دهوك، لەزگین جۆقی:

رێڤەبەرێ چاڤدێریا بازرگانی ل پارێزگەها دهۆكێ راگەهاند، نابیت بهایێ نانی بهێتە گرانكرن و دڤێت هەر ل دووڤ بهایێ بەری نوكە بهێتە فرۆتن.
نەشوان تەعمل، رێڤەبەرێ چاڤدێریا بازرگانی ل پارێزگەها دهۆكێ گۆت: «سەرەدان و دووڤچوونا چەندین نانپێژی و سەمۆنخانان ل سەنتەرێ دهۆكێ هاتیە كرن، ئەم رێكێ‌ نادەین، بهایێ سەمۆن و نانی بهێتە گرانكرن و دڤێت هەر ل دووڤ بهایێ بەری نوكە بهێنە فرۆتن».
گۆت ژی: «داخوازێ‌ ژ خودانێن نانپێژی و سەمۆنخانەیان دكەین، ل گەل خەلكی د هاریكاربن، هەتا ئەڤ رەوشە چارەسەر دبیت».

هەولێر، قائید میرۆ:

رێڤەبەرێ ئاڤا بن ئەردی ل هەرێما كوردستانێ خویاكر، ژبەر هاتنا رێژەیەكا زۆر یا بەفر و بارانێ پێشبینی دكەین، ئەڤ سالە ئاڤا بن ئەردی بگەهیتە ئاستەكێ بلند و دبێژیت: ل هندەك دەڤەرێن چیایی هەتا دوماهیا وەرزێ بارانبارینێ دێ گەهیتە دو هزار ملیمێن بارانێ.
نەزیر ئەسعەد، رێڤەبەرێ ئاڤا بن ئەردی بۆ رۆژناما ئەڤرۆ دیاركر، د دەمێ 35 سالێن بۆری دا، ب تنێ پێنج سالان بەفر و بارانێن باش بارینە، لەوڕا ژی سەرەڕای رێژەیەكا زۆر یا بەفر و بارانێ د ئەڤ سالە دا قەرەبوویا 35 سالێن دی ناكەت، بەلێ رێژەیا بارانێن ئەڤ سالە د ئاستەكێ زۆر باش دانە و دێ ببیتە ئەگەرێ زێدەبوونا ئاڤا بن ئەرد و گۆت: «بارانا ئەڤ سالە هاتی ل چەندین سالێن بۆری نەهاتیە، كانی و رویبار ڤەژینەڤە، دیارە پێشبینی دهێتە كرن ل مەها نیسانێ ژی رێژەیەكا زۆر یا بارانێ بباریت، ئەڤە ژی دێ بیتە ئەگەرێ زێدەبوونا ئاڤا بن ئەردی».
گۆت ژی: «پشتی مەها نیسانێ دێ كانی پەقن و رێژا زێدەبوونا ئاڤا بن ئەرد دیار بیت، بەلێ وەكو پێشبینی، ئەڤ سالە ل هندەك دەڤەران ئاستێ ئاڤا بن ئەرد دو مەتران دێ بلندبیت».

زاخۆ، دلۆڤان هالۆ:

محەمەد مەهدی، بەرپرسێ نڤیسینگەها زاخۆ یێ دەزگەهێ خێرخوازی یێ بارزانی بۆ ڕۆژناما ئەڤرۆ دیاركر كو ب ئامادەبوونا مووسا ئەحمەد، سەرۆكێ دەزگەهێ خێرخوازی یێ بارزانی، گوهدار شێخۆ، سەرپەرشتێ ئیدارەیا سەربخوە یا زاخۆ و هژمارەكا ڕێڤەبەرێن دام و دەزگەهێن حزبی و حكومی و نوونەرێن رێكخراوێن مەدەنی، د ڕێورەسمەكێ تایبەت دا سەنتەرەكێ مەزن یێ سەردەم و پێشكەفتی یێ ئۆتیزمێ بناڤێ (سەنتەرێ هەژار) ل ئیدارەیا سەربخوە یا زاخۆ هاتە ڤەكرن.
بەرپرسێ نڤیسینگەها زاخۆ یێ دەزگەهێ خێرخوازی یێ بارزانی گۆت: «تێچوویێ ئاڤاكرنا ڤی سەنتەری ژ لایێ هەردو سەرمایەدارێن زاخۆ هەژار شنگالی و ئیبراهیم شنگالی هاتیە مەزاختن، ئەركێ كارگێری و برێڤەبرنا سەنتەری ژی ب دەزگەهێ خێرخوازی یێ بارزانی هاتیە ڕاسپاردن، كو ئەزموونەكا بەرچاڤ د ڤی بیاڤی دا هەیە».
گۆت ژی:»ئەڤ سەنتەرە دێ ب شێوەیەكێ بێ بەرانبەر خزمەتا زاڕۆكێن ئۆتیزمێ ل سنۆرێ ئیدارەیا سەربخوە یا زاخۆ كەت».

رەمەزان زەكەریا:

ل سنۆرێ دەڤەرداریا ئاكرێ، هەژمارەكا بەنداڤان هاتینە دروستكرن، ئەڤ سالە هەموو سەرڕێژ بووینە.
ئەندازیار محەمەد هاشم، رێڤەبەرێ هۆبا ڤدانێ ل ئاكرێ بۆ ئەڤرۆ گۆت: «ل دەڤەرداریا ئاكرێ و ناوچەداریێن گردەسێن و بجیل و دینارتە و گوندێن دەردووربەر، هەژمارەكا بەنداڤان هاتینە دروستكرن و هەموو پڕۆژەیان ژی سەركەفتن ئینایە و بۆ كەرتێ چاندنێ و ئاژەلداریێ مفا ژێ‌ دهێتە وەرگرتن».
گۆت ژی: «پڕانیا بەنداڤێن دەڤەرا ئاكرێ تژی ئاڤ بووینە، بەلێ تیمێن چاڤدێریا بەنداڤان بەردەوام سەخبێریا بەنداڤان دكەن و چو مەترسی ل سەر پەقینا بەنداڤێن دەڤەرا ئاكرێ نینە، كو حەفت بەنداڤن».

ئامێدیێ، مەحمود نهێلی:

ژ ئەگەرێ نەبوونا غازێ و وەكو كارڤەدانەك ل هەمبەر گرانیا بهایێ وێ، پتر ژ دەهـ رۆژایە پڕانیا نانپێژیێن دێرەلۆكێ‌ هاتینە دائێخستن.
ئێك ژ خودانێن وان نانپێژیان بۆ رۆژناما ئەڤرۆ دیار كر، ئەڤە بوویە قەیرانا غازێ و غاز گران بووی، غازا حكومی بۆ وان نەهاتیەدان، ژ بەر وێ یەكێ ژی ئەو غازا بازرگانی یا دكرن تێهەل ناهێت و گەلەك گران ل سەر وان رادوەستیت و گۆت: «مە گەلەك رۆژان نانپێژیێن خوە دانە كاری، لێ مە دیت حەقێ خوە نادەرئێخن، ژ بەر وێ یەكێ، مە ب كۆم بڕیار دا ئێدی ئەم نانپێژیێن خوە ڤەنەكەین، هەتا غازا حكومی بۆ مە دهێتەدان یان ژی غاز ئەرزان ببیت».
دهێتە زانین 10 بۆ 15 نانپێژی و سەمۆنخانە ل دێرەلۆكێ هەنە، لێ ب تنێ سێ بۆ چار ژ وانا دانەكی ڤەدكەن و ژ بەر دائێخستنا نانپێژیان خەلكێ دێرەلۆكێ نەچارن نانی ل شێلادزێ یان ژی جهێن دیتر بكڕن.