NO IORG
نووترين نووچه
Authors Posts by Naci Badel

Naci Badel

8160 POSTS 0 COMMENTS

6

ئەحمەد شوکری کوچەر

د دیدارەکا تایبەت دا بۆ رۆژنامەیا ئەڤرۆ ڕاهێنەرێ تیما یانەیا سێمێل دروشمێ سەەرکەڤتن بۆ هەر پێنچ یاریێن مایی ڕاکر وەکو فینالێ بۆ تیما خوە هەژمارت، ددەمەکی دایە بڕیارە ئەڤرۆ یارییا خوە یا گەڕا ١٢ێ ژ خولا پلا ئێکا کوردستانێ بەرانبەر یانەیا تەناهی بکەت.
زێدەتر محەمەد یوسف گۆت: ئەو پێنج یاریێن ل بەرسینگێ مە ماین، بۆ مە وه‌كۆ یارییێن فیناڵێنه‌ نابیت چ خالان ژدەست بده‌ین و هه‌می یاریی بۆ مه‌ بزه‌حمه‌تن و یێن دووماهییێنه‌، بۆ یارییا ئەڤرۆ ژی مه‌ ب شێوه‌یەكێ باش خوە بەرهەڤکرییە تایبەت بۆ ڤان یارییان و مۆراڵا هه‌می یاریزانان یا بلنده‌ ئارمجا وان ژی گه‌هشتنه‌ ب خولا نایابا كوردستانێ و خۆ پتر نێزیكی ڕێزێن پێشیێ یێن ڕێزبه‌ندییێ بكه‌ن ژبیر نەکەین د هه‌مان ده‌م دا ئارمانجا سه‌ره‌كی یا هه‌می ڕاهێنه‌رانه‌ هه‌ڤركییێ بۆ سه‌ركه‌فتنێ و ڕێزبه‌ندییا پێشیا خولێ بكه‌ن.
هەروەسان ناڤهاتی گۆت: سه‌باره‌ت وەر‌گرتنا تیمێ من ده‌مه‌كێ كێم دا تیما وه‌رگرتیە لده‌مێ ڤه‌گوهاستنا یاریزانان دا، بۆ سوباس بۆ خودێ كۆ كارگێرییا یانێ هاریكار بۆ ژبۆ ڤه‌گوهاستنا هژماره‌كا یاریزانێن باش، سه‌باره‌ت پشته‌ڤانێن مه‌ هیڤیدارن به‌رده‌وامبن لسه‌ر پشته‌ڤانیێ چونكی نۆكه‌ تیم یا دناڤ هه‌ڤركیێدا و مافێ پشته‌ڤانایه‌ گڤاشتنێ بكه‌ن چونكی ئه‌و یاریزانێن هژماره‌ 12 دناڤ یاریگه‌هێ دا به‌لێ ئارمانجا یاریزانان و ستافێ ڕاهێنه‌ران دگه‌ل كارگێرییا یانێ و پشته‌ڤانن بتنێ سه‌ركه‌فتنه‌ و ده‌ربازبوونه‌ بۆ خولا نایابا كوردستانێ.
محەمەد یوسف ئەوچەندە ژی گۆت: دێ دووباره‌ كه‌م كۆ هه‌می پلانێن مه‌ بۆ یارییێن مای بتنێ بۆ سه‌ركه‌فتنێ ئه‌م دێ یاریێ كه‌ین و ئه‌م بهیڤینه‌ دووباره‌ یانه‌یا خۆ سێمێلێ ڤه‌گه‌رینه‌ خولا نایابا كوردستانێ و دووباره‌ یاریزانێن باش ژبۆ ڤێ یانه‌یێ ئاڤا بكه‌ین .

7

بڕیارە ئەڤرۆ ژ ل دانێ‌ شەڤێ‌ چار یاریێن مایی ژ هەڤڕكیێن گەڕا دویێ‌ و ئێكلاكەر ژ قووناغا هاتنێ‌ یا پاشكۆی دەربازبوون بۆ قووناغا 16ێ‌ یا قارەمانییا یانەیێن ئۆرۆپا قارەمانێن خولا چامپیۆنز لیگ ب ئەنجامدانا چار یاریێن دی یێن ئاگرین بهێنە ئەنجامدان ژبۆ دیاركرنا چار یانەیێن دەربازبووی دگەل ئەوان چار یانەیێن دوهی دەربازبوونا خوە مسۆگەركرین و دبیت بۆ مەزنێن ئۆرۆپا یا ب ترس بیت.
ئەتالانتا دێ‌ زەحمەتەكا مەزن بەت
د ئێكەم یاری د چارچووڤەیێ‌ هەڤڕكیێن ئەڤ شەڤە دا بڕیارە یانەیا ئەتالانتا یا ئیتالی ل یاریگەها خوە مێڤاندارییا یانەیا بۆرۆسیا دۆرتمۆند یا ئەلمانی ل دەمژمێر 8:45 شەڤ مێڤان بكەت، ئەركێ‌ ئیتالیان بەرانبەر ئەلمانیان ب سانەهی نابیت ژبەركو د یارییا ئێكێ‌ یا ڤێ‌ قووناغێ‌ دا ب 2-چنە تووشی خوسارەتیێ‌ بوو، د یارییا ئەڤرۆ دا دڤێت جووداهییا سێ‌ گۆلان بیت هەتا بشێت پلێتا دەربازبوونێ‌ وەربگریت، پێتشر بتنێ‌ چار دیدار دناڤبەرا واندا پەیدابوویە، بۆرۆسیا دو سەركەڤتن ئینابوو، ئەتالانتا ئێك سەركەڤتن و یارییەك وەكهەڤی ب دووماهی هاتبوو.
یۆڤانتۆس پێدڤی ب ڕیمۆنتادایە
شەڤەكا ئاگرین و درێژ بەرانبەر پشتەڤان و یاریزانێن یانەیا یۆڤانتۆس یا ئیتالی یە ئەوا دێ‌ ل یاریگەها یانەیا گالاتا سارایی یا توركی مێڤان كەت، د یارییا ئێكێ‌ یا چوونێ‌ دا گالاتا سارایی شیابوو ب 5-2 گۆلان سەركەڤتنەكا دیروكی ل سەر یۆڤانتۆسێ‌ بینیت، لەوما ژی بۆ یارییا ئەڤرۆ یانەیا ئیتالی پێدڤی ب ڕیمۆنتادایە بجووداهیا چار گۆلان هەتا بشێت پلێتا دەربازبوونێ‌ وەربگریت، ئەڤ یارییە تایبەتمەندە بۆ هەردو یانەیان ژبلی كو یارییەكا هەڤڕكییا وەرزشی یە، د بەرانبەر دا هەڤڕكییەكا سیاسی ژی دناڤبەرا واندا هەبوویە، یانەیا توركی شیایە پێشتر خوە ب هەڤڕكەكا بهێز دیاربكەت ئەوا د سێ‌ دیدارێن بۆری دا سەركەڤتن ل سەر یۆڤانتۆسێ‌ ئیناین.
ڕیال مەدرید بەرانبەر ئاستەنگا بەنفیكا
ژلایێ‌ خوەڤە یانەیا ڕیال مەدرید یا ئسپانی دێ‌ دناڤ ئەرد و جەماوەرێ‌ خوە دا یانەیا بەنفیكا یا پۆرتۆگالی ل دەمژمێر 11ێ‌ شەڤ مێڤانكەت، ژ چارچووڤەیێ‌ یاریێن دویێ‌ یێن ئێكلاكەر بۆ دەربازبوونێ‌، د یارییا ئێكێ‌ دا ئەوا ل حەفتییا بۆری هاتیە كرن ریال شیابوو ب گۆلەكێ‌ ب سەركەڤیت، دیدارێن پێشتر دناڤبەرا واندا ئاگرین بووینە، یانەیا بەنفیكا ژی شیایە ئەنجامێن مەزن بەرانبەر ریالی بینیت، لێ‌ یارییا ئەڤشەڤە جوداهییەكا تایبەت هەیە، ریال بهێز یا ڕژدە بۆ پلێتا دەربازبوونێ‌ و بەنفیكا ب سانەهی نابیت.
لدووڤ پێشبینیێن پپێكهاتیێ‌ ریالێ‌ بڤی ڕەنگی بن، كورتۆا گۆلپارێز، هەرئێك ژكارباخال، ئەسینسیۆ، ئالابا، كاریراسی هێلا بەرەڤانیێ‌، هەروەسان چوامینگی، گۆلەر، كاماڤینگا و ڤالڤێردی ل هێلا ناڤین، مباپی و ڤێنێسیۆس ل هێلا هێرشبەریێ‌.
دیدارا كلاسیكۆیا فرەنسی و شەڕێ‌ 67ێ‌ یە
د دیدارەكا دو یانەیێن فرەنسی بڕیارە ل دەمژمێر 11ێ‌ ئەڤ شەڤە یانەیا پاریس سانجێرمان قارەمانا وەرزێ‌ بۆری یا چامپیۆنزێ‌ دێ‌ ل یاریگەها خوە یانەیا مۆناكۆ مێڤان بكەت، د یارییا ئێكێ‌ یا ڤێ‌ قووناغێ‌ دا سانجێرمانێ‌ ب 3-2 سەركەڤتن ئینابوو، لێ‌ یارییا ئەڤ شەڤە هەتا فیركا دادڤانی لێ‌ نەدەت دەربازبوونا یانەیەكێ‌ پشت راست نابیت، دهێتە چاڤەڕێ‌ كرن یارییەكا ئاگرین و پری هەڤڕكی بیت ب تاما كلاسیكۆیا فرەنسی دناڤبەرا دو هێزێن وی وەلاتی دا، پێشتر دیرۆكێ‌ دیاركرییە هەردەم هەڤڕكییەكا بهێز وهەڤسەنگ هەبوویە، سەرجەمێ‌ 66 یاریێن دناڤبەرا هەردو یانەیان دا، سانجێرمانێ‌ 24 سەركەڤتن ئیناینە و مۆناكۆ 23 سەركەڤتن ئیناینە و د 19 یارییان دا وەكهەڤ بووینە، ئەڤە ژی ئاماژەیی وێ‌ چەندێ‌ ددەت كو دیدارێن وان د ئاگرینن.
سیستەمێ‌ قارەمانیێ‌
هەژی گۆتنێ‌ هەر یانەیەك دێ‌ هەشت یارییان دگەل یانەیێن جودا كەت، چار یاری دناڤ ئەردێ‌ خوە دا و چار ژ دەرڤەیی یاریگەها خوە، هەشت یانەیێن ئێكێ‌ دێ‌ دەربازبنە قۆناغا 16ێ‌، ئەو یانەیێن ژ ڕێزا نەهێ‌ هەتا 24ێ‌ دهێن دێ‌ هەڤڕكیێ‌ بۆ هەشت پلێتێن مایی یێن دەربازبوونێ‌ بۆ قۆناغا 16ێ‌ كەن، ئەو یانەیێن د رێزا 25ێ‌ هەتا 36ێ‌ دهێن دێ‌ ژ هەڤڕكییان هێنە دوورئێخستن.
ئەو یانەیێن پێشتر دربازبووینە قووناغا 16ێ‌
پشتی ب دووماهی هاتنا قووناغا كۆمان ئەوا 36 یانە پشكداربووین، هەشت یانەیێن ڕێزبەندییا ئێكێ‌ ئێكسەر دەربازبووینە قووناغا 16ێ‌ و چاڤەڕێ‌ هەشت یانەیێن ماینە ئەوێ، د قووناغا پاشكۆ شەڕێ‌ بۆ هەشت پلێتان دكەن، ئەو یانەیێن دەربازبووین ل دووڤ ڕێزبەندییا ئێكێ‌ هەتا هەشتی بڤی شێوەیی بوون.
1- ئارسنال- ئنگلتەراـ 24 خال.
2- بایرن میۆنخ، ئەلمانیا- 21 خال.
3- لیڤەرپۆل، ئنگلتەرا- 18 خال.
4- تۆتنهام، ئنگلتەرا- 17 خال.
5- بەرشەلۆنا، ئسپانیا- 16 خال.
6- چێلسی، ئنگلتەرا- 16 خال.
7- سپۆرتینگ لەشبۆنە، پۆرتۆگال- 16 خال.
8- مانچستەر ستی، ئنگلتەرا- 15 خال.

15

عەبدولرەحمان بامەرنی

ھەر دەما كەفتە ناڤ نڤینێن خوە، ئێكەم تشتێ رێگرییێ ل خەوەكا خۆش دكەت، دەستێن وینە. ئەڤە رۆژا سەیدای گوتییێ دەستێن تە وەك یێن ھەمیا نینن! ھەر شەڤ دەستەك دھێت و خەوێ ژ چاڤێن وی ڤەدرەڤینیت.
وێ شەڤێ دەستێن چایچییەكی بەلا خوە ژێڤەنەدكرن و ل دەك پەیالە رادكرن، پێنج پەیالە و شەش پەیالە و حەفت پەیالە و ھەمی ژی د تژی چا. گۆتە خوە، ئەڤە ژی وەك نەخۆشیەكێ یە و ھەڤالەكێ وی بۆ پێشنیارا سەرەدانا نۆژدارەكێ تایبەتمەند كر.
ئەرێ دڤێت نۆژدارەك پشكنینا من بكەت، چ تیشكەكێ بۆ من بگریت یان پشكنینا خوینا من بكەت، چ دزانم، ئەڤە كارێ وییە و یا ل سەر من ئەز بكەم، د دەمێ پێدڤیدا ئەز ل كلینیكا وی یێ بەرھەڤ بم و ھەر گاڤا سكرتێری ناڤێ من گازی كر، ئەز بەرەڤ دەرگەھێ نۆژدار تێڤە بچم و ھەر پرسیارا وی ژمن كر، ئەز دێ بەرسڤێ دەم.
ئەرێ دێ بەرسڤا ھەمی پرسیارێن وی دەم. مانێ ئەز ژ ھەڤالێ خوە دزانم، دەما ئەز دگەل وی چوویمە كلینیكا نۆژاری و گۆتییێ ددانێ من یێ دئێشیت. پشتی پشكنینێ، نۆژداری گوتێ ددانێ تە چ تێنەمایە و دڤێت بھێتە ھلكێشان!
نەخێر ئەز ب پێشنیارا ھەڤالێ خوە ناكەم و دترسم نۆژدار دەستێن من ژ قوقلكێ بینتە دەرێ و مانێ سەیدا ژ من و ھەڤالێ من و نۆژداری ژی باشتر دزانیت. یا گۆتی دەستێن وە یێن مەنە و ئەو دبن كۆنترۆلا مەڤەنە. ھەر گاڤا مە ڤییا دێ پێكڤە دەستێ خوە بلندكەن و ھەر گاڤا مە ڤیا دێ ئیننە خوارێ و دەما من گۆتییێ قوربان، ئەڤە ژ وێ رۆژا جەنابێ تە گۆتی دەستێن تە وەك یێن ھەمیان نینن، خەو ب چاڤێن من نەكەفتییە و ھەر شەڤ دەستەك لمن دبیتە مێھڤان و ناھێلیت خەو نزیكی چاڤێن من ببیت؟ گۆت: دەما دنڤی دەستێن خوە ل بن بالیفكێ دانە و بكەڤە خەوێ.
راستی ژی ئەڤە ھزرەكا جوانە. ئەرێ بۆچی دێ قەستا نۆژداری كەم و سكرتێرێ وی پارەیێ كلینیكێ ژمن وەربگریت، ژنوی بەرێ من بدەتە دەرمانخانێ و ئەو پارەیێ دەرمانان ژ من وەربگریت، بتنێ دا كو بنڤم! نەخێر ئەز پێدڤی ڤێ ھەمییێ نینم و دێ قەستا دكانەكێ كەم، یا باشتر دێ قەستا ھۆستایەكێ لاندكا كەم، ئەوان شارەزایی د دروستكرنا لاندكاندا ھەیە.
مانێ ئەو ھەمی شۆلا دزانن، ئەو دێ رێكەكێ بۆ من پەیدا كەن كو ھەر شەڤ دەستێن خوە ژێڤەكەم و سپێدێ دوبارە بێخمە جھێ وانڤە و ھەر شەڤ ژی من ئەڤە دكر، من دەستێن خوە د دانانە بن بالیفكێ و من سەرێ خوە د دانا، ھێشتا چاڤێن من نەكەفتینە سەر ئێك، وەكی پشیكێ خەوێ خوە ل چاڤێن مندا. تا رۆژەكێ ل دەنگێ دیكلی ھشیار بوویم و ئێكەم تشتێ ھاتییە سەر ھزرا من، بەری بچمە سەر دەستئاڤێ، دڤێت دەستێن خوە بەمە جھێ وان و من بالیفك قولپاند، عەرد كون بوو و دەستێن من دیار نەبوون. رابوومە ژ قۆنڤە و من گازێ دەیكا خوەكر.
ـ دادێ دەستێن من د دیار نینن؟
ـ ما سەیدایی نەگۆتبوو دەستێن وە یێن مەنە، ھەما تەنا بنڤە، دەستێن وە یێ ل جھەكێ ئەمین.
دەیكا من راست دبێژیت، دەستێن مە یێ ل جھەكێ ئەمین و ما دێ بۆچی لێگەڕم!
ئێ باشە سەیدا، تە گۆت دەستێن وە یێ دبن كۆنترۆلا مەڤە، ئو پا ل چوونا دەستئاڤێ؟! باشە ئەگەر دەستێن مە دبن كۆنترۆلا وە ڤە بن، دەستێن نڤیسەری و یێن گوشتفرۆشی و یێن شۆفێری و یێن مامۆستایی و یێن نانپێژی تێكەلی ئێك بوون، كی دێ شێت ھەر دەستەكی دانیتە جھێ وی یێ دروست و باشە كی دێ گرەنتییێ دەت كو دەستێ دزیكەری چەكووچێ دادوەری نەھلگریت؟! ئێ باشە دزی ژی ب سەرێ خوە، رێڤەبرنا سەقەت ژی ب سەرێ خوە، بەرەللایی ب سەرێ خوە، مانە دڤێت پارییەكی بەرێڤەیی گەورییا خوە بكەین؟!

11

هەرهین محەمەد

بلا چاڤێن من و تە
وەکو دجلە و فوراتێ
د ناڤ دەشتێن دلێ ئێکدا ببنە ئێک
دا خەریتەیا عەشقێ
بەری سنوورێن ڤی وەلاتی
د ناڤبەرا سێدارە و سێبەرا تە دا
نەخشە بکەین.
تو ببە پایتەخت و ئەز دێ بمە پێشمەرگە
هەمی بێوارێن ئەڤێ جیهانێ
دێ کەنە ئاکنجیێن ناڤ دلێ مە
قانوونەکێ بوو نەمانا خەریبیێ و
قانوونەکێ بوو بێهنا ستۆیێ تە
دێ ئیمزا کەین
ئەرێ ما تو ژی
وەکو پێدڤیبوونا زەڤییێ بۆ بارانێ
بۆ بێهنا سینگێ من
خەریب نەبووی؟

11

زەكەریا حەمید

1
درەنگ هشیاربوو، رۆژا خۆ دیت كو بەرییا وی یا گەهشتی یە ماندیبوون و ئاڤابوونێ‌.

2
گۆتنە وی: تو ب بە «تو»، نە كەسەكێ‌ دی. دەمێ‌ بوویە خۆ؛ ب تنێ‌ هێلا.

3
ئەو ژ مرنێ‌ د ترسییا، لەوا ژییەكێ‌ درێژ بر… بێ‌ ڤیان بێ‌ ژیان.

4
د خۆدیكێ‌ دا تۆقە ل گەل مرۆڤەكی كر كو گەلەك وەكی وی بوو، پشتی هنگی لێبۆرین ژێ‌ خواست؛ چونكی بێ هیڤی كربوو.
5
ب هشیاری دەرگەهێ‌ دلێ‌ خۆ گرت، لێ‌ خەم ل بەر دەرگەهی روینشت بوون.

6
هەر جارا هەولا رەڤینێ‌ ژ بیرهاتنێن خۆ كربا، دا ب گاڤێن خۆ هەلنگڤیت و كەڤیتە د چالا بیرهاتنان دا.

7
گۆت: دێ‌ هەدارێ‌ كێشم. هەدار مەزن بوو، هند مەزن بوو، هیڤی گۆشت.

8
ئەو نە یێ‌ ب تنێ‌ بوو، لێ‌ بۆ وی تنێبوون ژ هەمییان ئەمەكدار تربوو.

9
وەسیەتناما خۆ نڤیسی، پشتی وێ‌ وەكی هاڤییەكی ل خۆ دگەڕییا.

10
دەمێ‌ دەنگێ‌ خۆ ژ دەستدایی، بۆ وی خۆیا بوو كو ئەڤە دەمەكێ‌ درێژە بێدەنگی چاڤەڕێیە ل جهێ‌ وی ب پەیڤیت.

11
خۆ فێری گڕنژینێ‌ كر، نەژبەر هندێ‌ كو یێ‌ دلخۆش بوو! ژبەر كو دا دەردۆرا خۆ ڕازی بكەت.

12
گەلەك چاڤەڕێ‌ بوو، هەتا كو ئەو تشتێ‌ وی ڤیایی هاتی؛ ئەو نەما ئەو كەسێ‌ چاڤەڕێ‌ دكری.!
13
زوی هشیار بوو، لێ‌ د خۆدێ‌ خۆدا یێ‌ گیرو بوو.. بۆ ژیانێ‌.

14
جگارەك بەردایێ‌ و ئاخینەك هەلكێشا و گۆت: چەند پتر ژ ژیانێ‌ بگەهین حەزا مرۆڤی بۆ ژیانكرنێ‌ كێمتر دبیت.

15
بۆ جارەكا ب تنێ‌ هەولدا یێ‌ راستگۆبیت و راستییەك گۆت: لێ‌ ژییێ‌ خۆ هەمی ب لێبۆرینێ‌ ڤە دەربازكر!

16
ئەو ژ ئێشانێ‌ نە د ترسییا دەما ڤییای خۆ ژ لۆتكێ‌ ب هاڤێتە خوار، لێ‌ د ترسییا هەست ب چ تشتان نەكەت، دەمێ‌ دكەڤیت.

17
د ناڤ قەرەبالغا مرۆڤاندا، بۆ وی خۆیا بوو كو تنێبوون بەهرەیەكا دەگمەنە.

18
د هەڤڕكییێ‌ دا، بزاڤكرن كو یێ‌ ب هێز بیت، لێ‌ ژبیركر كا دێ‌ چەوا بیتە مرۆڤ.

19
پشتی ئەو هێلای و چووی، گۆتنە وی ژبیر بكە، ژ هنگی وەرە بیرهاتن بوونە تاكە پیشەیێ‌ وی.

20
پشتی هەر تشت ژ دەستدایی، تنێ‌ دكرە كەنی؛ چونكی خەمگینی حەز ژ هەڤڕكان ناكەت.

11

ڕێزان جەعفەر

کا هیڤی دکەم دەستێن خو بدەف من، نێزیک بە، تو بۆچی دترسی؟ چەند نێزیک دبوو، دویرتر لێ دهات، هەتا ب تەمامی بەرزە بووی. ب تنێ ل بەر کەناری روینشتم، لێ نە یێ دەریایێ، ل ڤێرە، مە چو دەریا نینن، مە کەنارێ تەختی یێ هەی، یان یێ مێزەکێ، یان کەنارێن خەمەکێ، یان عەدەمەکێ.
خەیالان ئەز دویر نە برم، ئاخ، نێ خەیالێن مە ژی د سنووردارکرینە، بیرهاتن، تو، ئەو، هوین، ئەز، هەر تشت و هەمی جهناڤێن کەسی ل پێش چاڤێن من هاتنە هلاویستن، چەند دیمەنەک کرێتە، خۆ ب هلاویستنێ ژی، یێن ب سەر و چاڤێن ئێکڤە، خۆزی نە هاتبانە هلاویستن، هەتبانە بن ئاخکرن، دا ژێکڤە ببان، دێ کا بەسە هزرێن لەوچە، من دڤێت هەر چەوا بیت دەستێن وێ بگرم.
پشتی چەندین هەیڤێن هیڤیکرنێ و خۆ زەلیلکرنێ، رازی بوو بهێت، جهەک تژی گولێن کیڤی، بالندەیێن گێژ، هەوایەکێ بێهن تەنگ، رۆژەکا پێتی، مرۆڤی هزردکر هندە دێ مریت، تبلێن وێ گەهشتنە تبلێن من، دا دەستێن من بگریت، گۆت: تو چەند یێ ترسنۆکی. پەیڤا وێ کەتە سەر برینەکێ و خوین ژێ پەشی. ب لەز دەستێن خۆ کێشان و ئێلنجی هاتنێ. گۆت: «ببۆرە، ئەز حەز ژ بێهنا ئازارا ناکەم و بازدا و چوو». من زانی ژبەر بێهنا ئازارێن من، چو جاران خۆشییێ نەشیا دەستێن من بگریت.

15

سالار محەمەد دۆسكی:

1-6

پێشمەرگەیێ‌ شۆڕشا گولانا پێشكەفتنخواز دیار دكەت، ل دەسپێكا شۆڕەشێ‌ ل دەڤەرا بەرواری یا رێكخستنێن نهێنی گەلەك دچالاك و زیرەك بوون، و رۆژ بۆ رۆژێ‌ دگەشەبوونێ‌ دا بووینە، ئەڤە بۆ دەسپێكەك گەلەك قارەمان و مێرخاس چەكێ‌ شەرەفێ‌ هەلبگرن و ببنە پێشمەرگە.
عبدولستار سەید حامد سەید ئیبراهیم چەم سەیدی بەرواری دیدارەكێ‌ دا بۆ بەرپەرێ‌ دیرۆك ل رۆژناما ئەڤرۆ گۆت: پتریا خەلكێ‌ كوردستانێ‌ دناڤ شۆرەشێ‌ دا بووینە و پشتەڤان و هاریكارێن شۆرەشێ‌ بووین و تایبەت خەلكێ‌ گوندا گەلەك هاریكاری كریە و بێ‌ جوداهی ژن و مێرا و هەتا زارۆكان گیانەكێ‌ شۆرشگێری دناڤ ناخێ‌ وان دا سەر هلدا، دەمێ‌ رەحمەتی (مەلا مستەفا بارزانی) ژ ئێكەتیا سوفیەتی زڤری وی دەمی خەزیرێ‌ من (محەمەد سالح) بەری رەحمەتی ( مەلا مستەفا بارزانی ) بهێتە دەڤەرا مە خەزیرێ‌ من بارەگایەك دمالا خوە دا ڤەكر، و ناڤێ‌ وی بارەگایی كرە (خەبات) و چەند كەسایەتی ل دورێن خوە كوم ڤەكرن وەك حزبی هاتنە ناڤكرن و بابێ‌ من (سەید حامد چەم سەیدی) ئێك ژ ئەوا كەسان بوویە، و ئەڤە دەسپێكا سالێت شێستان بوو، دوڤدا بیرا من دهێت گۆتن ئەڤە (مەلا مستەرفا بارزانی) هات ویێ‌ بچوویك بووم و هاتنە دیف بابێ‌ من ڕا (محەمەد سالحێ‌) رەحمەتی بوو و چەندین كەسایەتیێن دی هەمی چووینە بەر رەحما خودێ‌ و بتنێ‌ بابێ‌ من ژێ‌ مایە و گۆتنە بابێ‌ من وەرە ل گەل مە دێ‌ چینە سەر مەغفەرا (دەرگەلا میسا بەگێ‌) و بابێ‌ من گۆتێ‌ دا بێژمە بابێ‌ خوە ئەوا گۆتێ‌ نە بێژە بابێ‌ خوە چونكە بابێ‌ تە قەبوول ناكەت، و باپیرێ‌ من مەلا بوو و بابێ‌ من ژ ناڤ نڤینا ئینا دەر و چوون و نەهـ 10 زەلام بوون، و جفتەك بابێ‌ من بوو یا باپیرێ‌ من (حجی سەدیقی) بوو(محەمەد سالح) خودێ‌ ژێ‌ رازی بیت ئنگلیزیەكا كورت ڤێ‌ بوو، و ئەو كەسێن دی هەر هەمی ب گوپال بوون و هەتا ژ گوندی دەركەفتین بوونە (13) زەلام هەر هەمی خەلگێ‌ گوندێ‌ چەم سەیدا بوون و ئێكی دگۆتنێ‌ (محەمەدێ‌ رحانێ‌) بەگ بوو یێ‌ گوندێ‌ سەفەریا بوو نیڤ دەمژمێرێ‌ ژ گوندێ‌ (چەم سەیدا) دوویرە و چوونە وێرێ‌ و ئەو ژی حزبیێ‌ (محەمەد سالحی) بوو و چایەك ل دەف ڤەخوارن و گۆتن هێشتا روناهی نەكەت بوو عەردی، و دونیا تاری بوو و دەمێ‌ چووین بۆ سەر مەغفەرا (دەرگەلێ‌) دیتن زەلامەكێ‌ ئاڤدانێ‌ دكەت و ئەوی گۆتێ‌ مامۆ زانیاری گەهشت بوونێ‌ و هەر هەمی رەڤینە و رێكا چەم سەیدا بۆ دەرگەلێ‌ رێكا دەمژمێرەك و نیڤا بوو، و دەمێ‌ نێزیكی گوندی بووین دیتن پولیس ل سەر هەسپانە و هندەك ب پیانە و چوون و كەسەك نەمابوو و (محەمەد سالح) گۆتێ‌ ئەزێ‌ چمە سەر رویبارێ‌ زێی هوون بزڤرنە ڤە و گۆت (مەلا مستەفا بارزانی) خودێ‌ ژێ‌ رازی بیت هاتیە سەر زێی و ئەزێ‌ چم و ئەڤە ل سالا 1961 بوویە وی دەمی گەهشتێ‌ و ل گەل مللەتی و بوونە نێزیكی 400 بۆ 500 زەلامان، و هەر چ گوندێ‌ بەرواری یا چوونێ‌ مرۆڤێن دلسوز دگەهشتنێ‌ و ژووردا هاتنە گوندێ‌ مە و بیرا من دهێت بابێ‌ من رابوو و گۆتە دایكا من تشتەكێ‌ ل گوندی دروست بووی نە رەمەزانە و نە جەژنە و ئەڤە چیە ل گوندی چ دبیت و دەمێ‌ بابێ‌ من دەركەفتی كەسەكی گازیكرێ‌ و گۆتێ‌ شریك دێ‌ كیڤە چی؟ گۆتێ‌ دێ‌ چم تەماشە كەمێ‌ ئەڤە چیە ل گوندی چ دبیت و ئەوا گۆتنێ‌ ئەو مالاتیە ل سەرێ‌ وی گركی؟ ئەوی گۆتێ‌ بەلێ‌ ئەو ماوەك بوو مە مالا خوە بربوو سەرێ‌ گركەكی و ئەوا كرە كەنی و گۆتێ‌ بزڤرە ڤە ئەڤە پێشمەرگێن (مەلا مستەفا بارزانی) نە و 500 زەلام ل گوندی نە و (مەلا مستەفا بارزانی) هاتبوو مالا خەزیرێ‌ من (محەمەد سالح) خودێ‌ ژ هەردوكان رازی بیت و ب شەڤێ‌ هاتبوون و گوند هەمی هشیار ب بوون و خوارن بۆ دروستكر و هەر سپێدێ‌ ب شەڤ (مەلا مستەفا بارزانی) ل گەل لەشكرێ‌ خوە ژ گوندی دەركەفتن و ئەڤە چونكە سپێدێ‌ زووی فرۆكێن دوژمنی دهاتن و پێشمەرگە هاتنە گوندێ بازێ‌ و ئێكی دگۆتنێ‌ یاسین بازی ل گەل خوە بر و هاتنە دەڤەرا گەلیێ‌ سپی و ل وێرێ‌ شەرەك دروست بوو و بەرەف دەڤەرێن جودا جودا چوون ل بەهدینان.
هەمان پێشمەرگەیێ‌ شۆرەشا گولانا پێشكەفتنخواز ئەو ژی گۆت: حوكمەتا وی سەر دەمی ب چەكەكێ‌ گران و هێزەكا مەزن ژ چەتا و لەشكری ل دەڤەرا دوسیكیا و ل گوندێ‌ ئێك مالا عەلی گێندەلی شەرەكێ‌ مەزن چێ‌ بوو وی شەری خەزیرێ‌ من (محەمەد سالح) تڤەنەك ب پێ‌ وی كەفت و بریندار بوو وی دەمی چەكێ‌ پێشمەرگەی بتنێ‌ تڤەنگ بوون و یێ‌ سنورداركری بوو و پێشمەرگە شكەست و بەرەڤ گوندێن( رابینا و ئورمانا) و دەڤەرا بەرواری یا ڤە هاتن و شەر كەفتە چیایێ‌ گامێركی دروست بوو ل ناڤ بەرواری یا وی دەمی ب برینداری ڤە دەمارا سپی یا پێ‌ خەزیرێ‌ من بری وی دەمی هندەك مرۆڤێن وی (یاسین بازی و محەمەد عامر بێدهی) یێ‌ مالا عەزو وان خودێ‌ ژ هەمیان رازی بیت و ئەو ل گەل هاتن هەتا ئینایە گوندێ‌ (چەم سەیدا) و چەتە دووڤدا هاتن و وی دەمی حوكمەت ل كانی ماسێ‌ بوو و چەتان گوتن دێ‌ ل گەل خوە بەین و هندەكا گۆتن نابەین و دووڤدا شەر كەفتە دەڤەرا (ئورمان و رابینا) و (محەمەد سالح) گەلەك قەهری وەكی دیتی دوژمنێن وی هاتینە هنداڤ سەرێ‌ وی گەلەك قەهری و خوینا پێ‌ وی نە راوستیا و دبرینا خوە دا شەهید بوو و چوو بەر رەحما خودێ‌، وی دەمی (سەید نوری) كورێ‌ پسمامێ‌ وی بوو نوكە ل ئەمریكا دژیت و پێشمەرگەكێ‌ گەلەك زیرەك بوو و هێشتا گەلەكێ‌ بچوویك بوو و (سەید یاسین) و ئێكێ‌ دیە دگۆتنێ‌ (ئەحمەد) و (یاسین و ئەحمەد) چووینە بەر رەحما خودێ‌ و (سەید نوری) ل سالا 1961 پشتی وەغەركرنا پسمامێ‌ بابێ‌ خوە چوو دەف (ئەسعەد خوشەبی) ل قومریێ‌ و (ئەسعەد خوشەبی) گۆتێ‌ تو ژ كیڤە دهێی ؟ ئەوی گۆتێ‌ هاتیمە بخوە تڤەنگەكێ‌ و پێشمەرگەكی گۆتێ ئەزبەری ئەڤە پسمامێ‌ شەهید (محەمەد سالح) چەم سەیدی یە وی دەمی تڤەنگەك دا (سەید نوری) زڤری ڤە و نە دا ئەوێن ل گەل و سالا دووڤدا (سەید ئەحمەد و یاسین) چوون و تڤەنگ دانێ‌ و ئەو ژی بوونە پێشمەرگە،(سەید سالح) بابێ‌ سەید(ماجد) پێشمەرگە و قەهرەمانەكێ‌ بناڤ و دەنگە وی دەمی شانا وان ل لەشكریێ‌ ئاشكرا بوو و مەترسی كەفتە سەر ژیانا وان و ئەو 22 عەریف بوون خەلكێ‌ دەڤەرێ‌ و نەچار بوون هاتن و پەیوەندی ب پێشمەرگەی و شورەشا ئیلۆنا مە زن كر و (نەجمەدین) ل گەل سەید( سالحی) وا چوو دەف (ئەسعەد خوشەڤی) گۆتێ‌ ئەڤە ژی گوندیێ‌ شەهید (سالحی) یە و بوونە پێشمەرگە و رێكخستنا پارتایەتیێ‌ هەر ل گوندێ‌ چەم سەیدا یا بەردەوام بوو و پتریا زەلامێن چەم سەیدا هاتنە دناڤ رێكخستنێن پارتی دیموكراتی كوردستان دا.

3

سندس سالح سلێڤانەیی:

ئەكتەرێ‌ بەرنیاس (سیروان گۆیی) د دیدارەكێ‌ دا بۆ رۆژنامەیا ئەڤرۆ گۆت: پێشكێشكرنا بەرنامەیێ‌ (بۆخچك) د هەیڤا رەمەزانێ‌ دا ژلایێ‌ من و ئەكتەرا بەرنیاس (زۆزان خدر) ل دووف هەلبژارتنا كەنالێ‌ وار بوو، چنكو وان دزانی من و زۆزان خانێ‌ گەلەك دراما یێن پێكڤە چێكرین و ئەم پتر د هەڤدۆ دگەهین، لەورا ئەم هەلبژاتنین و هیڤیا من ئەوە دڤێ‌ هەیڤا پیرۆزدا بشێین گرنژینەكێ‌ بێخینە سەر لێڤێن بینەران.
هەروەسا گۆت: مە دڤیا ئەم شیانێن خۆ وەك پێشكێشكار ژی بۆ بینەران دیاركەین و بێژینە وان ئەم دشێین بەرنامەی ب شیوەیێ‌ لایڤ پێشكێش بكەین، ئەز ب باوەرم ئەكتەری جیهانەكە و پێشكێشكرنا بەرنامەیەكی ل ستۆدیۆیێ‌ جیهانەكا دی یە، بۆ زانین بۆ پشتی رەمەزانێ‌ د پلانێ‌ دایە كو پێشكێشكاری یا بەردەوام بیت، هەروەسا دێ‌ درامایەك ژی هەبیت، لێ‌ وێنەكرنا وێ‌ دێ‌ چیتە پشتی جەژنێ‌، بۆ پاشەرۆژێ‌ ژی هندەك هزر و پلان هەنە و هیڤیا من ئەوە ئەم بشێین وانژی بجه بینین.

9

زنار تۆڤی:

وێنەگر (نیزامەددین پیرینجی ئۆغلو) كو ل باژێرێ‌ ئامەدێ‌ دژیت، د دیدارەكێ‌ دا بۆ رۆژنامەیا ئەڤرۆ گۆت: من ل زانكۆیا دیجلە پشكا ئابۆری ل ئامەدێ‌ خواندیە، هەروەسا بەری ئەز كارێ‌ وێنەگریێ‌ بكەم، ئەز چیاگەر بووم، ئەز ل چیایێن باكورێ‌ كوردستانێ‌ و میزوپۆتامیا، دناڤبەرا چەمێن دیجلە و فۆراتی دا گەڕیایمە، دیسا ئەز چوویمە چیایێ‌ ئاراراتێ‌، كو 5 هزار و 137 مەتران یێ‌ بلندە، هەروەسا ئەز چوویمە چیایێ‌ رەشكۆ (جیلۆ) ل جۆلەمێرگێ‌، ئەو چیا ژی 4 هزار و 135 مەتران یێ‌ بلندە، ئەز چوویمە چیایێ‌ سیپانێ‌ خەلاتێ‌ ل بەدلیسێ‌، ئەو ژی 4 هزار و 50 مەتران یێ‌ بلندە و گەلەك حەزژ گەریانا چیایان دكەم.
ناڤهاتی گۆت: ئەز گەلەك حەزژ سروشتی و جهێن دیرۆكی دكەم، ڤێ‌ چەندێ‌ گەلەك كارتێكرن ل سەر من هەیە، ئەڤە 15 سالن ل باكورێ‌ كوردستانێ‌ ئەز كارێ‌ وێنەگریێ‌ دكەم، هەتا نوكە من نێزیكی ملیۆن وێنەیان گرتینە، هەروەسا من چەندین وێنە و ڤیدیۆ ژی ب مۆبایلێ‌ گرتینە و ل فێسبووكی و ئینیستیگرامی بەلاڤكرینە و باكورێ‌ كوردستانێ‌ بۆ مە وەكو بەهەشتێ‌ یە.

7

هیڤی كەریم:

دوعا هەجەر ئەحمەد، كچەكا بەهرەمەندا خەلكا دهۆكێ‌ یە، دەرچۆیا پەیمانگەها هونەرێن جوان/ پشكا شانۆیێ‌ یە، نوكە فەرمانبەرە ل پشكا راگەهاندنێ‌ ل پەیمانگەها رەند، د دیدارەكێ‌ دا بۆ رۆژنامەیا ئەڤرۆ دبێژیت: كارێ‌ من ل پەیمانگەهێ‌ رێكخستنا گەشتێن قوتابیان و ئاهەنگ و چالاكیانە، نە بتنێ‌ دبۆارێ‌ كارگێڕی دا، بەلكو دبۆارێ‌ تەكنیكی و سۆشیال مەدیا و ب رێڤەبرنا ئەكاوەنتێن پەیمانگەهێ‌، هەروەسا وەك وێنەگر و دۆبلێر ژی كاردكەم و من باوەریەكا مەزن ب كارێ‌ خۆ هەیە، لەورا دێ‌ یا بەردەوامبم.
هەروەسا گۆت: من باوەریەكا مەزن ب وێ‌ چەندێ‌ هەیە كو هونەر و راگەهاندن بنیاتێ‌ هەموو بۆارێن دی یێن ژیانێ‌ نە، چنكو ئەون ئاراستەیێ‌ جڤاكی دیاردكەن، بۆ زانین وەك پێشكێشكار و ریكلامكەر ژی من بزاڤ كرینە وێنەیەكێ‌ جوان پێشكێش بكەم، هەرچەندە ل دەستپێكێ‌ هندەك رێگری و مەترسی هەبوون، لێ‌ ب ئیرادەیا خۆ شیام یا بەردەوامبم و وان ئاستەنگان نەهێلم و داخوازا من ژ كچێن بەهرەمەند ئەوە هەكە تەبەهرەیەك هەبیت بێی ترس دەستپێبكە و هەكە خێزان و جڤاك هاریكارێن تە بن دێ‌ ب سەركەڤی.

نيشاندان1...297298299...816زێده‌تر لاپه‌ر 298 ژ 816
مالپه‌رێ فه‌رمى یێ رۆژناما ئه‌ڤرۆ یه‌ .
ئاگــــــه‌هــــــداری نـــــوویـــــــاتیـــــــان ببــــه‌ .
په‌یوه‌ندی : [email protected]
website security
© Copyright 2021 - Rojnameya Evro - Powered by Kurdo Plus
809 queries in 0.477 seconds.
WP Facebook Auto Publish Powered By : XYZScripts.com