بێوار حەمدی:

سەیاف حەسەن، بەرپرسێ‌ كۆمپانیا نۆژەن یا كارێن دۆبلاژێ‌، د دیدارەكێ‌ دا بۆ رۆژنامەیا ئەڤرۆ گۆت: نوكە پتری (70) كەسان ل دەف مە كاردكەن، بەلێ‌ بەردەوام گۆهۆڕین دروست دبن و هندەك جاران ئەم پێدڤی دۆبلێرێن زێدەترین و ب دیتنا من د نوكە دا كارێ‌ دۆبلاژێ‌ ژ بەرێ‌ باشترە، ب تایبەت ژلایێ‌ تەكنیكی ڤە، ل دەستپێكێ‌ مە گەلەك درامایێن توركی دۆبلاژدكرن، لێ‌ نوكە پتر درامایێن هندی نە و ئەم بزاڤێ‌ دكەین گرنگیێ‌ ب هەموو درامایان بدەین، چنكو د نوكە دا رەخنەگرتن ل كارێ‌ مە گەلەك كێم بوویە و خەلكەك ژی گەلەك ب درامایان ڤە هاتیە گرێدان.

زنار تۆڤی:

مۆزیكژەن (سیڤان پایەدار) د دیدارەكێ‌ دا بۆ رۆژنامەیا ئەڤرۆ گۆت: من ب شێوازێ‌ فانك، ئاوازا سترانەكا هونەرمەند محەمەد شێخۆیی تۆمار و كیلپ كریە، ئەز حەز ژ ڤی شێوازێ‌ مۆزیكێ‌ دكەم، هەروەسا ل سالا 2000 من دەست ب مۆزیكێ‌ كریە و پشكداری د پشكداری د هژمارەكا فەستیڤالێن نێڤدەولەتی ل دەرڤەی وەلاتی ژی دا كریە، من پشكداری د كۆنسێرتان ژی دا كریە و دو كۆنسێرتێن تایبەت ژی گێراینە.
ناڤهاتی گۆت: هەتا نوكە من پتری حەفت كلیپە مۆزیك چێكرینە، بەری چەند رۆژان من ڤیدیۆ مۆزیكەكا نوو بەلاڤكریە، كو من ل وەلاتێ‌ ئەلمانیا وێنەكریە و هەروەسا مۆزیكژەنێن ناڤدار یێن ئەلمانی و فرەنسی و توركی و رۆمانی پشكداری د چێكرنا وی بەرهەمی دا كریە..

شاكر ئەتروشی:

زانكۆیا نەورۆز/ پشكا کارگێریا راگەهاندن و رۆژنامەڤانی، خۆلەكا رۆژنامەڤانی یا نەهـ رۆژی بۆ هژمارەكا قوتابیێن خوە، كو ژ هەموو كولیژ و پشكێن زانكۆیێ‌ پێك دهاتن هاتە رێكخستن.
دسێ‌ رۆژێن ئێكێ‌ دا وانە ل دۆر (چاوانیا نڤیسینا نووچە و گۆتاران) ژلایێ‌ ماموستا (عەبدولخالق سولتان) هاتە پێشکێشکرن، و سێ‌ رۆژێن دووڤدا ژلایێ‌ ماموستا (د. رەوان نهێلی) ل دۆر بابەتێ (دێ چاوا گۆتارەکا باش نڤیسی) هاتە گۆتن، د سێ رۆژێن دوماهیێ دا رۆژنامەڤان (كاوە دیار دۆسكی) لدۆر بابەتێ (بنەمایێ دیزاینا رۆژنامەڤانی، دێ چاوا بیە دیزاینەرەکێ سەرکەفتێ) و د دو رۆژێن دووماهیێ‌ ژی دا سەرەدانا رۆژنامەیا ئەڤرۆ كرن و ل سەردەستێن دیزاینەرێ‌ رۆژنامەیا ئەڤرۆ ب شێوەیەكێ‌ پراكتیكی فێرێ‌ چاوانیا دیزاینكرنا رۆژنامە و کۆڤاران بوون.
كاوە دیار دۆسكی ئێک ژ مامۆستایێن خۆلێ دا دیارکرن، یا فەرە ئەڤ جۆرە خولە بۆ گەنجێن حەز ل سەر کارێ رۆژنامەڤانیێ هەین بۆ بهێنە رێکخستن داکو پتر مفای ژێ ببینن، رەنگە ئەڤ نەهـ رۆژە د کێم بن لێ هەر چەوابیت دێ مفا ژێ هێتە وەرگرتن.
هیڤیدار بەهجەت، قوتابیا قوناعا دویێ‌، پشكا كارگێڕی كار، گۆت: مە مفایەكێ‌ گەلەك باش ژڤێ‌ خولێ‌ دیت و ل ڤێرە ئەز باشتر فێربووم كا دێ‌ چاوا نووچەی نڤیسم، هەروەسا راپۆرتان چێكەم، دەربارەی دیزانیێ‌ ژی ئەم گەلەك تشتێ‌ باش ژ ماموستا (كاوە دیار دۆسكی) دیزاینەرێ‌ رۆژنامەیا ئەڤرۆ و ماموستایێ‌ خولێ‌ دكەم كو ب شێوەیەكێ‌ ئەكادیمی ئەم فێری كارێ‌ دیزاینێ‌ كرین و وەك ئەز دزانم زانكۆیا مە ل بەرە رۆژنامەیەكێ‌ دەربێخیت ل وی دەمی ئەز دێ‌ كەسا ئێكێ‌ بم ب كارێ‌ دیزاینكرنا وێ‌ رۆژنامێ‌ رابم.
ئەیوب بایز، قوتابیێ‌ قوناغا سێێ‌ ل كولیژا یاسا گۆت: لڤێ‌ خۆلێ‌ ئەم فێری گەلەك تشتێ‌ نوو بووین كو بەری نوكە مە نە دزانین، ب تایبەت ژی دوارێ‌ دیزاینێ‌ دا و كەیفخۆش بووم كو ل رۆژنامەیا ئەڤرۆ فێری گەلەك تشتان بووم و ئەڤە ژی بۆ من جهێ‌ شانازیێ‌ یە، چنكو رۆژنامەیا ئەڤرۆ قوتابخانەیا راگەهاندنێ‌ ل دەڤەرا بەهدینان.

دلۆڤان هالۆ:

مەزاختن ل گۆڕەی وی داهاتی ب دەست مە دكەڤیت ئەم پێدڤیێن خوە یێن رۆژانە پێ دابین دكەین، ل ڤێرێ ئەم دێ فوكسا خوە ئێخینە سەر مەزاختنا خوارنێن زێدە و دیاردەیا زێدەرەویا خوارن و ڤەخوارنێن دناڤ مال و شەهیانان و تازیان دا دهێتەكرن ژ ئەگەرێ چێكرنا گەلەك جۆرێن خوارنێ و هەر جۆرەك ب رێژەیەكا مەزن گەلەك جاران ژ نیڤێ پتر ئەو خوارن ناهێتە خوارن دێ هاڤێژنە دناڤ گلێشی دا، ل دووف ژیدەركێ ژ جهێن كومڤەكرنا گلێشی ل دیدارەكا دهۆك تیڤی ل سالا بۆری ٢٠٢٤ گلێشێ پارێزگەها دهۆك نزیك ٦٠ ٪ خوارنە ئەڤ رێژەیە نە كێمە بهێتە ب هەدەردان.
سەرەرای دهۆك ئێك ژ پارێزگەها هەژارە جهێ پسیارێ یە بۆچی بهانە گەلەك هەنە بۆچی دەمی دو مێهڤان هاتن بۆ مە ئەمێ بێژن كابانیا مالێ خوارنێ بۆ چار كەسان زێدە بكە دا مێهڤان لۆمەی مە نەكەن ئەم ژێ شەرم نەكەین، نموونەكا من دیتی دێ بێژم ئەز دگەل هەڤالەكێ خوە بیم و وی خو گەلەك مژول كر تەلەفۆن ل دووف تەلەفۆنی بەرسڤا ددا من گوتێ تەخێر تۆ هوسا ب كاركەفتی؟ گۆت دێ مهێڤان بۆ هێن، من گۆتێ دیارە مێڤانێن تە گەلەكن، گۆت خودێ ئەڤە ژ دوهی وەرە ئەز یێ ئامادەكاریان دكەم هەموو دەهــ كەسن هەتا دوازدە كەسان من خوارنا پێنچی كەسان یا ئامادەكری، من گۆتێ ما ئەڤە نە (اصرافە) مەزاختنا زێدە یە گۆت: خودێ مەزاختنا زۆرە ، من گۆت راستە قەدرگرتنا مێهڤانی گەلەك پێدڤیە پەیوەندیێن چڤاكی بهێزتر دكەت ژلایێ ئایینی ژی ڤە خێرەكا مەزنە، مللەتی كور د ب ناڤ و دەنگ بۆ قەدرگرتنا مێهڤانی.
مەردینی سالۆخەتەكێ گەلەك باشە تۆ ل دەڤ هەموو كەسێ نابینی بەلێ بلا ئەم خەلەت ل مەردینی یێ نەگەهین ب ناڤێ مەردینی و ناندەهـیێ مەزاختنەكا گەلەك بكەین ل جهێ خێر بۆ مە بهێتە نفیسن بكەڤینە د بن گونەهان ڤە، چونكی خودایێ مەزن فەرمانێ دكەت مەزاختنێ نەكەن هەرەوسا پێغەمبەر(س.خ) دبێژت ( هەكەر تۆ ل سەر دەریایێ بی چێ نابیت تۆ مەزاختنێ دئاڤێ دا بكەی) ل دەمی دەستنفێژ گرتنێ، ما دەریا چەند ئاڤا تێدایە بێ هژمارە ئەرێ تۆ چەند ئاڤێ ژ دەریای ببی دێ كێم بیت بەرسڤ نە سەرەری ڤێ ئاڤا بۆش گەلەك مەزن چێ نابیت تۆ زێدەی پێدڤییا خوە ب مەزێخی، ئەڤە نێزیك مەها رەمەزانا پیرۆزە هات باوەربكە مەها پەرستنا خودێ یە مخابن مە ناڤێ وی یاكری مەها خوارنێ مەزاختنەكا زێدە و نە پێدڤی دهێتەكرن ژ بێ پیلانی و نە رێكوپێكیا مەزاختنا بەرەللا هەر ئەندامێ خێزانێ دلێ وی چو چی دێ ژلایێ خوەڤە گریت خوە پارە ژێ نەبیت دێ قەركەن، دەمی بانگێ مەغرەب دێ بینێ دەهــ جۆرین خوارن و ڤەخورنێ ئامادەنە تۆ نوزانێ دێ چ خوی دێ چ هێلی نیڤەكا ڤێ خوارنێ دهێت هاڤێن جیرانێ ب رەخڤە هەژارە برسی یە هاژێ نینە، مەزن دبێژن (خوارن ل هەموو نەفسان بەلێ لباس نەل هەموو بەژنا) سەرەری خودێ ئەڤ نعمەتە هەموو بۆ مە بەردەست كرن دڤێت ئەم سوپاسداربن.

شاهۆ فەرید:

پەیكەساز (كارزان رەمەزان) كو ژ قەزایا سێمێلی یە، د دیدارەكێ دا بۆ رۆژنامەیا ئەڤرۆ گۆت: هونەرێ پەیكەرسازیێ نوكە پترجهێ خوە یێ كری، ژبەرێ پووتە پێدانەكا باش ب هونەری بگشتی دهێتە دان و پەیكەرسازی بوویە جهێ سەرنجا خەلكەكی بۆ چێكرنا دیكورێن مال و جهێن بازرگانی قەستا پەیكەرسازی دكەتن بۆ چێكرنا دیكۆرێ‌ ژ درەڤە و ناڤدا، جڤاكێ مە د بەرێ دا ب شێوەیەكێ دی بەرێ خوە د دانە پەیكەری، بەلێ ڤان دووماهیا زانینە بتنێ بۆ جوانیێ یە.
ناڤهاتی گۆت: من پشكداری د هژمارەكا چالاكیێن هونەری دا كریە دەمێ قوتابی ل پەیمانگەها هونەریێن جوان و زانكۆیێ، مەرەم ژچێكرنا پەیكەری رێزگرتنە بۆ وی كەسی دا هەر زیندی بمینیت و خەبات و رێبازێن وی نەهێنە ژبیركرن، چنكو ب ڕێكا پەیكەری ئەم دشیێن چەندین پەیامان بگەهین و نیشادانا پەیكەران د ناڤ باژێران دا ب كارەكێ‌ باش دبینم و هەر كەسەكێ پشكا هونەری ب دووماهی ئینا بیت بلا دەست بەردای نەبیت و یێ‌ بەردەوام بیت و پێدڤیە پشتەڤانیا ماددی بۆ دەسترەنگینا هەبیت و جهێن تایبەت بۆ وان ڤەكەن.

سولین سلێمان:

سترانبێژ (شنیار نەجیب) د دیدارەكێ‌ دا بۆ رۆژنامەیا ئەڤرۆ گۆت: دژیەكێ‌ بچووكدا من ستران بۆ زارۆكان دگۆتن و من چار كلیپ هەنە و هەتا نوكە یا بەردەوامم.
هەروەسا گۆت: دەمێ‌ من ستران بۆ زارۆكان گۆتین ژیێ‌ من نەه سال بوون، من مۆزیكا سترانێن خوە ژی هەر من دانا بوون، چنكو من خوە فێری چەند ئامیرەكێن مۆزیكێ‌ كربوو، هەروەسا من پشكداری د هژمارەكا كونسێرت و ڤەستیڤالان دا كریە، بۆ زانین سترانا من یا ئێكێ‌ ب ناڤێ‌ (دل لەسینەم دەرچوو) كو ل وی دەمی خەلكی گەلەك حەزژێكر و ب دیتنا من نوكە هونەرێ‌ كوردی د ئاستەكێ‌ باش دایە، لێ‌ هندەك كەس هونەری بەر ب لاوازیێ‌ ڤە دبەن، ئانكو دشێم بێژم هەموو كەس نە هونەرمەندن.

هێلین سالم:

حەجی بەشیر، خودانێ‌ دوكانەكا گژوگیایێن سروشتی یە، د دیدارەكێ‌ دا بۆ رۆژنامەیا ئەڤرۆ گۆت: ئەڤە (39) سالن ئەم وەك بنەمال كارێ‌ فرۆتنا بهارات و گیایێن هشككری دكەین و ئەم بەرهەمێن خوە ژ كوردستانێ‌ و هندستانێ‌ و پاكستانێ‌ و باكۆرێ‌ ئەفریقیا دئینین.
هەروەسا گۆت: دەربارەی گیایێن سروشتی كو بۆ وەك دەرمان بكار بهێن، سێ‌ گیایێن هشك هەنە هەكە مرۆڤ یێ‌ ساخلەم ژی بیت یان هەر چ نەخۆشیەك هەبیت، ئەڤ گیایە دەرمانن ئەوژی ( زەنجەبیل، كەمۆن، دراچین) و هەر كەسەكێ‌ ڤان گیایان بخۆت و بكەلینیت و ڤەخۆت دێ‌ ساخلەمیا وی گەلەكا باش بیت.