورکیا نەگوهۆڕیت وەکو تورکیا ئەم ژی نەشێین هەتا هەتای چاڤەرێی بەرسڤا ئێکەتیا ئۆرۆپا بین، بێگومان مە رێیێن دی ژی هەنە.
رەجەب تەیب ئەردۆغان سەبارەت ب پرسا کوردی ژی دیار کر، ژ بۆ چارەسەرکرنا پرسا کوردی وان گەلەک کارێن مەزن کرینە، لێ بابەتێ تیرۆرێ و بابەتێ پرسا کوردی ژێک جودانە، یێن چەکی ل دژی تورکیا بکار بینن و وەلاتیێن تورکیا بکوژن دڤێت بگەهنە سزایێن خوە، تورکیا ل هەمبەر وان کەسان بێدەنگ نابیت، ب سالانە ل تورکیا پرسا تیرۆرێ هەیە و وەلاتێن ئێکەتیا ئۆرۆپا ژی باش دزانن، لێ هەتا نها ژ بۆ شەرێ ل دژی تیرۆرێ هاریکاریا تورکیا نەکرینە، گەلەک سۆز داینە تورکیا لێ ب کریارێن چو نەکرینە، ئەو یەک ژی نیشا ددەت وەلاتێن ئێکەتیا ئۆرۆپا د گۆتن و کریارێن خوە دا وەکو ئێک نینن و دیسان دخوازن تورکیا ب هندەک تشتێن دی ڤە مژوول بکەن و گۆت: (وەکو تورکیا مە دڤێت ئەم ببینە ئەنداما ئێکەتیا ئۆرۆپا، ژ بۆ هندێ ژی بەری نها مە گەلەک گوهۆڕینێن باش ژی کرینە، لێ د راپۆرتا هەری دووماهیێ دا بەحسێ ڤان تشتان نەهاتیە کرن، دیسان بەهانێن بەری نها هاتینە دوبارە کرن و ئەو یەک ژی ب چو رەنگەکێ ناهێتە قەبوول کرن، چونکی وەکو من گۆتی ل تورکیا ئازادیا رادەربڕینێ یا هەی و دیموکراسی و مافێن مرۆڤی ژی د ئاستەکێ بلند دانە لێ مخابن وەلاتێن ئێکەتیا ئۆرۆپا بەحسێ هندێ ناکەن و هەردەم هندەک تشتان ل دژی تورکیا دوبارە دکەن، دڤێت ئێدی ئێکەتیا ئۆرۆپا تورکیا مژوول نەکەت و بریارا خوە یا دووماهیێ بدەت، چونکی مە دڤێت بزانین براستی ئێکەتیا ئۆرۆپا دڤێت تورکیا ببیتە ئەنداما وێ یا نە؟ چونکی ئەم نەشێین هەردەم گوهداریا بەهانێن وان بکەین).
وەزارەتا بەرگریێ یا ئەمریکا راگەهاند، رۆسیا، ئیران و رژێما بەشاری دخوازن ل هندەک دەڤەران ئالۆزیان دروست بکەن، ب تایبەتی ژی ل وان دەڤەرێن کو رەوش ئارامە، ئارمانجا وان یا سەرەکی ژی ئەوە دا ئالۆزیان بۆ ئەمریکا دروست بکەن، ل دێرازۆرێ وان خواستن ئالۆزیان دروست بکەن لێ سەرکەفتی نەبوون و نها رەوش ل دێرازۆرێ یا ئارامە و گرۆپێن تێکدەر نەشیان بگەهنە ئارمانجێن خوە.
وەزارەتا بەرگریێ یا ئەمریکا ئەو یەک ژی دیار کریە، نها ژی ئیرانێ دڤێت ل رۆژهەلاتێ فراتێ ئالۆزیان دروست بکەت، چونکی ئیرانێ نەڤێت رەوشا سووریێ یا ئارام بیت، ئیرانێ دڤێت مفای ژ رەوشا ئالۆز یا سووریێ وەربگریت و بگەهیتە هندەک ئارمانجێن خوە، رۆسیا ژی دڤێت هێزێن ئەمریکا ل سووریێ نەمینن، ژ بەر هندێ ژی پێکڤە ل دژی ئەمریکا کار دکەن، لێ مەترسیا داعشێ هەتا نها ل سووریێ هەیە، داعش و گرۆپێن دی یێن تیرۆرستی مەترسینە ل سەر بەرژەوەندیێن ئەمریکا، ژ بەر هندێ ژی ئەمریکا جارێ سووریێ بۆ کەسێ چۆل ناکەت.
ب سەرپەرشتیا د. عەلی تەتەر، پارێزگارێ دهۆكێ، دوهی 17/9/2023 كۆمبوونەكا هەڤپشك د ناڤبەرا لژنا بجهئینانا بڕیارا ١٧٢ سەبارەت كرێكاران و دەڤەردار و رێڤەبەریێن پەیوەندیدار هاتنە ئەنجامدان.
د كۆمبوونێ دا باس ل ناڤەرۆكا بڕیارا 172 بۆ رێكئێخستنا دەستێ كاری و كرێكاران هاتە كرن، رێڤەبەریێن پەیوەندیدار بیروبۆچوون بۆ دووڤچوون و بجهئینانا بڕیارێ لێكگوهارتن، بۆ هندێ پترین دەلیڤەیێن كاری بۆ وەلاتیێن هەرێما كوردستانێ بهێنە دابینكرن.
دیسا هەر دوهی ئێڤاری د. عەلی تەتەر، پارێزگارێ دهۆكێ، پێشوازی ل شاندەكێ سەرۆكێن ژوورێن بازرگانی یێن پارێزگەهێن هەرێما كوردستانێ و ئیراقێ كر، د هەڤدیتنەكێ دا بەحسێ بزاڤا بازرگانی د ناڤبەرا هەرێما كوردستانێ و ئیراقا فیدرال و هەڤكاری و هاریكاری د ناڤبەرا ژوورێن بازرگانی یێن هەرێما كوردستانێ و ئیراقا فیدرال دا هاتەكرن، بۆ وێ یەكێ بزاڤا بازرگانی د ناڤبەرا هەردو ئالیان دا پتر بهێتە پێشئێخستن.
پارێزگارێ دهۆكێ پشتەڤانیا پارێزگەهێ و سازیێن پەیوەندیدار نیشا دا، كو بزاڤا بازرگانی پتر بهێتە پێشئێخستن.
نيشاندان