قەیس وەیس:
چاڤەڕێ دهێتە كرن ئەڤرۆ تیما فوتبۆلا یانەیات زاخۆ بۆ جارا ئێكێ د دیرۆكا خوە دا پشكداریێ كۆپا كەنداڤی دا بكەت ئەوا بڕیارە ئەڤرۆ ل دەمژمێر 8:30 شەڤ ل یاریگەها یانەیا دهۆك یا نێڤدەولەتی مێڤاندارییا یانەیا ئەلقادسییە یا كوێتی بكەت د گۆپیتكا هەڤڕكیێن گەڕا ئێكێ یا كۆما ئێكێ دا ئەوا پێكهاتیینە ژ هەردو یانەیێن دیاركری دگەل یانەیێن عەین یا ئیماراتی و سترە یا بەحرێنی، كۆما دویێ پێكهاتییە ژ رەیان یا قەتەری، شەباب یا سعۆدیێ، نەهزە یا عومانی و تەزامن حەز مەوت یا یەمەنی، ل دۆر یارییا ئەڤرۆ یا تیما زاخۆ رۆژنامەیا ئەڤرۆ بۆچوون و پێزانین وەرگرتینە ئەوێن بڤی شێوەیی هاتینە دیاركرن.
ل دەستپێكێ ویسام ڕزق ڕاهێنەرێ یانەیا زاخۆ گۆت: پێنەڤێت سەقا و شێوازێ یارییا كۆپا كەنداڤی وەكو یا خولا ستێرێن ئیراقێ نینە، تیما مە بۆ جارا ئێكێ یە دێ پشكداریێ د ڤێ قارەمانیێ دا كەت، ڕاستە من پێزانین باش هەنە ل سەر كۆپا كەنداڤی ژبەركو خەلكێ كەنداڤی مە و دناڤا قارەمانیێ دابوویمە، لێ ئەركێ من دگەل یانەیەكا ئیراقی و تایبەت یا مەزن وەكو یانەیا زاخۆ بەرپرسیارەتییەكا مەزنە، شانازیێ پێ دكەم یانەیەكا وەكو زاخۆ خودان جەماوەر و ناڤودەنگییا خوە هەیە.
هەروەسان ناڤهاتی گۆت: یارییا ئێكێ ب تاما فینالێ یە بەرانبەر یانەیا قادسییە ئەوا ل وەرزێ بۆری گەهشتیە دووماهییا ڤێ قارەمانیێ و دگەل دهۆكێ ل یاریگەها دهۆكێ خوسارەت بووی ب گۆلەكێ، پێكهاتییەكێ زیرەك و شارەزا هەیە، لەوما ژی دێ یارییەكا بهێز بیت و پری هەڤڕكی بیت، هەرچەندە سیستەمێ كۆما یە و هەر یانەیەك دێ شەش یارییان كەت لێ ئەو یارییا دناڤ ئەردێ خوە دا دڤێت هەمی بزاڤان بكەین بۆ سێ خالان پێخەمەت گەشبینی ژبۆ دەربازبوون بۆ فینالێ، ئەم بەرهەڤین و ب هیڤی نە ئێكەم سێ خالان بۆ تیما خوە بینن.
ژلایێ خوەڤە بەدر ئەلمتەوع ستێرا یانەیا قادسیە یا كوێتی گۆت: سۆپاسییا خەلكێ كوردستانێ دكەین كو پێشوازییا مە ب شێوەیەكێ جوان كری، مە بەرهەڤیێن تایبەت بۆ ڤێ یاریێ كرینە و كەمپەكێ ڕاهێنانێ ل توركیا دانا بوو، هەرچەندە بۆ ڤێ یاریێ نێزیكی شەش یاریزانێن مە تووشی هنگاڤتنێ و نە بەرهەڤبوونێ بووینە لێ پێكهاتیێ مە گەلەك یێ باشە، ئەڤ یارییە دێ بیتە یا دویێ بۆ من بهێمە دهۆكێ زوور كەیفخوەشم، پێشتر ل كۆپا كەنداڤی تیما مە هاتییە ڤێ یاریگەهێ دگەل دهۆكێ خسارەت بووین و ناسناڤ ژ دەستدابوو، كەیفخوەشم دوبارە هاتیمە كوردستانێ و یارییا ئەڤرۆ ئەم یێن هاتین قەرەبوو بكەین، بڕێیا خولا ستێرێن ئیراقێ پێزانین ل سەر یانەیا زاخۆ هەنە، تیمەكا ڕێكخستی و ب هێزە و خودان جەماوەرەكێ ئێكجار مەزنە.
ژلایێ خوەڤە ئەیوار مزیری سەرۆكێ كۆمەلا پشتەڤانێن یانەیا دهۆكێ گۆت: هەردەم ئەم هەردو یانە برایێن ئێكی و هەردەمێ پێدڤی مە بیت ئەم پشتەڤانن، یارییا ئەڤرۆ ئەم مێڤانێن زاخۆیانە و یاریگەها دهۆكێ یا زاخۆیە، ب هەموو شێوەیان دێ پشتەڤانێن تیما زاخۆ بین بۆ یارییا ئەڤرۆ و دێ دگەل برایێن خوە كۆمەلا پشتەڤانێن زاخۆ كاركەین بۆ پشتەڤانییەكا شارستانی و سەردەمانە وكاربكەین بۆ بلندكرنا ناڤێ كوردستانێ و دەڤەرا بەهدینان و زاخۆ و دهۆك هەردەم برانە
شرۆڤەكارەكێ وەرزشی ئەركێ زاخۆ ب زەحمەت دبینت
ژلایێ خوەڤە سلێمان زەكی شرۆڤەكارێ وەرزشی ل پارێزگەها دهۆكێ گۆت: بۆ وەرزێ دویێ ل دووڤ ئێك یانەیێن مە یێن پارێزگەهێ پشكداری قارەمانییا كەنداڤی دبن، ئەڤە ژی بەلگەیە ل سەر هەبوونا پێشكەڤتنا وەرزشا كوردستانێ و پووتەدان ژلایێ بەرپرسێن حوكمەتێ بۆ وەرزشێ، سەبارەت یارییا ئەڤرۆ زاخۆ و مێڤانا وێ قادسیە، گەلەك یا بزەحمەتە ئەنجام دیاربكەین، ژبەركو هەردو تیم بۆ جارا ئێكێ یە دكەڤنە بەرانبەر ئێك، هەروەسان ئێكەم یارییە د كۆپا كەنداڤی دا و مرۆڤ ب دورستی نەشێت سەنگ و هێز و كێماسیێن هەردو تیما دیاربكەت، هەروەسان دو یانەیێن دو وەلاتێن ژێكجودا و دو خولێن جودا هەنە.
هەروەسان ناڤهاتی گۆت: هەرچەندە یانەیا قادسیە بەری پێنچ هەیڤەك و 15 رۆژ بوو د فینالا كەنداڤی دا هاتبوو یاریگەها دهۆكێ و خوسارەت بوو، لەوما یا هاتی قەرەبوویا خوسارەتیێ بكەت و سەركەڤتنێ تۆماربكەت، ژلایێ خوەڤە زاخۆ دێ ب هێز وپشتگەرمییا جەماوەرێ خوە یێ مەزن هێتە دناڤ یاریگەهێ دا دێ شەڕی بۆ ئێكەم سەركەڤتنا خوە د كەنداڤی دا كەت و پێشبینییا ئەنجامی ب زەحمەتە.
جاسم ئەلرمێحی ئەمیندارێ گشتی یێ فدراسیۆنا كەنداڤی گۆت: بۆ وەرزێ ئەڤ سالە پشكداریا یانەیێن كەنداڤی دێ ب هێزتر بیت ژ وەرزێ بۆری ژبەركو پشتی سالا بۆری ب سەركەڤتیانە هاتییە كرن هەروەسان مە بڕیار دایە خەلاتێن سەركەڤتیان هەر ژ قۆناغا كۆما هەتا فینالێ ب شێوەیەكێ باش هەبیت، یاریێن كوردستانێ هێزەكا دی دا كۆپا كەنداڤی ئەڤچەندە وەكرییە یانەیێن كەنداڤی بۆ ڤێ قارەمانیێ بەرهەڤبكەن و یێن بهێز هاتینە دناڤ هەڤڕكییان دا، بۆ مە گرنگ قارەمانی بهێز ڤەگەڕیت و پشكدارییەكا بەرچاڤ هەبیت.
خەلاتێن قارەمانیێ دێ چەوابن؟
ل دووڤ لیستەیا پێشتر ژلایێ فدراسیۆنا فوتبۆلا كەنداڤی بەلاڤكری كو دهەمان وەرزێ بۆری دا بوو، بڕیار هاتیە دان خەلاتێن پشكداران هەتا دگەهیتە خودانێ ناسناڤی دێ بڤی شێوەیی بیت.
قارەمانا كۆپا كەنداڤی دێ سێ ملیۆن دۆلاران وەرگریت.
خودانا رێزا دویێ دێ ئێك ملیۆن دۆلاران وەرگریت.
باشترین یاریزانێ كۆپا دێ 50 هزار دۆلاران وەرگریت.
باشترین گۆلپارێز دێ خەلاتێ 50 هزار دۆلاران وەرگریت.
گۆلكەرێ قارەمانیێ ژی دێ 50 هزار دۆلاران وەرگریت.
هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
بۆ زانین یانەیا زاخۆ وەكو نوونەرا ئێكانە یا كوردستانێ و ئیراقێ پشكداریێ د ڤێ قارەمانیێ دا كەت، ئەوا ل وەرزێ بۆری یانەیا دهۆك شیایی ب سەرفەرازی پشكداریێ بكەت و ناسناڤێ قارەمانیێ بۆ جارا ئێكێ د دیرۆكا خوە دا ب دەستڤە بینت پشتی د فینالێ دا ئەوا ل 15ێ نیسانا سالا 2024ێ شیابوو ل سەر ئەردێ یاریگەها خوە سەركەڤتنێ ل سەر یانەیا قادسیە یا كۆێتی بینت ب گۆلەكێ بێ بەرانبەر و ئێكەم ناسناڤێ كۆپا كەنداڤی بۆ ئیراقێ و كوردستانێ ب دەستڤە بینت.
نيشاندان