زنار تۆڤی:

ئه‌كته‌ر و شانۆكار مه‌كییه‌ كزلكایا، ل باژێرێ مێردینێ ل باكوورێ كوردستانێ ژ دایك بوویه‌، ل سالا 1993ێ ل گه‌ل مالباتا خوە چوویه‌ باژێرێ ئامه‌دێ و نوكه‌ ژی ل وی باژێری دژیت، د دیداره‌كێ دا بۆ رۆژناما ئه‌ڤرۆ دبێژیت:
ل سالا 2006 ێ، ل باژێرڤانیا باژێرێ ئامه‌دێ من ده‌ست ب كارێ شانۆیێ كرییه‌، ل ده‌ستپێكێ ب زمانێ كوردی من ده‌ست ب كارێ شانۆیێ كرییه‌، بۆ من ئه‌ڤه‌ خوەشترین كاربوو د ژیانا من دا، كو ئه‌ز ب زمانێ دایكا خوە باخڤم و كارێ شانۆیێ بكه‌م، پاشی ئه‌ز چوومه‌ زانكۆیا روحایێ من خواندنا خوە د وارێ هونه‌ری دا ل وێرێ ته‌مام كر، من ل وێرێ ژی چه‌ندین كارێن شانۆیێ ئه‌نجامدان، نوكه‌ ژی ل ئامه‌دێ ئه‌ز مامۆستا مه‌ و ده‌وامێ دكه‌م و ل كۆلیژا هونه‌ری وانه‌یان دده‌مه‌ قوتابیێن شانۆیێ، هه‌روه‌سا ل ده‌ستپێكا كارێ خوە من ژ شانۆیێ ده‌ستپێكر، ئێكه‌م كارێ درامایی ژی من د دراما جان و جه‌گه‌ر دا كار كرییه‌، پشتی هنگێ من پشكداری د چه‌ندین كارێن درامایێ و فلمان ژی دا كرییه‌.
مه‌كییه‌ هێشتا دبێژیت: شانۆ و دراما كوردی ل باكوورێ كوردستانێ، خوە دناڤا چه‌ندین ئاسته‌نگان دا ئاڤاكرییه‌، میناك ژی سینه‌ماكارێ كوردێ مه‌زن یلماز گۆنایی، ده‌مێ وی فلمێن كوردی چێدكرن، گه‌له‌ك زه‌حمه‌ت و ئاسته‌نگ ل پێشیا كارێ وی بوون.
دیسان د وارێ پۆلیتیكی و ئابۆری و ته‌كنیكی ژی دا گه‌له‌ك زه‌حمه‌تی هه‌بوون، دیسان د وراێ په‌یداكرنا ئه‌كته‌ران ژی دا گه‌له‌ك ئاسته‌نگ و زه‌حمه‌تی هه‌بوون، ل گه‌ل هندێ ژی وی كارێن گه‌له‌ك باش ئه‌نجامدان، نوكه‌ ژی ژ ئالیێ ته‌كنیكی و ئابۆری و ژ ئالیێ ده‌وله‌تا توركیا ڤه‌، هیشتا گه‌له‌ك ئاسته‌نگی ل پێشیا كارێ مه‌ چێدبن، هه‌روه‌سا ده‌مێ ئه‌م ب زمانێ كوردی كارێن شانۆیێ دكه‌ین، ئاسته‌نگی بۆ مه‌ چێدبن و كارێن مه‌ دهێنه‌ قه‌ده‌غه‌كرن ژ ئالیێ ده‌وله‌تێ ڤه‌، هه‌ر چه‌نده‌ به‌ری نوكه‌ شانۆیا كوردی ل باكوور گه‌له‌ك یا كێم بوو، به‌لێ نوكه‌ شانۆكار و كارێن شانۆیی ژی پتر لێهاتینه‌، به‌لێ هێشتا زه‌حمه‌تی ل پێشیا كارێ مه‌ هه‌نه‌، زێده‌باری وان هه‌موو ئاسته‌نگ و زه‌حمه‌تیان ئه‌م د به‌رده‌وامین و كارێن گەلەک باش ژی هاتینه‌ كرن.
ناڤهاتیێ ئه‌و چه‌ند ژی ئاشكرا كر: كارێن هونه‌ری یێن باش ژ لایێ ئه‌كته‌ر و سینه‌ماكار و شانۆكارێن كورد یێن باكۆرێ كوردستانێ ڤه‌ هاتینه‌ كرن، ئه‌ڤه‌ جهێ دلخۆشیا مه‌یه‌.
ئه‌م ب هیڤینه‌، كو ئه‌م بشێین كارێن باشتر ژ بۆ خه‌لك و گه‌لێ خۆ ئه‌نجام بده‌ین، هه‌ر چه‌نده‌ د وارێ ته‌كنیكی و ئابۆری دا مه‌ كێماسی هه‌نه‌، وه‌كو پێدڤی هاریكارییا ئه‌كته‌ر و شانۆكارێن كورد ل باكوورێ كوردستانێ ناهێته‌ كرن، دیسان ژ ئالیێ ته‌كنیكی ڤه‌، ده‌مێ كاره‌كێ هونه‌ری ب زمانێ كوردی دهێته‌ چێكرن و ده‌رهێنه‌ر تورك بیت، ئه‌و د زمانێ كوردی ناگه‌هیت، ل وی ده‌می ژی كارێ مه‌ ب زه‌حمه‌ت دكه‌ڤیت، هه‌روه‌سا ئه‌م وه‌كو ئه‌كته‌ر و شانۆكار ژی گه‌له‌ك زه‌حمه‌تیان دبینین.
هێشتا دبێژیت:
مه‌ وه‌كو ئه‌كته‌رێن كورد و تورك تێكهه‌لی ل گه‌ل ئێك هه‌یه‌، به‌لێ نه‌ د وی ئاستێ هند مه‌زن دایه‌، به‌لێ مخاین رێز و بهایێ ئه‌كته‌رێن كورد وه‌كی یێ توركان نینه‌، هه‌ر چه‌نده‌ كارێ مه‌ و یێ وانا وه‌كی ئێكه‌، هه‌كه‌ د ئێك پرۆژه‌ ژی دابن، وان پتر رێز و قه‌در هه‌یه‌، ژبه‌ركو ئه‌م كوردین، له‌وما ئه‌ڤ چه‌نده‌ دهێته‌ كرن، هه‌روه‌سا ئه‌م دخوازین ئه‌ڤ چه‌نده‌ نه‌مینیت، چونكی سینه‌ماكار و ئه‌كه‌رێن كورد كارێن باشتر ژی ژ یێن توركان دكه‌ن، به‌لێ پتر رێز بۆ یێن توركان هه‌نه‌، من ژی چه‌ندین تێكهه‌لی ل گه‌ل چه‌ندین ئه‌كته‌ر و شانۆكارێن تورك هه‌یه‌، من پشكداری د چه‌ندین كارێن هونه‌ری ب زمانێ توركی ژی كرینه‌، به‌لێ پرانییا وان كارێن من كرین ب زمانێ كوردی بووینه‌.

دلۆڤان هالۆ:

دەرهێنەرێ باژێڕێ زاخۆ مەهدی مونیر ل وەلاتێ مسرێ د دیدارەکێ دا بۆ ڕۆژناما ئەڤرۆ دیار کر کو ب شانازی ڤە من خەلاتێ ڕێزگرتنێ یێ مەزنترین و گرنگترین ڤیستەڤالا سینەمایی یا کام یا نێڤدەولەتی یا تایبەت ب کورتە فلمان ل وەلاتێ مسرێ ژ لایێ سەرۆکێ ئەنجۆمەنێ کارگێری یێ ڤیستەڤالێ دکتۆر عەلا نەسر وەرگرت.
ناڤهاتی ئاماژە ب وێ چەندێ ژی کر پشتی هەر خۆلەکا ئەنجامدانا ڤێ ڤیستەڤالێ چەندین دەرهێنەر و وێنەگرێن وەلاتێن بەشدار دهێنە خەلاتکرن، لەوما ڤێ جارێ ژی ئەز وەکو دەرهێنەر هاتمە خەلاتکرن.
گۆت ژی:»هەر دڤێ سەرەدانا خوە دا ئەز و دەرهێنەر و سینەماکارێ ناڤدار یێ مسری دکتۆر عەلا نەسر سەرۆکێ ئەنجوومەنێ کارگێری یا ڤیستەڤالێ مە ڕێککەفتەك کر کو د دەمێن داهاتی دا دوو پڕۆژەیێن هونەری و سینەمایی یێن نێڤدەولەتی یێن هەڤپشك د ناڤبەرا کوردستان و مسرێ دا ل ل زاخۆ ئەنجامدەین، لەوما بۆ ڤان پڕۆژەیان ئەم پێدڤی ب پشتەڤانیا ئیدارەیا سەربخوە یا زاخۆ نە بۆ بجهئینانا ڤان هەر دوو پڕۆژەیان».