ئازاد بەرواری/ ئەلمانیا

سپێدێ زووی ژ خەو ڕابوو، كارێ خۆ كر، ب دلەكێ پڕ هیڤی ژ مال بەرەڤ ناڤ سویكێ بڕێكەفت، ئەو ناڤونیشانا دوهی جیرانێ وی دایێ، ژ بنێ بەرویكا خۆ ئینا دەر و خۆ ل شوفێرێ تەكسیەكێ نێزیك كر و ب ڕێز ڤە گۆتێ: ئەرێ بێ زەحمەت دێ شێی بێژیە من ئەڤ ناڤونیشانە چەند ژ ڤێرێ دوویرە؟ شوفێری بەرێ خۆ دایێ و گۆتێ: بەڕێز ئەڤ ناڤونیشانە یا دوویرە ژ ڤێرێ و ئەگەر تەبڤێت ب تەكسیێ ژی بچیێ، ژخۆ نێزیكی ٣٥ دولار كریا وێ یە.
دەستێ خوو هاڤێتە بنێ بەرویكا خۆ، هەرچەندە دزانی كا چەند پارە د بەرویكێ دایە، چونكی ئەو چار ڕۆژ بوو چ خەرجی نەكربوو، د بەرڕا دگۆتە خۆ، هەتا دو دولاران قازانج نەكەم، من ماف نینە دولارەكێ خەرج بكەم.
لەوما گۆتە شوفێرێ تەكسیێ: نەخێر بەڕێز ئەڤرۆكە ناچمە وێرێ.
ڕابوو هێدی هێدی خۆ ژ شوفێری دوویر ئێخست و بەرەڤ وی ناڤونیشانی ب پیا بڕێكەت بۆ وی دەرێ كو شوفێری بوو شرۆڤە كری.
نێزیكی دو سەعەتا بڕێڤە چوو هەتا گەهشتیە جهێ پێدڤی. ئاڤاهیەكێ گەلەك مەزن بوو، ل بەر دەرگەهی زاڵگەهەك هەبوو، گۆت: ناڤێ من ..، ئەز یێ هاتیم كو ل ڤێرێ بهێمە دامەزراندن وەك كرێكارێ پاقژیێ شۆل بكەم. كەسێن شۆلەژێ گۆتن: باشە، ژۆرەك نیشا دا و گۆتێ ل وێرێ چاڤەڕێ بكە هەتا گازی تە دكەن بو چاڤپێكەفتنێ.
پشتی بیستخەبەركێ، ناڤێ وی هاتە گازی كرن، بەرەڤ ژۆرا چاڤپێكەفتنێ چوو، ل بەرانبەری دەرگەهی مێزەكا مەزن و خەملاندی و ل پشت مێزێ زەلامەكێ ماقویل ڕونشتی بوو و ب پەیوەندیەكا تەلەفۆنێ ڤە مژویل بوو و بچاڤا گۆتێ ڕوینەخارێ.
چەند خۆلەكەكان ما چاڤەڕێ هەتا كو هەڤپەیڤینا تەلەفۆنێ ب دوماهیك هاتی، و كەسێ بەرپرسیار هندەك پرسیار دەربارەی ژیان و شیانێن وی یێن كاری لێ كرن، ئاقلێ وی ژێ بڕی و دیت كو كەسەكێ باشە بۆ وی كارێ وان ل كۆمپانیێ هەی دەست ددەت، ئەو ژی كارێ پاقژكرنێ‌ و چا گێڕانێ یە.
گۆتێ باشە، لێ ئیمێل ئەدرێسێ خۆ ژی ب دە من دا پاشی ئەم تە ب ئیمێلی ئاگەهدار بكەین دەربارەی ڕۆژا دەستپێكرنا كاری!
ئەوژی بەرسڤ دا و گۆت: سەیدا من ئیمێل نینە و ئەز نوزانم چ ئیمێلا ب كار بینم.
خودانێ كۆمپانیێ ژی ب بێ منەتی بەرسڤ دا و گۆت: ئەز بێژم تو ب كێر هندێ ناهێی كو ئەم تە ل دەڤ خۆ بدەینە شۆلی، چونكە ئەم كۆمپانیایەكا ئەلەكتڕۆنی یا ب ناڤ و دەنگین، كەسێ كو نەشێت خۆ ل گەل ڤێ ژیانا نووی بگونجینیت، و چ ژ ئیمێلی نەزانیت، نە هەژی هندێ یە ل دەڤ مە كار بكەت، خۆ كارمەندێ پاقژیێ ژی بیت، دڤێت شیانا سەرەدەریێ ل گەل بكارئینانا ئیمێلا هەبیت.
كرێكارێ بەستەزمان جارەكادی نەچار بوو هیڤی و ئومێدێن خۆ ب هشكی داعویران! و ب دلەكێ شكەستی ژ وێرێ دەركەفت.
بڕێكا مال ڤەبوو، دیت كەسك (توت فڕەنگیا) ب سندۆق دفرۆشیت و ئەرزان! و هەر سندۆقەك ژی پێكهاتیە ژ چەند كارتونەكێن بچویك .. بچویك یێن توت فڕەنگیا. ویژی بەرێ خودا شیانێن خۆ یێن دراڤی، ئەو پارێ ڤێ دا ب دو سندوقێن توت فڕەنگیا. و ب ڕێكا بەرەف مال ڤە هەما ل سەر جادەیێ بوو دەمێ ئێك – دو دەمهژمێرا هەمی فرۆت و قازانجێ وی بوو دو بەرانبەر.
ڕۆژا پاشتر هەما ب ستەهی چوو بازاڕێ گشتی یێ فێقی و بەرێ خۆ دایێ، دێ شێت چ كڕیت كو قازانجێ ژێ بكەت.. ئیدی بەردەوام بوو ل سەر ڤی دەست و داری هەتا شیانێن وی یێن دراڤی بەرفرەهتر لێهاتن و عەرەبانەك كڕی و شۆلێ خۆ مەزنتر لێ كر. ڕۆژ بو ڕۆژێ كارێ وی هند بەرفرەهتر لێدهات، دوكانەك بكرێ گرت و پاشی كرێكار ژی ئینانە هاری خۆ و هەتا ئێك – دو سالەكا كارێ وی هند بەرفرە‌هبوو، ئیدی بوو خودان عەمبار و سویكەكا بەرفرهـ.
هزرا هندێ كر كو كارێ خۆ ب شێوەیەكی مۆدێڕن ڕێكبێخیت، بۆ هژمار و داهات و خەرجیێن خۆ، گۆتە كارمەندەێ ژمێریاریێ: هەرە فلان كۆمپانیا ئەلكتڕونی و بێژێ بلا بهێن بۆ مە سیستەمەكێ ئەلەكتڕونی دابمەزرینن بۆ هژمارتنا داهات و خەرجیێن مە یێن ڕۆژانە.
پشتی چەند ڕۆژەكان خودانێ وێ كۆمپانیێ هات، هۆ بەرێ خوۆ دا مەزناهی و بەرفرەهیا بازارێ‌ عەمبارێن وان و گۆتێ: باشە ئەم دێ بۆ وە سیستەمەكێ ئەلەكتڕونی تایبەت ب كارێ وە بۆ وە بەرهەڤ كەین، لێ بێ زەحمەت ئیمێلێ خۆ بدە من دا پاشی بڕێكا ئیمێلی پەیوەندیێ ل گەل تە بكەین دەربارەی خەرجی و بهایێ دەستحەقێ كارێ مە.
خودانێ وێ بازارێ‌ مەزن ب دلەكێ پڕ ب باوەری ڤە گۆتێ: من ئیمێل نینە!
یێ بەرانبەر ب سەرسوڕمایی ڤە گۆتێ: تو خودانێ ڤێ بازارێ‌ هندە بەرفرەهـ و تە ئیمێل نینە! پا ئەگەر تە ئیمێل هەبا دا چەند پتر یێ‌ سەركەفتی بی!
خودانێ بازاری ل هیڤیا ڤێ دەلیڤێ بوو!
گۆتێ: ئەگەر من ئیمێل هەبا، دا هەتا نوكە ل كۆمپانیا وە كرێكارێ پاقژیێ بم.

ڕۆندك مزووری

ل بەر بارانا زستانێ
هەر شەڤ ل تە دگەڕم
ل وان جهێن مە یێن كەڤن
تە نابینم
هناڤ ژ خەمێن تەدا دكەلن
دەستڤالا ڤەدگەڕم
ژ قەدەمان د كەڤم
ڤیناتە ئەز بەرزە كرم
ماندی كریم
ل ڤێ دنیایێ
تو ژ بیرا من نەبری
ئەز ژ بیرا تە برم
ژ هزرا من ناچن ژڤانێن من و تە
ڕۆژێن مە هەڤڕا دەرباز دكرن
ل بن سیها داران
ل بن زناران
خۆزی ژ بن نینۆكێن من دەردكەڤن
هێشتا باوەر ناكەم
تو یێ بوویە خەون
هەر یا ب هیڤیمە
هیڤییا هەلاتنا ڕۆژەكێمە
ژ ڕۆژئاڤا دەربكەڤیت
دا جارەكا دی تە ل گەل خۆ ببینم
دیسا دەستێن تە بگرم
ئەو ڕۆژێن من
ب فرمێسك و ب خەم بۆراندین
بكەنم بكەنم.

عەبدولرەحمان مەحموود

لڤــێ ژیــنا پــــر كەند و چال
پۆڕام سپی بوو بووم پـیرە كال
زیزبـوون خۆشـی خـەما داپال
پەڕگـەندەبووم مامە بـێ حال
::: :::
چــەنــد دنیایەك بێ وەفــایە!
بارێ گــران چانتـێ خــەمایــە
ئــێش و دەرد و پـــڕ بــەلایــە
جار شینی و جار لێ سەمایـــە
::: :::
خەون و هیڤیا خوە كیڤی كـر
دەرد و خــەمــا دل تژی كــر
ڕۆنــیـا چاڤــێـن مە تاری كر
ڕێــیا ژینــێ لــمـە ڤاژی كــر

ناجح بێجانی

ها دوهی بوو عەبۆێ موختار و مام حەسۆیێ شڤان د ئەوی ڕوبارێ نیڤا گوندی ڕا دچوو خۆ فێری مەلەڤانییان دكرن، هەڤڕكیا وان ئەبوو كی دێ ب سەركەڤیت، د وی دەمی دا پەریا بێری ژی ب مەنجەلۆكا خۆ یا تێژی ئاڤ ڤە حەنەك و پێترانكانێ پێدكرن، حەزا وێ ئەو بوو مامێ حەسۆیێ شڤان ب سەربكەڤیت، ژ نیشكەكێڤە، د ئاشۆپا وان دا عەبۆیێ موختار بزاڤێن خوتركرن، لێ هێشتا ئەنجام نەدیارین، دناڤبەرا چاڤنقاندنێ دا هەمی تشت دیاربوون، عەبۆیێ موختار ڤێ جارێ دێ‌ بسەركەڤیت، لێ هێشتا یاری بدوماهی نە هاتییە، پەریا بێرێ ژ نیشكەكێڤە هەول دان مامێ حەسۆیێ شڤان ئەنجاما ب گوهۆڕیتن، چەوا بانگ ل عەبۆیی موختار كر، سوباهی من و تە ژڤانە لدەمێ هەمی بێری خاترا خۆ دخوازین، ئەز و تو ب تنێ لكێلەكا گوندی ب هەڤڕا دمینین، ژبۆ تە ئەز باغەكێ بێ پێجانم وسۆزێ ددم هەر چی دل بخازتن، بێ دو دلی تو ئازادی، لێ عەبۆیێ موختار وەكو بیا دناڤ ئاڤێ دا هەمی لەشێ وی ڤەدلەرزیت، بڕاستی ژی ئەڤە چ یە ڕووددەت، ئەگەر ب خێڕا ڤی گۆپالی نەبتن، ئەز نەشێم پێنگاڤەكێ بەرەف پێشڤە بچم، ئەڤا من گوهـ لێ بووی تەنها رەنگێن شانۆیێ ددین، لێ د هزرا وی دا ب ئاوازەكێ دیتر دەنگ ڤەددەت، ها ب وی مەرجی دێ ڕازیبم باشە ئەگەر حەسۆیێ شڤان ب سەركەڤیت، سوباهی ل سەر كانییا گوندی بانگ ل گوندییا كر و ئەنجام ڕاگەهاندن، نــە، نــە، ئەڤە نەڕاستە، ئەز باوەر ناكم ئەڤاچێدبیت، ب تنێ یاریەكە دناڤبەرا مان و نەمانێ دا، هزرەكا دی پتر مێشكێ وی ئالۆزكر تو بێژی ئەڤە ڕاستە، ئەرێ پا دناڤبەرا ڕاست و شاشیێدا چ ب هەلبژێرم، دڤان كاودانان دا بڕیار یا بزەحمەتە گازی پەریا بێری كر گۆتێ: ئەز ڕازی مە، لێ هەگەر خەلكێ ئەم دیتین بەرسڤ دێ چ بت؟