سەرۆکێ پەرلەمانێ تورکیا دیار دکەت ل تورکیا تنێ ئێک زمان دێ فەرمی بیت و ئەو ژی زمانێ تورکییە و نابیت زمانێ کوردی ببیتە زمانێ فەرمی و ئەو یەک بوویە جهێ دلگرانیا کوردان و چاڤدێرێن سیاسی ژی وەسا دبینن داخویانیا سەرۆکێ پەرلەمانێ تورکیا د خزمەتا قووناغا ئاشتیێ دا نینە.

نومان کورتولمیش سەرۆکێ پەرلەمانێ تورکیا سەبارەت ب کۆمبوونێن کۆمسیۆنا ئاشتیێ و رەوشا نها یا تورکیا بۆ دەزگەهێن راگەهاندنا تورکیا دیار کر، هندەک کەس و ئالی بەحسێ ڤێ یەکێ دکەن کو دڤێت زمانێ کوردی ل تورکیا ببیتە زمانێ فەرمی، د رۆژەڤا کۆمسیۆنێ دا تشتەک وەسا نینە و نابیت ل پەرلەمانی ژی بەحسەک وەسا بهێتە کرن، چونکی ل تورکیا زمانێ فەرمی تورکییە، ئێدی پێدڤی ب چو زمانێن دی یێن فەرمی ناکەت و کەسێن تشتێن وەسا دبێژن دخوازن ئالۆزیان دروست بکەن و گۆت: (د کۆمبوونێن هەتا نها یێن کۆمسیۆنا ئاشتیێ دا بەحسەک وەسا نەهاتیە کرن، ئەز باوەر ناکەم ل پەرلەمانێ تورکیا ژی بەحسەک وەسا بهێتە کرن، چونکی هەر کەس دزانیت ل تورکیا ئێک زمان دێ فەرمی بیت و ئەو ژی زمانێ تورکییە، لێ ئەم رێگریێ ل قۆتابخانێن تایبەت ژ بۆ زمانێ کوردی ناکەین و هەر کەسێ بڤێت دشێت فێری زمانێ کوردی ببیت، چو ئاستەنگی ل هەمبەر فێربوونا زمانێ کوردی ل تورکیا نینن).
سەرۆکێ پەرلەمانێ تورکیا سەبارەت ب داخوازا دەم پارتی ل دۆر هەڤدیتنەکێ ل گەل ئۆجەلانی ژی دیار کر، ئەندامێن کۆمسیۆنا ئاشتیێ هەتا نها بەحسێ ڤێ یەکێ نەکرینە، کو سەرەدانا ئۆجەلانی بکەن و گوهداریا نێرینێن وی بکەن، خالا دی ئۆجەلانی نێرینێن خوە یێن سەبارەت ب قووناغا ئاشتیێ بەری نها دیار کرینە و هەکە تشتەک هەبیت ژی ب رێیا پارێزەرێن خوە یان ژی ئەندامێن دەم پارتیێ دیار دکەت، د رەوشا نها دا پێدڤی نینە کۆمسیۆنا سەرەدانا ئۆجەلانی بکەت.
ل ئالیێ دی سڕی ساکیک ئەندامێ پەرلەمانێ تورکیا سەر ب فراکسیۆنا دەم پارتی دیار کر، داخویانیا سەرۆکێ پەرلەمانێ تورکیا ب تەمامی ل دژی قووناغا ئاشتیێ یە، هەکە هوون ل دژی زمانێ کوردی بن وی دەمی چ رامانا قووناغا ئاشتیێ هەیە، هەکە هوون دبێژن کورد و تورک برانە وی دەمی کا تورکان ل تورکیا چ ماف هەیە دڤێت کوردان ژی هەمان ماف هەبیت، لێ داخویانیا سەرۆکێ پەرلەمانێ تورکیا نیشا ددەت کو نیەتا وان سەبارەت ب کوردان باش نینە و کورد ڤێ یەکێ ب چو رەنگەکێ قەبوول ناکەن.
ل ئالیێ دی گەلەک ژ سیاسەتمەدار، مامۆستایێن زانکۆیێ، چاڤدێرێن سیاسی و کەسانێن ئەکادیمی یێن کورد نەرازیبوونا خوە ل هەمبەر داخویانیا سەرۆکێ پەرلەمانێ تورکیا دیار کرن و داخواز ژ دەستهەلاتێ کرن هەلوەستێ خوە ل هەمبەر قووناغا ئاشتیێ ئاشکرا بکەت، چونکی یا نها دەستهەلات دکەت ب چو رەنگەکێ ناهێتە قەبوول کرن.

سەرۆک کۆمارێ ئیرانێ دیار کر، ئەمریکا و وەلاتێن رۆژئاڤایی ل ژێر ناڤێ دانوستاندنان دخوازن ئیران خوە رادەستی وان بکەت و دەست ژ هەموو مافێن خوە بەردەت، ئەو یەک ب چو رەنگەکێ ناهێتە قەبوول کرن، هەکە نها ئیران هندەک ژ داخوازیێن ئەمریکا و وەلاتێن رۆژئاڤایی قەبوول بکەت، سوباهی ئەو دێ هندەک داخوازیێن دی ژی کەن، داخوازیێن وان تەمام نابن هەتا ئیران خوە ب تەمامی رادەستی وان نەکەت.
مەسعود پزیشکیان ئەو یەک ژی دیار کر، وان بەری نها ژی دیار کرینە کو ئیران بەرهەڤە پرسێن هەی ل گەل ئەمریکا و وەلاتێن رۆژئاڤایی چارەسەر بکەت، لێ دیارە نیەتا ئەمریکا و وەلاتێن رۆژئاڤایی چارەسەری نینە، ئەو دخوازن ئیران هەموو داخوازیێن وان قەبوول بکەت، ئانکو ب کورتی وان دڤێت ئیران خوە رادەست بکەت، د کەلتورێ ئیرانێ دا تشتەک وەسا نینە و گەلێ ئیرانێ دێ ل هەمبەر سیاسەتا خراب یا ئەمریکا و وەلاتێن رۆژئاڤایێ خوراگر بیت و خوە رادەست ناکەت.

جێگرێ پەیڤدارێ سکرتێرێ گشتی یێ نەتەوەیێ ئێکگرتی دیار کر، ئەو پشتەڤانیێ ل پلانا ترامپی بۆ راگرتنا شەڕی و ئاشتیێ ل غەزە دکەن و د هەمان دەمی دا دڤێت حەماس ژی چو ئاریشەیان دروست نەکەت، وەکو نەتەوەیێن ئێکگرتی وان دڤێت حەماس هەموو گرتیێن ئسرائیلی ئازاد بکەت و ل هەمبەر دا ئسرائیل ژی رێ بدەت دا هاریکاریێن مرۆڤی بگەهنە دەستێ خەلکێ غەزە، گرنگە د رەوشا نها دا ئەڤ هەر دو کارێن پێدڤی بهێنە کرن.
فەرحان حەق ئەو یەک ژی دیار کر، بەری نها ژی نەتەوەیێن ئێکگرتی چەندین جاران داخوازا راگرتنا شەڕێ غەزە کریە، نها دەلیڤەیەک گەلەک باش هاتیە پێش و گرنگە حەماس ژی چو ئاریشەیان دروست نەکەت، هەلوەستێ وەلاتێن عەرەبی ژی د جهێ خوە دایە و ئەو دشێن حەماسێ رازی بکەن دا پلانا ترامپی قەبوول بکەت.