د. عەلی تەتەر، پارێزگارێ دهۆكێ دوهی 29/7/2025 سەرپەرشتیا كۆمبوونا ئاسایی یا لیژنا پیشەسازی و وەبەرهێنانێ كر و پتریا داخوازیێن سەرمایەدار و خودانێن پڕۆژەیان هاتنە پەسەندكرن.
د كۆمبوونێ دا بەحسێ رەوشا كەرتێ پیشەسازی و وەبەرهێنانێ و داخوازیێن سەرمایەدار و وەبەرهێنەران ل سنۆرێ پارێزگەهێ، وەكو: دامەزراندنا كارگەهان و دروستكرنا پڕۆژەیێن وەبەرهێنانێ د كەرتێن جودا دا هاتە كرن و پشتی گەنگەشێن تێروتەسەل، پتریا داخوازیان هاتنە پەسەندكرن.
پارێزگارێ دهۆكێ دوپاتكر كو هەر داخوازیەك و پڕۆژەكێ هاتیە پەسەندكرن، دڤێت ل دووڤ رێنما و یاسایێن حكومەتا هەرێما كوردستانێ بهێنە ئاڤاكرن و د بەرژەوەندیا گشتی دابن و كارتێكرنێ ل سەر ژینگەهێ نەكەن و دەلیڤەیێن كاری بۆ خۆجهێن دەڤەرێ پەیدا بكەن و پشتەڤانیا كارگێریا پارێزگەهێ بۆ هەر هاریكاریەكێ دیاركر.

زاخۆ، دلۆڤان هالۆ:

ل هۆلا كۆلیژا زانست ل زانكۆیا زاخۆ، ئیدارا سەربخوە یا زاخۆ ب هەڤكاری ل گەل زانكۆیا زاخۆ و كوردستان فاوندەیشن، دوهی 29/7/2025 كۆنفرانسێ پێنگاڤەك بەرەڤ باژێڕەكێ كەسك ل زانكۆیا زاخۆ ئەنجام دا.
گوهدار شێخۆ، سەرپەرشتێ ئیدارەیا سەربخوە یا زاخۆ د گۆتارەكێ دا د كۆنفرانسێ پێنگاڤەك بەرەڤ باژێڕەكێ كەسك دا گۆت: «خوەش بەختانە ل زاخۆ پڕۆژە و پێنگاڤێن هەری باش یێن كەسككرنا باژێڕی و پاقژیێ هاتینە هاڤێتن، ئەڤە ژی بۆ هاریكاریا خەلكێ زاخۆ ڤەدگەڕیت، كو خوە ب دلسۆز و خودان دزانن ل ڤی باژێڕی».
سەرپەرشتێ ئیدارەیا سەربخوە یا زاخۆ گۆتژی: «زاخۆ ئێكەم باژێڕە ل سەر ئاستێ ئیراقێ بۆ پاقژییێ و چاندنا داران، سوپاسیا خەلكێ زاخۆ دكەین، بۆ هاریكاریا وان د پاقژڕاگرتنا باژێڕی و كەسككرنا وی دا».

د. سالار عوسمان، بەرپرسێ بەشێ ڕەوشەنبیری و ڕاگەهاندنا پ. د. ك، ب هەڤالینیا هەژمارەكا ئەندامێن بەشی، دوهی 29/7/2025 سەرەدانا فەرماندەییا هێزێن خەبات كر و ژ لایێ‌ عومەر عوسمان مێرگەسۆری، فەرماندەیێ‌ فەرماندەییا هێزێن خەبات و هاریكار و ئەندامێن فەرماندەییا هێزێن خەبات ڤە پێشوازی لێ هاتە كرن.
د دیدارەكێ‌ دا، ب گرنگی باس ل خەبات و قوربانیدانا هێزێن پێشمەرگەیێ‌ كوردستانێ‌ د بزاڤا ڕزگاریخوازییا گەلێ كوردستانێ‌ دا هاتە كرن، هەروەسا دانوستاندن ل دۆر گرنگیدانا بەردەوام ب مێژوویا پڕ شانازی یا پێشمەرگەی و گەلێ كوردستانێ‌ د میدیایێ‌ دا هاتە كرن و جەخت ژی ل هەماهەنگی و كارێ پێدڤی هاتە كرن ب مەرەما زێدەتر گرنگیدان ب مێژوویا پڕ سەروەرییا هێزێن پێشمەرگەی د قۆناغ و وێستگەهێن پاراستنا كوردستان و ئەزموونا وێ‌ دا.

دهۆك، لەزگین جۆقی:

د چارچوڤێ‌ گرنگیدان ب گەهاندنا خزمەتگوزاریێن ساخلەمیێ‌ بۆ وەلاتییان ل نەخۆشخانەیێن پارێزگەهێ، د. عەلی تەتەر، پارێزگارێ دهۆكێ و ب ئامادەبوونا ئەفراسیاب موسا، رێڤەبەرێ گشتی یێ ساخلەمیێ و چەندین بەرپرسێن دەزگەهێن ساخلەمیێ ل پارێزگەهێ، دوهی 29/7/2025 هەردو پڕۆژەیێن دابینكرنا ئامیرێن (CT-SCAN) بۆ پشكا تەنگاڤیان ل نەخۆشخانەیا ئازادی یا فێركرنێ و قاتێ دویێ و ئامیرێن چاڤدێریا چڕ بۆ زارۆكێن ژ نوو ژ دایك دبن ل نەخۆشخانەیا ژ دایكبوونێ ڤەكرن.
پارێزگارێ دهۆكێ گەڕیانەك د ناڤ هەردو پڕۆژەیان دا كر و ژ نێزیك سەحكرە بەرهەڤیا وان بۆ خزمەتكرنا نەخۆشان و بناڤێ خەلكێ پارێزگەهێ سوپاسیا مەسرور بارزانی، سەرۆكێ حكومەتا هەرێما كوردستانێ و وەزیرێ ساخلەمیێ‌ و هەموو دام و دەزگەه و نۆشدار و كارمەندێن ساخلەمیێ كر، ل دۆر ئەو گرنگیا ب كەرتێ ساخلەمیێ و نەخۆشان ددەن و پشتەڤانیا پارێزگەهێ بۆ هەر هاریكاریەكێ دیاركر.
هەژی گۆتنێ یە هەردو پڕۆژە ب گوژمێ چار ملیار و 100 ملیۆن دیناران هاتینە بجهئینان و دێ خزمەتێن پێشكەفتی پیشكێشی نەخۆشان كەن.

رەمەزان زەكەریا:

ل زانكۆیا ئاكرێ بۆ زانستێن كرداری، بۆ وەرزێ نوو یێ خواندنێ دو كۆلیژێن نوو دێ زێدەبن.
د. لوقمان سەعید، بەرپرسێ راگەهاندنا زانكۆیا ئاكرێ بۆ زانستێن كرداری گۆت: «ل زانكۆیا ئاكرێ بۆ زانستێن كرداری 25 پشكێن زانستی و سێ كۆلیژ و دو پەیمانگەهێن تەكنیكی هەنە، بڕیارە ئەڤ سالە زانكۆیا ئاكرێ كۆلیژا یاسا و كۆلیژا رەزگەریێ ل بەردەڕەشێ‌ ڤەكەت».
د كابینەیا نەهێ یا حكومەتا هەرێما كوردستانێ گەلەك گرنكی ب كەرتێ خواندنێ هاتیەدان و چەندین كۆلیژ و پەیمانگەهـ ل سنۆرێ دەڤەرداریێن ئاكرێ و بەردەڕەشێ‌ هاتینە ڤەكرن.

ئەڤرۆ، پروین سەلاح:

مامۆستایەكێ زانكۆیێ دیار كر، بازارێن ئۆنلاین ل ئاستێ جیهانێ پێشكەفتینە، لێ ل هەرێما كوردستانێ و ل پارێزگەها دهۆكێ ب تایبەتی د قۆناغا گەشەپێدانێ دانە و ل قوناغێن دەسپێكی نە، ئەگەر ئەم بازارێن خۆ بەراورد بكەین دگەل بازارێن بیانی یێن ئۆنلاین گەلەك یا مای ئەم بگەهینێ، ژ وان لاوازیا ژێرخانا مە یا ئەلكترۆنی، ب تایبەت بابەتێ پارەداركرنێ و پارەدانا ئەلكترۆنی و یێن باوەری پتر هەبیت بۆ بازارێن ئۆنلان پتریا وان گەنجن، لێ خەلكێ دی یێ دانعەمر پتریا وان باوەری ب بازارێ كلاسیك هەیە.

د.هلۆڤان حوسنی مامۆستایێ زانكۆیێ و شارەزا د وارێ ئابووری دا د دیدارەكێ بۆ رۆژناما ئەڤرۆ دیار كر، سالۆخەتێن ڤان جۆرە بازاران و جیاوازیا وان دگەل بازارێ كلاسیك د چەند خالان دا دهێتە دیاركرن، ئێك ژ وان سالۆخەتان ژی سالۆخەتێ گەهاندنێ یە، گەهشتن بۆ ڤی بازاری ل بەرامبەر بازارێ كلاسیك ب ترۆمبێلێ یان هەر رێكەكا هەبیت بۆ ریكێن دوور و گۆت: بەلكی ب كلیكەكێ دگەهیە ڤان بازارێن ئۆنلاین
خویاژی كر، ل هەموو وەلاتان بازارێ ئۆنلاین بۆ بەرهەمێ ئەلكترۆنی، زوو گەهاندنا كەرەستەیە یان ژی پرۆگرامەكە ب رێیا وی زوو دگەهیت، بەلێ‌ بۆ بەرهەمێ لۆجستی ئۆنلاین دا گەهاندن پتر پێرابوونێن كۆمپانیێن تایبەتمەندن و شارەزای هەنە د ڤی واری دا، لێ هەرێما كۆردستانێ هێشتا ئەڤ كارە نەبووینە وەك كۆمپانی هاریكار و پشتەڤان بن و ئاریشە د گەهاندنێ دا هەیە.
هلۆڤان ئاماژە ب وێ چەندێ دا، ئەگەر وەك فرۆشیار بیت بۆ بازارێ ئۆنلاین هندەك مەرج هەنە، ب تایبەت بازارێ چێكرنا ئۆنلاینێ یان وێنەكرنا ژمارێ و ڤەگۆهاستنا بەرهەمی چ بەرهەمەكێ خۆمالی نیشان بدەت، نیشاندنا وی وەك ئۆنلاین ئەڤە گەلەكا گرنگە ئەو شیان و بەهرەمەندیە هەبن ل سەر زێدەكرنا پێدڤیێن دی وەك سیستەمێ گەهاندنێ و پارەدانا ئەلكترۆنی و چاوانیا ڤەكێشانا بكری و بەرسڤدانا پرسیارێن بكران و پەیوەندی دگەل بكران باش بیت و ل دووڤدا هەردوو لایەن ژی دشێن بازارێ ئۆنلاین بكەن، بەلێ‌ ل دووڤ ڤان مەرجان بچن.