سندس سالح سلێڤانەی:

هونه‌رمه‌ندێ دیارێ باژێرێ زاخۆ (سه‌لام یوسف) دیاركر كو ل نێزیك ئه‌و دێ دو سترانێن خوه‌ یێن نوو به‌لاڤكه‌ت، یا ئێكێ ب ناڤێ (ژیانا من) ژ په‌یڤ و ئاوازێن هونه‌رمه‌ند (وه‌لید یوسف) سترانا دویێ ژی ب ناڤێ (ئه‌ز كوردستانم) ژ په‌یڤ و ئاوازێن هونه‌رمه‌ند (عیسا عه‌بدوللا) ی نه‌، هه‌ر دو ستران ب پشته‌ڤانیا هونه‌رمه‌ندان (كه‌ریم حه‌یده‌ر و هه‌وار میكائیل) هاتینه‌ تۆماركرن، هه‌ر دو سترانان دكه‌ته‌ دیاری بۆ وان كه‌سێن حه‌زژ ده‌نگێ وی دكه‌ن و ب گۆتنا وی هژماره‌كا دی یا سترانان ل به‌رده‌ستن.
ناڤهاتی، د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ل سالا (1977) ئه‌ز ل باژێرێ مووسل دژیام، ژیێ من شازده‌ سال بوون من هوزان دنڤیسین و هنده‌ك جاران ژی ل ئاهه‌نگ و شه‌هیانان بێی مۆزیك به‌س ب ده‌ربه‌گێ، ئانكو (تۆمبلكێ) ستران دگۆتن، پاشان ل (1979) ل گه‌ل سازێ و تۆمبلكێ من ستران دگۆتن، ل وی ده‌می ئه‌ز داخبارێ ده‌نگێ هونه‌رمه‌ندان (ته‌حسین تەهای و بشار زاخۆیی و محه‌مه‌د ته‌یب تاهر) بووم و من سترانێن وان دگۆتن، د دووڤدا ده‌نگێ هه‌ردو هونه‌رمه‌ندێن زاخۆ( ئه‌رده‌وان زاخۆیی و ئه‌یاز یوسف) ژی گه‌له‌ك كارتێكرن ل من كرن و ئه‌وان ئه‌ز هاندام یێ به‌رده‌وامبم، له‌ورا هه‌تا نوكه‌ ئه‌م یێ ل سه‌ر ڕێبازا وان دچین و هیڤیا من ئه‌وه‌ ئه‌ز شیابم خزمه‌ته‌كا بچووك بۆ هونه‌رێ كوردی پێشكێش بكه‌م و كه‌یفا من ب هه‌موو ئامیره‌یێن مۆزیكێ دهێت، ب تایبه‌ت ژی یێن كوردی.
هه‌روه‌سا گۆت: زێده‌تر ئه‌ز ب ده‌نگێ هه‌ردو هونه‌رمه‌ندێن نه‌مر(ته‌حسین تاهای و محه‌مه‌د ته‌یب تاهر) داخبارم و هه‌موو سترانێن وان بۆ من گه‌له‌ك دخۆشن، بۆ زانین من پتری (160) سترانان هه‌نه‌ و هاتینه‌ تۆماركرن و نوكه‌ پتری (10) سترانێن دی ل به‌ر ده‌ستن به‌س نه‌هاتینه‌ تۆماركرن، هه‌روه‌سا ژبه‌ر هنده‌ك ئه‌گه‌ران هه‌ر ژ سالا (1983) هه‌تا سالا (1990) ئه‌م نه‌دشیاین ب دلێ خوه‌ سترانان بێژین، ل سالا (1986) مه‌ تیپه‌كا هونه‌ری هه‌بوو داخواز ژمه‌ هاته‌ كرن سترانه‌كێ ب له‌شكه‌رێ ئیراقێ بێژین، هه‌روه‌سا به‌ری گۆتنا هه‌ر سترانه‌كێ من هوزان د هه‌لبژارتن و نیشا گه‌له‌ك كه‌سان ددا و هه‌تا ئه‌ز رازی نه‌ دبووم من نه‌ دگۆتن، له‌ورا گه‌له‌كا فه‌ره‌ سترانبێژ بۆ خوه‌ ل هه‌لبه‌ستڤان و ئاوازدانه‌رێن باش بگه‌ڕیت، هه‌تا بشێت سترانێن باش و سه‌ركه‌فتی بێژیت و ب دیتنا من مۆزیكا كه‌ڤن تامه‌كا تایبه‌ت هه‌بوو، ل دووماهیێ دبێژم هه‌ر دله‌كێ ئه‌ڤیندار و ب كول دێ دلێ خوه‌ كه‌مه‌ ده‌ستمال دا پاقژبكه‌ت رۆنكێن شل، هه‌ر دله‌ كێ ب كه‌یف و شاهی دێ دلێ خوه‌ بۆ كه‌م شه‌مال، دا رێكا وی ببیته‌ رۆناهی.

ئه‌ڤرۆ، هه‌رهین:

سترانبێژێ گه‌نج هونه‌ر به‌رواری دیداره‌كێ دابۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ئه‌ز و بابێ خوه‌ هونه‌رمه‌ند (ته‌حسین به‌رواری) به‌رده‌وام سترانان پێكڤه‌ ل مال دبێژین، به‌لێ چو جاران من و وی ل ده‌واتان ستران نه‌گۆتینه‌، چونكۆ ئه‌ز چمه‌ ده‌واتان و ئه‌و ناچت و دهه‌یڤی داد چمه‌ شه‌ش حه‌فت ده‌واتان ل دهۆكی و ده‌وروبه‌ران و ل ده‌واتان ژی پتریا جاران سترانێن هونه‌رمه‌ند عه‌بدولواحدی دبێژم وداغبارێ ده‌نگێ وی مه‌ ، چونكو گه‌له‌ك جاران دهاته‌ نك بابێ من لمال و ئه‌وی ژی گه‌له‌ك جاران مه‌قام (حیجاز و كارد) دگۆت من ژی گه‌له‌ك حه‌زژ ستایلێ وی كر بتایبه‌تی ده‌واتان و گه‌نجێن مه‌ژی نوكه‌ گه‌له‌ك ئه‌وان مه‌قاما دبێژن.
و دبینم چوونا ده‌واتان باشێن خوه‌ هه‌نه‌ و راهێنانه‌كه‌ بۆ ده‌نگێ مرۆڤی گۆت: سترانبێژێن ده‌واتان و یێن كلیپا چێدكه‌ن ژێك جوانه‌ و سترانبێژێن كلیپا چێدكه‌ن هه‌كه‌ بچیته‌ ده‌واتان ژی نه‌شێت ده‌مژمێره‌كێ ئه‌وێ ده‌واتێ ب رێڤه‌ ببه‌ت، به‌لێ ئه‌ز دچمه‌ ده‌واتان ژی و ككلیپان ژی چێدكه‌م.
ناڤبری گۆتژی : ده‌واتێن به‌ری خوه‌شتربوون ژیێن نوكه‌، چونكو كاودان خوه‌شتربوون و دلێ خه‌لكی خوه‌شتر بوو به‌رده‌وام ده‌وات دكرن و بەرێ سترانبێژ دكێم بوون و ده‌وات پتر هه‌بوون، به‌لێ نوكه‌ به‌روڤاژی یا لێهاتی و هه‌ر كه‌سێ چار ستران ژبه‌ركرن بۆ سترانبێژێ ده‌واتان و هوینگێ سترانبێژێ ده‌واتان دناڤبه‌را چارگوشه‌كێ دابوون و هه‌موو كه‌سان دنیاسین كینه‌ و 80%سترانبێژێن نوكه‌ دچن ده‌واتان ژنه‌چارینه‌ و بخوه‌ كریه‌ ژێده‌رێ پاریێ ژیانێ 20% دچنه‌ ده‌واتان سترانان دبێژن حه‌ز ل سه‌ر هه‌یه‌ و ئه‌ز ژی ئێك ژوانم و داهاته‌ك ژی دهێت، به‌لێ لنك من ستران و كلیپ و دیدارێن ته‌له‌ڤزیونی پتر رولێ خوه‌ هه‌یه‌ ژ ده‌واتان .
زێده‌تر گۆت: سترنێن به‌رێ چو جاران نامرن و گه‌له‌ك یا جوانه‌ ژی ب ته‌كنیكه‌كا نوی بهێنه‌ نویكرن و گۆتنن به‌لێ ب مه‌رجه‌كی گوهۆرینێ دپه‌یڤ و ئاوازێ دا نه‌هێته‌كرن و وه‌كو خۆدانێ سترانێ بهێته‌ گۆتن.