وهی ل بارەگایێ مەكتەبا رێكخستنا پارتی دیموکراتی کوردستان ل پارێزگەها دهـوكێ برێكا نوونەرێ خۆ، مەسرور بارزان یسەرۆكێ حكومەتا هەڕێما كوردستانێ و درێورسمەكێ هەژی دا سەرۆك و دەستەیا كارگێری و یاریزانێن هەردو یانەیێن دهـۆک و زاخۆ خەڵاتكرن بهـەڵكەفتا بدەستڤەئینانا وان ئەنجامێن باش یێن ڤێ دووماهیێ هەردو یانەیان بدەستخۆڤە ئینایی
ئەڤ رێورسمە ب ئامادەبوونا بەرێزان سەربەست لەزگین بەپرسێ مەكتەبا ڕێكخستنا پارێزگەها دهـۆکێ و عیسا ئەحمەد نوونەرێ سەرۆك وەزیران و د.عەلی تەتەر پارێزگارێ دهـۆكێ و گوهداڕ شێخۆ سەرپەرشتیارێ ئێدارا سەربەخۆیا زاخۆ و ئاریان سەڵاحەدین بریكارێ وەزارەتا وەڕزش و ڵاوان و سەردار ئیسماعیل ڕێڤەبەرێ گشتی یێ وەرزشی ل هەرێمێ و هەرسێ هاریكارێن مەكتەبا رێكخستنێ برێڤەچوون.
هەروەسا بەرێز سەربەست لەزگین بناڤێ مەكتەبا ڕێكخستنا پارێزگەها دهـۆکێ و ئیداڕا سەربەخۆیا زاخۆ سۆپاسیا جەنابێ سەرۆك وەزیران كر كو ل سەر ئاستێ هەرێما كوردستانێ درێغی نەكریە ژ بۆ سەركەفتنا كەرتێ وەرزشێ و گوت: ئەف پێشڤەچوونە و هەروەسا ئەو دەستكەفتێن یانەیێن كوردستانێ ب تایبەت یانەیێن دهـۆک و زاخۆ ب دەستخۆڤە دئینن بەرهەمێ پشتەڤانیا بەردەواما سەرۆك وەزیران و كابینەیا نەهـێ یا حكومەتا هەڕێما كوردستانێ یە.
بۆ زانین هەردو یانەیێن دهۆک و زاخۆ دەربازبوونە کۆپا ئیراقێ ئەوا یانەیا دهۆک شیایی ناسناڤێ وێ ب دەستڤە بینت، هەروەسان یانەیا زاخۆ شیابوو رێزا سێیێ ل سەر ئاستێ خولا ستێرێ ئیراقێ بهێت و پلێتا دەربازبوونێ بۆ کۆپا کەنداڤی مسۆگەر بکەت.

ب فەرمی د. ئەحمەد قاسم سەرۆكێ‌ لژنەیا ئۆلمپی ل دهۆكێ‌ خوە بەربژاركر بۆ پۆستێ‌ ئەندامەتییا فوتبۆلا ئیراقێ‌ ئەوا بڕیارە هەلبژارتنێن وێ‌ ل ناڤەڕاستا مەها بهێت پایتەختێ‌ ئیراقێ‌ دەستپێبكەت، ئەڤچەندە هات پشتی ژلایێ‌ ڕێڤەبەرییا گشتی یا وەرزش ل هەرێما كوردستانێ‌ عەبدوللا مەجید بۆ پۆستێ‌ جێگرێ‌ سەرۆكێ‌ فدراسیۆنا دەستنیشان كربوو.
ل دۆر ڤێ‌ یەكێ‌ د. ئەحمەد قاسم كو هەمان دەمدا سەرۆكێ‌ فدراسیۆنا فوتبۆلا دهۆكێ‌ یە بۆ رۆژنامەیا ئەڤرۆ گۆت: پێنەڤێت ئەڤ پێنگاڤە هاتییە هاڤێژتن ژبەركو ل دەڤەرا مە بەهدینان پێشكەڤتنەكا باش یا وەرزشێ‌ و فوتبۆلێ‌ ب خوە ڤەگرییە، ب هەبوونا هەردو تیمێن یانەیا دهۆك و زاخۆ د ناڤ خولا ستێرێن ئیراقێ‌ دا و دەربازبوونا وان بۆ فینالا كۆپا ئیراقێ‌، ژلایەكێ‌ دووڤە ژی پارێزگەها دهۆكێ‌ یا مەغدورە ژ ئەڤان پۆستێن وەرزشی ل هەرێما كوردستانێ‌ و ل بەغدا ژی، لەوما ژی بۆ ڤێ‌ مەرەمێ‌ مە ئەڤ پێنگاڤە هاڤێژیت بۆ وێ‌ یەكێ‌ كو هەر چنە بشێن مافێ‌ دەڤەرا بەهدینان ڤەگەڕینن
ژلایەكێ‌ دووڤە ناڤهاتی ئەوچەندە ژی دیار كر وەكو نوونەرێ‌ كوردستانێ‌ ژلایێ‌ ڕێڤەبەرییا گشتی یا وەرزشی ل هەرێما كوردستانێ‌ هاتیە دەستنیشانكرن و گۆت: دێ‌ هەموو بزاڤان كەم خزمەتا وەرزشا كوردستانێ‌ گشتی بكەین كو هەر یانەیەكا كوردستانی د خول یان قارەمانییەكا ئیراقێ‌ دا پشكداربیت، ژبەركو بۆ مە گرنگن خزمەتا وەرزشا كوردستانێ‌ بكەین و مافێ‌ هەموو یانەیێن مە د پاراستی بن. لەوما ژی خوە بەربژێركرنا من ب هێزكرنا پێگەهێ‌ كوردانە و پاراستنا مافێن وەرزشی یێن كوردستانی یە
ژلایەكێ‌ دووڤە بۆ ماوەیەكە دناڤا جادا وەرزشی یا ئیراقێ‌ دا لڤینێن باش هەنە دگەل ڤەبوونا دەرگەهێ‌ خوە بەربژاركرنێ‌ بۆ پۆستێن سەرۆك، جێگر و ئەندامەتییا فدراسیۆنا فوتبۆلا ئیراقێ‌ هەنە، ل دووڤ ژێدەرێن رۆژنامەڤانی كو بتنێ‌ بۆ پۆستێ‌ سەرۆكێ‌ فدراسیۆنێ‌ ناڤێن كۆمەكا بەربژارا هاتینە بەلاڤكرن وبڤی شێوەیی، ژبلی دوبارە خوە بەربژاركرنا عەدنان درجالی، هەر ئێك ژ ئەیاد بنیان سەرۆكێ‌ بەرێ‌ یێ‌ یانەیا زەورا، یونس مەحمود ئەندامێ‌ نوكە و عەلی جەبار ئەندامێ‌ پێشتر یێن فدراسیۆنێ‌، محەمەد خەلەف ئێك ژ وەرزشڤانێن دیار یێن ئیراقێ‌.

قەیس وەیس:

چاڤەڕێ‌ دهێتە كرن ئەڤرۆ ل هەولێرا پایتەخت كۆنگرەیێ‌ رۆژنامەڤانی بۆ یانەیێن پشكدار د قۆناغا سێیێ‌ و پێش دووماهییا قارەمانییا ئیراقێ‌ یا یارییا پایسكلان، ئەوا بڕیارە سوبەهی ل سەر ڕێیا كۆیە بۆ سماقۆلی بهێتە كرن، تیما لاوێن یانەیا دهۆك و یاریزانێن تازەپێگەهشتی و پشكۆژان وەكو تاكە یانەیا پارێزگەهێ‌ پشكدارە د ڤێ‌ قارەمانیێ‌ دا.
سوبەهی ئەینی، ل سەر ئاستێ‌ پێشكەڤتیان دێ‌ بەریكانەیا تیم دژی دەمژمێرێ‌ بۆ 60كم هێتە كرن، ل سەر ئاستێ‌ لاوان تیم دژی دەمژمێرێ‌ بۆ 50كم، ل سەر ئاستێ‌ تازەپێگەهشتییان كت بۆ گشت تیما لێزڤرین- ئانكو نە رێكا درێژ بۆ 40 كم ب پێنچ جارا زڤڕین هەبیت.
ل رۆژا شەمبیێ‌، پێشكەڤتییان، كت دژی دەمژمێر بۆ 23 كم، ل سەر ئاستێ‌ لاوان كت دژی دەمژمێر بۆ 25 كم، لسەر ئاستێ‌ تازەپێگەهشتییان كت بۆ گشت تیما 50كم دوجاركی.
لدۆر دووماهی بەرهەڤیێن تیما دهۆكێ‌ تارق سەعید ڕاهێنەرێ‌ ئێكێ‌ یێ‌ تیمێ‌ بۆ رۆژنامەیا ئەڤرۆ خویاكر، هەرچەندە ئەم ل قووناغا دویێ‌ یێ‌ ل سەر ئاستێ‌ لاوان یێن ئێكێ‌ هاتبووین، دیسان ل سەر ئاستێ‌ تاكی یاریزانێن مە یێن تازەپێگەهشی و پشكۆژان رێزێن ئێكێ‌ هەتا چارێ‌ هاتبووینە، لێ‌ ئەڤ قووناغە یا هەستیارە و تا ڕادەیەكی یا ڤەبرە بۆ هەڤڕكییا ناسناڤی، مە بەرهەڤییەكا باش یا كری و گەهشتینە گۆپیتكا وێ‌، دڤێ‌ قووناغێ‌ دا دڤێت چو خەلەتی نەبن و هەموو یاریزان بزاڤێ‌ بكەن رێژەییا دەمژمێرێ‌ زێدەتر بەرانبەر هەڤڕكیێن خوە زێدەتر لێبكەن، ژبەركو بتنێ‌ دو دەمژمێر هەنە ئانكو یا كێمە و دڤێت پارێزین و زێدەبكەین تایبەت بەرانبەر هەڤڕكا مە سیناعە ئەوا بۆ ڤێ‌ قووناغێ‌ پیشەكارێن ئیرانی ئیناینە، لێ‌ من باوەرییەكا مەزن ب یاریزانێن خوە هەیە دێ‌ رێزا ئێكێ‌ پارێزین ب جووداهییەكا باشتر.
ژلایێ‌ خوەڤە هشیار فەریق ئەندامێ‌ كارگێرییا یانەیێ‌ و سەرپەرشتێ‌ تیما دهۆكێ‌ گۆت: تیما لاوان د قووناغا ئێكێ‌ دا ڕێزا دویێ‌ هاتبووین، لێ‌ د قۆناغا دویێ‌ دا ڕێزا ئێكێ‌ دەستڤەئینابوو، ئەڤ قووناغە بوو مە گەلەك یا گرنگە ژبۆ پاراستنا رێزبەندیێ‌ و نێزكبوونا ناسناڤی ژبەركو قووناغا چارێ‌ دێ‌ ل باژێرێ‌ مە دهۆكێ‌ هێتەكرن، لەوما ژی مە پلان و بەرنامەیەكێ‌ باش دانایە.
هەروەسان ناڤهاتی ئەوچەندە ژی گۆت: نە بتنێ‌ ل سەر ئاستێ‌ لاوان مە هیڤیێن ناسناڤی هەنە بەلكو تازەپێگەهشتیان و پشكۆژان كو بشێن دەستكەڤتێن كەسۆكی بۆ یانەیا مە بینن، وەكو كارگێرییا یانەیێ‌ هەر تشتەكێ‌ پێدڤی دهێتە بەرهەڤكرن پێخەمەت گەهشتن بۆ ئارمانجان.

چاڤەڕێ‌ دهێتە كرن ئەڤرۆ ل دەمژمێر پێنجێ‌ ئیڤاری 24 یاری ژ هەڤڕكیێن گەڕا شەشێ‌ و دووماهیێ‌ ژ خولا كوردستانێ‌ بۆ یاریزانێن ل بن 20 سالیێ‌ دا ل سەر ئاستێ‌ یانەیان بهێتە كرن ئەوا 28 یانە پشكدارن و هاتینە بەلاڤكرن ل سەر شەش كۆمان ل دووڤ چۆگرافییا دەڤەران.
ژ چارچووڤەیێ‌ كۆما پارێزگەها دهۆكێ‌ كو دبیتە كۆما ئێكێ‌ بڕیارە یانەیا زاخۆ ل یاریگەها خوە دەلال مێڤاندارییا یانەیا ئاكرێ‌ بكەت، هەرچەندە هەردو یانەیان پلێتا دەربازبوونێ‌ بۆ قۆناغا دویێ‌ مسۆگەر كرییە، زاخۆ سەرێ‌ لیستێ‌ دهێت ب15 خالان و ئاكرێ‌ ب12 خالان ڕێزا دویێ‌ دهێت، لێ‌ دێ‌ هەڤڕكی بۆ سەرێ‌ لیستێ‌ بیت، دیارییا دویێ‌ دا تەناهی دێ‌ بیتە مێڤانا یانەیا سێمێلێ‌، هەردو یانە چو هیڤیێن دەربازبوونێ‌ نەماینە، هەرچەندە تەناهی سێ‌ خال هەنە لێ‌ سێمێل بێ‌ خالە.
ژ یاریێن دی، كۆما دویێ‌: چەمچەمال- بازیان، خاك- بابان، سیروانی نوو چاڤەڕێ‌ یە.
كۆما سێیێ‌: ڕزگاری- دەربەندیخان، شێروانە- كفری، یانەیا شۆرجە چاڤەڕێ‌ یە.
كۆما چارێ‌: كۆیە- ڕانیە، قەلادزێ‌- چوارقورنە،
كۆما پێنجێ‌: زانكۆیا جیهان- پێشەسازی، ڕواندز- ئاڕاڕات، پێشمەرگەیا هەولێر چاڤەڕێیە.
كۆما شەشێ‌: برایەتی- شەقلاوە، هندرین- سۆران، یانەیا هەولێر چاڤەڕێیە.