زنار تۆڤی:

سەرۆکێ دەستەیا گشتی یا وەبەرھێنانێ ل ھەرێما کوردستانێ دیار كر، ب بریارا مەسرور بارزانی، سەرۆکێ حکومەتا ھەرێما کوردستانێ، ١٦ دەڤەرێن پیشەسازی ل ھەرێما کوردستانێ دێ هێنە دروستکرن و هندەك ژ وان د قووناغا بجهئینانێ دانە، ژ وان ژی چوار دەڤەرێن پیشەسازی دێ ل سنۆرێ پارێزگەها دهۆکێ دێ هێنە چێکرن و دو دەڤەر ژی دێ ل ئیدارا سەربەخۆیا زاخۆ هێنە چێکرن.
د. محەمەد شوکری، زێدەتر بۆ رۆژناما ئەڤرۆ گۆت: كابینا نەهێ یا حکومەتا ھەرێما کوردستانێ» گەلەك گرنگی ب کەرتێ پیشەسازییێ دایە و بۆ وێ مەرەمێ ژی ب بڕیارا سەرۆکێ حکومەتا ھەرێما کوردستانێ هژمارەكا زۆر یا دەڤەرێن پیشەسازی ل ھەرێما کوردستانێ ل ھەموو باژێران دێ هێنە دروستکرن، نوكە ل زاخۆ و ھەولێر و سلێمانیێ دەست ب دروستکرنا وان هاتییە كرن.
ناڤهاتی گۆت ژی: ئەڤ چەندە دێ کەرتی پیشەسازی پتر پێشئێخیت، چونکی حکومەت یا رژدە ل سەر دروستكرنا وان ١٦ دەڤەرێن پیشەسازی و زۆر یا گرنگە و دێ بینە خودان بەرھەمێ خۆ» ژ هەموو لایانڤە دێ د مفادار بین.

زاخۆ، دلۆڤان هالۆ:

محەمەد مەهدی، بەرپڕسێ نڤیسینگەها زاخۆ یا دەزگەهێ خێرخوازی یێ بارزانی بۆ ڕۆژناما ئەڤرۆ دیار کر، کو مە وەکو دەزگەهێ خێرخوازی یێ بارزانی ڕێککەفتنەكا ئێك سالی یا پڕۆژەیەکێ خێرخوازی ل گەل سەندیکا نۆژدارێن زاخۆ ئیمزاکر.
بەرپڕسێ نڤیسینگەها زاخۆ، ئاماژە دا کو د ڤی پڕۆژەیی دا نوشدار پشکدارن ل گەل دەرمانخانەیەکێ و ئۆفەرێن باش و جیاواز یێن تێدا، داشکاندن دێ ل سەر پلێتێن نۆشدار و تاقیگەه و نشتەرگەرییان ب ڕێژا (40-50%) بیت.
گۆت ژی:»نێزیکی خێزانێن ئێتیم دێ بەشداری ڤی پڕۆژەیی بن لگەل کەسێن خودان پێدڤیێن تایبەت، دیسان کەسێن بێ مووچە و نەساخ کو ئەڤە هەموو ب ڕێکا کارتەکا خێزانی دێ بەشداری ڤی پڕۆژەیی بن، کو پێزانینێن وان یێن تێدا، و ئەو کارتە دێ ل دەف مە هێتە چێکرن و دێ دەینە وان کەسان کو ل دووڤ دەمێن پێدڤی سەرەدانا نۆژداری بکەن».

سێمێل: مووسا خالد

د بەردەوامییا بزاڤ وچالاکییێن خۆدا و دابەشکرنا هاریکارییێن مرۆڤی و ژبۆ پتر خزمەتکرنا تەخ و چینێن جڤاکی و ب تایبەت خەلکێ کەمدەرامەت، بنگەهێ لالش تایێ شاریا ب هەڤکاری دگەل رێکخراوا « خیوگ الشمس « ل ئەڤرۆ رێککەفتی 15/3/2025 ل هۆلا لالش « ئێک « رابوون ب پارڤەکرنا هاریکارییان لسەر « ١٠٠ « خێزانێن کەمدەرامەت یێن ئاوارێن شنگالێ و خۆجهێن کۆمەلگەها شاریا.
جهێ ئاماژێیە ئەڤ هاریکارینە پێکهاتبوون ژ ئاهێن خوارنێ یێن جۆراوجۆر وەکو « برنج ،زەیت فاسولی و شیر و توڤ چای و ڕژدە و شەکر و گەلەکێن دی «. ژئالیێ خۆ ڤە بنگەهێ لالش تایێ شاریا سوپاسیا رێکخراوا « خیوگ الشمس « کر بۆ هاریکاری و هەماهەنگیا وان دگەل مەدا بۆ پارڤەکرنا ئەوان هاریکاریان، کو بەردەوام هاریکارن دگەل کەم کەمدەرامەتان.

دهۆک لەزگین جوقی

د. ئەفراسیاب موسا رێڤەبەرێ گشتیێ ساخلەمیا پارێزگەها دهوکێ دگەل فێدریکو دایلی سەروکێ رێکخراوا ئایسپو بەحسا پروژێن هەڤبەش یێن دناڤبەرا هەردوو ئالیان کرن، و ئامادەکاریێن دەست بکاربوونا نەخۆشخانا ئومێد یا پەنجەشێرێ ل دهوکێ هاتە کرن.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆکێ دیارکر، دگەل رێکخراو ئیتالیێ بەحسا چەندین پرۆژێن داهاتی هاتنە کرن، کۆ دێ ژ لایێ حکوومەتا ئیتالی و رێکخراوا ناڤبری ب هەڤکاریا رێڤەبەریا گشتی یا ساخلەمیا پارێزگەها دهوکێ هێنە ئەنجامدان.
دئالیەکێ دێ دا دگەل رێکخراوا iom ساخلەمیا دهۆکێ هەولێن پێشکێشکرنا خزمەتێن دەرونی دناڤ کەمپێن ئاوارەیان دا کرن .

هەولێر، قائید میرۆ:

په‌یڤدارێ ده‌سته‌یا گه‌شت و گوزارێ ئاماژه‌كر: لسه‌ر ده‌مێ كابینا نه‌هێ ب قه‌بارێ حه‌فت ملیار و 500 ملیۆن دۆلاران وه‌به‌رهێنان ل كه‌رتێ گه‌شت و گوزارێ هاتیه‌ ئه‌نجامدان.
ئیبراهیم عه‌بدولمه‌جید، په‌یڤدارێ ده‌سته‌یا گشتیا گه‌شت و گوزارێ بۆ رۆژناما ئه‌ڤرۆ دیاركر» لسه‌ر ده‌مێ كابینا نه‌هێ یا حوكمه‌تا هه‌رێما كوردستانێ ب قه‌باره‌یێ حه‌فت ملیار و 500 ملیۆن دۆلاران وه‌به‌رهێنان ل كه‌رتێ گه‌شت و گوزارێ هاتیه‌ ئه‌نجامدان و دده‌مێ پێنج سالێن بۆری هژماره‌كا پڕۆژێن گه‌شتیاری هاتینه‌ ئه‌نجامدان كێم وێنه‌بووینه‌ و وه‌به‌رهێنانه‌كا باش د كه‌رتێ گه‌شاری دا هاتیه‌كرن، ئه‌ڤه‌ژی بۆ پێشخستنا كه‌رتێ گه‌شت وگوزارێ، سیاسه‌تا حوكمه‌تا هه‌رێما كوردستانێ ژی ئه‌ڤه‌ گه‌شت و گوزار ببیته‌ ژێده‌رێ داهاتی بۆ هه‌رێما كوردستانێ.
ئیبراهیم عه‌بدولمه‌جید گۆتژی» تنێ سالا بۆری 2024ێ ب سه‌رمایێ 300 ملیۆن دۆلاران وه‌به‌رهێنان ل كه‌رتێ گه‌شتیاری هاتیه‌كرن و پڕۆژه‌یێن گه‌شت و گوزارێ هاتینه‌ ئه‌نجامدان، كو هژماره‌ك ژوان پڕۆژێن گه‌شتیاری ستراتیژینه‌ و دێ كاریگه‌ری لسه‌ر كه‌رتێ گه‌شت و گوزارێ هه‌بیت و كه‌رتێ گه‌شتیاری دێ جاره‌كادی ڤه‌ژیت.

زاخۆ، دلۆڤان هالۆ:

محەمەد مراد، كەسایەتیێ دیار یێ قەزا باتیفایە د دیدارەكێ دا بۆ ڕۆژناما ئەڤرۆ دیار كر كو پێشتر قەزا باتیفا خودان ژینگەهەكا پاقژ و خودان هژمارەكا زۆر یا داروباران و 12 كانیێن سرۆشتی بوو، ژبەر هەبوونا هژمارەكا زێدە یا داروباران باتیفا وەكو دارستانا ئەمەزوون دهاتە بەرچاڤ.

ناڤهاتی ئاماژە ب وێ چەندێ ژی كر كو ژیانا خەلكێ باتیفا ل سەر تەرش و كەوالی و دار و بارێن چیایی بوون و پێدڤی ب كەلوپەلان و بازاڕان نە دبوون، چونكو پتری100 هزار دارێن بەڕی و مازی و گۆهیشك و قاچ و كەزوانان لێ هەبوون، لێ هەموو هاتنە بڕین و سۆتن، ئانكو پشتی شارستانیەتێ باتیفا بوویە بیابان، ژبلی هەر دوو مەزاران دار لێ نەماینە، كانیێن ب كێر ئاڤ ڤەخوارنێ بهێن نەماینە، د نوكە دا ئاڤا ڤەخوارنێ ژ ڕۆبارێ گۆندێ دێریشكێ ب بۆڕیان دهێتە باتیفا.
گۆت ژی:» دارەكا هژیرا هەووكێ‌ یا مەزن هەبوو ل تەنشت واركێ تەهای، تا وی ڕادەی یا مەزن بوو، 20 زاڕۆك دچوونە سەر چەقێن دارا وێ و هەژیر دچنین، دارەكا دی یا مەزن هەبوو خەلكێ د گۆتنێ دارا درەوان، جهێ‌ بێهنڤەدانا ڕێڤینگان بوو ئەوێن كو ژ ناڤ بەرواریان و گوندێن چیایی دهاتن، ل بنێ‌ دارێ‌ بێهنا خوە ڤەدكرن، وەسا دیار بوو كو بنێ‌ وێ دارێ‌ جهێ‌ ڤەگۆهاستنا سۆحبەتان بوو، ژ بەر هندێ‌ د گۆتنێ‌ دارا درەوان».
زێدەتر ژی گۆت:»كانیەك بناڤێ كانیا سێڤێ هەبوو، خودان ئاڤەكا تەزی و شرین بوو، دار بیشەنگەكا مەزن ل هنداڤ بوو، و د بن كانیێ‌ دا هەمی بیستان بوون و هەمی جۆرێن داروباران تێدا هەبوون، ل وەرزێ هاڤینێ هژمارەكا وەلاتیێن خەلكێ‌ باتیفا دهاتن دەورو بەرێن كانیێ‌ و ل بن داران كەپر چێدكرن و دمانە ل وێرێ هەتا پایزا درەنگ، دیسان كانیەكا دی بناڤێ كانی شەكرك لێ هەبوو، ژ بەر خوەشی و شریناهیا ئاڤا وێ‌ د گۆتنێ‌ كانی شەكرك».