ژ نڤیسینا: دیستۆیەڤیسکی
و. ژ عەرەبی: شەمال ئاکرەیی

ھەر سال دایک و بابێن «مارتان»ێ زارۆک ب شەمەندەفڕێ ل گەل خۆ دبرە گوندی؛ داکو ھەمی بێهنڤەدانا ھاڤینێ ل وێرێ ب بۆرینیت، ئەو ب خۆ ژی د ھەمان رۆژ دا دزڤڕین و زارۆکێ خۆ ل نک داپیرا وی و کەسوکارێن خۆ دھێلا!
ل سالەکێ زارۆکی گۆتە دایک و بابێن خۆ: ئەز یێ مەزن بوویم و ژیێ من یێ بوویە دەھ سال، چما ئەز ب خۆ ب تنێ نەچم؟
دایک و باب، پشتی گەنگەشەیێ و رژدییا مارتانی، قاییل بوون.
دایک و باب ھەتا پەیاکێ ستاسیۆنێ ل گەل چوون و ئامۆژگاریێن خۆ بۆ وی دوبارە و سێبارە دکرن. زارۆکی ژی، دلتەنگییا خۆ ب ئامۆژگاریێن وان دەردبڕی و ل گەل خۆ دگۆت: ئەڤە بۆ جارا ھزارێ یە من گوھ ژ ڤان ئاخفتنان دبیت!
ھەر چەوا بیت، بەرییا شەمەندەفڕ ب رێ بکەڤیت، بابێ وی خۆ نێزیکی وی کر و د گوھێ دا ب دەنگەکێ ھێدی گۆتێ: ئەڤ کاخەزە بۆ تە یە، ھەر دەما تە ھەست ب ترسێ یان دلتەنگیێ کر، ئێکسەر و بێ دودلی بخوینە. بابێ زارۆکی کاخەز کرە د بەرویکا مارتانی دا.
پشتی بابی کوڕێ خۆ برییە د شەمەندەفڕێ ڤە و دانایە سەر کورسیکا وی، شەمەندەفڕ ب رێکەفت! زارۆک بۆ ئێکەمین جار د ژیانا خۆ دا، بێی دایک و بابێن خۆ د شەمەندەفڕێ دا ما.
د پەنجەرێ ڕا، ل دیمەنێن کێلگەھ و سروشتی دنێڕی، و گوھ ژ قەلەبالغییا دەنگێن رێڤینگێن بیانی دبوو، کو دناڤ شەمەندەفڕێ دا بلند دبوو. ژ دەرڤەی شەمەندەفڕێ دارستان و گوند ددیتن و دناڤ دا ژی ل دەردۆری خۆ خەلکەکێ بیانی ددیت، کو دھاتن و دچوون و ھندەکێن دی دھاتنە جھێ وان، ھەمییان ژی ب مەندەھوشی و نێڕینێن سەیر، بەرێ خۆ ددانە وی!!
بەلێ دەما پلیتبڕێ شەمەندەفڕێ نێزیکی وی بووی، پلیتبڕ ژی مەندەهۆش ما و مارتانی پلیتا خۆ ژ بەرویکا خۆ ئینادەر و نیشا پلیتبڕی دا. پلیتبڕی هندەک پرسیار ل مارتانی کرن و ژ بەر نەبوونا کەسەکی مەزن ل گەل وی ب کارەکێ نەیینی زانی!
ژنەک ل نێزیک وی یا روینشتی بوو، ب خەمگینی بەرێ خۆ دایێ و گۆتە پلیتبڕی: ئەو چ دایکە، زارۆکێ خۆ هۆسا دهێلیت، بابێ وی و کەس و کارێن وی کانێ نە، چەوا هۆسا ب تنێ هێلایە!؟ ما وان هزرا هندێ نەکریە، ئەگەر هات و بۆ نموونە شەمەندەفڕ ب شەڤ ژ کار کەڤت!؟
سەروسیمایێ مارتانی تێکچوو و چ پەیڤ ڤێ نەبوون بەرسڤا وان پێ بدەتەڤە، بەلکو زانی ئەو یێ د رەوشەکا نە ئارام دا، ئیدی هەست ب دودلی و هێبەتیێ کر و هندەکێ تێکچوو و دلێ وی ژ ترسا تشتەکێ نە دیار تژی بوو، کو رەنگە روی بدەت؛ لەوڕا ل سەر کورسیکا خۆ یا گەلەک مەزن هەمبەر کەلەخێ وی، خۆ ب چڕڤەئینا و خۆ کۆمکر، و سەرێ خۆ یێ بچویک کرە دنێڤبەرا هەردو چۆکێن خۆ دا، داکو سیمایێ دێمێ خۆ ژ وان ڤەشێریت! پاشڕا هەردو چاڤێن وی تژی رۆندک بوون و دەست ب گریێ کر و ل سەر هەلبژاردەیا خۆ، کو د گەشتێ دا یێ ب تنێ بیت، زۆر پەشیمان بوو.
ل وێ گاڤێ، بیرا وی ژ پەیڤێن بابێ وی هاتەڤە، دەما پارچە کاخەز کرییە د بەرویکا وی دا، داکو ل دەراڤێن تەنگ یێن مینا ڤێ رەوشا ئەو کەفتیێ بخوینیت. ب دەستێن لەرزۆکیڤە، د بەرویکا خۆ خەبتی و ئەو پارچە کاخەز ئینادەر و ڤەکر و تێدا خواند: « کوڕی من، مە حەزا تە بجهئینا، ئەڤە ئەز و دایکا تە یێن د فارگۆنا دویماهیێ یا شەمەندەفڕێ دا؛ چونکی دڤێت ئەم ژی سەرەدانا داپیرا تە بکەین و ژ رەوشا وێ و کەسوکارێن مە بپرسین!»
مارتان بلەز رابوو سەر پی یێن خۆ، هەر وەکی روحا وی بۆ زڤڕییەڤە، کو ژ بەر ترس و لەرزێ چ روح تێ نەما بوو!
رەوشا وی هاتە گوهۆڕین و ئارامی بۆ زڤڕی، دەستمالا خۆ ژ بەرویکا خۆ ئینادەر و رۆندکێن خۆ زوها کرن، هەمی ئەوێن ل دەردۆرێن وی ب نێڕینێن تژی باوەری بەرێ خۆ دانە وی. وەسا خۆیا بوو، کو وی دڤێت ببێژیتە وان:
ئەز نە یێ ب تەنێ مە، هەر وەکی هوین هزر دکەن! من دلۆڤانترین و باشترین دایک و باب ل ڤێ دنیایێ هەنە! من کەس و کار و خێزانەک یا هەی و ئەو گەلەک حەز ژ من دکەن!

ژێدەر: https://www.youtube.com/watch?v=VeStVfUUS6o

سەیفوللا محەمەد

بەختێ من بوو سال و دەمان
بووم هەلگرێ دەرد و خەمان
هـــەمی هیـڤی ب ڕێڤە مان
لێ من دەســـت ژ تە بەرنەدا

بریـــــــنا دلی پڕ كویـــر بوو
بهارا مــن بەیی و پیـــــر بوو
لێ من ئەو ڕۆژ هەر ل بیر بوو
ڕۆژا كـــەتیم دعەشـــقا تەدا

عەشــــقا تەیە ئەز ژار كـــرم
ژ خوەشیــــــیا بێ بار كـــرم
ل ڤێ ژیـــنێ بێـــــزار كـــرم
ئەز حەلیـــیام د حالێ خوەدا

ما كێ ئاگــەهـ ژ مـــن هەیە
هـــندە دل كۆڤــــــانێ تەیە
چ بێــــــژم ئێـــدی ژ خوەیە
بۆ عەشــــــقا دناڤبەرا مەدا

مە نەبوو بەخت ل ڤێ ژیــنێ
یا مـــــە ڤیای ب گەهیـــنێ
ئەم بوونە وەك مەم و زیــنێ
چیـــڕۆكا مە ژی دەنگـــڤەدا

سەدیق سنداڤی/ ئەلمانیا

من تو دڤێ
نەژبەر
لێڤێن تە یێن پفدای
چاڤێن تە، ێن بەربیپلک کری
جەرمێ سیمایێ تە یێ کشیای
ناڤتەنگا تە
ژ بەزی و رونی فشیایی
حاشا!!
ئەز نابێژم
ب سلیکۆنێ پرکرین
گروڤر و هلدای
ئەز حەز ژ تە دکم
تو ب خوە جوانی
کا چەوا خودێ تو دای.

سەگڤان ئیسماعیل

ئاخینك دهاتن خارێ، هەمی هیڤێن خوە ڕاچاندن بۆ ئەوان بیرهاتنێن دەم بسەرڤەچوویی، ژیان بەرەڤ هەناسەیا خوە یا هەلنگفتی دچۆ، ئەڤجا هەر جار دەمێ ئاخینکێن خوە دیتن لاوازی و بێهۆدەیی ئاسمانێ بهارێ بەرەڤ تاریبوونێ دچۆ…هەمی ئالاڤێن ژیانا خوەلی گرتنێ هیڤیێن چرمسی بەرەڤ بێهۆدەبوونا خوە ڕادەستی ئاڤابوونا ڕۆندکێن ب ڕەنگێ زەر بوویی دچۆ. دەم دچۆ..دەم دچۆ..هەر دەمێ دبێژی یا بوویی کۆلبە ب چ کەسێ ڕا نەدگەهشت.. ئەوی هیڤیێن ڕاچاندن بۆ گەهشتنا هەلاویستی و ئازار و خەمگینی گەهشتنە كۆپیتکا کەفتنا بێ ڕابوون. دەمێ بیرهاتن دوبارە دبوون ئێکسەر ڕۆژا پێنجشەمبیا ڕەش هاتە بیرێ؛ دەمێ دگۆت دێ هزرا خوە کەم پاشی دێ بەرسڤا خوە دەم…لێ بەرسڤا ئەوێ ڕەنگەکێ زەر بوو و خوبایبوونا خوە دا گەهشتبوو كۆپیتکا سەرێ كۆپێ کەمباخگرتی.
ل دووماهیێ هەمی هیڤیێن من نە بوون ڕاستی ژ ئەگەرێ بێدەستهەلاتدارییا من، ئەگەر ئەز ژی وەکی بەرێزی خودان هەبوون بام دبیت جارا ئێکێ دا بێژی بێتە ژیان یا ڕەشە ڕووتە…دەرگەهێن د چوون ئەڤینا تە هەمی بەرامبەری من د هاتنە گرتن.. بهارا من ژی ل داوییێ بوونە هەڤال دگەل ڕۆندکێن هەناسەیێن من ئەوێن هەڤرکی د کرن بۆ ئەوان شکەستنێن بووینە پەیام دگەل هەست و نەستا تێکەلی هەڤبوون، هەر جار وەکی ژیێ دانعەمرەکێ هەڤرکیێ د کەت لگەل هەبوونا ژیانا نە وەکهەڤ.