قەیس وەیس:

ل ئەینییا بۆری ب شێوەیەكێ‌ فەرمی پەردە ل سەر وەرزێ‌ 2024-2025ێ‌ یا خولا ستێرێن ئیراقێ‌ یا فوتبۆلێ‌ هات، پشتی ب دووماهی هاتنا یاریێن هەڤڕكیێن گەڕا 38ێ‌ ئەوا ل 20ێ‌ ئەیلۆنا سالا 2024ێ‌ ب پشكدارییا 20 یانەیان دەستپێكری، یاریێن وان ب شێوەیی خول دو قووناغ بۆ ماوەیێ‌ نێزیكی دەهـ هەیڤان یا بەردەوام بووك و دهێتە هژمارتن درێژترین خول ل جیهانێ‌، ئەوا یانەیا شورتە بۆ جارا چارێ‌ ل دووڤ ئێك و یا هەشتێ‌ د دیرۆكا خوە دا ناسناڤێ‌ خولێ‌ ب دەستڤە دئینت.
دهۆك ل ڕێزا حەفتێ‌ هات و پلێتەكا دەرڤە ژ دەستدا
پشتی ب دووماهی هاتنا وەرزەكێ‌ درێژ یێ‌ خولا ستێرێن ئیراقێ‌ تیما دهۆكێ‌ چەندین قووناغ دەربازكرن، ژێهەلی و ژووردانی، ئاستەنگ و سزایێن خولێ‌، لێ‌ دێ‌ مینیت ناسناڤێ‌ كۆپا كەنداڤی دا دیرۆكەكا مەزن بۆ ئەلهۆیێن چیا، لێ‌ د خولا ستێرێن ئیراقێ‌ دا نە ل دووڤ هیڤی و حەزا جەماوەری بوو، ئەوا بتنێ‌ 57 خال كۆمكرین ڕێزا حەفتێ‌ هاتی ب 16 سەركەڤتنان، نەهـ وەكهەڤی و 13 خوسارەتییان، ئەڤێ‌ ڕێزبەندیێ هەموو هیڤیێن پشتەڤانان بۆ قارەمانیەكا دەرڤە بێ‌ ئۆمێدكرن.
ئەگەڕێن سەرەكی چ بوون؟
هەرچەندە د خولێ‌ دا تووشی گەلەك ئاریشەیان بوو، لێ‌ دبیت ئەگەرێن سەرەكی و جادەیا وەرزشی پێ‌ بەحس بكەن ئەوژی پشتی دەست ژ كاركێشانا ڕاهێنەرێ‌ وێ‌ مەسعوود میرالی و ئینانا ڕاهێنەرەكێ‌ نووی ێ‌ رۆژهەلاتا كوردستانێ‌ ئەمیر ئەزرەفشانی و چوونا ستێرێ‌ وێ‌ پیتەر گۆرگیس و هنگاڤتنا چەند یاریزانان ژ وانا زانا عەلی، محەمەد سەعید و شاشیێن دادڤانان كو كارتیكرنەكا مەزن ل سەر ئاست و ئەنجامان دیاربوو، ژ 11 یارییان بتنێ‌ دو سەركەڤتن هاتن و شەش خوسارەتی و سێ‌ وەكهەڤی.
سلێمان رەمەزانێ‌ دووماهییەكا سەركەڤی بۆ دهۆكێ‌ ئینا
پشتی دەستكاركێشانا ڕاهێنەرێ‌ بەرێ‌ ئەمیر ئەزرەفشانی ئەوێ‌ د نەهـ یارییان دا نەشیایی چو سەركەڤتنان بینت، كارگێرییا یانەیا دهۆك پشت گەرمی ب ڕاهێنەرێ‌ پارێزگەهێ‌ و خودان شیان سلێمان رەمەزانی دا ئەوێ‌ بتنێ‌ ئێك سەرپەرشتییا ئێك یاری كری كو د یارییا گەڕا 38ێ‌ و دووماهییا خولێ‌ دا شیابوو دگەل تیما خوە سەركەڤتنەكا مەزن ل سەر كەرخێ‌ بینت ب چار گۆلان بەرانبەر دو گۆلان.
گۆلكەرێن دهۆكێ‌ كینە؟
ب شێوەكێ‌ گشتی 11 یاریزانێن دهۆكی ژ سەرجەمێ‌ 44 گۆلان 42 گۆل تۆماركرینە، ئێكەم گۆل د خولێ‌ دا یا پیتەر گۆرگیس بوو ئەوێ‌ هەتا نوكە هەشت گۆل هەنە، دیسان هەر ئێك ژ پاشەنگ عەبدوللا هەشت گۆل، كەریم دەرویش حەفت گۆل، ئیبراهیم غازی سێ‌ گۆل، مارلۆن دۆ سانتۆس سێ‌ گۆل، هەروەسان هەرئێك ژ شەرقی ئەلبەحری، یانیك زاكێری، لۆكاس هێنریك، سیابەند عەگید دو گۆل، ژلایەكێ‌ دووڤە ئەو یاریزانێن گۆلەك كری ئەو ژی، بەیار ئەبۆ بەكر، كێلبرت كۆمسۆن، مۆسێس لۆكاس، زانا عەلی و عیماد حەسەن، بۆ زانین گۆلەك ب شاشی ڤە یاریزانێ‌ یانەیا مینا ل سەر خوە كرییە و گۆلا دی یاریزانێ‌ كەرخێ‌ ل سەر خوە كرییە.
شرۆڤەكارێ‌ وەرزشی: چاڤێ‌ دهۆك و زاخۆ ل كۆپا ئیراقێ‌ یە
د داخویانیەكێ‌ دا سلێمان رەمەزان شرۆڤەكار و چاڤدێرێ‌ وەرزشی گۆت: تیما یانەیا دهۆك د قووناغێن جودا دەربازكرن، دبیت نە بتنێ‌ شاشیێن دادڤانان، یان چوونا ڕاهێنەر مەسعوود میرالی بتنێ‌ ئەگەرن، بەلكۆ غرورا یاریزانان پشتی ب دووماهی هاتنا كۆپا كەنداڤی و دەستڤەئینانا ناسناڤێ‌ وێ‌، ژبەركو نە بەرعاقلە تۆ سەركەڤتنان ل سەر یانەیێن سعۆدیێ‌، ئیماراتێ‌، كوەیتێ‌ و بەحرەینێ‌ بینی و دگەل یانەیێن كێمتری ئاستێ‌ خوە تووشی خوسارەتیێ‌ بی، گرنگی ب یاریزانی گەلەك هاتە دان زێدەتر ژ سنۆرێ‌ خوە.
هەروەسان گۆت: بەرپرسیارێن سەرەكی، كارگێری، كادرێ‌ ڕاهێنانێ‌ دڤیابا هەرزوو چارەسەركربا و بڕیارێن توند دژی وان دەركربان ئەوێن سستاهی د یاریكرنێ‌ دا كری، د نوكە دا بۆ پشتەڤانێن دهۆك و زاخۆ كۆپا ئیراقێ‌ گەلەك گرنگە، بتنێ‌ دو پێنگاڤ ماینە بگەهنە یارییا دووماهیێ‌ و دەستڤە ئینانا ناسناڤی، سەركەڤتنا دووماهیێ‌ یا تیما دهۆكێ‌ بەرانبەر كەرخێ‌ دبیت پالدەر بیت بۆ یارییا كۆپا بەرانبەر مینا، دیسان زاخۆ ژی هیڤیێن مەزن هەنە.
زاخۆ سەركێشا یانەیێن كوردستانی یە
هەرچەندە تیما شورتە سەرێ‌ لیستا خولێ‌ هات و بوو قارەمان لێ‌ تیما یانەیا زاخۆ بەرانبەر یانەیێن كوردستانێ‌ پێشكەڤتییە، ئەو كاروانەكێ‌ ب زەحمەت و پری ئاستەنگ دەرباز كری، ئەوا ل دووماهیێ‌ شیایی دیرووكەكێ‌ و ڕیكۆردەكا نوو بنڤێسیت شیا ڕێزا سێیێ بهێت ب كۆمكرنا 71 خالان كو دبیتە ڕیكۆرد جارا ئێكێیە هژمارەكا مەزن یا خالان بینت، پشتی 20 سەركەڤتن، 11 وەكهەڤی و حەفت خوسارەتییان، هەرچەندە دەنگۆباسێن جودا هەنە لێ‌ هێشتا دیار نینە كوڕێن خابووری دێ‌ یاریێ‌ د كیش قارەمانییەكا دەرڤە دا كەن.
گۆستاڤۆ گۆلكەرێ زاخۆ یە
ژلایەكێ‌ دووڤە یاریزانێن وێ‌ 57 گۆلان د خولێ‌ دا ئیناینە و بەلاڤبووینە ل سەر یاریزانان و بڤی شێوەیی، پیشەكارێ‌ یانەیا زاخۆ یێ‌ بەرازیلی گۆستاڤۆ هێنریك ل سەرێ‌ لیستا گۆلكەرێن تیما خوە دهێت ب تۆماركرنا 17 گۆلان، هەڤالێ‌ وی و یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا 13 گۆلان رێزا دویێ‌ دهێت، ناسر ئەحمەد محەمەدو نەهـ گۆل، دیبیۆتی ئۆگۆنا چار گۆل، ئەحمەد یاسین چار گۆل، مەحمود فائیز ئەلئەسوەد سێ‌ گۆل، پاتریك مارسێلۆ هەر ئێك دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك و یوسغ رائید ئەلئالۆسی گۆلەك تۆماركریە.
موهەنەد عەلی بوو گۆلكەرێ‌ خولێ‌
ل دووڤ دووماهی لیستەیا هاتییە بەلاڤكرن بەری ب دووماهی هاتنا گەڕا 38ێ‌ هێرشبەرێ‌ یانەیا شورتە موهەنەد عەلی ب تۆماركرنا 27 گۆلان سەرێ‌ لیستێ‌ دهێت و بوویە گۆلكەرێ‌ خولێ‌ یێ‌ وەرزێ‌ ئەڤ سالە، دووڤدا هەر ئێك ژ مەروان حسێن هێرشبەرێ‌ نەورۆز ب17 گۆلان، گۆستاڤۆ هێنریك هێرشبەرێ‌ زاخۆ ب17 گۆلان، رێزێن دویێ‌ و سێیێ‌ دهێن، سەیف رەشید یاریزانێ‌ ئەلقاسم ب15 گۆلان، ئیڤیانی ئێزی هێرشبەرێ‌ كەرخێ‌ ب14 گۆلان، ئەمجەد عتۆان ستێرێ‌ یانەیا زاخۆ ب13 گۆلان، سیمۆن مۆسڤا پیشەكارێ‌ تەلەبە ب12 گۆلان، هێرشبەرێ‌ ئەلقاسم ئەلحارس حاتم ب12 گۆلان، پیشەكارێ‌ شورتە مەحموود ئەلمۆاس ب11 گۆلان و هێرشبەرێ‌ مینا عەلا عەبدولزەهرە ب11 گۆلان ل رێزێن چارێ‌ هەتا 10ێ‌ ل دووڤ ئێك دهێن.
حدود و كەربەلا داكەڤتن و مووسل و ئەلغراف سەركەڤتن
پشتی ب دووماهی هاتنا خولێ‌ بفەرمی هەر ئێك ژ یانەیێن حدود خودانا 22 خالان ل رێزا 19ێ‌ و كەربەلا خودانا 20 خالان ل ڕێزا 20ێ‌ و دووماهیێ‌ داكەڤتنە خولا پلا نایاب، د بەرانبەر دا هەردو یانەیێن مووسل، ئەلغراف، پێشڤە هاتنە خولا ستێرێن ئیراقێ‌ بۆ وەرزێ‌ 202502026ێ‌، پشتی مووسل بوویە قارەمانا پلا نایاب و رێزا ئێكێ‌ هاتی ب 70 خالان و ئەلغراف69 خال كۆمكرین رێزا دویێ‌ هاتی، ژلایێ‌ خوەڤە یانەیا خودانا ڕێزا سێیێ‌ د خولا ستێرێن ئیراقێ‌ دا یانەیا نەفت ئەلبەسرا دێ‌ د دو یاریێن پاشكۆ ژبۆب دەستڤە ئینانا پلێتا سێیێ‌ یا ستێرێن ئیراقێ‌ دگەل تیما خودانا ڕێزا سێیێ‌ یا خولا نایاب.
هەلوەستێ‌ گشتی یێ‌ وەرزێ‌ 2024-2025ێ‌ بڤی شێوەیی ب دووماهی هات:
1 شورتە 87 خال.
2- زەورا 77 خال.
3- زاخۆ 71 خال.
4- تەلەبە 63 خال.
5- جەوییە 60 خال.
6- نەفت 59 خال.
7- دهۆك 57 خال.
8- ئەلگەرمە 56 خال.
9- نەورۆز 53 خال.
10- ئەلقاسم 53 خال.
11- نەفت میسان 51 خال.
12- هەولێر 50 خال.
13- ئەلكەرخ 46 خال.
14- نەجەف 46 خال.
15- نەجەف 46 خال.
16- مینا 43 خال.
17- دیالا 41 خال.
18- نەفت بەسرا 33 خال.
19- حدود 26 خال .
20- كەربەلا 22 خال.

بۆ جارا دویێ‌ د ماوەیێ‌ ئێك وەرز دا یاریزانێ‌ 22ی نیكۆ وێلیامز ستێرێ‌ یانەیا ئەتلەتیكۆ بلباۆ یانەیا بەرشەلۆنا خاپاند و گرێبەستا یانەیا خوە هەتا 2035ێ‌ نوو كر ئەڤ دەنگۆباسە دربەكێ‌ مەزن بوو ب یانەیا كاتەلۆنی كەڤیتی ئەوا بزاڤێن مەزن دكرن ب هەر كۆژمەیەكی ڕازی بكەت.
رۆژنامەیا دیبۆرتیڤۆ خۆیا كر یانەیا بەرشەلۆنا تا ڕادەیەكێ‌ مەزن گەهشتبوو ڕێكەڤتنێ‌ و نێزیكی 62 ملیۆن یۆرۆ بۆ گرێبەستێ‌ تەرخانكربوون، لێ‌ بریكارێ‌ یاریزانی ئەو حەز نەبوو دگەل بەرشەلۆنا بگەهنە ڕێكەڤتنی و یانەیا ئەتلەتیكۆ ژی 50% ژ مووچەیێ‌ وی زێدەتر لێكر، هەرچەندە نیكۆ وێلیامزی دەرگەهـ بەرانبەر بەرشەلۆنا نە گرتبوو ودیاركربوو حەزا یانەیا كەتالۆنی یا هەی لێ‌ پشتی نووكرنا گرێبەستی هەموو بابەت هاتە گوهۆڕین و بەرشەلۆنا هاتە خاپاندن و گۆت: ئەز یێ‌ ل مالا خوە و دێ‌ بەردەوامبم.

ل سەر هەبوونا گرێبەستێن جودا و نە زێدەكرنا مووچەیێن وان پێنچ یاریزانێن یانەیا مانچستەر یۆنایتد یا ئنگلتەرایێ‌ بایكۆتا ڕاهێنانان ڕاگەهاندییە و یانەیێ‌ حەفتییەك دەلیڤە دایێ‌
رۆژنامەیا B.A.MEDIA یا بریتانی خۆیاكر هەر ئێك ژ ماركۆس ڕاشفۆرد، ئالیخاندرۆ گارناچۆ، ئەنتۆنی، جادۆ سانچۆ و تیرێل مالاسا بایكۆتا ڕاهێنانێن تیما خوە مانچستەر یۆناتید كرییە، پشتی داخوازایا وان هاتییە ڕەدكرن بۆ زێدەكرنا مووچەیێ‌ وان، دیسان چەند یانەیان ئوفەر بۆ هنارتینە.
رۆژنامەیێ‌ دیاركر هەر ئێك ژ یانەیێن بەرشەلۆنا، چەند یانەیەك ژ ئەلمانیا، ئیتالیا و سعۆدیێ‌ بزاڤێن ڕازیكرنا هەر پێنچ یاریزانان كرییە، ئەڤچەندە زەنگلا ترسێ‌ دناڤ یانەیێ‌ دا پەیداكرییە و دەلیڤە دایە یاریزانان بۆ ماوەیێ‌ حەفتییەكێ‌ نە هێنە ڕاهێنانان ژبۆ هندێ‌ دانۆستاندن ل سەر داخوازیێن وان بهێنە كرن.