ئه‌ڤرۆ، هه‌رهین محه‌مه‌د:
داخویانیه‌كێ دا خه‌تاب عه‌مه‌ر راهێنه‌رێ به‌رنیاس یێ یاریا باسكێت بۆلێ دیاركر ل دهۆكێ جوداهیه‌كا مه‌زن دهێته‌كرن د ناڤبه‌را یاریزانێن ته‌پا پێی و یاریێن دی و هه‌ر ژ سالا 2014 و هه‌تا نوكه تیما ته‌پا پێی پشكداریا دكه‌ت و رۆژ بۆ رۆژێ خراپتر لێ دهێت و ل یانێن پارێزگه‌ها هه‌ولێرێ و سلێمانیێ هه‌موو یاری یێت هه‌ین و پشكداریێ دكه‌ن و یانا دهۆكێ ل پارێزگه‌هێ هه‌موو یاری یێن دی قوربانی یا ته‌پاپێی كرین.
ژلایێ خوه ڤه ناڤهاتی گۆتژی: باسكێت بۆلا دهۆكێ ب ئێكجاری نه‌مایه و ئه‌ڤه ژی ئێك ژ ئاریشێن مه‌زنه و ده‌مه‌كی دا دهۆك دهاته نیاسین پایته‌ختێ باسكێت بۆلێ ل سه‌ر ئاستێ ئیراقێ، ژبه‌ر وان ده‌سكه‌فتێن مه‌زنێن یێن دهۆكێ دئینان و مێڤانداریێن سه‌ركه‌فتی یێن قاره‌مانیێن ده‌رڤه، هه‌كه سه‌حكه‌ینه ده‌ستكه‌ڤتێن ڤێ یاریێ ئیناین چو یاریێن دی نه‌ئیناینه ل سه‌ر ئاستێ ئیراقێ و ناڤێ پارێزگه‌ها دهۆكێ هاتیه بلندكرن ل سه‌ر ئاستێ وه‌لاتێن عه‌ره‌بی و ئاسیا و هه‌موو خه‌لكی دهۆك ب ڤێ یاریێ نیاسین لێ گه‌له‌ك ئه‌گه‌ر هه‌نه ژبۆ نه‌مان و لاوازیا باسكێت بۆلێ، ئه‌وژی ئه‌گه‌رێ سه‌ره‌كی و كارگێرێن هاتی پشتی سالا 2014 و ئه‌وه ده‌مێ هه‌شت ساله ماینه راوه‌ستیایی و هه‌كه هه‌ڤڕك ل سه‌ر ئاستێ هه‌رێمێ و ئیراقێ نه‌بن یاریزانی ئارمانج و هیڤی نامینن و ناهێته راهێنانان، هه‌ردیسان نه‌بوونا قاره‌مانیه‌كا هه‌رێمی و ئه‌ڤه نهه ساله نه‌هاتیه كرن، دڤی ده‌می دا ئێكه‌تیا باسكێت بۆلا هه‌رێمێ چو چالاكی دخزمه‌تا باسكتبولێ دا نه‌كرینه و ئه‌ڤه ئه‌گه‌ره‌كێ دیاره ل سه‌ر ئاستێ هه‌رسێ پارێزگه‌هێن هه‌رێمێ، چونكو هه‌كه قاره‌مانی نه‌بیت یاریزان راهێنانا بۆ چو كه‌ت، دیسان نه‌بوونا داهاتی ژبه‌ركو هه‌كه داهات هه‌با دێ به‌رده‌وامیێ ده‌تێ، لێ نه رامان ژێ ئه‌وه هه‌كه داهات نه‌بیت دێ راوه‌ستین و دبینم ئه‌ڤ چه‌نده هه‌موو دكه‌ڤیته سه‌ر وێ كارگێریێ كا دێ چه‌وا یانێ ب رێڤه به‌ن.
نيشاندان