چاڤەرێ‌ دهێتە كرن ئەڤرۆ سێ‌ یاری ژ دەستپێكا یاریێن گەڕا چارێ‌ یا خولا ستێرێن ئیراقێ‌ یا فوتبۆلێ‌ بهێنە كرن، هەردو یانەیێن كوردستانی دهۆك و هەولێر یاریێن ئاگرین هەنە و سوبەهی كلاسیكۆیەكا كوردستانی دناڤبەرا زاخۆ و نەورۆز دێ‌ هێتە كرن.
یاریێن رۆژا ئەینی
تەلەبە – دهۆك
بڕیارە سوبەهی ئەینی ل دەمژمێر 8:30 شەڤ تیما فوتبۆلا یانەیا دهۆك ل یاریگەها ئەلمەدینە ببیتە مێڤانا یانەیا تەلەبە ل پایتەختێ‌ ئیراقێ‌ بەغدا د یارییەكا هەڤڕكی و هێز دا، ئەلهۆیێن چیا ئەوا د دەمەكێ‌ نەخۆش دا دەرباز دكەت پشتی سێ‌ خوسارەتیێن نە چاڤەڕێ‌ كری بەرانبەر یانەیێن، ئەلگەرمە، شورتە و كەرخ، دێ‌ هەموو بزاڤان كەت ب سەركێشییا ڕاهێنەرێ‌ كوڕێ‌ باژێرێ‌ خوە سلێمان رەمەزان ئێكەم سێ‌ خالان بینیت، لێ‌ یا ب سانەهی نابیت بەرانبەر تیمەكا جەماوەری كو یانەیا تەلەبەیە دێ‌ ل ئەردێ‌ خوە دا هەمو بزاڤان كەت بۆ سێ‌ خالان تایبەت پشتی فدراسیۆنا فوتبۆلا ئیراقێ‌ یارییا گەڕا سێیێ‌ بڕیاردایی تەلەبە بهێتە هژمارتن خوسارەت ژبەر شاشیەكا كارگێری د هژمارەیا یاریزانەكی دا، هەردو تیم خودان سەربۆرین و هەڤڕكن، د پێنچ یاریێن دووماهییا دناڤبەرا هەردو یانەیان دا هەر تیمەكێ‌ دو سەركەڤتن بەرانبەر ئێك خوسارەت هەبوویە، د خولێ‌ دا تەلەبە سەركەڤتن، وەكهەڤی و خوسارەتیەك هەیە.
هەولێر- ئەلگەرمە
ژلایەكێ‌ دووڤە د هەمان دەم دا یانەیا هەولێر دێ‌ ل یاریگەها خوە مێڤاندارییا یانەیا ئەلگەرمە یا باژێرێ‌ روومادی كەت كو ئێك ژ یاریێن دی یێن ب هێزە بۆ یانەیێن كوردستانی، ژبەركو یانەیا ئەلگەرمە خودان یاریزانێن ستێرە و شیاییە د سێ‌ یاریێن بۆری دا حەفت خالان كۆمبكەت، لێ‌ یانەیا كەلهە ومنارە ژی ئاست و ئەنجامێن باش هەنە و حەفت خال وەكو مێڤانا خوە كۆمكرینە، ئەڤ یارییە دێ‌ بیتە یا سێیێ‌ دناڤبەرا هەردو تیمان دا، ل وەرزێ‌ بۆری دوجاران بەرانبەری ئێك بووینە، هەولێرێ‌ سەركەڤتن ئینایە و وەكهەڤییەك ژی بدووماهی هاتییە.
زاخۆ- نەورۆز
دێربییەكا تایبەت یا كوردستانی ئەوا بڕیارە ل شەمبییا بهێت دەمژمێر 8:30 شەڤ یانەیا زاخۆ مێڤاندارییا یانەیا نەورۆز ل یاریگەها یانەیا زاخۆ بكەت، پشتی چارەسەركرنا ئەردێ‌ یاریگەها وێ‌، كوڕێن خابوری ژی ئاست و ئەنجامێن وێ‌ د خولێ‌ دا دباش نینن، دیارییا ئێكێ‌ بەرانبەر تەلەبە خوسارەت بوو، دووڤدا سەركەڤتن ل سەر جەوییە ئینابوو پاشان دگەل دیالا تووشی خوسارەتیەكا نەچاڤەڕێ‌ كریبوو، لێ‌ بۆ ڤێ‌ یاریێ‌ كو دهێتە هژمارتن دێربیێ‌ كوردستانێ‌ و دناڤ ئەرد و جەماوەرێ‌ خوە دا یا داخوازكرییە بۆ ڤەگەڕاندنا سەركەڤتنان، د بەرانبەر دا یانەیا نەورۆز د یارییا ئێكێ‌ دا سەركەڤتن ل سەر كارەبا ئینابوو لێ‌ دووڤدا دو خوسارەتی ل دووڤ ئێك دگەل نەفت میسان و شورتە ئینا.
وەحید رەشید بۆچوونا خوە دیار كر
ل دۆر یانەیا دهۆكێ‌ ناڤهاتی گۆت: بمخابنی ڤە كاروانێ‌ تیمێ‌ ب خرابی یا دەستپێكری، ئەڤە ژی ڕامانا وێ‌ ددەت كو ئەو بەرهەڤیێن دەستپێكێ‌ هاتینە كرن د ئاست نەبن، پرۆسەیا هاتنا یاریزانان د باش نەبووینە و ئەوێن ژ دەستداین جهێ‌ وان نە هاتییە پركرن وەكو ئاستێ‌ وان، بەلگەژی پشتی بۆرینا سێ‌ یارییان ئەو ئاستێ‌ مە هیڤی خوازت نە هاتییە دیتن، پشتی دو گەران ڕاهێنەر هاتییە دوورئێخستن و هاتنا كاپتن سلێمانی، و هەكە ڕاهێنەرەكێ‌ دی ژی بهێت دەم دڤێت هەتا تیم بهێتە سەرپێ خوە، لەوما ژە د قووناغا ئێكێ‌ ئەڤ تیمە بگەهیتە یا 12ێ‌ ژی باشە هەتا ڕێزێن خوە باشتربكەت ب ئینانا چەند یاریزانێن باش د ڤەگوهاستنێن زڤستانێ‌ دا، یارییا ڤێ‌ حەفتیێ‌ بۆ دهۆكێ‌ یا بزحمەتە ب هیڤی نە ب سێ‌ خالان ڤەگەریت.
ل دۆر یانەیا زاخۆ گۆت: تیما زاخۆ باشترە و ڕێكخستیترە، ئەنجامێن وێ‌ دناڤبەرا سەركەڤتن و خوسارەتی بوون و ئاستێ‌ وێ‌ خراب نینە، پشتی یارییا كۆپا كەنداڤی شیایی سەركەڤتنەكا باش ئینایین بەرانبەر ئەلقادسیە، لێ‌ وەكو ئاست گەلەك یێ‌ باش بوو ژ هێلا گۆلپارێزی هەتا هێرشبەران، ئەڤ یارییە دێ‌ بیتە پالدەرەكێ‌ باش بهێز ڤەگەرینە خولێ‌ و ڤەگەرییتە سەركەڤتنان، هوسا دیارە هزر و پلانێن ڕاهێنەرێ‌ وان دگەل یاریزانان د گۆنجیت، یارییا بەرانبەر نەورۆز دێ‌ بیتە كلاسیكۆیەكا خوش.
ژ یاریێن دی ئەوێن بڤی شێوەیی دێ‌ هێنە كرن.
سوبەهی ئەینی، كەرخ- نەفت، دەمژمێر شەشی ئێڤاری.
رۆژا شەمبی
ئەلغراف- ئەلقاسم، دەمژمێر شەشێ‌ ئێڤاری.
كارەبا- شورتە، دەمژمێر 8:30 شەڤ.
رۆژا ئێك شەمبی.
مووسل- دیالا، دەمژمێر شەشێ‌ ئێڤاری.
ئەمانەت بەغدا- نەفت میسان، شەشێ‌ ئێڤاری.
زەورا- جەوییە، دەمژمێر 8:30 شەڤ.
مینا- نەجەف، دەمژمێر 8:30 شەڤ.

قەیس وەیس:

تیما فوتبۆلا یانەیا زاخۆ سەركەڤتنەكا باش و گرنگ د دەستپێكا كاروانێ‌ خوە یێ‌ كۆپا كەنداڤی ئینا پشتی ب سێ‌ گۆلان بەرانبەر گۆلەكێ‌ سەركەڤتی ل سەر مێڤانا خوە یانەیا ئەلقادسیە یا كوێتی، د یارییا واندا ئەوا ژ چوارچووڤەیێ‌ هەڤڕكیێن گەڕا ئێكێ‌ یا كۆما ئێكێ‌ ل یاریگەها یانەیا دهۆك هاتییە كرن.
گۆلێن كوڕێن خابووری ژلایێ‌ یاریزانان پیشەكارێ‌ وێ‌ ئیچیتا دیبۆتی د خولەكا 15ێ‌، شێركۆ كەریم دو گۆل د خولەكێن 45+6 و 51ێ‌ تۆماركرن، د هەمان كۆم دا یانەیا عەین یا ئیماراتی سەركەڤتەكا باش ل سەر یانەیا سترە یا بەحرێنی ئینا ب 3-1 گۆلان.
ل دۆر ڤێ‌ یاریێ‌ ئەمجەد عەتوان كاپتنێ‌ تیما زاخۆ بۆ دەزگەهێن ڕاگەهاندنێ‌ گۆت: دەستپێكێ‌ پیرۆزباهییا پشتەڤانێن یانەیێ‌ دكەم، سەركەڤتنەكا گرنگ بوو د كاروانێ‌ مە یێ‌ دەستپێكی دا ل كۆپا كەنداڤی، یاگرنگ مە شیا پشتەڤانان ڕازی بكەین و ڕژدین بەردەوامیێ‌ بدەینە ئەڤان ئەنجامان، كۆپا كەنداڤی ب سانەهی نابیت لێ‌ یا د شیان دا بیت دێ‌ شەڕی بۆ كەین پێخەمەت دەستڤە ئینانا سێ‌ خالان.
هەروەسان ناڤهاتی گۆت: ئەڤ سەركەڤتنە پالدەركە بۆ مە ئەنجامێن باشتر بینن تایبەت بۆ یارییا كلاسیكۆیا كوردستانی بەرانبەر نەورۆز، دڤێت بەردەوامین ل سەر ئاست و ئەنجامێن خوە هەكە ب گەهینە ئارمانجان.
بۆ زانین یاریێن گەڕا دویێ‌ ژ كۆپا كەنداڤی دێ‌ بڤی شێوەیی بن، كۆما دویێ‌ ل 21ێ‌ ڤێ‌ مەهێ‌ تەزامن حەزرموت یا یەمەنی- شەباب یا سعۆدیێ‌، نەهزە یا عومانی- ڕەیان یا قەتەری، یاریێن كۆما دویێ‌ ل 22ێ‌ هەمان مەهـ هێنەكرن، سترە یا بەحرێنی- زاخۆ ، دەمژمێر شەشێ‌ ئێڤاری، ئەلقادسیە یا كۆێتی- عەین یا ئیماراتی.

رەمەزان زەكەریا

خوە بەرهەڤكرن بۆ وەرزێ‌ نوو یا خولا پلا نایابا كوردستانێ‌ یا فوتبۆلێ‌ تیما یانەیا ئاكرێ ب سەر پەرشتیا راهێنەرێ خوە هێور مستەفا هژمارەكا گرێبەستێن نوو دگەل كۆمەكا یاریزانان ڕاگەهاندیە و ئەوا ل 13ێ‌ گۆلانا بۆری دەست ب یەكەم ڕاهێنانێن خوە كری.
لدۆر ڤێ‌ یەكێ‌ سوهەیب عەلی پەیڤدارێ یانەیا ئاكرێ بۆ رۆژناما ئەڤرۆ گۆت: بۆ وەرزێ نوو یێ خولا نایاب و كۆپا كوردستانێ مە گرێبەست دگەل هژمارەكا یاریزانا ئیمزاكرییە ئاشتی ئیدریس، هنگاو محەمەد یاریزانێ‌ بەرنیاس،گولپارێز نیما نەعیمی، توانا ئەمیر ناڤەراستكار، محەمەد عەبدولحەمید بەرەڤانیكار پیشەكارێ ئیراقیە، پەیام ئەحمەد ناڤەراستكار، سولتان سولتان هێرشبەر پیشەكارێ سوری، دیدار غازی هێلا بەرەڤانیێ‌، رەیان عەبدولقادر،هێڵاا بەرەڤانیێ‌ ، رێزدار وەلی هێرشبەر ،هەروەسا كار ل سەر یاریزانەكێ دی دكەین یێ پیشەكار بریارە دەمەك نیزیك بگەهیت .
ناڤبری گۆتژی: دیسان گرێبەستێن نەهـ یاریزانێن پار سال هاتنە نووكرنەڤە، حەفت یاریزانێن لاوێن ئاكرێ هاتنە سەر ئێخستن، چەند رۆژە تیما یانەیا ئاكرێ دەست ب راهێنانان كریە و دێ بەردەوام بیت بۆ وێ چەندێ ب باشترین شێوە خۆ بەرهەڤ بكەت بۆ خولێن كوردستانێ.
ناڤهاتی خویاكر، تیما یانەیا ئاكرێ ئەڤسالە ب سەر پەرشتیا راهێنەر هێور مستەفا كو كوردە دێ هەڤركیێ ل سەر ناسناڤێ خولا نایاب و كۆپا كوردستانێ كەت ، ب هاریكاریا هیشام شێرزاد و راهێنەرێ گولپارێزان فرید سەفا یێ ئیراقی و راهێنەرێ لەشی وشیانان بێرۆز داڤالی یێ ئیرانی .
هەژی گۆتنێ یە ل وەرزێ‌ بۆری تیما یانەیا ئاكرێ‌ نەشیابوو ناسناڤێ‌ خوە یێ‌ وەرزێ‌ 2023-2024ێ‌ پارێزیت، د وەرزێ‌ ئەف سالەدا حوكمەتا هەرێما كوردستانێ‌ یاریگەها یانەیا ئاكرێ‌ نووژەنكرییە ئەوا دهێتە پێشبینیكرن جەماوەرەكێ‌ ئێكجار زوور ل وەرزێ‌ ئەڤ سالە بەرهەفی یارییان بن.

چاڤەڕێ‌ دهێتە كرن سوبەهی هەتا 13ێ‌ ڤێ‌ مەهێ‌ ل باژێرێ‌ سلێمانیێ‌ دەست ب هەڤڕكیێن قارەمانییا عەرەبی بۆ یارییا پایسكلان بهێتە كرن، پێنچ یاریزانێن پارێزگەها دهۆكێ‌ دناڤ ڕێزێن هەلبژارتیێن ئیراقێ‌ دانە، ئەوا بڕیارە هەشت وەلاتێن عەرەبی پشكدارن و دێ‌ هەڤڕكی ل سەر ئاستێن پێشكەڤتی،ئۆلمپی، لاوان، تازەپێگەهشتی و كچان ب پشكدارییا 200 یاریزانێن كوڕ و كچ هێنە كرن.
تارق سەعید ڕاهێنەرێ‌ یانەیا دهۆك و هەلبژارتیێ‌ ئۆلمپیێ‌ ئیراقێ‌ گۆت: ب گەشبینی پێنچ یاریزانێن پارێزگەهێ‌ پشكدارن ژ وانان سێیێن یانەیا دهۆكێ‌ ل سەر ئاستێ‌ لاوان، ئاڤەند هشیار فەریق، یوسڤ جیهاد و عیسا عەلی، دو یاریزانێن دی خەلكێ‌ پارێزگەهێ‌ نە ئەوژی وەهبی سلیمان ژ یانەیا سیناعە یا بەغدایی بۆ ئۆلمپیێ‌ ئیراقێ‌ و سەربەست عەبدوللا ژ یانەیا كۆیە یا هەولێری بۆ ئاستێ‌ پێشكەڤتیان، ئەڤ روودانە ئێك ژ هێزترین قارەمانیانە ل سەر ئاستێ‌ عەرەبی
هەروەسان ناڤهاتی گۆت: زێدەتری مەهەكە بەرهەڤییان دكەین، ئەڤ قارەمانییە بۆ مە گەلەك گرنگە و پشكدارییا پێنچ یاریزانێن مە دەستكەڤتەكە و دێ‌ هەموو بزاڤان كەین ب گەهینە ڕێزێن پێشیێ‌ و من باوەری ب یاریزانێن پارێزگەهێ‌ هەیە دێ‌ گەهنە دەستكەڤتەكی