بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان بەرسڤا ئاخڤتنێن سەرۆكێ ئێكەتیێ د دەت و دبێژیت: دەمێ بافل تالەبانی د ئاخڤیت عەقلی وی د سەری دا نینە و پێدڤی ب چارەسەریێ هەیە. دوپاتی ل وێ چەندێ ژی كر، ئاخڤتنێن بافل تالەبانی جهێ پێكەنینێ نە و پێدڤییە خوە كۆنترۆل بكەت.
فازل میرانی، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان، گوت» ئیراق كووراتییا مە یا ستراتیژییە، هەروەسا پەیاما پارتی د بانگەشەیێ دا گەلەك یا رۆهن بوو، رێیا راست ئەوە یا ئەم ل سەر چووین، لەوما دڤێت ئالیێ دی یێن كوردستانێ ژی بهێنە ل گەل مە و هەڤڕا و هاریكارێن مە بن».
بەرپرسێ دەستەیا كارگێرییا مەكتەبا سیاسییا پارتی، ل دۆر داخویانیێن سەرۆكێ ئێكەتیێ ب پێدڤی زانی ئاماژە ب وێ چەندێ بكەت» ب راستی جهێ شەرمێیە كەسەكێ وەسا سەرۆكێ حزبێیە، بەلكو ئەو كەسە دیرۆكا ئێكەتیێ ژی نزانیت و هاتیە سەر مالەكا بەرهەڤكری، رەفتارێن وی یێن سەرۆك حزبا نینە».
هەڤدەم فازل میرانی ئەوژی نەڤەشارت كو ئێكەتی سەرەرای وان تۆمەتێن د بەخشیت، دڤێت وێ چەندێ بزانن ل سالێن 1964 هەتا 1970 سیاری دەبابەیێن ئیراقێ بووینە و خیانەت ل كوردان كریە.
هەر د بەرسڤا ئاخڤتنێن سەرۆكێ ئێكەتیێدا، بەرپرسێ دەستەیا كارگێرییا مەكتەبا سیاسییا پارتی راگەهاند» ئەو ئاخڤتنێن كو بافل تالەبانی كرین، بابێ وی یێ رەحمەتی ژی ئەڤە نەگوتیە و ب وی شێوەی هزر نەكریە، مام جەلالی هەردەم دگوت د ناڤبەرا خوە و پارتی دا تێكنادەم، یێ پەشێمانم كو ل دەمێ بۆری ژ مەلا مستەفا بارزانی جودابوویم».
میرانی باس ل وێ چەندێ ژی كر» بۆ من جهێ حێبەتیێیە د ناڤ ئێكەتیێدا كەسەك نینە شیرەتا ل بافل تالەبانی بكەت و بێژیتێ ئەو داخۆیانیێن تە د باش نینن و زیانێ د گەهیننەمە! ب راستی داخۆیانییا وی جهێ پێكەنینێیە و تنێ زارۆك پێ دكەنە كەنی».
فازل میرانی ئاماژە ب وێ چەندێ ژی كر» ئەو چەندا سەرۆكێ ئێكەتیێ دبێژیت ئەم د وەسا نینین، دیرۆكا مە یا دیارە و دیرۆكا وان ژی یا دیارە».
د بەرسڤا درووشمێ دێ ژناڤبەین، بەرپرسێ دەستەیا كارگێرییا مەكتەبا سیاسییا پارتی گوت» ئەوێ وان ئاخڤتنان بێژیت دڤێت پرسیارێ ژ خوە بكەت دێ كێ ژناڤبەت؟ پارتی دو بەرامبەری ئێكەتیێ جەماوەر هەیە و هێزا لەشكری هەیە، دیرۆكا پارتی دەه بەرامبەر یا ئێكەتیێ پاقژترە، ب راستی ل دەف مە شەرمە ب هەمان شێوازێ وان بەرسڤا وان بدەین، ئاستێ خوە نائینینە خوارێ بۆ ئاستێ وان».
سەبارەت ب جوداهییا 31 ئاب 1996 و 16 ئۆكتۆبەرا 2017، فازل میرانی، رۆهنكر» ل 31 ئاب مە برادەرێن ئێكەتیێ بۆ دەمەكی ژ كوردستانێ دەركرن و پاشی ئاشتبووین، بەلێ وی دەمی كەركووكی ژ دەستێ كوردان نەهاتە دەرئینان، ئەرێ ئەوان ل 16 ئۆكتۆبەرێ چ كر، كا كەركووك، كا شنگال، كا خانەقین، كا مەخموور؟».
ل دۆر ئەگەرێن پێكنەئینانا كابینەیا دەهێ یا حوكمەتا هەرێما كوردستانێ، بەرپرسێ دەستەیا كارگێرییا مەكتەبا سیاسییا پارتی گوت» ئەم دشێین بێی ئێكەتیێ حوكمەتێ پێكبینین، بەلێ مە وەنەكر، نوكە ژی مە بڤێت دشێین وەبكەین، بەلێ ئێكەتی یا هاتی شانازیێ ب وێ چەندێ دكەت كو نەهێلایە حوكمەت بهێتە پێكئینان، پێكنەئینانا حوكمەتێ د بەرژەوەندییا ئاكنجیێن هەرێما كوردستانێ دا نینە».
فازل میرانی گوت ژی» ئێكەتی هەردەم رەوشێ خرابتر دكەت، بەلێ پارتی بەرۆڤاژی وان رەوشێ باشتر دكەت و كاروانێ ئاڤەدانیێن وێ یا بەردەوامە، ئێكەتی بوو ئەگەرێ دائێخستنا فرۆكخانەیا سلێمانیێ بەلێ پارتی ڤەكر».
هەر د بەرسڤا داخۆیانیێن سەرۆكێ ئێكەتیێ، فازل میرانی گوت» سەرۆكێ ئێكەتیێ عەقل د سەری دا نینە، ئەو ب تانك و چەكێ گران چوو سەر هۆتێلا لازارێ، بەری چەند رۆژان كەسەك كو ئەوان ل لالەزار دەستەسەركربوو بۆ كەسوكارێن وی هاتیە هنارتن، ئەڤە ئەو ئازادییە كو بافل تالەبانی باس دكەت؟ سەرەرای ڤێ چەندێ ژی چاوان ژ روویێ وی دهێت باسێ ئازادیێ بكەت، ب راستی ئەو برادەرە یێ دروست نینە و پێدڤیە ب چارەسەریێیە».
بەرپرسێ دەستەیا كارگێرییا مەكتەبا سیاسییا پارتی گوت ژی» دڤێت برادەرێن ئێكەتیێ كۆنترۆلا بافل تالەبانی بكەن، چونكە ب راستی ئاخڤتنێن وی نە خزمەتا كوردان، نە یا ئێكەتیێ، نە پێكڤەژیانێ دكەت».
سەبارەت پەترۆل و غازا كوردستانێ، فازل میرانی ئاماژە ب وێ چەندێ كر» سامانێ سروشتی مولكێ هەموو خەلكێ كوردستانێیە، نە تنێ مولكێ ئێكەتیێ و نە پارتییە».
سەبارەت پڕۆژەیێ رۆناهی ژی گوت» ئەو پڕۆژەیە دەستكەفتە و ب وێ رێ كێشەیا كارەبێ ل كوردستانێ هاتە چارەسەركرن، پێدڤییە ئەم هەموو شانازیێ ب وێ دەستكەفتێ بكەین، د بەرژەوەندییا مە هەموویانە».
د پشكەكا دی یا ئاخڤتنێن خوە دا میرانێ ئەوژی بەرچاڤكر» پێدڤییە زمانێ زڤر و بێ سلووكی بهێتە ب دووماهی ئینان، نابیت ئەو بێ سلووكییە د ئەدەبیاتێن جڤاكێ كوردی دا هەبیت، چونكە مللەتێ كورد مللەتەكێ ب ئەدەب و ئەخلاقە، ئەوێن زمانێ زڤر بكاردئینن دڤێت وێ ئاخڤتنا كوردی « چیا ب چیا ناكەڤیت، بەلێ چاڤ ب چاڤی دكەڤیت» ل بەرچاڤ وەربگرن».
هەدەم سەرنج بۆ وێ چەندێ راكێشا، ل بەغدا ئاخڤتنێن مە و ئێكەتیی د جودانە، ئاخڤتنێن مە بۆ نیشتمانپەروەیێ، بەرژەوەندییا كوردستانێ و پاراستنا ئەزموونا مللەتێ كوردە.
سەبارەت ب ئاخفرۆشتنێ و خیانەتێ، میرانی راگەهاند» بۆ جارا ئێكێ ل سالا 1964، ئێكەتی بوو دەست ب خیانەتێ و ئاخفرۆشتنێ كری».
میرانی ل درێژییا ئاخڤتنێن خوە دا باس ل سلێمانیێ كر و گوت» سلێمانیێ مولكێ ئاكنجیێن وێ یە نەك حزبەكێ، چەندین ئاكنجیێن سلێمانیێ كو د ناڤ واندا سەرمایەدار و خودان پڕۆژە هەبوون ژ ئەگەرێ گەفێن سەرۆكێ ئێكەتیێ هاتن هەولێرێ، پشكەك ژ وان ژ بەر ڤێ عەقلییەتا سەرۆكێ ئێكەتیێ، ب ئێكجاری كوردستان بجه هێلا».
دوپاتی ل وێ چەندێ ژی كر» سەرۆكێ ئێكەتیێ كەسەكێ گەلەك نەزان و پێ پێزانینە و نە دیرۆكێ دزانیت و نە جوگرافییایێ دزانیت».
ل دۆر كێشەیا مووچەیێ فەرمانبەرێن هەرێما كوردستانێ، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان ئاشكرا كر» ئێكەتی بوو ل دەستپێكێ پڕۆژەیێ تەوتینێ قبوولكری، پاشی دگوت داخوازا مووچەی ژ بەغدا بكەین، ئەو دێ بۆمە هنێرن، نوكە دبێژم بلا بهنێرن بۆ نەهنارت؟ هەكە سەرۆكێ ئێكەتیێ راست دبێژیت بلا وەبكەت مووچەیێ وان مەهێن ماین بەغدا بهنێریت».
فازل میرانی د پشكەكا دی یا ئاخڤتنێن خوەدا ئاماژە ب وێ چەندێ كر» ئەم ل بەغدا داكۆكیێ ل مافێن وەلاتیێن هەرێما كوردستانێ دكەین و ئەم وەك ئێكەتیێ نینین تنێ بۆ حزبا خوە ل بەغدایێ كار بكەین، بەلكو ئەم بۆ مللەتێ خوە ل بەغدایێ نە».
ل دۆر بجهئینانا پڕۆژەیان ل سلێمانیێ، میارنی رۆهنكر» ئێكەتی بودجە ژ كیرا ئینایە هەتا پڕۆژەیان ب ناڤێ خوە ڤەكەت، هەموو داهاتێ ڤێ مللەتی ئێكەتی بۆ خوە بكاردئینیت، ئێكەتی كو ب رێیا مالپەرەكی مەهانە رێژەیا داهاتێ ناڤخوەیێ سلێمانیێ تێدا بەلاڤ دكەت، بەلێ هەموو چاواشەكارییە و ئەوێن بەلاڤ دكەت هیچ راست نینن».
دیاركر ژی» دەمەكی مەسرور بارزانی، سەرۆكێ حوكمەتا هەرێما كوردستانێ خواستبوو لیژنەیەكا هەڤپشك بۆ هەموو دەرگەهێن سنووری یێن هەرێما كوردستانێ بهنێریت، بەلێ ئەو دەرگەهێن كو ل بن دەستێ ئێكەتیێ بوون ب وی كاری رازی نەببوون و گەلەك ب رەهایی گوتبوویێ هەكە ئەو لیژنە بهێتە هنارتن دێ شەڕێ ناڤخوە دروست بیت».
میرانی باسێ سەروەت و سامانێ سەرۆكێ ئێكەتیێ كر و ئاشكراكر» بافل تالەبانی هێلیكۆپتەر و فرۆكەیا تایبەت هەیە، ل هەموو جیهانێ كۆچك هەنە، ئەو سەروەت و سامانە ژ كیڤە ئینایە؟».
گوت ژی» مەلا مستەفا بارزانی و باب وباپیرێن مە، هەردەم د ناڤ خەلكیدا د رێزگرتی بوون، دەمێ چووینە رووسیا ژی هەر رێزەكا مەزن لێ هاتە گرتن، دەمێ هاتینە كوردستانێ ژی هەر ب سەربلندی و قەهرەمانی وڤرین، بەلێ ئەوێن بافل شانازیێ پێ دكەت، دەمێ زڤرین كوردستانێ ب زەلیلی زڤرین».
بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان، پەیامەك ئاراستەی سەرۆكێ ئێكەتیێ كر و گوت» چ ژ دەستێ وی دهێت بلا بكەت و د بێ منەتین ژ وی، هەروەسا كونسولگەری و نوونەرێن وەلاتان ژی كو ل هەرێما كوردستانێ نە دەمێ گوه ل ئاخڤتنێن بافل تالەبانی دبن تنێ پێ دكەنە كەنی».
سەبارەت ب دو ئیدارەیێ، میرانی دوپات ل وێ چەندێ كر» ئەم هەموو دژی دو ئیدارەیی نە و چو جاران كارەكێ ب وی شێوەی روونادەت».
بەرپرسێ دەستەیا كارگێرییا مەكتەبا سیاسییا پارتی، باس ل خەونەكا دێرین یا ئێكەتیێ كر و ئاماژە ب وێ چەندێ كر» ئێكەتی ژ مێژە بزاڤێ دكەت پارتی ژناڤببەت ل كوردستانێ، بەلێ چو جاران نەشێت وی كاری بكەت، دئینمە بیرا هەوە خەونەكە و نابیتە راستی، ئەو خەونا وان ل سالا 1963 هەیە».
میرانی ل دووماهییا هەڤپەیڤینێدا پەیامەك ئاراستەی هەموو حزبێن كوردستانێ كر كو تێدا هاتیە» دڤێت بەرژەوەندییا خوونا شەهیدان و خەلكی ل بەری بەرژەوەندییا حزبی بیت، دڤێت ب وەفاداری بۆ خوونا شەهیدان هزر بكەین و پێنگاڤان هاڤێژین».

دهۆك، لەزگین جۆقی:

پرۆسەیا دەنگدانا تایبەت و ئاوارەیان دوهی 9/11/2025 و ل دەمژمێر 7:00ی سپێدێ‌ ل سنۆرێ‌ پارێزگەها دهۆكێ‌ دەستپێكر و هەتا 6:00ی ئێڤاری یا بەردەوامبوو، پرۆسە ب رەنگەكێ‌ گەلەك رێك و پێك و سەركەفتیانە هاتە ئەنجامدان و رێژەیا پشكداریێ‌ ژی د دەنگدانا تایبەت دا گەهشتە 98%.
سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ‌ دوهی 9/11/2025 ل ئێك ژ بنگەهێن دەنگدانا تایبەت ل دهۆكێ‌ دەنگێ‌ خۆ دا و د داخویانیەكێ‌ دا بۆ دەزگەهێن راگەهاندنێ‌ گۆت: «پرۆسەیا دەنگدانێ ل دهۆكێ گەلەك باش هاتە ئەنجامدان، هەردەم خەلكێ دهۆكێ و زاخۆ پشكداریەكا مەزن د هەلبژارتنان دا دكەن، لێ مخابن یاسایا هەلبژارتنێن ئیراقێ‌ غەدرەكا مەزن ل مە كریە، ب تایبەت د وارێ كۆرسیێن پەرلەمانێ ئیراقێ دا، ل دووڤ دەنگدەر و هەژمارا ئاكنجیێن دهۆكێ غەدر هاتیە كرن».
سەربەست لەزگین گۆتژی: «خەلكێ مە گەلەك باش پشكداریێ دكەن و دەنگێن خۆ ددەن، پێدڤیە هەژمارا نوونەرێن دهۆكێ ل پەرلەمانێ‌ ئیراقێ زێدەبیت بۆ پاراستنا مافێن خەلكی».
دیسا خالد عەباس، بەرپرسێ ئۆفیسا پارێزگەها دهۆكێ یا كۆمسیۆنا هەلبژارتنێن ئیراقێ‌ دوهی 9/11/2025 سەرەدانا بنگەهێن دەنگدانێ‌ ل دهۆكێ‌ كر و بۆ دەزگەهێن راگەهاندنێ‌ دیار كر كو پرۆسەیا دەنگدانێ‌ ب باشی و رێك و پێكی هاتە ئەنجامدان و گۆت: «بۆ هەلبژارتنێن پەرلەمانێ عێراقێ رۆژا 11/11/2025ێ هندەك رێنمایێن نوو هاتینە دەرئێخستن و بۆ ئێكەم جار بابەتێ بوویە هاتیە لادان بۆ دەنگدانێ، دیسا دەنگدەر ب تنێ دشێن كارتا خۆ یا دەنگدانێ ل گەل خۆ ببەن و پێدڤی ب چو بەلگەنامەیێن دی نابن».

زاخۆ، دلۆڤان هالۆ:

ل سەر ڕاسپاردەیا مەسرور بارزانی، سەرۆكێ حكومەتا هەرێما كوردستانێ و ب چاڤدێرییا گوهدار شێخۆ، سەرپەرشتێ ئیدارەیا سەربخوە یا زاخۆ، ب گوژمێ 24 ملیار و 530 ملیۆن دیناران بەرێ بنیاتی بۆ چەندین پڕۆژەیێن خزمەتگوزاری ل ئیدارا سەربخوە یا زاخۆ هاتە دانان.
ئەو پڕۆژە ژ چێكرنا جادە و سۆلینێن ئاڤڕێژ ل تاخێ بارزان و چێكرنا جادەیێن تاخێ ئەیلۆل و پێشمەرگە، چێكرنا جادە و سۆلینێن ئاڤڕێژ ل تاخێ تلكەبەرێ، دیسا دانانا هێمایێن هاتنوچوونێ بۆ جۆتسایدێ ئیبراهیم خەلیل هەتا باتێلێ، چێكرنا ئۆڤەرپاس و ئەندەرپاسێن جاددەیا خەبات و گۆندكی پێك دهێن.
گوهدار شێخۆ گۆت: «ب راسپاردەیا مەسرور بارزانی، سەرۆكێ حكومەتا هەرێما كوردستانێ، كاروانێ ئاڤەدانیێ د هەموو وارەكی دا ل سنۆرێ ئیدارەیا سەربخوە یا زاخۆ بەردەوامە».