ب شێوەكێ‌ فەرمی فدراسیۆنا یارییا تیروكڤانیێ‌ یا كێشوەرێ‌ ئاسیا هەرێما كوردستانێ‌ هەلبژارت ژبۆ مێڤانداریكرنا هەڤڕكیێن كۆپا ئاسیا بۆ سالێن 2026 و 2027ێ‌، پشتی ڕازیبوون ل سەر هەموو خالێن وێ‌ هاتیە كرن.
سەعید مەحمود ئەلمەشهەدانی سەرۆكێ‌ فدراسیۆنا یارییا تیروكڤانیێ‌ راگەهاند، بادەكا ئیراقێ‌ ب سەركەفتیانە هاتە وەرگرتن ژلایێ‌ فدراسیۆنا یاریێ‌ پشتی هەڤڕكییەكا دژوار دناڤبەرا مە و شەش وەلاتێن دی دا، مە باژێرێ‌ سلێمانیێ‌ ل هەرێما كوردستانێ‌ دەستنیشان كربوو ژبەر هەبوونا خالێن سەركەفتنێ‌، ب فەرمی ئەم هاتینە ئاگەهداركرن كو بۆ دو قارەمانییا ل دووڤ ئێك یا سالا 2026ێ‌ و سالا 2027ێ‌ كۆپا ئاسیا ل سەر ئاستێن جودا دێ‌ ل ئیراقێ‌ هێتە كرن، ئەڤە ژی دەستكەفتە بۆ وەرزشا ئیراقێ‌ ب گشتی و كوردستانێ‌.
هەروەسان ناڤهاتی گۆت: د دەمێ‌ داهاتی دا دێ‌ كۆمبوونێن بەردەوام هێنە كرن پێخەمەت دانانا پلان و بەرنامەیان ژلایێ‌ دروستكرنا هەلبژارتیێن ئیراقێ‌ و ژلایەكێ‌ دووڤە ب پشتەڤانییا سەرۆك وەزیرێن ئیراقێ‌ و هەڤكاری دگەل حوكمەتا هەرێما كوردستاتێ‌ دێ‌ بزاڤێ‌ كەین ب جوانترین شێوە رێكخستنا قارەمانیێ‌ بهێتە كرن، پێنەڤێت ژبەر ئارامییا هەرێما كوردستانێ‌ وپێشكەفتنا وێ‌ ئەڤ رازیبوونە هاتییە كرن و سۆپاسیا حوكمەتا هەرێمێ‌ دكەین بۆ پشتگێرییا وان.
بۆ زانین ئەو شەش باژێرێن دی یێن هەڤڕكی كرین بۆ دەستڤەئینانا پلێتا مێڤانداریێ‌ هەر ئێك ژ بەكین – وەلاتێ‌ چینێ‌، نیۆدلهێ‌- وەلاتێ‌ هندستانێ‌، ئاستانا- كازاخستان، بالی- ئەندۆنیزیا، فجەیرە- ئیمارات، بانكۆك- تایلەند.

پەروین سەلاح:
تیما باسكێت بۆلا یانەیا دهۆكێ‌ پلێتا دەربازبوونێ‌ بۆ قۆناغا دویێ‌ یا خولا پلا ئێكا ئیراقێ‌ دەربازبوون بۆ پلا نایاب وەرگرت، پشتی شیایی رێزا دویێ‌ بهێت ل سەر ئاستێ‌ كۆما هەولێرێ‌ ئەوا یاریێن وێ‌ ل شەمبییا بۆری ب شێوەیێ‌ كۆمڤەبوون ل هەولێرا پایتەخت ب پشكدارییا یانەیێن سایبس ژ سلێمانیێ‌، یانەیێن ئەكاد و ئەكاد ژ هەولێرێ‌ و یانەیا دهۆك وەكو نوونەرا پارێزگەهێ‌ پشكداربووی و شیایی د سێ‌ یاریێن خوە دا ب سەركەڤیت ل سەر یانەیێن ئاسۆ و ئەكاد و دگەل سایبس خوسارەت بیت، رێزبەندییا دویێ‌ بینت و دەربازبیت قۆناغا دویێ‌.
ل دۆر ڤێ‌ یەكێ‌ میقدا رەعدی ڕاهێنەرێ‌ تیما یانەیا دهۆكێ‌ بۆ رۆژنامەیا ئەڤرۆ گۆت: هەرچەندە ئەو پلانا مە دانایی پشتی خولا پلا دو ب دووماهی بهێت ل دووڤ بەرنامەیێ‌ مە پشتی سالەكێ‌ ژنوو پشكداری پلا ئێك بین لێ‌ ژ نشكەكێ‌ ڤە فدراسیۆنا باسكێت بۆلا ئیراقێ‌ بڕیار دا ڤاڤارتنێن پلا ئێك ژی بهێنە كرن لەوما مە بەردەوامی دا بەرهەڤیێن خوە و شیان د قۆناغا ئێكێ‌ یا كۆمان دا دەربازبینە قۆناغا دویێ‌ كو سەرجەمێ‌ پێنج كۆمان دەهـ یانە دەربازبووینە، سۆپاس بۆ خودێ‌ و پشتەڤانییا كارگێرییا یانەیێ‌ ئەم شیاین دەربازبینە قۆناغا دویێ‌.
ژلایەكێ‌ دووڤە ناڤهاتی ئەوچەندە ژی گۆت: د قۆناغا دویێ‌ دا دێ‌ ئەركێ‌ مە ب زەحمەتر بیت ژبەركو باشترین یانەیێن ئیراقێ‌ یێن پلا ئێك دێ‌ پشكداربن، لێ‌ مە بەرنامەكێ‌ تەسەل هەیە و ب خوون گەرمێن باژێرێ‌ خوە دێ‌ بەردەوامیێ‌ دەینە راهێنانان و یا دشیان دا بیت دێ‌ هەڤڕكیێ‌ كەین و ئەگە دەرباز نەبووین ژی پلانامە یا بەردەوامە و گەشبینم دێ‌ گەهینە ئارمانجا مە دڤێت ئەو ژی ڤەگەڕاندنا باسكێت بۆلا یانەیا دهۆكێ‌ یە د چالاكیێن ئیراقێ‌ دا و دوبارە كوڕێن باژێرێ‌ مە ب یارییا خوە گەشبین بن.

قەیس وەیس:

فدراسیۆنا باسكێت بۆلا ئیراقێ‌ ب فەرمی لیستا داخوازكری یا یاریزانان بۆ ناڤ رێزێن هەلبژارتیێ‌ ئیراقێ‌ بەلاڤكر، ئەوا حەفت یاریزانێن كوردستانی دناڤ دا نە خوە بەرهەڤكرن بۆ ڤاڤارتنێن ئاسیا و مۆندیالا جیهانی و بڕیارە ئەڤرۆ ئێكەم خرڤەبوونا وان ل هۆلا گرتییا شەعب ل پایتەختێ‌ ئیراقێ‌ بەغدا بهێتە كرن.
ل دووڤ ڕاگەهاندنا فدراسیۆنا باسكێت بۆلا ئیراقێ‌ كو ل سەر داخوازییا ڕاهێنەرێ‌ هەلبژارتیێ‌ وان فازلین ماتیچ 19 یاریزان بۆ ناڤ رێزێن هەلبژارتیێ‌ خوە داخوازكرینە و ئەڤرۆ دێ‌ ئێكەم یەكەیا ڕاهێنانێ‌ كەن و بڕیارە رۆژانە دو یەكەیێن ڕاهێنانێ‌ بهێنە كرن خوە بەرهەڤكرن بۆ ڤاڤارتنێن قۆناغا دووماهیێ‌ یا دەربازبوونێ‌ بەر ب كۆپا ئاسیا 2025 و موندیالا جیهانی 2026ێ‌.
ل دووڤ لیستەیا بەلاڤكری حەفت یاریزانێن هاتینە داخوازكرن یێن كوردستانی هەر ئێك ژ، موراد عەلی، محەمەد عەلی و زنار هشیار ژ یانەیا زاخۆ، دیسان فەرید رەعدی ژ یانەیا ئەلكەرخ یا بەغدایی، هەروەسان محەمەد ئەمین عەبدولخالق و میر ناریمان ژ یانەیا غازئەلشیمال، یاریزانێ‌ حەفتێ‌ رێكان عوسمان ڕەڤەندا كورد ل ئۆرۆپا و یانەیا شورتە یا بەغدایی.
دیسان دهێتە پێشبینیكرن هەلبژارتیێ‌ ئیراقێ‌ ل سەر ئاستێ‌ لاوان ژی بهێتە ڕاگەهاندن خوە بەرهەڤكرن بۆ ڤاڤارتنێن ئاسیا و رۆژئاڤا ئاسیا، زێدەتری شەش یاریزانێن كوردستانی ژ وانا یێن یانەیا زاخۆ، دەربەندیخان و ئاسۆ د ناڤ لیستەیا گشتی دا بن.
بۆ زانین هەلبژارتیێ‌ ئیراقێ‌ ل سەر ئاستێ‌ كچان ژی هەموو یاریزانێن وێ‌ وێ‌ ژ ئافرەتێن كوردستانی نە ئەوێن ب سەرپەرشتییا راهێنەر ڕزگار تەوفیق كو ژلایێ‌ خوەڤە بڕیارە ئەو ژی د ماوەیێ‌ بهێت دا بەرهەڤییان بۆ ڤاڤارتنێن كۆپا ئاسیا بكەن.

شاهۆ فەرید:

د داخویانیەكێ دا د.نیهاد ئیبراهیم ئەندامێ فیدراسیۆنا شمشێربازیا ئیراقێ بۆ رۆژنامەیا ئەڤرۆ دیاركر: ئاستێ یاریا شمشێربازیێ ل پارێزگەها دهۆكێ د ئاست و ئەنجامێ باش دایە، سالێن بوری شیاینە رێزبەندییا سێیێ د قارەمانیا كۆپا ئیراقێ ب دەستڤە بینین، دیسان ل سەر ئاستێ كوردستانێ رێزێن ئێكێ‌ و دویێ‌ ل سەر ئاستێن جودا هەبووینە.
زێدەتر ناڤهاتی گۆت: هەر قارماینیەكا ل سەر ئاستێ ئیراقێ مە پشكداری كرییە بێ ڤەقەتیان و پتری چل یاریزانان مە هەنە ئاستێن جودا یێن كچ و كوڕان بناڤێ یانە و نوونەراتیا دهۆكێ پشكداری كریە، ئەڤ یاریە سێ ئاستان بخوەڤە دگریت چەكێ زۆرانبازی، چەكێ شیشك و چەكێ ئەرەبی، هەر یارییەكێ چوار یاریزانان وەكو تیم و تاك هەنە، مە چ یانە نینن تایبەت یاریا شمشێربازیێ ڤە لێ مە كۆمەكا یاریزانان هەیە و دەمێ قارەمانیەك یان خولەك هەبیت ئەم بەلاڤ دكەینە سەر یانەیان هەتا رادەكێ هاریكارن ژبەر رەوشا دارایی گڤاشتنێ لسەر ناكەین، بناڤێ هەموو یانەیێن ناڤخوەیی دهۆكی ل گەل یانەیا زاخۆ مە پشكداریی هەنە دووماهیك پشكداریا مە بناڤێ پیرس بوویە.
د. نیهاد ئیبراهیمی گۆت: ل25 چریا ئێكا بوری كۆمبوونەك ل باژێریێ سلێمانیێ هاتبوو ئەنجامدا و چەندین بڕیارێن گرنگ هاتنەدان كو دا قارەمانیەكا ئەرەبی هێتە ئەنجامدان لێ ژبەر رەوشا نوكە یا ئیراقێ هاتە پاشئێخستن، هەروەسان هەلبژارتن بۆ پۆستێن جودا هاتنە دانان وەكو ئەندامێ لیژنەیا بازارگەریێ هاتمە دەستنیشانكرن، د كۆمبوونێ دا من پێشنیاركربوو ب ڤەكرنا ئەكادیمەكا شمشێربازیێ ل دهۆكێ ب چاڤدێرییا فدراسیۆنا ئیراقێ و سەرپەرشتیا وێ‌ بكەم، دێ ڕێكا ئەكادیمی شێن پشكداریێ دهەموو ئاستێن ناڤخوەیی و نێڤدەولەتی كەین لێ بیتنێ ئەم پێدڤی جهی نە بۆ ڤەكرنا ئەكادیمیێ، فدراسیۆنا ئیراقێ دێ هەموو پێدڤییان پەیدا كەت، چەندین خول و قارەمانی مە ل دهۆكێ رێكخستینە و كەمپێ راهێنانان بۆ هەلبژارتیێ ئیراقێ ئەنجامداینە، چەندین خول و قارەمانیێن دی دهۆكێ دێ هێنە ئەنجامدان و چەند راهێنەران ژیی بۆ ڤێ یاریی فرێكەینە خولا.

ستێرێ‌ فرەنسی و یانەیا ریال مەدرید یا ئسپانی كەیفخوەشیا خوە دیاركر ب سەركەفتنەكا تیما وان بەرانبەر ڤالادولید ژ چارچووڤەیێ‌ گەڕا 21ێ‌ یا خولا ئسپانیا ئەوا بۆ جارا ئێكێ‌ شیایی هاتریك سێ‌ گۆلان بێ‌ بەرانبەر سەركەفتنێ‌ بۆ تیما خوە بینت.
مباپی بۆ رۆژنامەیا ئاس یا ئسپانی گۆت: هەرچەندە ل دەستپێكا یاریێ‌ ئەم كەڤتبووینە لبن گڤاشتنان بەرانبەر تیمەكێ‌ یا بزاڤێ‌ دكەت خوە ژ رێزا دووماهیێ‌ قورتالبكەت، لێ‌ هەموو یاریزانان ئێك ئارمانج هەبوو ئەوژی تۆماركرنا گۆلان كو یارییەكا ب كۆم دهاتە كرن و باوەری دامە ئەم ب گەهینە سێ‌ خالان، د دەسپێكا خولێ‌ دا هەتا بەری چەند یارییان پێدڤی ب دەمی هەبووم، د نوكە دا باشترین شێوە بەرهەڤم هاتریك ب تنێ‌ دەستپێكە بۆ بەردەوامییا سەركەفتنان و ڕێكخوەشكەرە بۆ هەڤڕكیێ‌ ل سەر لیستا خولێ‌.
بۆ زانین كلیان مپابی ب15 گۆلان جهێ‌ خوە ل رێزا دویێ‌ پاراست ئەوا هێرشبەرێ‌ بەرشەلۆنا رۆبێرت لیڤاندۆڤێسكی ب 16 گۆلان سەرێ‌ لیستێ‌ دهێت، هەڤالێ‌ وی یێ‌ بەرازیلی ڕاڤینا ب11 گۆلان ڕێزا سێیێ‌ دهێت.

ل دووڤ ڕاپۆرتێن رۆژنامەڤانی ستێرێ‌ ئەرجەنتینی و یانەیا ئینتەر میامی یا ئەمریكی لیۆنێل مێسی سنۆرەك بۆ مانا خوە ل ڤێ‌ یانەیێ‌ دانایە و دوور نابینت ل یانەیا خوە یا پێشتر بەرشەلۆنا كاروانێ‌ خوە ب دووماهی بینت ئەوا بڕیارە گرێبەستا وی دگەل یانەیا ئەمریكی ل كانوونا ئێكێ‌ یا ئەڤ سالە ب دووماهی بهێت.
رۆژنامەیا میرۆر یا ب چاپا ئەمریكی دیار كر، مێسی پلان بۆ بەردەوامییا خوە دگەل یانەیا ئینتەر میامی نە دانایە و هزرا وی دگەل بەرشەلۆنایە و ئەڤچەندە ل سەر زاری گۆتارا ڕۆژنامەڤانا بەرنیاس یا ئەرجەنتینی یانینا لاتۆری گۆتییە، مێسی حەز دكەت ڤەگەڕیتە بەرشەلۆنا پشتی گرێبەستا وی دگەل میامی ب دووماهی دهێت، ل یانەیا ئسپانی هزرا ب دووماهی ئینانا كاروانێ‌ خوە كرییە.
بۆ زانین مێسی دگەل ئینتەر میامی 39 یاری ئەنجامداینە، بوویە ئەگەرێ‌ تۆماركرنا 52 گۆلان ژ وانا 34 تۆماركرینە و 18 گۆل بۆ هەڤالێن خوە بەرهەڤكرینە.