قەیس وەیس:

چاڤەڕێ‌ دهێتە كرن ئەڤرۆ دەست ب هەڤڕكیێن گەڕا 16 یا خولا ستێرێن ئیراقێ‌ یا فوتبۆلێ‌ ب ئەنجامدانا سێ‌ یارییان بهێتە كرن، سوبەهی ئەینی هەردو یانەیێن پارێزگەهێ‌ دهۆك و زاخۆ ژ دەرڤەیی یاریگەهێن چاڤ ل خالا شەشێ‌ بن و زێدەتر پێنگاڤ بۆ پێشڤە چوونێ‌ د ڕێزبەندییا خولێ‌ دا بكەن.
دهۆك دێ‌ شێت ئاستەنگا مینا دەربازكەت
بڕیارە سوبەهی ئەینی تیما یانەیا دهۆك ل یاریگەها ئەلفەیحا ببیتە مێڤانا یانەیا مینا یا بەسرایی ل دەمژمێر 5ێ‌ ئێڤاری د یارییەكا گرن گدا بۆ هەردو یانەیان، پشتی سەركەفتنا باش ل سەر نەفت ئەلمیسان ژ گەڕا 15ێ‌ ئەلهۆیێن چیا جهێ‌ خوە ل رێزا پێنجێ‌ پاراستیە ب كۆمكرنا 27 خالان ژ ئەنجامێن هەشت سەركەفتن، سێ‌ وەكهەڤییانە، لێ‌ چار خوسارەتی هەنە، د بەرانبەر دا یانەیا مینا ئەوا تووشی خوسارەتیێ‌ بووی بەرانبەر نەجەفت دێ‌ بزاڤێ‌ كەت قەرەبوویا خالان بەرانبەر دهۆكێ‌ بكەت، یانەیا بەسری خودانا 19 خالایە ل رێزا 13ێ‌ دهێت، هەروەسان دبیت گوهۆڕینێن دناڤا كارگێریا یانەیێ‌ دا كارتیكرنا خوە ل سەر ئەنجامی ژی بكەت چو نێكەتیڤ یان پۆزەتیڤ ژبەركو كاودانێن وێ‌ ژی گوهۆڕین سەردا هاتینە كرن.
دهۆك دێ‌ پشتگەرمیێ‌ گۆلكەرێن خوە بیت
تیما دهۆكێ‌ خوانا هەشت یاریزانێن پشكداری د تۆماركرنا 20 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس پێنج گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن و مارلۆن دۆسانتۆس گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر، لەوما ژی دێ‌ پشت گەرمیێ‌ ب ئەڤان یاریزانان كەت بۆ تۆماركرنا گۆلان بەرانبەر مینا و بگەهیتە خالا شەشێ‌ ل دووڤ ئێك د یاریێن دەرڤە دا.
زاخۆی دخوازن بیرا نەفتا میسان ژی داگیربكەت
هەر سوبەهی ئەینی ل دەمژمێر 2:30 پشتی نیڤرۆ تیما یانەیا زاخۆ بەرانبەر دوبارە دیرۆكێ‌ یە و ڤەگەڕیان بۆ سەرێ‌ لیستێ‌ دەمێ‌ دبیتە مێڤانا یانەیا نەفت ئەلمیسان د یارییەكا گرنگ و پری هەڤڕكی دا، كوڕێن خابووری ئەوێن د گەڕا بوری دا سەركەفتنەكا ب زەحمەت ل سەر خودانێن ئەردی یانەیا نەفت ئەلبەسرا بینن ب سێ‌ گۆلان بەرانبەر دو گۆلان و زێدەتر خوە نێزیكی سەرێ‌ لیستێ‌ بكەن، ئەوێن ب كۆمكرنا 28 خالان پیێشڤە چووینە ڕێزا سێیێ‌ ژ هەشت سەركەفتن، دگەل چار وەكهەڤیان و سێ‌ خوسارەتی هەنە، ژلایێ‌ خوە تیما نەفت میسان ئەوا ل سەر دەستێ‌ دهۆكییان تووشی خوسارەتیێ‌ بو ودێ‌ بزاڤێن قەرەبوویێ‌ بەرانبەر زاخۆییان كەن، نەفتا میسان خودانا 22 خالانە ل رێزا هەشتێ‌ دهێت، ئەڤ یارییە بۆ زاخۆییان ئاگرینە و ڤەبڕە بەر ب سەرێ‌ لیستێ‌ هەكە یانەیێن شورتە و زەورا د یاریێن خوەدا تووشی خوسارەتیێ‌ بوون، لێ‌ هەر سەركەفتن دێ‌ سەركەفتنا زاخۆ بۆ پاراستنا جهێ‌ خوە بیت.
ئامارێن گۆلكەران د بەرژوەندیا زاخۆ دانە
پشتی تۆماركرنا گۆلێن ڤێ‌ گەڕێ‌ هەردو ستێرێن یانەیا زاخۆ یێ‌ بەرازیلی گۆستاڤۆ هێنریك نەهـ گۆل سەرێ‌ لیستا گۆلكەرێن تیما خوە دهێت، یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا هەشت گۆلان رێزا دویێ‌ دهێت، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
هەولێر گەشبینە جەماوەرێ‌ خوە دلخوەش بكەت
تیما یانەیا هەولێرێ‌ دێ‌ ئەڤرۆ دناڤ ئەرد و یاریگەها خوە دا مێڤاندارییا یانەیا كەربەلا كەت ئەوا دێ‌ ل دەمژمێر 7:30 شەڤ هێتە كرن، كوڕێن كەلهە و منارە رێزا نەهێ‌ ب كۆمكرنا 22 خالان دهێت دێ‌ شەڕی بۆ سێ‌ خالان كەن و جەماوەرێ‌ خوە دلخوەشكەن، لێ‌ یانەیا كەربەلا خودانا 15 خالانە ل رێزا 16ێ‌ دهێت و نەچارە ب هەموو شیانێن خوە یاریێ‌ بكەت بۆ باشتكرنا جهێ‌ خوە.
نەورۆز بەرانبەر تاقیكرنەكا بزەحمەت دایە
تیما چارێ‌ یا هەرێمێ‌ یانەیا نەورۆز ئەوا دێ‌ سوبەهی ئەینی ل یاریگەها شەعب ببیتە مێڤانا یانەیا شورتە یا بەغدایی د یارییەكا ئاگرین و ب هێزدا، نەورۆز ل رێزا 15ێ‌ دهێت ب كۆمكرنا 18 خالان، ژلایێ‌ خوەڤە یانەیا شورتە هەڤڕكا سەرێ‌ لیستێ‌ و قارەمانا وەرزێ‌ بۆری ل رێزا دویێ‌ دهێت ب كۆمكرنا 30 خالان و دێ‌ شەڕی بۆ سێ‌ خالان كەت پێخەمەت ڤەگەڕیان بۆ سەرێ‌ لیستێ‌.
ژ یارییێن مایی د خولێ‌ دا
ئەڤرۆ پێنج شەمبی، دیالا- ئەلزەورا دەمژمێر 2:30 پشتی نیڤرۆ، ئەلكەرمە- ئەلكەرخ دەمژمێر پێنجێ‌ مەغرەب، سوبەهی ئەینی، تەلەبە- نەفت ل دەمژمێر 2:30 پشتی نیڤرۆ، رۆژا شەمبی، ئەلقاسم- نەفت ئەلبەسرا دەمژمێر 2:30 پشتی نیڤرۆ، ئەلحدود- كارەبا ل دەمژمێر 2:30 پشتی نیڤرۆ، نەجەف- جەوییە ل دەمژمێر پێنجێ‌ مەغرەب.
رێزبەندییا گشتی پشتی بۆرینا 15 گەڕان ژ خولا ستێرێن ئیراقێ‌.
1- زەورا 31 خال.
2- ئەلشورتە 30 خال.
3- زاخۆ 28 خال.
4- جەوییە 28 خال.
5- دهۆك 27 خال.
6- تەلەبە 27 خال.
7- نەفت 24 خال.
8- نەفت ئەلمیسان 22 خال.
9- هەولێر 22 خال.
10- نەجەف 21 خال.
11- ئەلقاسم 21 خال.
12- ئەلكەرمە 20 خال.
13- مینا 19 خال.
14- كارەبا 18 خال.
15- نەورۆز 18 خال.
16- كەربەلا 15 خال.
17- نەفت ئەلبەسرا 14 خال.
18- ئەلكەرخ 12 خال.
19- حدود شەش خال.
20- دیالا پێنج خال.
رێزبەندییا گۆلكەرێن خولێ‌
ب دووماهی هاتنا یاریێن گەڕا 15ێ‌، ستیرێ‌ یانەیا شورتە موهەنەد عەلی ب تۆماركرنا 10 گۆلان سەرێ‌ لیستا گۆلكەران دهێت، گۆستاڤۆ هێنریك هێرشبەرێ‌ زاخۆ ب نەهـ گۆلان رێزا دویێ‌، هەڤالێ‌ وی ئەمجەد عتوان ژ یانەیا زاخۆ و عەلا عەباس یاریزانێ‌ جەوییە هەر ئێك ب هەشت گۆلان رێزێن سێیێ‌ و چارێ‌ دهێن، هەر ئێك ژ شێركۆ كەریم یاریزانێ‌ هەولێرێ‌، عەلی یۆسف ژ زەورا، پاشەنگ عەبدوللا ژ دهۆكێ‌ و یۆسف بن سودە ژ هەولێرێ‌ رێزێن پێنجێ‌ هەتا هەشتێ‌ ل دووڤ ئێك دهێن.

عەلی حاجی:

د داخویانیەکێ دا سەرپەرپشتێ تیما فوتبۆلا یا زاخۆ یا پشکدار د خولا ستێرێن ئیراقێ دا بۆ رۆژنامەیا ئەڤرۆ دیار کر کارێن یاریزانێ وان ئەحمەد یاسین ب دوماهی هاتینە و دڤێت سەرکەڤتنێ توماربکەن.
زێدەتر حەمید ئیسماعیل گۆت: پشتی سەرکەڤتنا مە بۆری ل سەر نەفتا بەسرا هەر ئێکسەر دەست ب بەرهەڤیان هاته‌كرن‌ بۆ دیدارا گرنگ بەرامبەر نەفتا میسان، یاری ب سانه‌هی نابیت ژبەرکو تیمه‌كا هه‌ڤڕكه‌ و بهێزه‌ د یاریگەها وێ دایە، ئەم دێ باشترین شێوە خوە بەرهەڤكه‌ین، گه‌شبینن د ماوەیێ ئێک حەفتی دا دو چیچكا ب به‌ره‌كی بكۆژین، سەرکەڤتن ل سەر نەفت میسان گەلەکا گرنگە تایبەتی باشتركرنا رێزێن پێشیێ، نابیت ئەم چ خالان ژ دەست بدەین داکو بشێن جهێ خوە موکمتربکەین، یاریزان د رەوشەکا ئاسایی دا دەربازدبن هەموو ڕەنگان بەرهەڤن بۆ یاریێ، د نوکە دا کاروبارێن یاریزانێ مه‌ یێ نوو ئەحمەد یاسین ب دووماهی هاتینە، بۆ یاریێ بەرهەڤە لێ لدووڤ پلانێن ڕاهێنەری دمینیت ژ بۆ پشکداریێ د یاریێ دا.
ل دووماهیێ ناڤهاتی گۆت: ئەڤ یارییە بۆ مە یا گرنگ و زەحمەته‌ لێ ئارمانجا مە دێ بۆ سەرکەڤتنا دویێ ل دووڤئێک بیت.

شاهۆ فەرید:

د داخویانیەكێ راهێنەرێ تیما فۆتبولا یانەیا تەناهی دارڤان خالد بۆ رۆژنامەیا ئەڤرۆ دیار كر هەتا رادەكێ باش مانا خوە پاراستیە دناڤا خولێ دا لێ ئارمانجا مە یا مەزن دەستڤە ئینانا پلێتا دەربازبوونە بۆ پلەیا نایاب.
هەروەسان ناڤهاتی گۆت: هەڤركی یا مە لدووڤ پارەیێ بەردەست مە كار لسەر كریە زور باشە ژ لایێ ئاست و ئەنجامان ڤە، تیمەكا باش مە پێكئینایە و رێژەكا یاریزانیێن ناڤخوە یێن باش خوە كومكرینە، حەفتێ ژ سەدێ تیما مە یاریزانێن وەرزێ بورینە سەربورا خولێ ل دەف وان هەیە، من باوەریەكا باش ب یاریزانێن خوە هەیە دێ سوپرایزەكێ د نیڤا دویێ ژ خولێ ئەنجامدەین، رێزێن دەستپێكی یان پلێتەكێ دەستخوەڤە بینین.
دارڤانی گۆت ژی: مە خالێن لاوازی یێن خوە دەسنیشانكرینە د گفتوگویێ داینە ل گەل چەند یاریزانێن ناڤخوەیی، ئەڤە دو رۆژە پێشەكارەكێ ئیرانی پەیوەندی ب رێزێن تیمێ كریە، ئەگەر ئەو دو یاریزانێن ناڤخوەیی ژی رازی بن پەیوەندیێ ب تیما مە بكەن دێ هیز هێنە دناڤا هەڤركیێ دا ئەگەر دەرباز نەبین ژی ل رێزبەندیێن دەستپێكێ ناهێنە خوار، هندەك یانەیان دو قاتی مە پارە مەزاختینە لێ ئاستی و ئەنجام و رێزبەندیێ ژوان باشترین، كارگێریا یانەیێ بزاڤێن بەردەوام دایە بۆ پالپشتیا مە ئینانا یاریزانان، هندی بشێن دێ كاركەین بۆ پێشەنگیێ خولێ و دەبازبوونێ كەین، سەرباری ئەركێ‌ مە ب سانەهی نابیت و هەموو یانە ب هێزن و شەڕی بۆ رێزێن باشتر دكەن.

د داخویانیەكێ‌ دا ئەندامێ‌ فدراسیۆنا فوتبۆلا كوردستانێ‌ بۆ رۆژنامەیا ئەڤرۆ دیار كر ژبەر نە پێگێرییا پرانییا یانەیێن وەرزشی بۆ هنارتنا كشوفاتێن تیمێن خوە یێن فوتسالێ‌ بۆ وەرزێ‌ نوو یا 2025ێ‌ ل سەر ئاستێ‌ كچان، بڕیار هاتە دان بۆ ئێك حەفتی هەڤڕكیێن وەرزێ‌ نوو بهێتە پاشئێخستن و دووماهی دەلیڤە ژی هاتیە دان.
زێدەتر ئازاد محەمەد گۆت: هەرچەندە بەری مەهەكێ‌ ژڤانێ‌ وەرزێ‌ نوو یا خولا فوتسالێ‌ هاتبوو دانانا كو دێ‌ ل 24ێ‌ ڤێ‌ مەهێ‌ هێتە ئەنجامدان ب پشكدارییا هەشت یانەیان و پشككێشان ژی هاتبوو كرن و بۆ دو كۆمان هاتبوونە بەلاڤكرن لێ‌، هەتا دووماهی ژڤانێ‌ هنارتنا كشوفاتان ژ سەرجەمێ‌ هەموو یانەیان ب تنێ‌ یانەیا ئافرەتێن دهۆكێ‌ ب ڕێك و پێك بۆ مە هنارتبوون، سەرباری داخوازیێن مە بۆ یانەیێن دی كو زووترین دەم فڕێكەن.
هەروەسان ناڤهاتی گۆت: دوهی كۆمبوونەكا بلەز هاتە كرن و بڕیار هاتە دانان بۆ ئێك حەفتی وەرزێ‌ نوو یێ‌ خولا فوتسالا كچان پێشڤە بچیت و دووماهی دەلیڤە هەتا ئێكشەمبییا بهێت بۆ ئەوان یانەیێن كشوفاتێن خوە نە ئیناین و هەر یانەكا پێگێریێ‌ نە كەت دێ‌ ب كۆژمەیێ‌ 500 هزار دیناران هێتە سزادان، چنكو بڕاستی جهێ‌ سەرنجراكێشێ‌ یە، مە دەلیڤەكا درێژ یا دەمی بۆ هەموو یانەیان بەردەست كربوو پێخەمەت كشوفات و بەرهەڤیێن خوە بۆ وەرزێ‌ نوو ب دانن، یا مە ژی هەر ئەوە خزمەتا هەموو یانەیان ژی بكەین لێ‌ دڤێت پێگێری ژی ب یاسا و ڕێنمایان هەبیت دا وەرزشا كوردستانێ‌ یا سەركەفتی و پێشكەفتی بیت.
بۆ زانین دبیتە جارا دویێ‌ ل دووڤ ئێك بۆ وەرزێ‌ نوو 2025ێ‌ خولا فوتسالا كچان دهێتە پاشئێخستن، ئەوا بڕیار بوو ل 24ێ‌ كانوونا سالا 2024ێ‌ هاتبا ئەنجامدان لێ‌ ب بوهانا تاقیكرنێن قوتابخانەیان و دەلیڤە بۆ یاریزانێن كچ ئەوێن قوتابی بۆ ئێك مەهـ هاتبوو پاشئێخستن، ئەڤجارە ژی ژبەر نە هنارتنا كشۆفاتێن پرانییا یانەیان دوبارە هاتە پاشئێخستن بۆ حەفتییا بهێت.

دادڤانێ‌ نێڤدەولەتی یێ‌ خولا ستێرێن ئیراقێ‌ یا فوتبۆلێ‌ محەمەد تارق ئەحمەد سێ‌ سكالا ل دادگەهەكا ئیراقێ‌ ل یانەیا نەفت بەسرا كرییە دەرئەنجامێ‌ توندوتیژییا بەرانبەر وی هاتیە كرن پشتی ب دووماهی هاتنا یارییا زاخۆ بەرانبەر یانەیا نەفت بەسرا ئەوا ب سەركەفتنا زاخۆ ب 3-2 ب دووماه هاتی.
محەمەد تارق بۆ دەزگەهێن ڕاگەهاندنێ‌ گۆت: من سێ‌ سكالا ل سەر یانەیا نەفت بەسرا تۆماركرینە و هیچ ڕەنگەكی نا ڤەكێشم، یا ئێكێ‌ كارگێرەكێ‌ یانەیێ‌ قەسێن كرێت گۆتینە بابێ‌ من یێ‌ رەحمەتی، یا دویێ‌ سەرپەرشتێ‌ تیما وان دڕبێن شەڕی بەرانبەری من داناینە و بوویە ئەگەر دەستێ‌ من تووشی هنگاڤتنێ‌ كریە، یا سێیێ‌ دژی بەرپرسێ‌ ڕاگەهاندنا وێ‌ یانەیێ‌ كو پۆستێن ئیهانەكرنێ‌ ل سەر بابێ‌ من نڤێساینە، لەوما سكالا خوە ناڤەكێشم هەتا بگەهنە سزایێ‌ خوە.
ژلایێ‌ خوەڤە عەبدولئەمیر ئەلشەمەری وەزیرێ‌ نافخوەیا ئیراقێ‌ بڕیاردا ل هەموو یاریگەهێن ئیراقێ‌ ب رژدی ئێمناهییا یاریگەهان بهێتە كرن و هەر كەسەكێ‌ توندوتیژیێ‌ بكەت هەرزو بهێتە دەستەسەركرن.