دیدار: قەیس وەیس
بڕێارە ئەڤرۆ چار یاریێن مایی ژ هەڤڕكیێن گەڕا 15ێ یا خولا ستێرێن ئیراقێ یا فوتبۆلێ ب هێنە ئەنجامدان، هەردو یانەیێن دەڤەرا بەهدینان دهۆك و زاخۆ دێ ژ دەرڤەیی یاریگەهێن خوە بنە مێڤانێن یانەیێن نەفتا میسان و بەسرا.
بزاڤێن سەركەفتنا هەشتێ یە
چاڤەڕێ دهێتە كرن ئەڤرۆ ل دەمژمێر 2:30 پشتی نیڤرۆ تیما یانەیا دهۆك ژ دەرڤەیی یاریگەها خوە و دووری پشتەڤانێن خوە ببیتە مێڤانا یانەیا نەفت میسان د یارییەكا ب هێز دا بۆ هەردو یانەیان، ئەوێن ل رێزێن پێشیێ د لیستا خولێ دا، ئەلهۆیێن چیا رێزا پێنجێ دهێت ب كۆمكرنا 24 خالان ژ ڤەڕێژا حەفت سەركەفتن، سێ وەكهەڤییانە، لێ چار خوسارەتی هەنە، ئەنجامێن وێ یێن باش وەكرییە بۆ ڤێ یاریێ هزرا سەركەفتنا هەشتێ بیت تایبەت د یارییا بۆری دا شیابوو ئێك ژ بهێزترین یانەیێن ئیراقێ جەوییە ب گۆلەكێ خوسارەت كەت، د بەرانبەر دا یانەیا نەفت میسان ئێك ژ تیمێن باشە و هەڤڕكە ئەوا 22 خال كۆمكرین رێزا هەشتێ دهێت، ئەڤ یارییە دێ شەڕێ ب دەستڤەئینانا رێزێن باش و خوەشكرنا جهێ خوە بیت.
بۆ زانین حەفت یاریزانان پشكداری د تۆمار كرنا 18گۆلان دا هەیە بۆ یانەیا دهۆكێ و بڤی ڕەنگی، پاشەنگ عەبدوللا شەش گۆل، پیتەر گۆرگیس چار گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
زاخۆ داخوازكرییە بۆ قەرەبوویا خالان
ژلایێ خوە ڤە تیما یانەیا زاخۆ پشتی دەلیڤەیا سەرێ لیستێ ژ دەستدا و خوسارەتیەكا نە چاڤەڕێ كری یا حەفتییا بۆری دگەل مێڤانا خوە یانەیا كارەبا ب گۆلەكێ بێ بەرانبەر، دێ بزاڤێ بكەت بۆ یارییا ئەڤرۆ قەرەبوویا خالان بكەت دەمێ دبیتە مێڤانا یانەیا نەفت :ئەلبەسرا ئەوا دێ ل دەمژمێر 7:30 ل یاریگەها فەیحا ل باژێرێ بەسرا هێتە كرن، كوڕێن خابووری ژی دوورێ جەماوەرێ خوە نە لێ دێ پشتگەرمیێ ب مۆرال و شیانێن خوە كەن بۆ سەركەفتنێ و مزگینیێ بگەهینە جەماوەرێ خوە، تیما زاخۆ ب كۆمكرنا 25 خالان ل رێزا چارێ دهێت ب حەفت سەركەفتن، چار وەكهەڤیان و سێ خوسارەتی هەنە، ژلایێ خوەڤە یانەیا نەفت ئەلبەسرا 14 خال كۆمكرینە رێزا 17ێ دهێت لێ ئەنجامێن وێ یێن ڤێ دووماهیێ ژبلی بەرانبەر مینا شیایە سەركەفتنان بینت و ڤەگەڕیایە تایبەت دناڤ ئەردی خوە دا دگەل نەورۆز ب دو گۆلان سەركەفت بوو، لەوما ژی دڤێت یاریزانێن زاخۆ د هوژداربن و سڤكاتیێ ب وێ تیمێ نەكەن.
حەفت یاریزانان پشكداری د گۆلێن زاخۆ دا كرینە
هەردو ستێرێن یانەیا زاخۆ یێ بەرازیلی گۆستاڤۆ هێنریك و یاریزانێ هەلبژارتیێ ئیراقێ ئەمجەد عتوان سەرێ لیستا گۆلكەرێن تیما خوە دهێن ب تۆماركرنا حەفت گۆلان، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
ژلایەكێ دیڤە تیما یانەیا نەورۆز ژی دێ ژ دەرڤەیی یاریگەها ل پایتەختێ ئیراقێ بەغدا بیتە مێڤانا یانەیا نەفت ئەوا دێ ل دەمژمێر 2:30 پشتی نیڤرۆ ل یاریگەها كەرخ هێتە كرن، یانەیا كوردستانی ل رێزبەندیەكا باش دا نینە ئەوا 17 خال كۆمكرین ژ پێنج سەركەفتن و دو وەكهەڤییان رێزا 15ێ دهێت، لێ مێڤاندارا وێ نەفت بەرۆڤاژی رێزبەندیەكا باشە و چاڤ ل پێشڤەچوونێ دكەت ئەوا 23 خال كۆمكرین ل رێزا حەفتێ دهێت، نەورۆز دێ بزاڤێ كەت خوە ژ رێزێن مەترسی یێن داكەفتنێ پارێزیت و نەفت چاڤ ل رێزێن چارێ و پێنحێ بیت ئەوێن جهێ دهۆك و زاخۆ.
ژ یاریێن دی یێن ئەڤرۆ تەلەبە خودانا 24 خالان یا رێزا شەشێ دێ كارەبا مێڤانكەت ئەوا 18 خال هەین رێزا 13ێ دهێت.
بۆ زانین هەتا نوكە د خولا ستێرێن ئیراقێ دا شەش ڕاهێنەران دەست ژ كار كێشاینە ئەوژی، ئەحمەد سەلاح ژ شورتە، سادق حەنون ژ دیالا، حەیدەر عەبدولئەمیر ژ حدود، جۆرڤان ڤیێرا ژ نەورۆز، هەیسەم شەعبان ژ كەرخێ، ویسام رزق ژ جەوییە.
نيشاندان