هەولێر، قائید میرۆ:

رێڤەبەرێ سامانێن ئاژەلی ل وەزارەتا چاندنێ خویاكر، هشكەسالیێ‌ كاریگەریێن زۆر ل سەر كەرتێ تەرش و كەوالی نەكریە و دبێژیت: بهایێ گۆشتی هەر یێ بلندە، لەو هشكەسالیێ كاریگەریێن وەسا نەبووینە.
فیراس سەدیق، رێڤەبەرێ سامانێن ئاژەلی بۆ رۆژناما ئەڤرۆ دیاركر، هشكەسالیێ كاریگەری ل سەر كەرتێ تەرش و كەوالی پەیداكریە، بەلێ زێدەتر ل گوندان، چونكی ئەو تەرش و كەوالێ‌ ل پڕۆژەیان، ئالیكێ ئامادەكاری ب كار دئینن، ب تنێ جۆتیارێن گوندان پێدڤی ب ئالیكا سرۆشتی نە، ئەڤ سالە ژی باران كێم بارینە و ئالیك و چەروان یێ كێمە، لەوڕا جۆتیار نەچارن عەلەفێ‌ بەرهەڤ بكڕن و گۆت: «ب دیتنا مە ب تنێ 10%ێ هشكەسالیێ كاریگەری ل سەر كەرتێ تەرش و كەوالی كریە».
فیراس سەدیق گۆتژی: «ژ بەركو بهایێ‌ گوشتی و شیری ئەڤ سالە یێ‌ بلندبوو، لەو هشكەسالیێ‌ گەلەك كارتێكرن ل سەر كەرتێ‌ تەرش و كەوالی نەكریە، راستە هشكەسالیە، بەلێ بهایێ گوشتی و بەرهەمێن شیری یێ بلندە و خواستەكا زۆر ل سەر بەرهەمێ ناڤخۆ هەیە، ئەڤە ژی بۆیە ئەگەر بهایێ تەرش و كەوالی وەكی خۆ بمینیت و دانەكەڤیت، بەروڤاژی ئەگەر بهایێ گوشتی ئەرزان ببا ل گەل هشكەسالیێ دابیتە كارەسات بۆ كەرتێ تەرش و كەوالی».

زاخۆ، دلۆڤان هالۆ:

ڤیان دەخیل، ئەنداما پەرلەمانێ ئیراقێ دیاركر كو مەسرور بارزانی، سەرۆكێ حكومەتا هەرێما كوردستانێ دەربارەی وێ مالباتا ئێزدی یا ل كەمپا باجدكەندالا ل ئیدارا سەربخوە یا زاخۆ، كو چار كەس تووشی نەخوەشییا پەنجەشێرێ بووین، مەزاختیێن دەرمان و هنارتنا وان بۆ دەرڤەی وەلاتی ب ستوویێ خوەڤە گرت.
ئەنداما پەرلەمانێ ئیراقێ، ئاماژە ب وێ چەندێ ژی كر كو تیمەكا تایبەت بۆ چاڤدێریكرنا ڕەوشا وان دێ هێتە هنارتن و گۆت: «جارەكا دی هیڤی و ئۆمێدێن ڤێ خێزانی ژ بۆ ژیانێ دێ ڤەگەڕن».

ئامێدیێ، مەحمود نهێلی:

ژ بۆ پتر گرنگیدان ب كەرتێ گەشتوگوزاری و پڕۆژەیێن گرێدای ب ژیانا وەلاتیان و جوانكرنا سیمایێ باژێری ڤە، دەست ب چێكرنا پاركەكا گشتی ل سەنتەرێ ناوچەدارییا دێرەلۆكێ‌ هاتە كرن.
ئەندازیار عەبدولمەناف رەشید، سەرۆكێ باژێرڤانیا دێرەلۆكێ‌ بۆ رۆژناما ئەڤرۆ دیار كر، ئەڤ پاركە ل سەر رووبەرێ 10 هزار مەترێن دوجار دێ‌ هێتە چێكرن و گوژمێ 310 ملیۆن دیناران ژ بۆ ئەنجامدانا ڤی پڕۆژەی ل گەل پڕۆژەیێ چێكرنا چەند جادەیەكان هاتینە تەرخانكرن.
ناڤهاتی گۆت: «ب چێكرنا ڤی پڕۆژەی دێ سیما و روویەكێ جوان و یێ گەشتیاری دەتە باژێرێ دێرەلۆكێ و بیتە جهێ‌ بێهنڤەدانێ‌ بۆ وەلاتیان».

رێڤەبەرێ كاروبارێن شوونواران ل هەرێما كوردستانێ دیاركر كو د ماوێ دو سالێن بۆری دا، نێزیكی 160 كەیسێن گرێدای ب دزینا شوونواران ڤە بۆ دادگەهان هاتینە هنارتن، ژ وان ژی 40 كەیس هاتینە ئێكلاكرن و سزایێن گران ل سەر خودانێن وان هاتینە سەپاندن.
محەمەد لەشكری، رێڤەبەرێ كاروبارێن شوونواران ل هەرێما كوردستانێ بۆ رۆژنامەیا ئەڤرۆ گۆت: «د سالا بۆری دا مە نێزیكی 95 كەیسێن دزینا شوونواران ل دادگەهان هەبوون، 40 ژ وان هاتینە ئێكلاكرن و یێن دی هێشتا ل دادگەهانە، دیسا ئەڤ سالە ژی نێزیكی 65 كەیسێن نوو هەنە و هەركەسێ گومان ل سەر هەبیت، پشتی ڤەكۆلینێ ئەگەر تاوانبار بیت، دێ هێتە هنارتن بۆ دادگەهێ و هێتە سزا دان، هەركەسێ دەستكاریا جهێن شوونواری بكەت یان دزیێ ژێ بكەت، دێ هێتە گرتن و روو ب روویێ دادگەهێ هێتە كرن».
لەشكری گۆتژی: «نێزیكی شەش هزار و 500 جهێن شوونواری ل هەرێما كوردستانێ هەنە، لەو كۆنترۆلكرنا وان هەمی جهان كارەكێ ب زەحمەتە».

رەمەزان زەكەریا:

پشتی كاركرن ل پڕۆژەیێ جۆتسایدێ بەردەڕەشێ بۆ كەلەكێ هاتیە راوەستاندن، بڕیارە د دەمەكێ‌ نێزیك دا، دوبارە دەست ب كاركرن و تەمامكرنا پڕۆژەی بهێتە كرنەڤە.
دو رۆژە كاركرن ل رێكا د ناڤبەرا بەردەڕەشێ بۆ كەلەكێ ب رەنگەكێ دەمكی راوەستیایە، بەلێ هەر دەمێ سۆلفە بۆ كۆمپانیا بجهئینەر هاتە مەزاختن، دێ جارەكا دی دەست ب تەمامكرنا پڕۆژەی هێتە كرن ڤە، بڕیارە د دەمەكێ نێزیك دا سولفە بهێتە مەزاختن و پڕۆژە بهێتە تەمامكرن.

دهۆك، لەزگین جۆقی:

رێڤەبەرێ باژێرڤانیا زاویتە راگەهاند، هەوا راكرنا هەمی زێدەگاڤیێن سەر دارستانا زاویتە دەستپێكریە و دبێژیت: ئەڤ هەوە بۆ پاراستنا دارستانا زاویتە دێ یا بەردەوام بیت.
نەوزاد عەبدوللا، رێڤەبەرێ باژێرڤانیا ناوچەداریا زاویتە بۆ ئەڤرۆ گۆت: «دەست ب راكرنا هەمی زێدەگاڤیێن سەر دارستانا زاویتەی هاتە كرن، هەمی جهێن بێ دەستووری و رازیبوون هاتینە چێكرن دێ هێنە خرابكرن، هندەك كەسان دار چاندینە هەمی دێ هێنە راكرن و هندەك جهێن دارستانا زاویتە هاتینە پەرژانكرن هەمی دێ هێنە راكرن و نابیت دارستانا زاویتەی بهێتە تێكدان».
گۆتژی: «باشترە پرۆژەك بۆ پەرژانكرنا دارستانا زاویتەی هەبیت، ژ بەركو جهەكێ گشتیێ گەشتیارییە، ئەڤ هەوا راكرنا زێدەگاڤیێن سەر دارستانا زاویتەی دێ یا بەردەوام بیت».