دگەل دەستپێكرنا مێركاتۆیا هاڤینێ‌ هەموو یانەیێن ئیراقی و كوردستانی كەنالێن پەیوەندییان دگەل كۆمەكا یاریزان و ڕاهێنەران چركینە و دووڤچوونەكا باش یا دهێتە كرن، یانەیێن دهۆك و زاخۆ هێش بێ‌ ڕاهێنەرن و یاریزانان كۆمڤە دكەن و یێن بەغدایی ڕێزێن خوە موكم دكەن بۆ وەرزێ‌ نوو یێ‌ خولا ستێرێن ئیراقێ‌ یا فوتبۆلێ‌
دهۆكێ‌ گرێبەستا دو پیشەكاران ئیمزاكرییە
یانەیا دهۆك گرێبەستا یاریزانێ‌ یانەیا مینا ئەندرێی ئەلسناتی بۆ ئێك وەرز ڕاگەهاند، دیسان دگەل منتەزر محەمەد یێ ناڤدار كنۆش یێ‌ ئیرانی گەهشتە ڕێكەڤتنێ‌، پێشتر یاریزانێ‌ یانەیا مس ڕەڤسەنجانی و ئیستقلال یا ئیرانی، زەورا و جەوییە كرییە، ئەڤ یاریزانە ل هێلا ناڤین و هێرشبەریێ‌ دکەت، ژلایەكێ‌ دووڤە یاریزانێ‌ دهۆكێ‌ موستەفا عوید گرێبەستا یانەیا ئەلغراف ئیمزاكر، ژلایەكێ‌ دووڤە ل سەر بزاڤێن یانەیا دهۆك بۆ ئینانا ڕاهێنەرەكێ‌ نوو پشتی سلێمان رەمەزانی لێبۆرین خواستی ژبەر تەندرۆستیا خوە.
ل رۆژێن بۆری دەنگۆباسەك هاتە بەلاڤكرن كو ڕاهێنەرێ‌ مسری حوسام بەدری و یانەیا ئەهلی تەرابلسی یا لیبی ئەوژی لێبۆرین خواست، دیسان ژێدەرێن رۆژنامەڤانی دیاركریینە كو یاریزانێ‌ هەلبژارتیێ‌ ڤەنزوێلا ئیدیسۆن كاستێلۆ نێزیكی یانەیا دهۆكێ‌ بوویە، ئەوێ‌ ل هێلا بەرەڤانیێ‌ و خوەجهگێر دناڤ یاریگەهێ‌ دا دكەت.
زاخۆ نێزیكی ڕاهێنەرەكی بوویە
یانەیا زاخۆ ئۆفەرەكا باش پێشكێشی ستێرێ‌ هەلبژارتیێ‌ ئوردن یەز نەعیماتی كرییە، لێ‌ دەنگۆباس هوسا دهێتە گۆتن هاتنا وی بۆ خولا ئیراقێ‌ دێ‌ بزەحمەت بیت، ژلایەكێ‌ دووڤە دەنگۆباس هاتینە بەلاڤكرن كو كارگێرییا زاخۆ بزاڤێن ب دەستڤە ئینانا ستێرێ‌ سۆری خالد كەردۆخی یاریزانێ‌ یانەیا هەولێر دكەت، د هەمان پێنگاڤ دا هێشتا چو ڕاهێنەر نە هاتینە دەستنیشان كرن لێ‌ گۆتگۆتێن هاتینە بەلاڤكرن، هەروەسان ئۆفەرەك پێشكێشی یاریزانێ‌ هەلبژارتیێ‌ سوریێ‌ عومەر سومە كرییە لێ‌ هێشتا چو بەرسڤ نە داینە.
هێشتا هەولێر بێدەنگە و نەورۆز ژی بەردەوامە
ژ لایەكێ‌ دووڤە هەردو یانەیێن دی یێن كوردستانی د خولا ستێرێن ئیراقێ‌ دا، یانەیا هەولێر ئەوا كارگێرییەكا نوو بەری دو حەفتییان د پرۆسێسا هەلبژارتنان دا دەستنیشان كری، لێ‌ ژبەر هندەك ئاریشەیێن كارگێری و نە بەردەست بوونا كۆژمەیێ‌ گرێبەستان هیچ پێنگاڤەكا فەرمی یا گرێبەستا نە هاڤێژتیە و دبیت د ڤێ‌ حەفتیێ‌ دا دەست پێ‌ بكەن، هەرچەندە كۆمەكا یاریزانێن وێ‌ ژ هاتینە ژ دەستدان، ژلایێ‌ خوەڤە یانەیا نەورۆز ب ووردی و هێدی یا پێنگاڤێن خوە د هاڤێژیت، گرێبەستا ستێرێ‌ خوە مەروان حسێن نووكر، و گرێبەستا یاریزانێ‌ ڕەڤەندا كورد كاردۆ كامیران سەدیق ئیمزاكر.
حەفتییا گرێبەستان بۆ تەلەبە
یانەیا تەلەبە ب سەركێشیا ڕاهێنەرێ‌ خوە یێ‌ نوو و پێشتر یێ‌ یانەیا زاخۆ یێ‌ قەتەری تەلال ئەلبلۆشی گرێبەستا هەر ئێك ژ گۆلپارێزێ‌ خوە فەهەد تالب، یێ‌ ئیكوادۆری داریۆ ڤابیان نووكر، هەروەسان گرێبەست دگەل یێ‌ جەزائیری و مەولۆدیە وەهران كەریك عرێبی و یێ‌ زەورا عەلی كازم و یێ‌ نەجەف موستەفا محەمەد و یێ‌ ئەلغراف عەلی سەعەد بۆ ئێك وەرز ئێمزاكر، ژلایێ‌ خوەڤە پشتی یانەیا جەوییە گرێبەست دگەل یێ‌ عومانی رەشید جابری ئیمزاكر دووڤدا گرێبەست دگەل هێرشبەرێ‌ عومانی سەلاح ئەلیجیانی ئیمزاكر.
ژلایەكێ‌ دووڤە تەلال ئەلبلۆشی ڕاهێنەرێ‌ تەلەبە یێ‌ بزاڤا دكەت هەرچار یاریزانێن یانەیا زاخۆ كو پێشتر ڕاهێنەرێ‌ وان بوویە ڕازیبكەت بۆ یانەیا تەلەبە ئەو ژی هەر ئێك ژ ئەمجەد عتۆان، یوسف ئەلئالۆسی، سیداد حاجی و ئەحمەد ئیبراهیمی.
بۆ زانین پرۆسێسا دانۆستاندن و پەیوەندیكرنا یاریزانان ب یانەیان یا بەردەوامە، هەروەسان چوونا كۆمەكا یاریزانان بۆ یانەیێن دیتر ژی دهێتە كرن، لەوماژی دبیت هێشتا یاریزان هەبن و نە هاتبنە ڕاگەهاندن یان ژی پشتی نڤێسین و بەلاڤكرنا ڤی بابەتی هەبن.

تیما پایسكلڤانێن یانەیا دهۆك ل سەر ئاستێ‌ لاوان ب دەستڤە ئینانا ناسناڤێ‌ ئەڤ سالە یێ‌ ئیراقێ‌ بۆ قووناغا چارێ‌ و دووماهیێ‌ دا پاشئێخست، پشتی دوهی ل رێزا دویێ‌ هاتین ب كێمترییا 34 چركەیان ژ خودانا ڕێزا ئێكێ‌ یانەیا سیناعە، دیسان ل سەر ئاستێ‌ تازەپێگەهشتییان و پشكۆژان ژی ئەنجامێن تاكی یێن باش هەبوون، د هەڤڕكیێن واندا ئەوا ژ چارچووڤەیێ‌ قووناغا سێیێ‌ یا قارەمانییا ئیراقێ‌ ل سەر ڕێیا كۆیە بۆ سماقۆلی هەولێرا پایتەخت هاتییە كرن.
ل سەر ئاستێ‌ لاوان بۆ شێوازێ‌ تیم دژی دەمژمێرێ‌ بۆ بەریكانەیا ب درێژاهییا 45كم یانەیا دهۆك ڕێزا دویێ‌ پاراست پشتی ئێك دەمژمێر، چار خولەك و 42 چركە تۆماركری ئەوا یانەیا سیناعە ئێك دەمژمێر، ئێك خولەك و 55 چركە تۆماركری و ڕێزا ئێكێ‌ هاتی، یانەیا حدبا رێزا سێیێ‌ هات زێدەتری ئێك خولەك.
ل سەر ئاستێ‌ تازەپێگەهشتییان بۆ 40كم كو هەر 10كم زڤڕین هەبیت ڕێزا دویێ‌ هاتن، ل سەر ئاستێ‌ تاك یاریزانێ‌ یانەیا دهۆك عەبدولرەحمان شیڤان ئەكرەم شیا ل سەر ئاستێ‌ تاك ڕێزا ئێكێ‌ بهێت ب ئێك دەمژمێر، 11 خولەك و 27 چركەیان تۆماربكەت ئەوا 21 یاریزانان ژ هەشت یانەیان پشكدار كربوون، هەروەسان هەر ئێك ژ هەڤالێن وی یێن یانەیێ‌ برایێ‌ وی عەلی شیڤان ئەكرەم رێزا 12 هاتـ سەنەر هێرش رەجەب رێزا 13ێ‌ هات، لێ‌ هەردو یاریزانان سیروان سەباح و ژێهات زوهێر بەریكانە تمام نەكر.
ژلایەكێ‌ دووڤە ل سەر ئاستێ‌ پشكۆژان بۆ شێوازێ‌ تیم دژی دەمژمێر یێن ئێكێ‌ هاتن پشتی ب كۆمڤەكرن 40م، یانەیا دهۆك ڕێزا سێیێ‌ هات ب چار دەمژمێر، سێ‌ خولەك و 29 چركە، ئەوا یانەیا حدەبا رێزا ئێكێ‌ هاتی ب سێ‌ دەمژمێر، 38 خولەك و دو چركە و یانەیا حدود كێمترییا حەفت خولەكا رێزا دویێ‌ هات.
لدۆر ڤان ئەنجامان تارق سەعید ڕاهێنەرێ‌ تیما یانەیا دهۆك بۆ رۆژنامەیا ئەڤرۆ گۆت: هەڤڕكیێن ڤێ‌ قووناغێ‌ زێدە دژوار بوون و هەموو یانەیان هەڤڕكی بۆ ڕێزێن پێشیێ‌ دكرن، زێدەباری سەقایێ‌ گەرم كود بیت كارتیكرنا خوە هەبیت، لێ‌ وەكو تیمێن مە ل سەر هەرسێ‌ ئاستان لاوان، تازەپێگەهشتی و پشكۆژان بۆ شێوازێ‌ كت و تیم ئەنجامێن وان دلخوەشكەر بوون، تایبەت یێن لاوان سەرباری ڕێزبەندییا دویێ‌ هاتین لێ‌ ب تنێ‌ 34 چركە دناڤبەرا مە و تیما سیناعە دایە، یێن تازەپێگەهشتی و پشكۆژان ل سەر ئاستێ‌ تاكە یاریزان ئەنجامێن وان ژی گەلەك دباش بوون و گەشبیینە بۆ هەبوونا نڤشەكێ‌ بهێز و بەهرەمەند.
هەروەسان ناڤهاتی گۆت: ب دووماهی هاتنا قووناغا سێیێ‌ و بڕیارە سوبەهی قووناعا چارێ‌ و دووماهیێ‌ ل باژێرێ‌ مە بهێتە كرن، مە هیڤیێن مەزن هەنە كو دێ‌ ناسناڤی ب دەستخوەڤە ئینن، ژبەركو یاریزانێن مە خودان شیانن و ئەو مۆرالا هەیی بشێن دەستكەڤتەكی ب دەستڤە بینن، ئەم دێ‌ هەموو بزاڤان كەین مفایی ژ ئەردێ‌ خوە وەربگرین و بەرانبەر هەڤڕكا مە سیناعە ئەوا چەند پیشەكارێن ئیرانی ئیناینە دناڤ ڕێزێن تیما خوە بۆ دەستڤە ئینانا ناسناڤی، لێ‌ هەموو بزاڤان كەین ناسناڤ ژ دهۆكێ‌ نە دەرگەڤیت.

دهێتە چاڤەڕێ‌ كرن د ڤێ‌ حەفتیی دا ستێرێ‌ ئەرجەنتینی لۆنێل مێسی گرێبەستا خوە دگەل یانەیا ئینتەر مەیامی یا ئەمریكی بۆ سێ‌ وەرزان دگەل هەبوونا بەندەكێ‌ سەیر نوو بكەت.
رۆژنامەیا ماركا یا ئسپانی د ڕاپۆرتەكێ‌ دا بەلاڤكرییە كو ب شێوەیێ‌ دەستپێكی لیۆنێل مێسی و ئینتەر میامی یا ئەمریكایێ‌ گەهشتینە ڕێكەڤتنێ‌ بۆ سێ‌ وەرزان ئانكو هەتا ژیێ‌ وی بگەهیتە 41 سالیێ‌، ل سەرهەموو خالان ڕازیبوون پەیدابوویە بتنێ‌ گەنگەشە ل سەر ئێك بەند مایە ئەو ژی بۆ هەر وەرزەكی مێسی مافێ‌ هەیی گرێبەستا خوە ب دووماهی بینیت دناڤ وان هەرسێ‌ سالێن ئیمزا بوو هاتییە كرن، ئەوژی هەكە ڤیا كاروانێ‌ خوە ب دووماهی بینت، یانەیێ‌ هیچ ماف نینە داخوازا پارەیەكی بكەت، ئەڤ بەندە بۆ جارا ئێكێ‌ یە دهێتە دناڤ خالێن گرێبەستان، بڕیارە دڤێ‌ حەفتیێ‌ دا بابەت ئێكلابیت.