دهۆك، لەزگین جۆقی:
بۆ جارا ئێكی كۆمەلگەهەكا كارگێڕی ب شێوەیەكێ مۆدرێن و سەردەمیانە ل ناوچەداریا خانكێ دئ هێتە دروستكرن.
زەردەشت شێخ شامۆ، ڕێڤەبەرێ ناوچەداریا خانكێ بۆ ئەڤرۆ گۆت: «دەست ب دروستكرنا پڕۆژەیێ ئاڤاهییێ ناوچەداریا خانكێ هاتییە كرن، كو ب گوژمێ پتر ژ ئێك ملیار دیناران دهێتە بجهئینان».
گۆت ژی: «پشتی پڕۆژە تەمام دبیت، هەموو فەرمانگەهێن خزمەتگوزاری د ڤی ئاڤاهی دا دێ خزمەتا خەلكی كەن و كارێن وان ب ڕێڤەبەن».
رەمەزان زەكەریا:
د چارچۆڤێ بزاڤێن بەردەوام یێن باژێرڤانیا ئاكرێ دا بۆ پێشخستنا ژێرخانا باژێڕی و باشتركرنا جادەیێن هاتنوچوونێ، جادەیێن ناڤخۆیی ل تاخێ 11ی ئیلۆنێ ب شێوازەكێ ئەندازیاری و ڕێكوپێك دهێنە بەرفرەهكرن.
زێرەڤان تەمۆ، پەیڤدارێ سەرۆكاتیا باژێرڤانیا ئاكرێ بۆ ئەڤرۆ گۆت: «بەرفرەهكرنا جادەیان دبیتە سەدەم بۆ سنۆرداركرنا ئاستەنگ و قەلەبالغیا ترۆمبێلان د ناڤا تاخی دا و ب ساناهیكرنا هاتنوچوونا رۆژانە یا ئاكنجیان و شۆفێران و جوانكرن و ڕێكخستنا تاخان و ل سەر پێشینەیا هەیڤانەیا باژێرڤانیا ئاكرێ ئەڤ پرۆژە دهێنە بجهئینان».
دهۆك، لەزگین جۆقی:
جێگرێ پارێزگارێ نەینەوا بۆ رۆژنامەیا ئەڤرۆ دیار كر كو شنگالێ پێدڤی ب بجهئینان و بهێزكرنا خزمەتگوزاریێن سەرەكی و ئاڤاكرنێ هەیە.
غەزوان ئەلداودی، جێگرێ پارێزگارێ نەینەوا ئاشكرا كر، شنگالێ پێدڤی بجهئینان و بهێزكرنا خزمەتگوزاریێن سەرەكی و ئاڤاكرنا سەنتەرێ دەڤەرداریێ و گوندێن سەر ب وێ ڤە هەیە.
ناڤهاتی گۆت: «ئەم دوپاتییێ ل گرنگییا ئێكخستنا بزاڤێن حكومەتا خوەجهی و هەڤپشكان ل گەل ڕێكخراوێن نێڤدەولەتی دكەین، بۆ دابینكرنا هەموو ئاسانكاریێن پێدڤی بۆ سەرئێخستنا پلانا وەبەرهێنان و گەشەپێدانێ، دا كو ببتە ئەگەرێ بلەزكرنا پرۆسێسا ئاڤاكرنێ و دەستەبەركرنا ئارامی و گەشەپێدانا بەردەوام ل دەڤەرێ».
زاخۆ، دلۆڤان هالۆ:
جگەرخوین تاهر، ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو پڕۆژەیەكێ نوو یێ وەبەرهێنانێ، كو هۆلەكا سینەمایێ یا مەزنە، ل سەر ڕووبەرێ دو هزار مەتران و ب گوژمێ ئێك ملیۆن دۆلاران، ل ئیدارەیا سەربخوە یا زاخۆ دێ هێتە دروستكرن.
ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ گۆت: «ئەڤ هۆلا سینەمایێ ل دەمەكێ نێزیك ل سەر جاددەیا 60 مەتری د ناڤبەرا گوندێ دەشتمرێ و نیۆ زاخۆ دا دێ هێتە دورستكرن، كو ژ 306 كورسیێن ڕوونشتنێ پێك دهێت».
گۆت ژی: «د ڤی پڕۆژەیی دا خوارنگەهـ و پەرتووكخانەكا بچووك و پاركا دو نهۆمی یا ڕاوەستاندنا تڕۆمبێلان هەیە، دیسا د پلانا مە دایە، ل داهاتی فیستەڤالا فلمان ژی ل ڤێ هۆلا سینەما زاخۆ بهێتە ئەنجامدان».
بەرپرسەکێ تورکیا دیار دکەت یاسایا ئاشتیێ دێ د زووترین دەم دا ل پەرلەمانێ تورکیا دەرکەڤیت و هەموو ئەندامێن پەکەکێ یێن بچنە تورکیا دێ بۆ دەمەکێ ل ژێر چاڤدێریێ دا بن و ناهێنە دەستەسەر کرن و هەروەسا ژ بۆ ئۆجەلانی چو تشتەک تایبەت نینە.
بەرپرسەکێ تورکیا کو ناڤێ وی نەهاتیە ئاشکرا کرن بۆ ئاژانسا دویچە یا ئەلمانی دیار کریە، چارچۆڤەیا یاسایا ئاشتیێ تەمام بوویە و نها سەرۆکێ پەرلەمانێ تورکیا ل گەل فراکسیۆنێن ل پەرلەمانی دانوستاندنان دکەت دا پشتەڤانیا وان بۆ یاسایا ئاشتیێ بدەستڤە بینیت و یاسایا ئاشتیێ دێ بیتە دەستپێکەکا گرنگ بۆ هەموو تورکیا.
هەمان بەرپرسی ئەو یەک ژی دیار کریە، پشتی یاسا دەرکەڤیت دێ ژ ئالیێ سەرۆک کۆمارێ تورکیا ڤە ب فەرمی هلوەشاندنا پەکەکێ هێتە راگەهاندن و پاشی دێ چار هەتا شەش سال بۆ تەمامکرنا پرۆسیسا ڤەگەرا ئەندامێن پەکەکێ بۆ تورکیا هێتە دیار کرن و ل گۆر یاسایێ ئەو ئەندامێن پەکەکێ یێن کو پشکداری د چو چالاکیێن سەربازی دا نەکری دێ ڤەگەرنە و دبیت بۆ دەمێ دو سالان ل ژێر چاڤدیریێ دا بن، لێ ناهێنە دەستەسەر کرن و هەروەسا کەسێن کو تاوانێن مەزن ل دژی تورکیا ئەنجام داینە ژی دێ دەمێ زیندانکرنا وان هێتە کێم کرن و دبیت بۆ دەمێ چار سالان بیت.
ل گۆر هەمان بەرپرسی د یاسایا ئاشتیێ دا چو تشتەک تایبەت بۆ ئۆجەلانی نینە، لێ دەم پارتی و ئۆجەلان ئەو یەک ب توندی رەت کرینە، چونکی هەم دەم پارتی و قەندیل و هەم ژی ئۆجەلان دخوازن کو وی پێگەهەک تایبەت هەبیت و ئازادیا سیاسی هەبیت و مەرجێن وی بهێنە باشکرن دا بشێت ب ئازادی کار و خەباتا خوە بکەت، لێ هەتا نها ژ ئالیێ ئاکپارتیێ ڤە ئەو یەک نەهاتیە قەبوول کرن و دانوستاندن بەردەوامن.
ئەو یەک د دەمەکێ دایە هەڤسەرۆکێ دەم پارتی تونجەر باکرهان بەری دو رۆژان و پشتی هەڤدیتنا ل گەل سەرۆکێ پەرلەمانێ تورکیا دیار کر، دڤێت یاسایا ئاشتیێ یا بەرفرەه بیت و گرنگە رەوشا ئۆجەلانی بهێتە باشکرن و هەروەسا دڤێت یاسا رێ بۆ بەرپرسێن پلە بلند یێن پەکەکێ ژی خوەش بکەت دا ئەو بشێن ڤەگەرنە ڤە تورکیا و هەکە ئەو یەک نەهێتە کرن دێ ئالۆزی روو دەن.
چاڤدێرێن سیاسی ژی دیار دکەن، دەولەتا تورکیا دڤێت یاسا ب تەمامی د بەرژەوەندیا وێ دا بیت و هەتا نها چو تشتەک وەسا تێدا نینە کو ببیتە جهێ دلخوەشیا کوردان و ژ بەر ڤێ یەکێ ژی هەکە بەری یاسا بچیتە پەرلەمانێ تورکیا چو گوهۆڕینێن بەرچاڤ تێدا نەهێنە کرن دبیت ئالیێ کوردی دژبەریا خوە دیار بکەت و وی دەمی قووناغا ئاشتیێ وەکو دهێتە خواستن بەردەوام نابیت.
سەرۆکێ پەرلەمانێ ئیرانێ دیار کر، ئەمریکا و ئسرائیلێ گەلەک پیلان ل دژی ئیرانێ گێران و نها ژی پیلانێن وان د بەردەوامن، لێ هەتا نها هەموو پیلانێن وان ل دژی ئیرانێ هاتنە ژناڤبرن و گەلێ ئیرانێ شیا خوە راگریت و دێ هەتا دووماهیێ ژی ل دژی ئەمریکا و ئسرائیلێ شەڕی کەین و دێ وەلاتێ خوە پارێزین.
محەمەد باقر قالیباف دیار کر، ئەمریکا و ئسرائیلێ کار بۆ پارچەکرنا ئیرانێ دکرن و دخواستن هندەک پێكهاتەیێن ل ئیرانێ بکار بینن، لێ د بزاڤێن خوە دا سەرکەفتی نەبوون، وان ب هەموو رەنگەکێ کار بۆ گوهۆڕینا دەستهەلاتا ئیرانێ دکرن، لێ حوکمەتا ئیرانێ نها پتر ژ هەر دەمەکێ بهێزە و ل دژی پیلانێن دوژمنان سەرکەفت.
ناڤهاتی ئەو یەک ژی دیار کر، ئارمانجا ئەمریکا ژ دانوستاندنان ئەو بوو دا ئیرانێ نەچار بکەن هەموو داخوازیێن وان قەبوول بکەت، لێ ئیرانێ ب رەنگەکێ باش بەرسڤا ئەمریکا دا و نها ژی وان دڤێت ل باشوورێ ئیرانێ ئالۆزیان دروست بکەن، هەکە ئەمریکا و ئسرائیل کار بۆ داگیرکرنا باشوورێ ئیرانێ و کۆنترۆلکرنا دەرتەنگا هورمزێ بکەن دێ شەڕەک گەلەک مەزن ل دژی وان هێتە کرن، خەلکێ ئیرانێ ب چو رەنگەکێ هێزەکا داگیرکەر قەبوول ناکەت و خەلک دێ هەتا دووماهیێ شەڕی بۆ پاراستنا وەلاتێ خوە کەن و گۆت: (هەکە ئەمریکا بڤێت پرسێن هەی چارەسەر بکەت وی دەمی گرنگە رێزێ ل داخوازی و ئیرادەیا گەلێ ئیرانێ بگریت و دەست ژ زێدەگاڤیێن خوە بەردەت).
پهروين سالح:
بازاڕێ کڕین و فرۆتنا ترومبێلان ئێکە ژ وان بازاڕێن کو زۆرترین کارێن ساختەکاری و فێلبازیێ تێدا دهێنە ئەنجامدان. بەری کڕینا هەر ترومبێلەکا بکارئینای، دڤێت کڕیار هزار و ئێک حسابان بۆ خۆ بکەت دا کو نەکەڤیتە د داڤێن ساختەکاران دا. ئەڤە ژی چەند خاڵەکن بۆ ناسینا کارێن ساختەکاریێ د ترومبێلان و پیوەرێن وان دا:
ئەگەر تە ڤیا ترومبێلەکا بکارئینای بکڕی، دڤێت یێ هویربین بی، چونکی زۆر جاران فرۆشیار یاریێ ب پیوەرێ کێلۆمەترێن ترومبێلێ دکەن؛ د دەمەکێ دا کو زۆر هاتییە بکارئینان، ب بهایێ ترومبێلەکا کێم بکارئینای دفرۆشن. د ڤێ چەندێ دا پێدڤییە ڕەچاویا ڤان خاڵان بکەی:
١- ب شێوەیەکێ ناڤنجی، ترومبێل سالانە (٢٠) هزار کێلۆمەتران دبڕیت. ئەگەر تە ڤیا ترومبێلەکێ بکڕی کو تەمەنێ وێ (٥) سال بن و پیوەرێ کێلۆمەترێن وێ ل خوار (٩٠) هزار کێلۆمەتران بیت، وێ بکە خاڵەکا گومانێ و دویڤچوونێ بۆ بکە؛ چونکی ب شێوەیەکێ ئاسایی ترومبێل ل سەری (١٠٠) هزار کێلۆمەتران دەست ب کێمبوونا شیانان دکەت و خەرجیێن وێ زێدە دبن. هەرچەندە ئەڤە ب جۆرێ ترومبێلێ و چەوانیا بکارئینانێ ڤە ژی گرێدایە، کو ب ساناهی مروڤ دشێت هەست پێ بکەت کا ئەو ترومبێلە یا ماندی کرییە یان نە.
٢- ئێکەم تشت کو پێدڤییە ل سەر بوەستین، خودانیکردن و بەلگەنامەیێن ترومبێلێ نە، وەک ژمارە، سالنامە و هەر بەلگەنامەیەکا دی. هەروەسا هەڤبەرکرنا وان ژمارەیێن ل سەر سالنامێ دگەل ژمارەیێن ل سەر ترومبێلێ، وەک ژمارا شاسی و بزوێنەرێ (مەکینێ)، دگەل مۆدێلا ترومبێلێ. زێدەباری ڤێ چەندێ دڤێت ئاگەهدار بین کو ترومبێل چ کێشەیێن تایبەت نینن، وەک ماوێ قیستان یان قەرزێن ل سەر، و ساخیا خودانێ وێ.
٣- پشکنینا تەمام بۆ بهدهنێ (بۆدی) ترومبێلێ، دا کو ڕێژەیا بۆیاغێ یان گوهۆرینا پارچان بزانی. هەروەسا دڤێت یێ هویربین بی کا ئەو ترومبێلە تووشی روودانێن هاتنوچوونێ بوویە یان نە، و جۆرێ روودانێ چی بوویە؛ چونکی هەر گوهۆرینەک د پارچەیێن ترومبێلێ دا بهایێ وێ یێ کریاری کێم دکەت. بۆ زانینا جهێن لێدایی یان هەبوونا مەعجوونی (ههڤيرى) ل بن بۆیاغێ، تو دشێی مفای ژ مەگنەتیسەکێ بچووک وەربگری.
٤- ب هویربینی تەماشای پایدەران بکە، چونکی پایدەرێن ترومبێلێ ب تەخەکا لاستیکی هاتینە داپۆشین، ب تایبەتی پایدەرێ ئیستۆپێ. بکارئینانا زێدە دبیتە ئەگەرێ خوران و نەمانا وێ تەخا لاستیکی، ئەڤە ژی دشێت ببیتە نیشانەک بۆ زانینا ڕادەیێ بکارئینانا ترومبێلێ.
٥- بزوێنەرێ (مەکینێ) وێ پێبخە و گوهێ خۆ بدە هەر دەنگەکێ نائاسایی. تەماشای ئەگزۆزێ بکە کا دوکێلا سپی یان شین دەرنائیخیت. قەپاغێ ڕۆنی یێ ل سەر مەکینێ ڤەکە و بزانە کا هەلما ڕۆنی ژێ دهێت یان بڕا ڕۆنی چەندە؛ زێدەبوونا هەلما ڕۆنی نیشانا هەبوونا کێشەیێ یە د بزوێنەری دا.
٦- ئەگەر ترومبێلێ تەبرید هەبیت، پێدڤییە ل جهی بهێتە تاقیکردن و ژ کارکرنا وێ پشتراست ببی.
٧- پشکنینا تایەیان؛ ب شێوەیەکێ ئاسایی نابت کویراتیا نەخشێ (گرنجێن) تایەیان ژ (٥) ملم، واتە نیڤ سانتیمەتر کێمتر بیت، ب تایبەتی د وەرزی زستانێ دا. هەر خرابیەک د تایەیان دا بهایێ ترومبێلێ کێم دکەت.
٨- پشتی ڤان گاڤان، پێدڤییە کڕیار یان کەسەکێ شارەزا بۆ دەمەکێ ترومبێلێ بهاژۆت؛ باشترە ئەگەر ل سەر جاددەیەکا نەقیرکری بیت دا کو بزانی کا سیستەمێ ڕاگرتنێ (پێش و پاش) یێ ترومبێلێ چ دەنگان دکەت، یان دەبڵێن وێ یێن لاوازن یان نە، و بزانی شیانێن ئیستۆپێ چەوانن. هەروەسا د ڤێ تاقیکردنێ دا دشێی هەست ب هێزا بزوێنەری و کێشەیێن گێڕبۆکسێ بکەی.
٩- ئەڤە و چەند خاڵێن دی ژی وەک پشکنینا لایتان، کارەبێ و بارودۆخێ ناڤخوە یێ ترومبێلێ.
١٠- ژ هەموویان گرنگتر ئەوە، بێی پرسا کەسەکێ شارەزا چ بهایان نەدە چ ترومبێلێن بکارئینای.
سندس سالح سلێڤانەی:
کۆمپانیێن بەرهەمهێنەرێن ترومبێلان ل ژاپۆن بەرەڤ گاڤەکا دیرۆکی دچن بۆ ئێکخستنا ستانداردێن بەرهەمهێنانێ و پارچەیێن ترومبێلان، دا کو تێچوونا چێکرنێ ب شێوەیەکێ بەرچاڤ کێم ببیت و پێگەهێ خۆ ل هەمبەر گەشەکرنا خێرا یا براندێن چینی بپارێزن.
دەسپێشخەریا تۆیۆتا
(کۆجی ساتۆ) سەرۆکێ کۆمپانیا تۆیۆتا و ئێکەتیا چێکەرێن ترومبێلان ل ژاپۆن (JAMA) پێشنیار کریە کو هەموو کۆمپانیێن ژاپۆنی ببنە خودان ئێک ستاندارد و یەکەیێن چێکرنا هەڤپشک بۆ پارچەیێن لاوەکی (وەک وایرینگ، بۆڕی و بەستەرێن فیزیکی).
پشتەڤانیا نیسان و هۆندا
(ئایڤان ئێسپینۆزا) سەرۆکێ کۆمپانیا نیسان ب تەمامی پشتەڤانیا خۆ بۆ ڤێ هزرێ دیار کریە، هەروەسا کۆمپانیێن هۆندا، نیسان و میتسوبیشی ژ بەری نوکە ڤە دانوستاندنێن خێرا دکەن بۆ بکارئینانا یەکەیێن کۆنترۆلا ئەلیکترۆنی یێن هەڤپشک (ECU).
کێمکرنا تێچوونێ و زێدەکرنا خێراتیێ
بڕیارە ئەڤ هەڤپشکییە تێچوونا کۆمپانیان بۆ جۆرێن پارچان کێم بکەت، دا کو بشێن سەرچاوەیێن خۆ یێن دارایی پتر بۆ گەشەپێدانا سۆفتوێر، پاتری و بزوێنەرێن ژیر تەرخان بکەن.
بازاڕێ ناڤخۆیی یێ کوردستانێ و عێراقێ و کارتێکرنا ڤێ گاڤێ
ئەڤ هەڤپەیمانیا ژاپۆنی دێ کارتێکرنا ڕاستەوخۆ ل سەر بازاڕێ ناڤخۆیی یێ عێراقێ و هەرێما کوردستانێ هەبیت؛ چونکی ترومبێلێن ژاپۆنی (ب تایبەت تۆیۆتا و نیسان) ل دەڤەرا مە زۆرترین داخواز ل سەرە ژ بەر خۆراگری و هەبوونا پارچەیێن یەدەگ. ئێکخستنا پارچە و ئەلیکترۆنیاتا ڤان ترومبێلان دێ وەکەت کو تێچوونا چێکرن و دابینکرنا پارچەیێن یەدەگ ل بازاڕێ ناڤخۆ هێشتا هەرزانتر و ب ساناهیتر لێ بهێت، هەروەسا دێ هاریکار بیت بۆ جێگیربوونا بهایان ل هەمبەر لێشاوا براندێن چینی.
دلۆڤان هالۆ:
هونەرمەندێ ناڤدار و دەنگ خوەش بلند ئیبراهیم، سترانا خوە یا نوو یا هەڤچەرخ بناڤێ ٤٤ سال ب شێوازەکێ کوردەواری و ب چێژەکا فۆلکلوری بەرهەمئینایە، هەر ل دەمژمێرێن دەستپێکێ یێن بەلاڤکرنا ڤیدیۆ کلیپێ بینەرەکێ باش هەبوویە، هەر زوو ڤێ سترانێ جهێ خوە دناڤ دلێ پشتەڤان و حەزژێکەرێن هونەرمەندی دا کریە.
ئەڤ سترانە هەم ژ لایێ پەیڤان ڤە ب چێژەکا فۆلکلوری ژ لایێ هۆزانڤانێ وەغەرکری یێ ئیدارەیا سەربخوە یا زاخۆ ئەحمەد هەسنی ڤە هاتیە نڤیسین، کو مرۆڤ هەست پێ دکەت پەیڤێن ڤێ سترانێ چێژەکا فۆلکلوری تێدا هەیە، هەم ژی ژ لایێ ئاواز و گۆتنا سترانێ ڤە چێژەکا فۆلکلوری د بەخشیت، هەم وەکو دروستکرنا ڤیدیۆ کلیپێ ژی کو ل جهەکێ کەلتووری هاتیە وێنەکرن، و ئەکتەرێن پشکدار ژی د ڤیدیۆ کلیپێ دا جلێن کوردی ل بەر خوە کرینە و ڕەوشەکا جوان و کوردەواری داینە ڤیدیۆ کلیپێ.
ب گۆتنا ڤێ سترانێ هونەرمەند بلند ئیبراهیم شیایە سترانەکا هەڤچەرخ ب شێوازەکێ کوردەواری و ب چێژەکا فۆلکلوری بەرهەم بینیت، کو گۆهدار و حەزژێکەرێن سترانا کوردی عاشق و تێهنیێ ڤان جۆرە سترانێن خودان شێوازەکێ کوردەواری و چێژەکا فۆلکلوریە.
ئێك ژ خالێن بهێز یێن سەرکەفتنا هونەرمەندی ئەوە کو بشێت سترانەکا هەڤچەرخ ب شێوازەکێ کوردەواری و ب چێژەکا فۆلکلوری بەرهەم بینیت، و بێ گۆمان ڤێ چەندێ ژی شارەزایی و دلسۆزی و ماندیبوون پێ دڤێت هەتا کو سترانەکا ب ڤی شێوەیی بهێتە بەرهەمئینان و بەلاڤکرن، لەوما ئەز دەستخوەشیێ ل ڤی کارێ نوو یێ هونەری یێ هونەرمەند بلند ئیبراهیم دکەم، و هیڤیدارم بەردەوام بیت ل سەر ڤی شێوازێ خوە یێ کوردەواری.
بێوار حەمدی:
سترانبێژێ گەنج (بەرەڤان ئاکرەی) کو نێزیکی شەش سالانە سترانان دبێژیت، د دیدارەکێ دا بۆ ڕۆژناما ئەڤرۆ گۆت: هەر ژ زارۆکینیا خوە من حەزا سترانگۆتنێ هەبوویە، ژ بەر کو ئەز د ناڤ مالباتەکا هونەردۆست و تژی هونەر و ئەدەبیات و نڤیسەران دا مەزن بوومە، و تا نوکە من شەش ستران هەنە.
د بەردەوامیا ئاخفتنا خوە دا گۆت: من پشکداری د ناڤا گەلەک بەرنامەیێن هونەری یێن زندی دا کریە بێی کو هیچ گرووپەکێ مۆزیکێ هەبیت، بتنێ ب دەنگ و سازا خوە پشکدار بوویمە، ژ بەر ئەگەرێن ماددی و نەبوونا پشتەڤانیێ ل دەڤەرا مە، وەکو پێدڤی هاریکاری نینە، لێ ئەم هەر د بەردەوامین ژ بۆ خزمەتکرنا هونەری.
بەرەڤانی ئەو چەندە ژی دیار کر کو ئەو وەکو هونەرمەند یێ سەربلندە کو کوردە و ب هونەرێ خوە خزمەتا کەلتوور و هونەرێ وەلاتی خوە بکەت و گۆ: تشتێ مە تێبینی ل سەر هەی ئەوە کو یا پێدڤی گرنگیدان نە ژ لایێ ماددی و نە ژ لایێ تەکنیکی ڤە نینە، بتایبەتی ل ئاکرێ کو نە ستودیۆیەکا موزیکێ و نە ژی گرووپەکێ مۆزیکێ هەیە، یان ژی هۆلەک نینە ژ بۆ سازکرنا کۆنسێرتان.
ل دوماهیێ ژی گۆت: پتریا سترانێن من ل دۆر ئەڤینیێ و ئەشقا وەلاتی نە، ب کوردینی و کوردستانینی و سۆزداریا ڕەسەن و پاقژ، ب پەیڤ و ئاوازێن کوردی و دووری پەیڤێن بیانی یان ژی پەیڤێن کۆلانی و بێ رامان.
زێدەتر گۆت: نوکە ئەم یێ کار ل سەر پڕۆژەیەکێ نوو دکەین کو بنەهێ وێ بەس ب ئامێرێ سازێ دهێتە ژەنین. هەرچەندە پاڵپشتی نینە، لێ ئەم هەر د بەردەوامین ل سەر خەباتا خوە یا هونەری؛ لەوما یا گرنگ ئەوە تو ئافرێنەر بی و تشتەکێ نوو و جودا دروست بکەی و پێشکێشی گوهدارێن سترانا کوردی بکەی.
نيشاندان