مێهڤان چێی
ل ڤی وەلاتی ل هەرچار وەرزان هەر پاپپزە، پاییزەكا دژوار بەردەوام بەلگێ ژ دارا دوەرینیت، هند زەر دبن، هند ژی هێشتا دكەسك و بەری تەمەنێ خوە تمام بكەن یێ دكەڤن ل ئەردی درزن، دبنە تۆز، لبەر بابەلیسكا بلند دبن و وندا دبن، ل ئاسمانی عەورێن رەش یێن خوە داینە ئێك دگەل دەنگێ بریسییا بەركێن شاریایی وەكی بارانێ و ب لەزەكا زۆر ژۆردا دكەڤن.
د ڤی وەلاتی دا یا گونجایی نینە بۆ زارۆكەكێ تەمەن هەشت سالی ب رۆژا و ب مەها ژ خێزانا خوە ڤەدەر ببیت، بەلێ زۆر جاران كاودان خودانێن بریارێنە و مرۆڤ نەچاردبیت ملكەچ ببیت داكو ژ یاسایێن سروشتی نەدەركەڤیت.
ئەڤرۆ، سپێدەهیا سیێ یە ل دویری خێزانێ ل وی دهەلێت و ئەو ب جەستەیەكێ زاخ تێدا نەمایی ژ ڤێ كۆلانێ بۆ یا دی دچیت؛ ب هیڤیا هندێ بشێت دانەكێ دی یێ خوارنێ بۆ خویشك و برایێن خوە پەیدا بكەت، وی گەلەك كۆلان دانە سەر پێ، چەندین خرابەیێن چۆلكری پشكنینكرن، حەتا سەلكێن بەرمایكان ژی سەروبن دكرن بێی كو تشتەك ب دەست وی بكەڤیت، وی باش دزانی ل شەڤێن تاری یێن وەلاتێ وی سەیێن هار د جەنازەیان دهەلنگڤن و هەر تشتەكێ دكەڤیتە سەر رێكا وان دخون.
بۆ چەندەكێ ل سەر پارچە دیوارەكێ كەفتی ل نێزیك جادێ روینشت، ل دویراتیا وەلاتێن رۆژهەلاتێ دنێری، دیت تیرۆژكێن رۆژێ عەور یێن كەلاشتی و ب دلۆڤانی یێ ب بهارا كەسك یا عەردی دكەڤن، ل لایێ سلال و ل خوارێ ژی رەوش هەر ئەو بوو، بەلێ ل هنداڤ وی عەورێن تاری هیڤی دكوشتن، دەنگێ بریسییا گوه دسمتن. دەمێ دناڤ ڤان خەیالا دا، دەنگێ ترومبێلەكێ ل ئالیێ راستێ بهیست، ل پشت وێ تۆزەكا زەر بلند ببوو، دەمێ گەهشتیە راستا وی، شوفێری عەلاگەیەك د جاما ڤەكری را هاڤێتە بەر وی و بلەز ژێ بۆری، دەملدەست وی خوە د دیواری دا هاڤێتە خارێ و بەرەف عەلاگەی كرە غار، چەند میترەكان ل دویری وی دگەل دەنگێ گورمێنەكا ب سەهم ترومبێل د ئاگر و و دویكێلا وەربوو و وەكی بارانێ پارچێن ئاسنی یێن شاریایی ل دەوروبەرا كەفتن، وی عەلاگە هەلگرت و ب لەزەكا خەیالی غاردا و هەول ددا ژ وی جهی دویر بكەڤیت.
رۆژ ل نیڤەكا ئاسمانی بوو، ب ئاڤرویێن كوژەك هەر تشتەك دكوزراند، هەناسەیا وی تەنگ ببوو، جەستەیێ وی ژ خوهێ تەر ببوو، ب وێ هێزا كێم یا دگەهێن وی دا مای، چەند كۆلان ل پشت خوە هێلان و ژ چەند خرابەیان بۆری.
گەهشتە بەرامبەر وی خرابەیێ خێزانا وی دبنڤە خۆە ڤەشارتی، هەر دەمێ خوە گەهاندیە ژۆرڤە، هەر زویكا دایكا وی یا نەخوەش ئەو دەرباز كرە قولاچكێ ل سلال، عەلاگەیێ وی ڤەكر و دانا بەر زارۆكان، ئەو یێ زۆرێ ماندی بوو.. نەهاتە سەر سفرێ و حەزدكر چەندەكێ بێهنا خوە ڤەدەت، ب شانازی ل خویشك و برایێن خوە دنێری دەمێ ددیت ئەو چەند ژ دل یێ خوارنێ دخون، بەلێ خەمگینەك د دێمێ وی دا بوو؛ ژبەر كو وی دزانی ئەو دوماهیك دانێ خارنێیە ئەو بۆ وان دئینیت و دێ وان هێلیت ب هیڤیا كۆلانانڤە.
پشتی چەند جارەكا گازی وی كری دا بهێت ئەوژی تشتەكی بخوت و وی بەرسڤ نەدای، ئێدی دایكا وی خوارن هێلاو بەرەف وی چوو، چاڤێن وی د نیڤ ڤەكری بوون و هێشتا ئەو گڕنژینا ماندی لسەر دێمێ وی بوو.. دەمێ دایكا وی جەستەیێ وی یێ سار وەرگێڕای كونەكا بچویك ل ئالیێ سلال یێ تەنشتا وی یا چەپێ بوو ل بن جەستەیێ وی جۆكەكا خوینێ ژبەر چوبوو.
نيشاندان