ئه‌ڤرۆ:

سیاسه‌تمه‌داره‌كێ ناڤدار یێ باكورێ كوردستانێ راگه‌هاند كو هه‌كه‌ ئه‌ردۆغان د هه‌لبژارتنێن بهێت دا تووشی شكه‌ستنێ ببیت ژی ب ساناهی ده‌ستهه‌لاتێ راده‌ست ناكه‌ت و دێ هه‌ر تشته‌كێ كه‌ت دا ل سه‌ر ده‌ستهه‌لاتێ بمینیت.

ئه‌حمه‌د تورك سیاسه‌تمه‌دارێ ناڤدار یێ باكورێ كوردستانێ د داخۆیانیه‌كێ دا بۆ مالپه‌رێ ئیندێپێندێنیت یێ توركی راگه‌هاند كو جارا ئێكێ یه‌ ل توركیا ئۆپۆزسیۆن بهێز دكه‌ڤیت و نها ل هه‌مبه‌ر ئه‌ردۆغانی و ده‌ستهه‌لاتا وی دا ئۆپۆزسیۆنه‌كا بهێز یا هه‌ی، بێگومان هه‌كه‌ نها ل توركیا هه‌لبژارتن بهێنه‌ كرن ره‌نگه‌ ئه‌ردۆغان ڤێجارێ نه‌بیته‌ سه‌رۆك كۆمار، چونكو جڤاكێ توركیا ب گشتی ژ ئه‌ردۆغانی و ده‌ستهه‌لاتا وی بێزار بووینه‌ و رۆژ ب رۆژێ ژی ره‌وشا ژیانا وه‌لاتیان خرابتر لێ دهێت و ده‌ستهه‌لاتێ ژی چو به‌رنامه‌ بۆ چاره‌سه‌ركرنا ئالۆزیێن نها ل توركیا نینن و گۆت: (نه‌ تنێ كورد به‌لكو ئه‌ڤرۆكه‌ وه‌لاتیێن دی یێن توركیا ژی ژ ده‌ستهه‌لاتێ بێزار بووینه‌، ره‌وشا ئابووریێ گه‌له‌ك خرابه‌، خه‌لك نه‌شێن پێدڤیاتێن سه‌ره‌كی یێن ژیانێ بۆ خوه‌ دابین بكه‌ن، ده‌ستهه‌لاتا نها ژی ب جهێ هندێ كو كار بۆ باشتركرنا ژیانا وه‌لاتیان بكه‌ت ب هه‌موو ره‌نگه‌كێ ئالۆزیان دروست دكه‌ت و نها تنێ خه‌ما ئه‌ردۆغانی و هه‌ڤالێن وی ئه‌وه‌ كو ل سه‌ر ده‌ستهه‌لاتێ بمینن).

ناڤهاتی ئه‌و یه‌ك ژی دیار كر كو مخابن ده‌ستهه‌لاتا نها چو پرۆژه‌ بۆ چاره‌سه‌ركرنا ئاریشێن ل توركیا نینن، ژ به‌ر هندێ ژی ره‌وشا توركیا ب گشتی رۆژ ب رۆژێ خرابتر لێ دهێت و گۆت: (لێ مخابن ئۆپۆزسیۆنا توركیا ژی نها تنێ چاڤه‌رێی هه‌لبژارتنانه‌، ب جهێ كو ل گه‌ل خه‌لكی بن و گوهداریا داخوازیێن وان بكه‌ن و پێكڤه‌ ل گه‌ل خه‌لكی كار بكه‌ن، ئه‌و تنێ چاڤه‌رێی هه‌لبژارتنانه‌ و ئه‌و یه‌ك ژی بێگومان دێ كاریگه‌ریا خوه‌ یا خراب ل سه‌ر جڤاكێ توركیا هه‌بیت، دڤێت هه‌موو هێزێن ئۆپۆزسیۆنێ پێكڤه‌ كار بكه‌ن و پرۆژه‌یێن خوه‌ بۆ پاشه‌رۆژا توركیا ئاشكرا بكه‌ن، لێ هه‌تا نها مه‌ تشته‌ك وه‌سا نه‌دیتیه‌ و ئۆپۆزسیۆن چاڤه‌رێ هندێ یه‌ كو د هه‌لبژارتنان دا خه‌لك ده‌نگێ خوه‌ نه‌ده‌نه‌ ئه‌ردۆغانی و ئه‌و بهێنه‌ سه‌ر ده‌ستهه‌لاتێ).

ئه‌حمه‌د تورك د دووماهیا ئاخڤتنا خوه‌ دا ئه‌و یه‌ك ژی دیار كر كو هه‌كه‌ د هه‌لبژارتنێن بهێت دا ئه‌ردۆغان تووشی شكه‌ستنێ بهێت ژی ئه‌و ب ساناهی ده‌ستهه‌لاتێ راده‌ست ناكه‌ت، ئه‌ردۆغان دێ ب هه‌موو ره‌نگه‌كێ كار كه‌ت دا ل سه‌ر ده‌ستهه‌لاتێ بمینیت، ژ به‌ر هندێ ژی هه‌كه‌ ئه‌ردۆغان د هه‌لبژارتنان دا تووشی شكه‌ستنێ بهێت و ده‌ستهه‌لاتێ ژی راده‌ست نه‌كه‌ت ره‌نگه‌ ئالۆزیێن نوو ل توركیا روو بده‌ن، دبیت وی ده‌می ره‌وشا توركیا گه‌له‌ك خرابتر ژی ببیت، ژ به‌ر هندێ ژی دڤێت هه‌موو هێزێن ئۆپۆزسیۆنێ هه‌ر ژ نها ڤه‌ خوه‌ بۆ هه‌ر روودانه‌كێ به‌رهه‌ڤ بكه‌ن.