هەرهین محەمەد:

ئەڤرۆ، زنار تۆڤی:
فلمێ ( ئه‌ردێ هشك و ئه‌سمانێ دوور) فلمه‌كێ درامی جڤاكیه‌، د فۆرمدا شیعرییه‌ و د ناڤه‌رۆكێدا شێوازێ ریالیزمی جادوییه‌، ئه‌و فلمه‌ بزاڤێ دكه‌ت وێنێ مرۆڤی، پشتی شه‌ری نیشان بده‌ت، ئه‌و
فلمه‌ به‌رهه‌مێ بزاڤ و كه‌دا كۆمه‌كا هه‌ڤالایه‌، كو خه‌ونه‌كا هه‌ڤپشك كۆمڤه‌كرینه‌، فلمساز و ده‌رهێنه‌ر هه‌وراز محه‌مه‌د، بۆ رۆژناما ئه‌ڤرۆ دبێژیت: وی كارێ ده‌رهێنانێ بۆ وی فلمی كریه‌ و نوكه‌ د قووناغا ئاماده‌كاریێ دایه‌ بۆ نیشادانێ، بریاره‌ ل هه‌یڤا بهێت ل هۆلا سینه‌ما سالم ل باژێرێ سلمانیێ و پاشی ل سینه‌مایێن دیتر یێن كوردستانێ بهێته‌ نیشادان، هه‌روه‌سا سیناریۆیا ڤی فلمی ژ نڤیسینا هه‌ڤپشك یا د ناڤبه‌ینا هه‌وراز محه‌مه‌د و مه‌نسور ته‌یفوری دایه‌، ئه‌ڤ كاره‌ ب پشكداریا ده‌سته‌یه‌كا فلمسازێن كورد ل هه‌موو پارچێن كوردستانێ هاتیه‌ دروستكرن، قاره‌مانێن سه‌ره‌كی یێن وی فلمی پێكدهێن ژ هونه‌رمه‌ندان (به‌ختیار په‌نجه‌یی، مریه‌م بووبانی، ئه‌ژده‌ر سازگار، دیمه‌ن زه‌ندی) و چه‌ندین ئه‌كته‌رێن دیتر، به‌رهه‌مهێنه‌رێ وی فلمی ( ره‌وه‌ز حه‌مه‌ سالح)ه‌، رێڤه‌به‌رێ هونه‌ری یێ ڤی فلمی (به‌رهه‌م ته‌یب)ه‌، هه‌روه‌سا رێڤه‌به‌رێ وێنه‌گرتنێ (سالم سه‌له‌واتی) یه‌، (تۆفیق ئه‌مانی) كارێ مۆنتاژكرنێ و (هه‌لگورد محه‌مه‌د تاهر) ی، كاری ره‌نگی بۆ وی فلمی كریه‌.
ناڤهاتی ئه‌و ژی دیار كر: كارێ مۆزیكێ ژ لایێ موزیكدانه‌رێ ناڤدار یێ رۆژئاڤایێ كوردستانێ (مه‌حمود به‌رازی) ڤه‌ هاتیه‌ كرن، د هه‌موو پشكێن ڤی فلمی دا باشترین هونه‌رمه‌ندێن هه‌ر چار پارچێن كوردستانێ تێدا پشكدار بووینه‌، ئه‌ڤ فلمه‌ به‌رهه‌مێ ده‌زگه‌هێ كلتۆریێ غه‌زه‌لنوسه‌ ب هه‌ڤپشكی ل گه‌ل كۆمپانیا لامیدیا، ده‌زگه‌هێ میدیایی كوردسات سپۆنسه‌رێ سه‌ره‌كیێ میدیایی یێ نیشاندانا وی فلمیه‌ ل كوردستانێ، وه‌سا بریاره‌ ئه‌و فلمه‌، پشتی نیشاندانا ناڤخۆیی بۆ فیستیڤالێن سینه‌مایی یێن نێڤده‌وله‌تی بهێته‌ هنارتن، هه‌روه‌سا سیناریۆیا فلمێ « ئه‌ردێ هشك و ئه‌سمانێ دوور) « دوور دبینیت، به‌لێ سه‌ر ب ڤێ پانتایا ڤێ جوگرافیێ ڤه‌یه‌، برین پێ ئاشنا دبن، كاره‌كته‌ر پێ ئاشنا دبن، برینێن وێ یێن مه‌نه‌ و جوان یێن وێ ژی ێین مه‌نه‌.
ناڤهاتی هێشتا دبێژیت: چیرۆكا ڤی فلمی، به‌حسێ هارونی دكه‌ت، كو هارون زه‌لامه‌كێ د ژییێ پتری شێست سالیێ دایه‌، ل كارگه‌ها حه‌لاندنا ئاسنی كار دكه‌ت، ئالۆده‌یێ ده‌رده‌كێ ده‌روونییه‌، به‌رده‌وام خه‌وا نه‌خۆش دبینیت، هه‌موو تشتان د ژیانێدا وه‌كو تشته‌كێ ره‌شبینی دبینیت، هارون لدووڤ چاره‌سه‌ریێ دا دگه‌ریت، ل ده‌ستپێكێ ب رێیا هه‌ڤاله‌كێ خۆ دچیته‌ (جه‌مخانه‌– جهێ یارانێن ته‌مبورژه‌نێن یارسان، داكو «پیر» ب ته‌مبورلیدانێ ده‌ردێ وی ده‌رمان بكه‌ن)، مۆزیك هه‌موو ده‌رده‌كی چاره‌سه‌ر دكه‌ت، به‌لێ ب تنێ ده‌ستێن هارونی نه‌بن، دڤێت ئه‌و ده‌سته‌ ل ده‌ستپێكێ د پاقژ بن، پیر، هارونی ڤرێدكه‌ته‌ ده‌ف ژنه‌كێ ل زۆزانان ل سێگۆشا سنۆری، ل وێرێ مریه‌م دژیت، مریه‌م ده‌قان چێدكه‌ت و دشێت ب چێكرنا ده‌قان، ده‌ردان دیاركه‌ت، هارون رێیا زۆزانێن به‌فر گرتی یێن ل سه‌ر سنۆرێن سێ ده‌وله‌تان دگریت و ب رێكێ ڤه‌ دبیته‌ شاهدێ چه‌ندین تشتان، هه‌تا دگه‌هیته‌ دناڤ گوندی و ب شه‌ڤ دچیته‌ مالا مریه‌مێ و چیرۆكا خۆ و ژیانا خۆ یا تایبه‌ت بۆ ڤه‌دگێریت، داكو مریه‌م ل سه‌ر بنه‌مایێ چیرۆكا ژیانا وی نه‌خشی وێ ده‌قێ بۆ بكێشیت، روودانێن دناڤ ڤه‌گێرانا چیرۆكا هارونی دا، ئالۆزیێ دروست دكه‌ت، چیرۆكێن هارونی و مریه‌مێ د خاله‌كا نه‌ چاڤه‌رێكری دا ئێكدگرن و دبنه‌ ئێك چیرۆك، چیرۆكا ئازار و لێگه‌ریانێ، چیرۆكا هه‌ستێ تاوانباری و هه‌ستێ به‌رزه‌بوونێ، چیرۆكا حه‌زژێكرنێ و ژناڤچوونێ، مان و ڤه‌دیتن دناڤبه‌ینا تۆلڤه‌كرنێ و لیبۆرینێ دا.

نەرمین ڕێکانی:

دەنگبێژ و راگەهاندنکارەکێ دیار کر کو مللەتێ مە یێ کورد ل هەر چار پارچێن کوردستانێ کلتور و فولکلۆرەکێ زەنگین یێ هەیی، هەر ژ جلوبەرگان و دابونەریت و داوات و شەهیانان بگرە هەتا دگەهیتە خەم و شین و تازییان، بەلێ د ڤی سەردەمی دا ب مخابنیڤە پتریا وان یێن ژ ناڤچووین و هاتینە پشت گوهـ هاڤێتن.
کوردستان سپیرتی، دەنگبێژ و سترانبێژا کورد ل باکوورێ کوردستانێ د دیدارەکێ دا بۆ روژنامەیا ئەڤرۆ گۆت: داوات و فلکلورێ مە یێ کوردی، هەر ژ پازدە سالێن چویی و هەتا ڤان سالێن نێزیک ژی گەلەک و گەلەک پاشڤەچوبوون و گەلەک نەخوەش ببوون هاتبوونە پشت گوهـ هاڤێتن، هەموو ببوونە دابونەریتێن مللەتێن بیانی، دەواتێن مە بیک و زاڤایێن مە هەر ژ شێوازێ ل بەرکرنا جلوبەرگان هەتا کرنا دەواتێ هەمی وەك دابونەریتێن مللەتێن بیانی لێ هات بوون، بەلێ د نوکە دا هێدی هێدی ئەم دبینین خەلکێ مە یێ ل خوە دزڤریت بۆ سەردەمێ باب و باپیرا و کوردەواریێ زاڤایێن مە شال و شاپکا و بیکێن مەژی کراس و فیستانان دکەنێ، و شێوازێ دەرئێخستنا بیکێ ژ مالا بابێ ، و هەروەسا زاڤا ل دەمێ سەرشیشتن و ریهـ تراشینێ ئەم ب ستران و نارینکێن تایبەت ب بیک و زاڤایان ڤە یێن کوردەواری دگێرین و وان رێورەسمان برێڤە دبەین،
ژ ئالیێ خوەڤە دەنگبێژ و راگەهاندن کار هاشم عومەر، بەرنیاس ب هاشم بوسەلی ، سەبارەت هەمان بابەت دیارکر کو فولکلۆر و دابونەریتێن مە یێن کوردەواری یێن بەرێ ب تایبەتی داوات و شەهییان گەلەک هاتبوونە ژبیرکرن، بەلێ ل ڤان دووماهیان وەک یا دیار خەلکێ مە یێ دزڤریتە ل سەر دابونەریت و کلتورێ مە یێ کوردەواری یێ کەڤن.
هەروەسا گوت د نوکەدا ئەم پشکداری هندەك داواتان دبین، رێورەسمێن دەرئێخستنا بیکێ ژ مالێ و سەرشوویێن زاڤا و شەڤبێری و گێرانا سەرسبحیا زاڤا و سترانێن کوردی دهێنە کرن وگۆتن و جلوبەرگێن کوردی دهێنە ل بەرکرن ئەڤە ژی پشتەڤانەکە و زڤرینەکە بۆ کلتورێ مە یێ کەڤنار کو ئەم جارەکا دی نوو بکەینەڤە .
نافهاتی گۆت: بەری نوکە خەلکێ مە گەلەک گوهداریا سترانا کوردی نەدکر گوهداریا ڤان چیروکێن دەواتا و سترانێن ب سەرێ زاڤا و پێگوتنان نەدکر و گەلەک پشت گوهـ هاڤێتبوو، بەلێ نوکە ئەم دشێین ببینین ئەو چیرۆك و ئەو داواتە یێ ساخ دبنەڤە و خەلکێ مە پیچەک یێ لێ دزڤریت.