قەیس وەیس:

ب دووماهی هاتنا یاریێن گەڕا پێنجێ‌ ژ خولا ستێرێن ئیراقێ‌ یا فوتبۆلێ‌ هەر پێنج یانەیێن كوردستانی ب ئەنجامێن جودا و روودانێن نە چاڤەڕێ‌ كری دناڤا یاریگەهێ‌ دا پەیدابوون و بڤی شێوەیی.
دهۆك ب سەركەڤت و گۆلپارێز هنگاڤت
ب سەركەڤتنەكا ژ هەژی تیما یانەیا دهۆكێ‌ شیا سێ‌ خالێن گرنگ ژ مێڤانا خوە یانەیا جەوییە یا بەغدایی وەربگریت و بەردەوامی ب دەتە ئەنجامێن باش پشتی ب 2-1گۆلان بێ‌ بەرانبەر دلێ‌ جەماوەرێ‌ خوە خوەشكری هەردو گۆل ژلایێ ئیكۆرد داسێلڤایی تۆماركرن، لێ‌ یا نەخووش ئەوبوو د خولەكێن دووماهیێ دا كومەیل سەعەد گۆلپارێزێ‌ یانەیا دهۆكێ‌ تووشی دو هنگاڤتنان بوو، یا ئێكێ‌ داعویرانا ئەزامی سۆپاس بۆ خودێ‌ هاتە قورتالكرن، یا دویێ هنگاڤتنا مللیێ‌ ڕاستی كو دێ‌ بۆ ماوەیێ سێ‌ یارییان دووركەڤیت ژ یاریگەهان، ڕێزبەندیا دهۆكییان ناڤنجییە ب حەفت خالان ڕێزا نەهێ‌ دهێت، ئێك سەركەڤتن و چار وەكهەڤی هەنە.
ژ دەستدانا خالان بەردەوامە
تیما یانەیا زاخۆ بەردەوامە ل سەر ئانجامێن لاواز پشتی دیارییا چارێ‌ دا نەشیایی سەركەڤتنێ‌ بینیت، دەمێ‌ بەرانبەر یانەیا تەلەبە بێ‌ گۆل دناڤ ئەردێ‌ خوە دا وەكهەڤبووی، هەرچەندە یارییا ئێكێ‌ یا خولێ‌ دا دگەل غازئەلشیمال ب سەركەڤت بوو، لێ‌ چار یاریێن دووڤدا تووشی دو خوسارەتی و دو وەكهەڤیان بوو، ڕێزبەندیا وێ‌ باش نینە ب پێنج خالان ل 14ێ‌ دهێت.
روودانەكا سەیر
د یارییا زاخۆ و تەلەبە دا دادڤانێ‌ هاریكار ڕەڤتارەكا نە یاسایی و سەیر بەرانبەر پیشەكارێ‌ زاخۆ ئۆرۆینهۆیی كر ئەوا دخولەكا 84ێ‌ دا پەیدابووی كو دهێتە هژمارتن بو جارا ئێكێ‌ یە د خولا ئیراقێ‌ و دبیت یێن دەرڤە ژی دا روودابیت، یاریزان ب هاڤێتنا تەپێ‌ ڤە موژیلە دادڤانێ‌ هاریكار بدەستێ‌ خوە یاریزانی پالددەت ب شێوەیێ نەجوان، ئەڤچەندە بوو جهێ‌ سەرنجراكێشا هەموو پشتەڤانان و چاڤدێرێن وەرزشی.
هەولێر سەركێشا ڕێزبەندیێ یە
یانەیا هەولێر هەتا ڤێ‌ گەڕێ‌ ژی سەركێشا خولا ستێرێن ئیراقێ‌ یە ب كۆمكرنا 11 خالان سەرباری د ڤێ‌ گەڕێ‌ دا بەرانبەر شورتە بێ گۆل وەكهەڤبوو، ئەنجامێن كوڕێن كەلهە ومنارە د باشن سێ‌ سەركەڤتن و دو وەكهەڤی هەنە، ئانكو تیمەكە بۆ هەڤڕكییا ڕێزبەندیێن پێشیێ هەڤڕكیێ دكەت.
نەورۆز یا سەقامگیرە و ئەنجامێن غاز ئەلشیمال خراب نینە
تیما یانەیا نەورۆز نوونەرا پارێزگەها سلێمانیێ د ڕەوشەكا جیگیر دایە ل دووڤ ئەنجامێن وێ‌، كو ژ پێنج یارییان، دو سەركەڤتن، دو وەكهەڤی و خوسارەتیەك هەیە و دنوكە دا ل ڕێزا پێنجێ‌ دهێت ب كۆمكرنا هەشت خالان، ژلایێ خوەڤە یانەیا غازئەلشیمال نوونەرا كەركووكا كوردستانی سەرباری بۆ جارا ئێكێ‌ یە ددیرۆكا خوە دا هاتیە خولا ستێران لێ‌ ئەنجامێن وێ‌ دخراب نینن وەكو دەستپێك، پێنج خال كۆمكرینە ژ سەركەڤتنەك، دو وەكهەڤی و دو خوسارەتی هەنە ل رێزا 12ێ‌ دهێت.
شرۆڤەكارەكێ‌ وەرزشی بووچوونا خوە دیاركر
لدۆر ئاست و ئەنجامێن یانەیێن كوردستانی خەلەف كەریم شرۆڤەكارێ‌ وەرزشی یێ خولا ستێرێن ئیراقێ‌ گۆت: سەبارەت یانەیا زاخۆ بۆ من بخوە سەیرە یاریزانێن یانەیا زاخۆ شیانێن باش هەبن و هەتا نوكە لێكتێگەهشتن چێنەبوویە، یاریزانێن وەكو شیرۆزڤ گۆلكەرێ‌ خولا ئیراقێ‌ د پێنج یاریێن ئێكێ‌ دا ل گەل زاخۆ نەشیایە چو گۆلان بكەت ل وەرزێ‌ بۆری هەتا ڤێ‌ گەڕێ‌ دگەل هەولێرێ‌ پێنج گۆل تۆماركربوون، بدیتنا من ئاریشا یاریزانێن زاخۆ دەرۆنی نە ئاستی، ژلایەكێ‌ دووڤە دبینم ڕەوشا یانەیێن دهۆك و هەولێر جیگیرە و یاری بۆ یاری باشتر دچیت، ئەڤەژی بەلگەیە لسەر هەبوونا پلان و ڕێزكخستنێن باش، یانەیا نەورۆز ژی یا باشە لێ‌ هێشتا بۆ غازئەلشیمال دەم دڤێت.
گەڕا شەشێ‌ و ڤەگەڕاندنا خالان و دوبارە سەركەڤتنێ‌ یە
ئەڤرۆ دوشەمبیێ دێ‌ دەست هەڤڕكیێن گەڕا شەشێ‌ هێنە كرن و بڤی شێوەیی، زەورا و كەربلا دێ‌ مێڤاندارییا كارەبا و جەوییە كەن، سوبەهی سێشەمبی، دهۆك دێ‌ غاز ئەلشیمال ل دەمژمێر6:45 شەڤ مێڤانكەت، د هەمان دەم دا هەولێر دیالا مێڤان كەت و شورتە بیتە مێڤانا ئەلغراف، چارشەمبییا بهێت زاخۆ دێ‌ بیتە مێڤانا جەولان و نەورۆز دێ‌ مووسل مێڤان كەت ژ یاریێن دی، تەلەبە-كەرخ، مینا نەفت میسان، ئەلگەرمە- نەفت.

شاهۆ فەرید:

د داخویانەکێ دا میقداد ڕەعەد ڕاهێنەرێ تیما باسکێت بۆلا یانەیا دهۆکێ بۆ رۆژنامەیا ئەڤرۆ دیارکر ئەڤرۆ دێ دەست ئێکەم یارییا خوە یا خولا پلا ئێکا ئیراقێ بەرانبەر یانەیا شەباب ئەلموشاهد ژ چارچووڤەیی کۆما ئێکێ ئەوا ١٣ یانە پشکدارن و هاتینە بەلاڤکرن ل سەر چار کۆمان و پلانا مە دەربازبوونە بۆ پلا نایاب و ڕژین.
زێدەتر ناڤهاتی گۆت: بۆ ماوەیێ سیێ سالە مە تیما خوە بەرهەڤکری و بەردەوام ڕاهێنان ل دوو بەرنامەیەکی دهاتنە کرن، مە تیمەکا گەلەکا بهێز بەرهەڤکریە بۆ خولێ، ئارمانجامە یا سەرەکی دەربازبوونە بۆ نایابا ئێراقێ، مە چو یاریزانیێن دەرڤە نە ئیناینە، هەمان یاریزانن هەر ژ دەستپێکی هەتا نوکە بەردەوامن گەل تیمێ، دێ بزاڤێ کەین یاریەکا جوان یاریزانیێن دهۆکی نیشا ئێراقێ بدەن.
میقداد ڕەعدی گۆت ژی: نوکە ئارمانجامە دەربازبوو ژ قووناغا کۆمان، هەر کۆمەکی دو تیم ژێ دەربازبنە قوناغا هەشتێ یا خولێ، ئەم.دێ بزاڤێ کەین هەر بەردەوام بین هەتا بگەهینە ئارمانجا سەرەکی خولا نایاب و من باوەری یاریزانیێن خوە هەیە دێ تشتەکێ باش نیشان دەن.
بۆ زانین هەموو یاریێن خولا پلا ئێک دێ ل هۆلا گرتییا یانەیا دهۆکێ هێنە ئەنجامدان، هەر ١٣ یانە هاتینە بەلاڤکرن ل سەر چار کۆمان و بڤی شێوەیی، کۆما ئێکێ، دهۆک- شەباب ئەلموشاهد و شەباب ئەلبەسری، کۆما دویێ: ناسریە، ئەلوەحدە و ئەلنوعمانیە، کۆما سییێ: ئاسۆ، ئەکاد عەنکاوە و قەلعەت سوکەر، کۆما چاریچ ئەلتەزامن، سۆلاڤا نوو، جەیش و ئەلریفاعی.

رەمەزان زەكەریا

د داخۆیانیەكێ دا پەیڤدارێ یانەیا بجیل دیاركر تیما وان دەستپێكەكا ب هێز هاتینە د خولا پلا دویێ یا كوردستانێ دا پشتی شیاین د سێ گەڕێن دەستپێكێ یێن خولێ دا شەش خالان كۆم بكەت و سەری بهێن ب كۆمكرنا نەهـ خالان د كۆما خوە دا ئەوا پێهاتینە ژ یانەیێن پیرس، باتیفا، دینارتە، هەریر و شێلادزێ‌.
زێدەتر فەهمی فازل بۆ رۆژناما ئەڤرۆ گۆت: بەرهەڤی و ئەنجامێن تیما مە جهێ شانازیێ نە و ئاستێگەلەك باشە ب هاریكاریا یاریزان و راهێنەران مە شیا سەرێ‌ لیستێ‌ بهێن و هەڤڕكێن پلێتەكا دەربازبوونێ‌ نە، هەرچەندە كاروانێ‌ خولێ‌ درێژە و نابیت غرور بۆ یاریزانان پەیدابیت.
ناڤهاتی گۆت: سەرەڕای سەركەفتنان و ئەنجامێن مەزن ئەڤێ‌ نهێنیێ ژبیر نەكەین كو ئەم یێ ب دژواری د نیڤەكا ئاریشەیا دەرباس دبیت ب تایبەت تەمام نەبوونا یاریگەها یانەیێ كو نەبوونا یاریگەهەكا فەرمی نەچاری كرینە یاریێن خۆ ل دەرەڤەی بجیل ئەنجامبدەن هەروەسا لاوازییا لایەنێ مادوی كو بارەكێ گران ئێخستییە سەر ملێن كارگێریا یانەیێ.
پەیڤدارێ یانەیێ ئاشكراكر: سەرەڕای هەموو ئاستەنگان یاریزانان و دەستەیا راهێنەران بزاڤكرینە داكو دلێ جەماوەرێ یانەیێ خۆش بكەن و ئەم دێ هەموو بزاڤێن خۆ دەین داكو بگەهینە ئارمانجا خۆ یا سەرەكی، كو ئەو ژی گەهشتنا یانەیا بجیلە بۆ خولا پلا ئێك یا كوردستانێ.