د. عەلی تەتەر، پارێزگارێ دهۆكێ ب مەرەما ژ نێزیك ئاگاهداربوون ل سەر ڕەوشا كارەبێ و چاوانیا بڕێڤەچوونا كاروبارێن وەلاتیان، دوهی 6/4/2026 سەرا ڕێڤەبەریا بەلاڤكرنا كارەبێ دا و ب ئامادەبوونا حازم محەمەد، ڕێڤەبەرێ گشتی یێ كارەبا دهۆكێ ب وەكالەت گۆهداریا گازندەیێن وەلاتیان كر و سەحكرە كاروبارێن تەكنیكی یێن ڕێڤەبەریێ و گۆت: پڕۆژەیێ ڕۆناهی، پڕۆژەكێ حكومی یێ وەزارەتا كارەبێ یە و پێدڤیە كاروبارێن وەلاتیان ب زووترین دەم و بێ گیرۆبوون بهێنە بڕێڤەبرن، دیسا هەموو ئاسانكاری بۆ داخوازیێن وان بهێنە كرن.
پارێزگارێ دهۆكێ ل گەل ڕێڤەبەر و بەرپرسێن پشكێن ڕێڤەبەریێ كۆمبوو و دوپاتی ل سەر باشتركرنا خزمەتكرنا وەلاتیان كر و ڕێڤەبەریێن پەیوەندیدار ڕاسپاردن د خزمەتا وەلاتیان دابن و ئاریشەیێن پەیدا دبن ب شێوەیەكێ زەلال بهێنە دەستنیشانكرن و هەر وەلاتیەكێ وەسا ببینیت، كو بهایێ كارەبێ ب زێدەهی یان شاشی بوو هاتیە، دشێت سەرەدانا ڕێڤەبەریا ناڤبری بكەت و نابیت مافێ‌ چو وەلاتیەكی بهێتە بەرزەكرن.

زاخۆ، دلۆڤان هالۆ:

مووسا ئەحمەد، سەرۆكێ دەزگەهێ خێرخوازی یێ بارزانی دیاركر كو زێدەباری ڤەكرنا سەنتەرێن ئۆتیزمێ ل هەولێر و سۆران و زاخۆ، ل دەمەكێ نێزیك سەنتەرەكێ مەزن یێ ئۆتیزمێ ل پارێزگەها دهۆكێ ژی دێ هێتە ڤەكرن.
سەرۆكێ دەزگەهێ خێرخوازی یێ بارزانی، ئاماژە ب وێ چەندێ ژی كر كو چو كەس وەكو دەیك و بابێن زاڕۆكێن ئۆتیزمێ بهایێ ڤەكرنا ڤان جۆرە سەنتەران نزانیت، چونكی ئەو ب تەمامی هەست ب ئاریشەیێن مامەلەكرنێ ل گەل زاڕۆكێن خوە یێن ئۆتیزمێ دكەن و گۆت: «دەزگەهێ خێرخوازی یێ بارزانی سەنتەرێن ئۆتیزمێ كرینە كۆمەلگەهـ و پەیمانگەهێن پێگەهاندنا كادرێن تایبەت د بیاڤێ ئۆتیزمێ دا، مە 55 ڕاهێنەر پێگەهاندینە، كو ل سۆران خزمەتا زاڕۆكێن ئۆتیزمێ دكەن، دیسا 30 ڕاهێنەر ژی بۆ سەنتەرێ هەژار یێ ئۆتیزمێ ل زاخۆ هاتینە پێگەهاندن، ئەڤ هەموو ڕاهێنەرە دێ ڕۆلەكێ كاریگەر د ڤەكرنا سەنتەرێن دی ژی دا بینن».
گۆت ژی: «ئەم سوپاسیەكا تایبەت ئاراستەی مەسرور بارزانی، سەرۆكێ حكومەتا هەرێما كوردستانێ و هەڤدەم سەرۆكێ بۆردێ دامەزرێنەرێ دەزگەهێ خێرخوازی یێ بارزانی دكەین، كو بۆ هەر كارەكێ مرۆڤایەتی، بەردەوام هاریكار و پشتەڤانێ مە بوویە».

دهۆك، دلۆڤان ئاكرەیی:

رێڤەبەرێ نەفت و كانزایان ل پارێزگەها دهۆكێ دیاركر، ژ بەر كاودانێن ل دەڤەرێ دروست بووین، رێژەیا بەلاڤكرنا پانزینا پشتەڤانیكری ژ لایێ‌ حكومەتا هەرێمێ ڤە، كێم بوویە، بەلێ بڕیار ئەوە، ل ڤێ حەفتیێ كێشەیا كێمیا وێ ل پارێزگەهێ بهێتە چارەسەركرن.
كارزان رەئووف، رێڤەبەرێ نەفت و كانزایان ل پارێزگەها دهۆكێ بۆ رۆژنامەیا ئەڤرۆ گۆت: «بڕیارە د ڤێ‌ حەفتیێ‌ دا ئاریشەیا كێمیا پانزینا 750 دیناری ل سنۆرێ پارێزگەها دهۆكێ و ئیدارەیا سەربخۆ یا زاخۆ بهێتە چارەسەركرن».
گۆت ژی: «رۆژانە 400 هزار لێترێن پانزینێ دێ‌ گەهنە پارێزگەهێ و ل سەر سەنتەرێ پارێزگەهێ و ئیدارەیا سەربخۆ یا زاخۆ و دەڤەرداریان دێ‌ هێتە بەلاڤكرن و دێ‌ كارتێكرن ل سەر ئەرزانبوونا بهایێ پانزینێ‌ هەبیت».

دهۆك، لەزگین جۆقی:

رێڤەبەرێ گشتیێ وەبەرهێنانێ ل پارێزگەها دهۆكێ دیار كر، پڕۆژەیێ‌ دەڤەرا پیشەسازی یا خوارنێ ل كانی سپییێ ل دەڤەرداریا سێمێلێ‌، ل سەر رووبەرێ 142 هزار و 307 دۆنەمێن ئەردی دهێتە بجهئینان و هەمی خزمەتگوزاری د ناڤ دانە.
د. هەڤال سەدیق، رێڤەبەرێ گشتیێ وەبەڕهێنانێ ل پارێزگەها دهۆكێ گۆت: «ئەڤە پڕۆژەیەكێ‌ ستراتیژی یێ‌ ئاسایشا خوارنێ‌ یە، ل پارێزگەها دهۆكێ‌ و د ناڤ پڕۆژەی دا 275 كارگەهـ و 229 عمبار دێ‌ هێنە چێكرن، زێدەباری خزمەتگوزاریێن وەكو: بنگەهێ پۆلیسان و بەرەڤانیا باژێری و بنگەهێ ساخلەمیێ و پەیمانگەها پیشەسازی و مزگەفت و خوارنگەهـ و پێشانگەهێن بەرهەمێن خوارنێ و… هتد».
گۆت ژی: «هەتا نوكە رێژەیا بجهئینانا گشتی پڕۆژەی گەهشتیە 23%، ب دووماهی هاتنا پڕۆژەی، دێ‌ كاریگەری ل سەر دابینكرنا ئاسایشا خوارنێ‌ ل دەڤەرێ‌ هەبیت و بیتە ئەگەرێ‌ گەشەپێدانا ئابووری و دابینكرنا دەلیڤەیێن كاری بۆ وەلاتیان».

رەمەزان زەكەریا:

ب مەرەما پاراستنا بەرهەمێ گەنمی و دەستنیشانكرنا ئاستێ مەترسیا مێشێن زیانبەخش، پشكا پاراستنا رووەكی ل رێڤەبەریا چاندنا ئاكرێ دەست ب پرۆسەیا رامالینا كێزا سنكی كر.
ئەندازیار فازل مستەفا، رێڤەبەرێ چاندنا ئاكرێ بۆ ئەڤرۆ گۆت: «كەمپینا رامالینا سنكی دێ هەموو ناوچەداریێن سەر ب ئاكرێ ڤە ڤەگریت، وەكو: گردەسێن و بجیل و دینارتە، ل دووڤ پلانا هاتیە دانان پرۆسە دێ بۆ دەمێ دو مەهان یا بەردەوام بیت».
ناڤبری گۆت ژی: «مەرەم ژ ڤێ هەوا پشكنین و رامالینێ دەستنیشانكرنا رێژە و چڕیا كێزا سنكییە ل سەر زەڤیێن گەنمی، ئەڤ چەندە دێ هێلێن گشتی بۆ پلانێن داهاتی یێن رەشاندنێ و پاراستنا زەڤیێن جۆتیاران دیار كەت، داكو رێگری ل هەر زیانەكێ بهێتە گرتن كو كار بكەتە سەر كوالیتی و رێژەیا بەرهەمێ ئەڤ سالە».