ب ئامادەبوونا د. عەلی تەتەر، پارێزگارێ دهۆكێ و دكتۆرە ڤیان سلێمان، هاریكارا بەرپرسێ مەكتەبا ڕێكخستنا پارتی ل بەهدینان و ئەمیر چالی، بریكارێ وەزارەتا خواندنا بلند و ڤەكۆلینێن زانستی و د. داود سلێمان، سەرۆكێ زانكۆیا دهۆك، دوهی 23/9/2026 ئاهەنگا دەرچوونا 526 قوتابیێن هژمارەكا كۆلیژێن زانكۆیا دهۆك یێن خواندنا بلند (دبلۆما بلند، ماستەر و دكتۆرا)یێ‌ هاتە گێڕان.
پارێزگارێ دهۆكێ د پەیڤەكێ دا بناڤێ كارگێڕی و خەلكێ پارێزگەهێ پیرۆزباهی ل دەرچوویان و كەسوكارێن وان و سەرۆكاتییا زانكۆیێ و مامۆستایان كر و خواست هەموو كەد و وەستیانا وان بكەڤیتە د خزمەتا نیشتیمانی و وەلاتیان دا، پاشی باوەرنامەیێن دەرچوویان هاتنە پێشكێشكرن.

فارس عیسا، سەرۆكێ نوونەراتیا حوكمەتا هەرێما كوردستانێ ل بغدایێ‌، دوهی 23/9/2026 ل گەل بالیۆزا وەلاتێ‌ ئسپانیا ل ئیراقێ ئەلیسیا ریكو بیریس دیل بولگار كۆمبوو.
د كۆمبوونێ دا، دووماهی پێشهات و گوڕانكاریێن نوكە ل هەرێما كوردستانێ و ئیراقێ و ناوچەیێ هاتنە گەنگەشەكرن.
بالیۆزا ئسپانیا ئاماژە دا وان ئاستەنگێن هەمبەر هەرێما كوردستانێ، دیسا ئەو هێرشێن ل سەر هەرێما كوردستانێ هاتینە كرن شەرمزار كرن، ب تایبەتی ئارمانجكرنا نڤیسینگەها سەرۆكێ حوكمەتا هەرێما كوردستانێ.

ئامێدیێ، مەحمود نهێلی:

ب چاڤدێری و بەرهەڤبوونا د. عەلی تەتەر، پارێزگارێ دهۆكێ و وارشین سەلمان، دەڤەردارێ ئامێدیێ و ڕێناس جانۆ، نووەنەرێ مەكتەبا ڕێكخستنا پارتی ل بەهدینان و ئازاد ئسماعیل نوونەرێ لقێ 18 یێ پارتی و میران عەبدولڕەحمانن رێڤەبەرا ناوچەدارییا بامەڕنێ و هژمارەكا ڕێڤەبەر و ئەكادیمی و ڕەوشەنبیر و كەسایەتیێن جودا، دوهی 23/9/2026 ل ژێر درووشمێ «هەمەجۆرییا مە ژێدەرێ هێزا مەیە «دیدارا دویێ یا بامەڕنێ یا ڕەوشەنبیری و ئەكادیمی دەستپێكێر و بۆ دو ڕۆژان دێ یا بەردەوامبیت.
عەلی تەتەر، پارێزگارێ دهۆكێ د پەیڤەكێ دا پشتەڤانییا ئیدارا پارێزگەهێ بۆ بزاڤا ڕەوشەنبیری دوپاتكر و خواست ڕەوشەنبیر و ڤەكۆلەر و ئاكادیمی باشتر گرنگییێ ب ڤەكۆلینێن ئەدەبی و مێژوویی و كلتووری بدەن.
د ڕۆژا ئێكێ یا دیدارا بامەڕنێ دا، هژمارەكا پەنەلان ل دۆر بابەتێن جودا هاتنە پێشكێشكرن.

دهۆك، دلۆڤان ئاكرەیی:

رێڤەبەرێ گشتی یێ دیوانا وەزارەتا ناڤخۆ یا حكومەتا هەرێما كوردستانێ دیاركر، قوربانیێن روودانێن هاتنوچوونێ ل هەرێما كوردستانێ د هەشت سالان دا ب رێژەیا 70% كێم بووینە و ئەڤ كێمبوونە ب پیڤانەیی دێ هێتە هەژمارتن.
هێمن میرانی، رێڤەبەرێ گشتی یێ دیوانا وەزارەتا ناڤخۆ یا حكومەتا هەرێما كوردستانێ بۆ رۆژنامەیا ئەڤرۆ گۆت: «ئەڤ كێمبوونا روودانێن هاتنوچوونێ‌ ژ ئەگەرێ‌ وان رێكارایە، یێن د بیاڤێ سلامەتییا هاتنوچوونێ دا هاتینە دانان، دیسا دانانا كامیرەیێن چاڤدێریا لەزاتیێ‌ و گوهۆڕینێن د دیزاینا رێ و رێباران دا، بووینە ئەگەر روودان كێم ببن، ب گشتی روودانێن هاتنوچوونێ هەڤبەركرن ل گەل سالێن بۆری ب رێژەیا 70% كیمبووینە».

زاخۆ، دلۆڤان هالۆ:

جگەرخوین تاهر، ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو د دەمێ‌ پێنج سالێن بۆری دا، ل سنۆرێ ئیدارەیا سەربخوە یا زاخۆ، وان مۆلەت دایە 25 پڕۆژەیێن وەبەرهێنانێ و دبێژیت: ب گوژمێ پتر ژ 110 ملیۆن دۆلاران پڕۆژە هاتینە بجهئینان.
ناڤهاتی گۆت: «مە ب گوژمێ 452 ملیۆن دۆلاران، بەرێ بنیاتی بۆ 9 پڕۆژەیان دانایە، سەرمایێ‌ هەموو پڕۆژەیێن وەبەرهێنانێ دگەهیتە 562 ملیۆن دۆلاران».
گۆت ژی: «ئەڤان پڕۆژەیان ڤەژەنەكا نوو و گەشەپێدانەكا ئابووری ل زاخۆ پەیدا كریە، د پلانا مەدایە ل دەمەكێ نێزیك ئەم مۆلەتێ بدەینە 10 پڕۆژەیێن دی، دیسا د پلانا مە یا دو سالێن بهێن دا، دێ مۆلەتێ دەینە 38 پڕۆژەیان و ب گوژمێ 165 ملیۆن دۆلاران دێ ئەڤ پڕۆژە هێنە بجهئینان».

رەمەزان زەكەریا:

حكومەتا هەرێما كوردستانێ ب مەرەما پاراستنا ساخلەمیا وەلاتیان و سامانی ئاژەلی دو ملیار و 700 ملیۆن دینار بۆ بەرهنگاریا تایا خوینبەربوونێ‌ تەرخانكری نە.
دكتۆر فەرەیدون حەمەد قادر، رێڤەبەرێ ساخلەمیا ئاژەلی ل هەرێما كوردستانێ ڕاگەهاند، پێشتر پلانەكا سالانە هەبوو بۆ رووبڕووبوونا نەخۆشییان، بەلێ حكومەتا ئیراقێ بۆ دەمێ 10 سالانە چو بودجەیەك بۆ ڤێ مەرەمێ‌ ڕەوانەی هەرێما كوردستانێ نەكرییە، ڤێ چەندێ ژی وەكریە، ئەركێ دابینكرنا ڤاكسین و دەرمانان بكەڤیتە سەر ملێ حكومەتا هەرێمێ.
ناڤبری گۆت: «نەخۆشیا تایا خوینبەربوونێ مەترسییەكا مەزنە و پێدڤی ب پلانەكا گشتگیر هەیە ل سەر ئاستێ ئیراقێ و هەرێمێ، ژ بەركو نەخۆشی سنووران نانیاسیت و دەرباز دبیت، ب مەرەما بەرهنگاریا تایا خوینبەربوونێ حكومەتا هەرێمێ دو ملیار و 700 ملیۆن دینار بۆ كڕینا دەرمان و ڤاكسینان تەرخانكرینە».
ل گۆر ئاماران، ژ دەستپێكا سالێ هەتا نوكە، نەه حالەتێن تایا خوینبەربوونێ‌ ل هەرێما كوردستانێ هاتینە تۆماركرن و دو كەسان گیانێ خۆ ژ دەست دایە.