بسپۆرەکێ پەیوەندیێن نێڤدەولەتی دیار دکەت، تورکیا ژی وەکو ئسرائیلێ نەڤێت چو دەستهەلاتێن بهێز ل سووریێ هەبن، چونکی تورکیا دڤێت دەستهەلاتەکا لاواز ل سووریێ هەبیت دا ل ژێر چاڤدێریا وێ دا بیت و ژ بەر ڤێ یەکێ ژی پرسێن ل سووریێ وەسا زوو چارەسەر نابن.

د. حەمید بۆزئارسلان بسپۆرێ پەیوەندیێن نێڤدەولەتی د داخویانیەکێ دا بۆ کەنالێ ئیکلە تی ڤی دیار کر، ئسرائیل ل سووریێ ب رەنگەکێ ئاشکرا دبێژیت ئەو ل دژی سیستەمەک ناڤەندی یە، ئسرائیل ب هەموو شیانێن خوە کار دکەت دا نەهێلیت دەولەتا نوو یا سووریێ د بیاڤێ سەربازی دا بهێز کەڤیت، هەکە ئەم بەرێ خوە بدەینێ یا تورکیا ژی دکەت د گەلەک بیاڤان دا وەکو ئسرائیلێ یە و گۆت: (تورکیا ب چو رەنگەکێ نەڤێت ل سووریێ دەستهەلاتەکا بهێز هەبیت، راستە بەرپرسین تورکیا هەردەم بەحسێ ڤێ یەکێ دکەن ئەو ل دژی پارچەبوونا سووریێ نە، لێ د راستی دا یا نها تورکیا ل سووریێ دکەت د خزمەتا چارەسەرکرنا پرسێن وی وەلاتی دا نینە، تورکیا ب سیاسەتا خوە رێ نادەت رەوشا سووریێ ئارام بیت، هەکە تورکیا ل سەر سیاسەتا خوە یا نها بەردەوام بیت دێ رەوشا سووریێ هەردەم یا خراب بیت).
ناڤهاتی ئەو یەک ژی دیار کر، نها ل سووریێ لەشکرەک بهێز و ئێکگرتی نینە، لەشکرێ نها یێ سووریێ ژ کۆمەکا گرۆپێن توندرەو پێکهاتیە و مەترسیا خوە بۆ هەموو رۆژهەلاتا ناڤین هەیە، هەکە سوباهی ئالۆزی دروست ببن گرۆپێن چەکدار یێن ل شامێ دشێن بۆ تورکیا ژی مەترسیێن گەلەک مەزن دروست بکەن، لێ دیارە د رەوشا نها دا ئەو یەک بۆ تورکیا گەلەک یا گرنگ نینە، تورکیا ب هەموو شیانێن خوە کار دکەت دا کورد ل سووریێ نەگەهنە مافێن خوە و گۆت: (هەتا پرسا کوردی ل سووریێ نەهێتە چارەسەرکرن، ئانکو کورد ل سووریێ نەگەهنە مافێن خوە رەوشا سووریێ ئارام نابیت، کورد ل سووریێ بهێزن، وەکو تورکیا دبێژیت وەسا نینە کو کورد هەما دەست ژ چەکان بەردەن، ئەمریکی و وەلاتێن دی ژی باش دزانن هەبوونا هەسەدێ ژ بۆ پاشەرۆژا سووریێ و ئارامیا ل وی وەلاتی و هەتا رۆژهەلاتا ناڤین ژی چەند یا گرنگە، ژ بەر ڤێ یەکێ ژی زێدەباری گەفێن تورکیا لێ دیسان ژی ژ بۆ پاشەرۆژا سووریێ کەس نەشێت بێی رازیبوونا کوردان چو بریاران بدەت).
بسپۆرێ پەیوەندیێن نێڤدەولەتی ئەو یەک ژی نەڤەشارت، کو سیاسەتا نها یا تورکیا دێ زیانا خوە یا گەلەک مەزن بۆ سووریێ و هەتا تورکیا ژی هەبیت، چونکی هەر کەس باش دزانیت هەکە ل سووریێ ئێرشی دەڤەرێن کوردی بهێتە کرن دێ قووناغا ئاشتیێ یا ل تورکیا ژی ژناڤ چیت، چونکی هەموو کورد ڤێ پرسیارێ ژ خوە دکەن، هەکە تورکیا ل دژی مافێن کوردان ل سووریێ بیت پا دێ چاوا پرسا کوردی ل وەلاتێ خوە چارەسەر کەت، ژ بەر ڤێ یەکێ ژی دڤێت تورکیا پێداچوونێ د سیاسەتا خوە یا ل سووریێ دا بکەت، دڤێت تورکیا پەیوەندیێن باش ل گەل کوردێن سووریێ دروست بکەت و گۆت: (نها تورکیا پەیوەندیێن گەلەک باش ل گەل هەرێما کوردستانێ هەنە و ئەو یەک مفایەکا خوە یا گەلەک مەزن بۆ تورکیا هەبوویە، تورکیا دشێت هەمان ئەزموونێ ل گەل کوردێن سووریێ ژی دوبارە بکەت).

مەحمود عەباس سەرۆکێ دەستهەلاتا فەلەستینێ دیار کر، دڤێت حەماس دەست ژ چەکی بەردەت، یا نها حەماس دکەت د خزمەتا خەلکێ فەلەستینێ دا نینە و خەلکێ فەلەستینێ ل دژی شەڕی و ئالۆزیانن، حەماسێ چو رۆل د پاشەرۆژا فەلەستینێ دا نابیت و ژ بەر ڤێ یەکێ ژی دڤێت حەماس راستیا هەی قەبوول بکەت.
مەحمود عەباس ئەو یەک ژی دیار کر، ئەو ئێرشا حەفتێ ئۆکتۆبەرێ شەرمزار دکەت، چونکی پشتی وێ ئێرشێ زیانێن گەلەک مەزن گەهشتینە فەلەستینێ و ژ بەر ڤێ یەکێ ژی دڤێت ئێدی حەماس نەبیتە مەترسی ل سەر ژیانا خەلکێ فەلەستینێ، حەماسێ چو رۆل د پاشەرۆژا فەلەستینێ دا نابیت و دڤێت راستیا هەی قەبوول بکەت.

فەرمانداریا گشتی یا هێزێن سووریا دیموکرات دوهی د داخویانیەکێ دا دیار کر، ل دێرازۆرێ چەکدارێن داعشێ ئێرشێ کاروانەکێ سەربازی یێ ئەمریکا کرینە و ئەو یەک ژی نیشا ددەت هێشتا ل سووریێ مەترسیا داعشێ یا هەی و دڤێت هێزێن ئەمریکا ل سووریێ بمینن، هەکە ئەمریکا د رەوشا نها دا هێزێن خوە ڤەکێشیت ئەو یەک دێ بیتە ئەگەرێ بهێزبوونا داعشێ و دێ زیانێن گەلەک مەزن ژی گەهنە وەلاتیێن سڤیل ل سووریێ.
فەرمانداریا گشتی یا هێزێن سووریا دیموکرات ئەو یەک ژی دیار کریە، سیاسەتا نها یا شامێ ل هەمبەر کوردان و پێکهاتەیێن دی دێ بیتە ئەگەرێ ئالۆزیێن زێدەتر ل سووریێ و هەر ئالۆزیەکا نوو ژی دێ بیتە ئەگەرێ بهێزبوونا داعشێ.