نێچیرڤان بارزانی، سەرۆكێ هەرێما كوردستانێ ب هەلكەفتا ب دووماهیك هاتنا ئەركێ وی وەك بەرپرسێ نڤیسینگەها ئێكەتییا ئورۆپایێ ل هەرێما كوردستانێ، پێشوازی ل ڕادو بێتۆم كر.
سەرۆكایەتییا هەرێما كوردستانێ د بەیاننامەیەكێ دا بەلاڤكر، د دیدارەكێ دا سەرۆكێ هەرێما كوردستانێ «سوپاس و پێزانینێن خۆ پێشكێشی ڕادو بێتۆم كرن بۆ پێشئێخستن و ب هێزكرنا پەیوەندیێن ئێكەتییا ئورۆپایێ و هەرێما كوردستانێ د دەمێ ئەركێ وی دا، هەروەسا هیڤییا سەركەفتنێ د ئەركێ وی یێ داهاتی دا بۆ خواست».
ژ ئالیێ خۆ ڤە، ڕادوی سوپاس و پێزانینێن خۆ ئاراستەی نێچیرڤان بارزانی و ئالیێن پەیوەندیدار یێن هەرێما كوردستانێ كرن «بۆ هاریكاری و پشتەڤانییا د دەمێ ئەركێ وی دا پێشكێشی وی كری، هەروەسا دوپاتی ل سەر خواستا ئێكەتییا ئورۆپایێ بۆ ب هێزكرنا پەیوەندییان و هاریكارییا هەڤپشك دگەل هەرێما كوردستانێ دا كر».

نێچیرڤان بارزانی، سەرۆكێ هەرێما كوردستانێ، ب هەلكەفتا دووماهی هاتنا ئەركێ وی وەكی قونسلێ گشتی یێ فەرەنسایێ ل هەرێما كوردستانێ، پێشوازی ل «یان برێم» كر.
د دیدارەكێ دا، سەرۆكێ هەرێما كوردستانێ سوپاس و پێزانینێن خۆ ئاراستەی «برێم» كرن بۆ وان خزمەت و رۆلێ بەرچاڤ یێ وی د بوارێ بهێزكرنا پەیوەندی و دۆستینییا د ناڤبەرا فەرەنسایێ و هەرێما كوردستانێ دا، هەروەسا هیڤییا سەركەفتنێ بۆ وی خواست د ژیان و ئەركێن وی یێن داهاتی دا.
ژ ئالیێ خۆ ڤە، قونسلێ فەرەنسایێ خۆشحالی و شانازییا خۆ دەربڕی ب كاركرنا خۆ ل هەرێما كوردستانێ و سوپاسییا نێچیرڤان بارزانی و دەزگەهێن هەرێمێ كر بۆ وێ پشتەڤانی و ب ساناهیئێخستنان ل دەمێ ئەركێ وی پێشكێشی وی كری.
هەروەسا د دیدارێ دا، هەردو ئالییان دوپاتی ل سەر خواستا خۆ كر بۆ پتر پێشڤەبرن ب پەیوەندییان و بەرفرە هـكرنا هاریكارییا هەڤپشك، دیسان رەوشا گشتی یا ئیراقێ و هەرێما كوردستانێ و پێشهاتێن دەڤەرێ تەوەرەكێ دی یێ كۆمبوونێ بوو.

نێچیرڤان بارزانی، سەرۆكێ هەرێما كوردستانێ، فەرمانا هەرێمی بۆ بلندكرنا پلەیا 729 پلەدارێن هێزێن ئاسایشا ناڤخۆ ل سەر میلاكێ وەزارەتا ناڤخۆ یا حوكمەتا هەرێما كوردستانێ ئیمزا كر.
ل دووڤ بەیاننامەیەكا سەرۆكایەتییا هەرێما كوردستانێ، دەركرنا ڤێ فەرمانێ ب پشتەڤانییا یاسایا سەرۆكایەتییا هەرێما كوردستانێ دهێت، پشتی كو هەموو وان پلەداران دەمێ خۆ یێ یاسایی تەمامكری و پێرابوونێن پێدڤی بۆ بلندكرنا پلەیێن وان د جڤاتا وەزیرێن هەرێما كوردستانێ دا هاتینە وەرگرتن.
د دووماهیا بەیاننامەیێ دا دوپاتی ل سەر وێ چەندێ هاتییە كرن، ئەڤ فەرمانە ژ رۆژا ئیمزاكرنێ ل 22/7/2026 ڤە دێ كەڤیتە د بوارێ بجهئینانێ دا و هەموو ئەو پلەدارە دێ ماف و شایستەیێن خۆ یێن یاسایی وەرگرن.

رێڤەبەرێ فەرمانگەها قونسلگەری ل وەزارەتا دەرڤە یا سووری، راگەهاند، شاندەكێ وەزارەتێ بەرەڤ هەولێرێ ب رێ كەفتییە، بۆ دانانا پێنگاڤا ئێكێ بەرەڤ ڤەكرنا قونسلخانەیا سووریایێ ل هەرێما كوردستانێ.
محەمەد یەعقوب عومەر، رێڤەبەرێ فەرمانگەها قونسلگەری ل وەزارەتا دەرڤە یا سووری د بەلاڤۆكەكێ دا ل سەر پلاتفۆڕما X گۆت: شاند بەرەڤ هەولێرێ ب رێ كەفتییە «ل سەر ڕاسپاردەیا وەزیرێ دەرڤە یێ سووری، بۆ دانانا پێنگاڤا ئێكێ بەرەڤ ڤەكرنا قونسلخانەیا سووریایێ ، كو دێ خزمەتا كەسۆكارێن مە ل هەرێما كوردستانێ كەت و دووماهیێ ب كێشەیا ب دەستئێخستنا خزمەتگوزاریێن قونسڵگەری ئینیت».
هەروەسا رۆهن كر كو ئارمانج ژ ڤەكرنا قونسلخانەیێ بۆ ب ساناهیئێخستنا پێشكێشكرنا خزمەتگوزاریێن قونسڵگەری بۆ وەلاتیێن سووری یێن ئاكنجی ل هەرێما كوردستانێ.
جهێ ئاماژەیێ یە هەتا نوكە، 41 قونسۆگەری و نڤیسینگەهێن نوونەرایەتیێ و ئاژانسێن دیپلۆماسی یێن وەلاتان ل هەرێما كوردستانێ هەنە و كار دكەن.

بناس دۆسكی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان، د بەیاننامەیەكا فەرمی دا، ئاشكرا كر كو وی پرسیارەكا پەرلەمانتاری یا فەرمی ئاراستەی وەزارەتا پەترۆلا ئیراقێ كریە داكو شلوڤەكرنێ ل سەر بنەمایێن یاسایی و تەكنیكی بدەت بۆ وێ جوداهییا مەزن یا د بەلاڤكرنا پەترۆلا خاڤ دا دهێتە كرن.
دۆسكی داتایێن مەترسیدار ئاشكرا كرن كو ل دەمەكێ هەرێما كوردستانێ 14% یا ئاكنجییێن ئیراقێ پێكدئینیت، لێ رۆژانە تنێ 50 هزار بەرمیلێن پەترۆلێ بۆ دهێنە تەرخانكرن، د دەمەكێ دا كو مافێ هەرێمێ یێ دەستووری دگەهیتە 182 هزار بەرمیلان.
پەرلەمانتار بناس دۆسكی داخواز ژ سەرۆك وەزیرێن ئیراقێ، عەلی فالح زەیدی كر كو ب لەز دەستێوەردانێ بكەت بۆ ب دووماهیئینانا ڤێ زۆرداریێ و مسۆگەركرنا بەلاڤكرنا دادپەروەرانە یا پەترۆلێ ل گۆرەی ماددەیێن 111، 112، 14، 121- برگەیا سیێ یێن دەستووری.
دۆسكی د راپۆرتا خۆ دا دیار كر كو پێدڤیێن هەرێما كوردستانێ ب رۆژانە حەفت ملیۆن لتر پانزین 95،1 ملیۆن لتر دیزل و هزاران تەنێن رۆن و غازی یە، و ڤەگوهاستنا ڤان هەژماران نە هەژمارێن رووتن، بەلكو پێدڤیێن سەرەكی یێن ملیۆنان وەلاتییان و كەرتێن چاندنێ و ساخلەمیێ و كارگەهانە.
پەرلەمانتار بناس دۆسكی ل دووماهیێ داخواز ژ هەموو كوتلە و حزبێن كوردستانی كر كو ب ئێك هەلوەست و دوور ژ جوداهیێن سیاسی، گڤاشتنەكا رەوا بێخنە سەر حوكمەتا فیدرال داكو مافێن وەلاتیێن هەرێما كوردستانێ بجهـبێنن، و دوپاتی ل سەر وێ كر كو ئەڤ پرسیارە دەستپێكا رێكارێن چاڤدێریێ یە و هەكە بەرسڤەكا تێركەر نەهێت، دێ پەنایێ بەنە بەر هەموو رێكێن دەستووری یێن دی.

سكراتێرا بەرێ یا پەرلەمانێ كوردستانێ و جێگرا سەرۆكێ پارتا چاكسازی یا توركمان ل كوردستانێ، د بەیاننامەیەكێ دا بۆ رایا گشتی سەبارەت ب كاراكرنا پەرلەمانی و پێكئینانا كابینەیا دەهێ یا حوكمەتا هەرێمێ و وان ئاستەنگ و رێگریێن بەرامبەر، ئاماژە ب وێ چەندێ دكەت كو پشتی دەمەكێ درێژ ب سەر هەلبژارتنان دا بۆری و چاڤەڕێكرن بۆ كۆمبوونان و درەنگكەفتنا بڕیارێن گرنگ یێن سیاسی، گەلێ كوردستانێ ژ ڤێ پتر بهانەیان بۆ كارانەكرنا پەرلەمانی و پێكنەئینانا كابینەیا نوو یا حوكمەتێ تەحەموول ناكەت.
گۆت ژی «وەلاتییان د پرۆسەیەكا دیمۆكراسی دا دەنگ دایە و نوكە چاڤەڕێی وێ چەندێ نە كو دەزگەهێن دەستووری ئەرك و بەرپرسیاریێن خۆ بجهبینن و بەرسڤا پێدڤیێن قۆناغا ئەڤرۆ بدەن».
مۆنا قەهوەچی ئاماژە ب وێ چەندێ دكەت «كاراكرنا پەرلەمانی و بلەزكرنا پرۆسەیا پێكئینانا كابینەیا نوو، تنێ داخوازیەكا سیاسی نینە، بەلكو پێدڤییەكا نیشتمانی یە بۆ پاراستنا جهگیرییا سیاسی، گەشەپێدانا ئابۆری و چارەسەركرنا كێشە و گرفتێن وەلاتییان. هەر دووركەفتن و درەنگكەفتنەكا پتر كاریگەرییا نەڕێنی ل سەر باوەڕییا خەلكی ب دەزگەهان و پرۆسەیا دیمۆكراسی دێ هێلیت».
پتر گۆت «دەمێ وێ چەندێ هاتییە كو هەموو ئالیێن سیاسی د چارچۆڤەیێ بەرپرسیارییا نیشتمانی و بەرژەوەندییا گشتی یا خەلكێ كوردستانێ دا، پێنگاڤێن بلەز و راستەقینە بهاڤێژن بۆ كاراكرنا پەرلەمانی و پێكئینانا حوكمەتەكا نوو كو بشێت بەرسڤدەرا داخوازی و پێدڤیێن رەوا یێن وەلاتییان بیت».
هەروەسا دبێژیت: «گەلێ كوردستانێ كو د سالێن بۆری دا قوربانییەكا زێدە دایە و بەرگەیا سەختی و نەخۆشییان گڕتییە، هەژێ وێ چەندێ یە كو دەزگەهێن دەستووری ب بلەز و ب بەرپرسیاری ڤە كارێن خۆ بكن و سەرنجا وان بۆ چارەسەركرنا گرفت و پێدڤیێن خەلكی بیت وبەرژەوەندییا گشتی داخواز دكەت كو قووناغا چاڤەڕێكرنێ ب دووماهی بێت و هەموو هێزێن سیاسی ل ئاست ڤێ پرسا چارەنووسساز ب بەرپرسیارانە رەفتارێ بكەن».