سەرۆك مەسعود بارزانی، سەرەخۆشیێن خۆ ئاراستەی بابێ شەهید (وەیسی ئاخر سەعید شێروانی) كر، یێ كو د هێرشەكا مووشەكی یا ئیرانێ دا گیانێ خۆ ژ دەست دای.
بارەگەهێ بارزانی د بەیاننامەیەكێ دا ئاماژە ب وێ چەندێ كر، سەرۆك بارزانی ب ڕێكا پەیوەندیەكا تەلەفۆنی، سەرەخۆشی و هەڤسۆزۆیا خۆ گەهاندە بابێ پێشمەرگەیێ قەهرەمان، شەهید (وەیسی ئاخر سەعید شێروانی) و بنەمال و كەسوكارێن وی.
شەهید وەیسی ئاخر سەعید شێروانی، ئێك بوو ژ بریندارێن هێرشا مووشەكی یا ئیرانێ بۆ سەر بارەگەهەكێ پێشمەرگەی ل دەڤەرا سۆران، كو ل رۆژا سێشەمبییا بۆری ل نەخۆشخانێ ژبەر دژوارییا برینێن وی گیانێ خۆ سپارد و گەهشتە كاروانێ نەمرێن شەهیدێن كوردستانێ.

نێچیرڤان بارزانی سەرۆكێ هەرێما كوردستانێ، پشكداری د بەهییا شەهیدێن رۆژا سێشەمبییا بۆری یێن گوندێ زەرگەزەوی یێ سەر ب پارێزگەها هەولێرێ ڤە كر.
ل رۆژا چارشەمبی 8/4/2026، نێچیرڤان بارزانی، سەرۆكێ هەرێما كوردستانێ پشكداری د بەهییا شەهید مووسا و هەڤژینا وی دا ل گوندێ زەرگەزەوی یێ سەر ب پارێزگەها هەولێرێ ڤە كر.

پشتی ڕاگەهاندنا ئاگربەستێ د ناڤبەرا وەلاتێن ئەمریكا و ئیرانێ دا ب ناڤبژێكرنا دەولەتا پاكستانێ، سەركردایەتییا سیاسی یا هەرێما كوردستانێ ب گەشبینی ڤە پێشوازی ل ڤێ پێشوەچوونێ كر و ب پێنگاڤەكا گرنگ بۆ ئارامییا دەڤەرێ ناڤ بر.
سەرۆك بارزانی: ئاشتی هەردەم باشترە ژ شەڕی
سەرۆك مەسعود بارزانی د پەیامەكێ دا ل سەر تۆڕا جڤاكییا «ئێكس» خۆشحالییا خۆ بۆ ڤێ رێككەفتنێ دەربڕی و راگەهاند: «هەردەم ئاشتی باشترە ژ شەڕی.» سەرۆك بارزانی هیڤی خواست كو ئەڤ ئاگربەستە ببیتە دەستپێكەك بۆ ئاشتییەكا بەردەوام و ب دوماهی هاتنا هەموو وان كێشەیێن كو ئاسایش و بەختەوەریا دەڤەرێ ئێخستینە د مەترسیێ دا.
نێچیرڤان بارزانی: پێننگاڤەكا گرنگە بەرەڤ دیالۆگێ
ژ ئالیێ خۆ ڤە، نێچیرڤان بارزانی، سەرۆكێ هەرێما كوردستانێ، ئاماژە ب وێ چەندێ كر كو ئەڤ ئاگربەستە دێ بیتە ئەگەرێ ئارامكرنا گرژییان و پاراستنا خەلكێ سڤیل. سەرۆكێ هەرێمێ سوپاسییا هەموو وان ئالییان كر یێن كو رۆل هەبوو د دەستڤەئینانا ڤێ ئاگربەستێ دا، و داخواز ژ هەموو ئالیان كر ب نیەتەكا پاك پێگیریێ ب ڤێ سۆزێ بكەن دا كو ئاشتی و ئارامی ل تەڤایا دەڤەرێ بچەسپێت.
مەسرور بارزانی: دڤێت هێرشێن ل سەر هەرێمێ ب دووماهی بهێن
هەروەسا مەسرور بارزانی، سەرۆكێ حوكمەتا هەرێما كوردستانێ، هیڤیخواست كو ئەڤ پێنگاڤە ببیتە رێخۆشكەر بۆ ئاشتیەكا بەردەوام. سەرۆكێ حوكمەتێ د پەیاما خۆ دا دوپاتی ل سەر وێ چەندێ كر كو هێرشێن ل سەر كوردستانێ بێ بەهانە بوون و گۆت: «هیڤیخوازم هەموو هێرشێن ل سەر خەلكێ سڤیل، پێشمەرگەی، ژێرخان و نوونەراتیێن دیپلۆماسی ب دوماهی بهێن.» هەروەسا بەرهەڤییا هەرێما كوردستانێ نیشان دا بۆ پشتەڤانیكرنا هەر بزاڤەكێ كو ببیتە ئەگەرێ كێمكرنا ئالۆزییان.
ئەڤ ئاگربەستە كو بۆ دەمێ دوو هەفتەیان هاتیە ڕاگەهاندن، وەك دەلیڤەیەكا زێڕین دهێتە دیتن بۆ ڤەگەڕیانێ بەرەو دیالۆگێ، و خەلكێ دەڤەرێ ب گشتی و كوردستانێ ب تایبەتی، ب گەشبینی ڤە چاڤەرێی ئەنجامێن وێ یێن ئەرێنی دكەن.

سەرۆكێ حوكمەتا هەرێما كوردستانێ، ب توندی هێرشا ل سەر ئاڤاهیێ قونسلخانەیا گشتی یا كوەیتێ ل باژێڕێ بەسرە پرۆتەستۆ كر، و ئەڤ كارە وەك بنپێكرنەكا مەترسیدار یا یاسایێن نێڤدەولەتی وەسف كر.
مەسرور بارزانی، سەرۆكێ حوكمەتا هەرێما كوردستانێ د تورا جڤاكییا (ئێكس) دا پەیامەك بەلاڤ كریە و تێدا نڤیسیە: ب توندترین شێوە هێرشا ل سەر قونسلخانەیا كوەیتێ ل بەسرە پرۆتەستۆ دكەم، ئەڤ كارێن تێكدەرانە بنپێكرنا رۆهن یا یاسایێن نێڤدەولەتی و پەیماننامەیێن دیپلۆماسی نە.
مەسرور بارزانی داخواز ژی ژ حوكمەتا فیدرال كر، لێپرسینێ ل گەل ئەنجامدەرێن هێرشێ بكەت و رێكارێن جدی و كریاری بۆ دانانا سنۆرەكی و دووماهی ئینان ب هێرشێن ل سەر نێردەیێن دیپلۆماسی ل هەرێما كوردستانێ و ئیراقێ بگریتە بەر.

فەرمانگەها پەیوەندیێن دەرڤە یا حوكمەتا هەرێما كوردستانێ، ب فەرمی نەڕەزایەتی و دلگرانییا خۆ گەهاندە قونسلخانەیا گشتییا كۆمارا ئیسلامییا ئیرانێ ل هەولێرێ.
ل رۆژا سێشەمبی، 7/4/ 2026، فەرمانگەها پەیوەندیێن دەرڤە یا هەرێما كوردستانێ راگەهاند، نامەیەكا فەرمییا نەڕەزایەتی و دلگرانیێ رادەستی قونسلخانەیا گشتییا كۆمارا ئیسلامییا ئیرانێ ل هەولێرێ كریە.
ئەڤ هەلوەستێ فەرمانگەها پەیوەندییان پشتی وێ چەندێ دهێت كو قونسلێ گشتیێ كۆمارا ئیسلامییا ئیرانێ ل سلێمانیێ، زنجیرەیەكا ئاخفتن و گەفان ئاراستەی خەلك و قەوارەیێ دەستووری و سیاسیێ هەرێما كوردستانێ كریە.
د ناما نەرازیبوونێ دا، حوكمەتا هەرێما كوردستانێ دلگرانییا خۆ یا كوور بەرامبەر وی جۆرێ زمانێ ئاخفتنێ دیار كریە و ئاماژە ب وێ چەندێ كریە كو ئەو جۆرە گەفە خزمەتا پەیوەندیێن دێپلوماسی و بنەمایێن هەڤسویەتیێ ناكەن.