زانكۆیا دهۆك ب شانازی ڤە بارەگایێ نوو یێ كوژیێ ئەمریكی، كو دكەڤیتە ناڤەندا قوتابیان، دوهی 9/9/2025 د رێورەسمەكێ‌ تایبەت دا ب ئامادەبوونا قونسلا گشتی یا ئەمریكا خانم وێندی گرین و سەرۆكێ زانكۆیا دهۆك دكتۆر داوود سلێمان ئەتروشی ڤەكر.
كوژیێ ئەمریكی وەكو بنگەهەك بۆ لێكگوهۆڕینا كەلتووری، فێركرنێ و شیاندنا قوتابیان رۆلێ‌ خۆ گێڕایە و ب تنێ د سالا بۆری دا، پتر ژ 40 چالاكی رێكخستبوون و دو هزار و 850 كەسان پشكداری تێدا كربوو.
قونسلا گشتی یا ئەمریكا ل هەرێما كوردستانێ‌ پەسنا زانكۆیا دهۆك كر و گۆت: «گەنج سەركردێن مەنە، پاشەرۆژ د دەستێ وان دایە».
كوژیێ‌ ئەمریكی دێ‌ دەلیڤەیێن نوو بۆ گەنجان، دیالۆگێ و داهێنانێ دروستكەت.

دهۆك، دلۆڤان ئاكرەیی:

ڕێڤەبەرییا گشتی یا ئاڤ و ئاڤڕێژێن هەرێما كوردستانێ دیاركر، بۆ جارا ئێكێ د دیرۆكا هەرێمێ دا، سیستەمێ سەلامەتیا ئاڤێ كەڤتیە د وارێ بجهئینانێ دا، ئەڤ سیستەمێ نوو، كو نێزیكی سال و نیڤایە كار تێدا دهێتە كرن و ماوێ هەشت مەهانە د قووناغا كۆمكرنا داتایان دایە، ئارمانجا وی یا سەرەكی پاراستن و بلندكرنا ئاستێ خزمەتگوزاریێن ئاڤێ یە ل سەرانسەری هەرێما كوردستانێ.
ئاری ئەحمەد، ڕێڤەبەرێ گشتی یێ ئاڤ و ئاڤڕێژێن هەرێما كوردستانێ بۆ رۆژنامەیا ئەڤرۆ گۆت: «ئەڤ سیستەمێ پلانا سەلامەتیا ئاڤێ، وەكو بانكەكا زانیاریان بۆ كەرتێ ئاڤێ كار دكەت و هەمی زانیاریێن گرێدایی بەرهەمئینان و بەلاڤكرن، پشكنینێن بایۆلۆجی و كیمیایی و هەمی هووركاریێن دی یێن تایبەت ب ئاڤێ، دێ د ڤی سیستەمی دا هێنە تۆماركرن».
ناڤهاتی خویا ژی كر، ڕۆژانە داتایێن تایبەت ب قەبارێ ئاڤا بەرهەمهاتی ل وەستگەهان، ڕێژەیا بەلاڤكری، قەبارێ ب كارهاتی ژ لایێ هەڤپشكان ڤە و قەبارێ ب هەدەرچووی و هەتا قەبارێ وێ ئاڤا ب تانكەران دهێتە بەلاڤكرن، دێ هێنە كۆمكرن و گۆت: «ئێك ژ ئارمانجێن سەرەكی یێن ڤێ پلانێ، دیاركرن و چارەسەركرنا بلەزا هەر مەترسیەكێ یە، كو ڕوو ب ڕووی ژێدەرێن ئاڤێ دبیت، چ ئەو مەترسیە نێزیك بیت یان ژی دوور و بجهئینانا ڤی سیستەمی پشكەكە ژ بزاڤێن حوكمەتا هەرێما كوردستانێ بۆ پێشڤەبرنا حوكمەتا ئەلیكترۆنی د كەرتێن جودا دا».
دهێتە چاڤەڕێكرن، هەتا سەرێ سالا نوو، سیستەمێ سەلامەتیا ئاڤێ ب تمامی بكەڤیتە كار و ببیتە ئەگەرەك بۆ دابینكرنا ئاڤەكا پاقژ و سەلامەت بۆ هەمی وەلاتیێن هەرێما كوردستانێ، هەروەسا ڕێگریێ ل ب هەدەردانا ڤی سامانێ گرنگ بكەت.

دهۆك، لەزگین جۆقی:

بەرپرسێ پڕۆژەیان ل باژێرڤانیا ناوچەداریا مسێریكێ راگەهاند، حكومەتا هەرێما كوردستانێ ب گوژمێ پتر ژ پینج ملیار دیناران پڕۆژەیێن جادە و ئاڤڕێژ و باخچەیان ل ناوچەداریا مسێریكێ ئەنجامداینە.
حەمود غەربی حەسەن، بەرپرسێ پڕۆژەیان ل باژێرڤانیا مسێریكێ بۆ ئەڤرۆ گۆت: «بەردەوام حكومەتا هەرێما كوردستانێ پڕۆژەیان ئەنجام ددەت، پشتی مسێریكێ د كابینا نەهێ دا بوویە ناوچەداری هەتا نوكە ب گوژمێ پینج ملیار و 400 ملیۆن دیناران پڕۆژەیێن جادە و ئاڤڕێژ و باخچە هاتینە چێكرن و ئاڤەدانی و پڕۆژە دبەردەوامن».

ئامێدیێ‌، مەحمود نهێلی:

ژ بۆ پتر گرنگیدان ب كەرتێ‌ چاندنێ‌ و خزمەتكرنا جۆتیاران و گەهاندنا ئاڤێ‌ بۆ مەرەما ئاڤدێریێ‌، پڕۆژەیێ‌ چێكرنا جۆیا چەمێ‌ مەهیدێ‌ ل گوندێ‌ گوهەرزێ‌ ب درێژاهیا پتر ژ سێ‌ كیلۆمەتران كەفتە د وارێ‌ بجهئینانێ‌ دا.
رێبەر سادق، رێڤەبەرێ‌ ناوچەدارییا دێرەلۆكێ‌ بۆ رۆژناما ئەڤرۆ دیاركر، دەست ب چێكرنا پڕۆژەیێ‌ جۆیا چەمێ‌ مەهیدێ‌ ل گوندێ‌ گوهەرزێ‌ هاتە كرن و گۆت: «بڕیارە د سێ‌ مەهێن دی دا ب دووماهی بهێت بكەڤیتە د خزمەتا جوتیارێن گوندی دا».
ناڤهاتی ئاشكرا ژی كر، ژ بەر شەر و ئالۆزیێن وێ‌ دەڤەرێ‌ زوو ئەڤ پرۆژەیە نەهاتە چێكرن و گیرۆ بوویە، لێ‌ نوكە رەوش هەتا رادەیەكی یا ئارامە و دەست بچێكرنا پڕۆژەی هاتە كرن و گۆت: «ژ بۆ ئەنجامدانا ڤی پڕۆژەی گوژمێ‌ 329 ملیۆن دیناران هاتینە تەرخانكرن».

سندس سالح سلێڤانەیی:

خودانێ نڤیسینگەها فرۆكەڤانیێ ل دهۆكێ دیاركر، نوكە نێزیكی (100) نڤیسینگەهێن فرۆكەڤانیێ ل سنۆرێ پارێزگەها دهۆكێ هەنە و كارێ وان یێ سەرەكی دابینكرنا تیكێتێن فرۆكە یانە بۆ گەشتیاران، هەروەسا پەیداكرنا هەر جۆرە ئاسانكاریەكێ بۆ گەشتیاران و گۆت: مە پەیوەندیێن باش ل گەل رێڤەبەریا گشتی یا گەشت و گوزارێ ل پارێزگەها دهۆكێ و ئێكەتیا كۆمپانیێن فرۆكەڤانی هەنە و ل گەل مە دهاریكارن.

‎‎ساندوڤان عەلی، خودانێ نڤیسینگەها (سون سوز) یا فرۆكەڤانیێ بۆ رۆژنامەیا ئەڤرۆ گۆت: ئەم سەر ب وەزارەتا گەشت و گۆزارێ ڤەینە، ل حكومەتا هەرێما كوردستانێ، ب مخابنی ڤە دێ بێژم ژ بەر رەوشا نوكە و گیرۆبوونا موچەیێن فەرمانبەرێن هەرێما كوردستانێ كارێ مە گەلەك لاواز بوویە و ئەڤە گازندەیا خودانێن هەموو نڤیسینگەهێن فرۆكەڤانیێ و وەكو مە گۆتی نێزیكی (100) نڤیسینگەهێن ب ڤی جۆری ل سنۆرێ پارێزگەها دهۆكێ هەنە.
زێدەتر گۆت: هەر نڤیسینگەهەكێ ژی چەندین كارمەند ل دەف كاردكەن و ب مووچەیێ خوە خێزانێن خوە پێ ب رێڤە دبەن، لێ مخابن نوكە ئەو هەموو نەمایە و رەوش گەلەكا ئالۆزە و ئەم دبینین تاكە ڕێ بۆ چارەسەریا ڤێ چەندێ كێشەیێن مە یێن هەرێمی، ب تایبەت یێن درایی بهێنە چارەسەركرن و مووچە د دەمێ خوە دا بهێنە بەلاڤكرن دا رەوشا مە هەموویان پێكڤە باشتر لێ بهێت و بازاڕێ مە گەرمتر لێ بهێت و داخوزێ ژ رێڤەبەریا رێڤەبەریا گشتی یا گەشت و گوزارێ ل پارێزگەها دهۆكێ دكەین، هەر چەندە ل گەل مە یا هاریكارە بەس بشێن پتر هاریكاریا مە بكەن و بزاڤێ بكەن هەر چو نەبیت هندەك جۆرە ئاسانكاریان بۆ مە دابین بكەن، ژ وانا هەكە بشێن هندەك هندەك باجەیان ل سەر مە كێم بكەن.