قەیس وەیس:

دوهی د ڕێورەسمەكێ‌ پێشچاڤ دا ل هۆلا كۆنفراسان یا زانكۆیا دهۆك باشترین ڕاهێنەر و یاریزانێن كوڕ و كچ ل سەر ئاستێ‌ پارێزگەها دهۆكێ‌ یێن یاریزانێن تاك و كۆم بۆ سالا 2025ێ‌ هاتنە هەلبژارتن، پشتی ل دووڤ دادتا و زانیاریێن وان یێن سالا بۆری كۆمڤەكرین و بڕێیا خالان ڕێزبەندیێن ئێكێ‌ بدەستڤەئینان كو ژ ژلایێ‌ لژنەیەكا تایبەت و پسپۆرڤە هاتینە پلەكرن كو ژلایێ‌ لژنەیا ئۆلمپییا دهۆكێ‌ و ب پشتەڤانی و چاڤدێرییا د. عەلی تەتەر پارێزگارێ‌ دهۆكێ‌ ڤە هاتییە ڕێكخستن.
ل دەستپێكا مەراسیمان د. ئەحمەد قاسم پەیڤا لژنەیا ئۆلمپی پێشكێشكر و رۆناهی دا ل سەر ڤێ‌ چالاكیێ‌ و گرنگییا وێ‌ و هەبوونا دەستكەڤتێن سالا بۆری یا 2025ێ‌ بەلگەیە ب هەبوونا پێشكەڤتنا وەرزشا پارێزگەهێ‌ و كوردستانێ‌ ب پشتەڤانییا رێزدار مەسرۆر بارزانی سەرۆكێ‌ حوكمەتا هەرێمێ‌ و پارێزگارێ‌ دهۆكێ‌ دڤی بیاڤی دا و داخوازا سەركەڤتنێ‌ بۆ هەموو یاریزان و یانەیێن پارێزگەهێ‌ كر.
دووڤدا د. عەلی تەتەر پارێزگارێ‌ دهۆكێ‌ ژی ب گۆتارا خوە دا ئاماژە دا پێشكەڤتنا وەرزشێ‌ و سەركەڤتنێن بەردەوام یێن یانەیێن كوردستانی د خولێن ئیراقێ‌ و دەرڤە دا، ئەڤە هەموو ب پشتەڤانییا رێزدار مەسرۆر بارزانی سەرۆكێ‌ حوكمەتێ‌ دا دیاركرن و هیڤییا سەركەڤتنێ‌ بۆ هەموو یاریزان و یانەیان خواست.
هەروەسان ناڤهاتی گۆت: وەرزشا كوردستانێ‌ ب گشتی و یا پارێزگەها دهۆكێ‌ پێشكەڤتنەكا باش یا دهێتە دیتن و ئەم دبینن یانە و یاریزانێن مە ل سەر ئاستێ‌ ئیراقێ‌ و دەرڤە و هەتا یێ‌ جیهانی ژی شیاینە دەستكەڤت و ئەنجامان بینن، ناسناڤێن یانەیا دهۆك د كۆپا كەنداڤی، كۆپا ئیراقێ‌ دا و باشترین جەماوەرێ‌ جیهانێ‌ یێ‌ پشتەڤانێن زاخۆ، هەروەسان ناسناڤێ دی یێن یانەیێن پارێزگەهێ‌ جهێ‌ سەربلندیێ‌ نە، ئەوا دشیان دا بیت دێ‌ بۆ پشتەڤانییا وەرزشێ‌ كەین پێخەمەت پێشكەڤتنەكا باشتر بیت.
دووڤدا ڤیدیویەكا تایبەت یا دەستكەڤت و ئەنجامێن ئەوان ڕاهێنەر، یاریزانێن كور و كچی ێن بەربژار بۆ خەلاتێ‌ باشترینان بۆ ئامادەبوویان هاتە نیشاندان كو ل سەر ئاستێ‌ تاك و كۆم ب دەستڤە ئینایین.
باشترینێن سالا 2025ێ‌
پشتەڤانێن یانەیا زاخۆ هاتنە خەلاتكرن، دەرئەنجامێ‌ پشتی ل سالا بۆری خەلاتێ‌ زە بێست یێ‌ باشترین پشتەڤانێن جیهانی ژلایێ‌ فیفایێ‌ بدەستڤە ئیناین.
• ل سەر ئاستێ‌ یاریێن كۆم، هەكار برقی ڕاهێنەرێ‌ تیما ڤۆلی بۆلا یانەیا سەنحاریب خەلاتێ‌ باشترین ڕاهێنەر ل سەر بدەستڤە ئینا.
• ل سەر ئاستێ‌ یاریێن تاك تارق سەعید ڕاهێنەرێ‌ یانەیا دهۆك بۆ یارییا پایسكلان وەكو باشترین ڕاهێنەر هاتە هەلبژارتن.
• دورین رۆمێل یاریزانا یانەیا سەنحاریب یا یارییا ڤۆلی بۆلێ‌ خەلاتێ‌ باشترین یاریزانا كچ ل سەر ئاستێ‌ یاریێن كۆم ب دەستڤە ئینا.
• ئایا سالم یاریزانا یانەیا ئافرەتێن دهۆك بۆ یارییا تیكۆنجتسۆیێ‌ باشترین یاریزانا كچ ل سەر ئاستێ‌ یاریێن كت ب دەستڤە ئینا.
• هارۆن ئەحمەد یاریزانێ‌ یانەیا دهۆكێ‌ یا فوتبۆلێ‌ باشترین یاریزانێ‌ كور ل سەر ئاستێ‌ یاریێن كۆم هاتە خەلاتكرن.
• ئەلند عەبدولرەحمان یاریزانێ‌ یانەیا ئامێدیێ‌ بۆ یارییا كیكبۆكسینگێ‌ خەلاتێ‌ باشترین یاریزان بۆ یاریێن كت وەرگرت.
ئێحسان حەسەن ژ لژنەیا دەستنیشانكرنا باشترینێ سالێ‌ گۆت: دەستپێكێ‌ پیرۆزباهیێ‌ ل هەموو سەركەڤتیان دكەم كو بووینە باشترینێن سالا 2025ێ‌، پێنەڤێت پرۆسێسا باشترینان ب سانەهی نەبوویە بەلكو نێزیكی دو مەهە وەكو لژنەیەكا تایبەت كار ل سەر دكر، پشت بەستنا مە ل سەر هەموو داتا و زانیاریێن فدراسیۆنێن وەرزشی یێن پارێزگەهێ‌ بوون ئەوێن بوو مە هنارتین كو د سالا 2025ێ‌ دا چو دەستكەڤت و ئەنجام یێن یاریزان و ڕاهێنەران مە كۆمڤەكربوون.
هەروەسان ناڤهاتی گۆت: ل دووڤ ستاندرێن جیهانی و پلانەكا تایبەت مە هەلسەنگاندنا هەموو ئەوان زانیاری وداتایێن بۆ مە هاتین دكر، ئەو یاریزان یان ڕاهێنەرێن ل سەر ئاستێ‌ نێڤدەولەتی، ئاسیایی، رۆژئاڤا ئاسیا، عەرەبی و ئیراقی و نافخوە هەر ئێك هندەك مەرج و خالێن تایبەت هەبوون، ژبۆ هندێ‌ ڤاڤارتنەكا ڕێكخستی هەبیت، ل دووماهیێ‌ وەكو لژنە ل دووڤ ئەوان داتایان و هەر ڕاهێنەر یان یاریزانەكێ‌ دەستكەڤت هەیی مە ڕێژە بوو دانا، ل دەڤ مە هەموو باشترین بوون ژبەركو هەموو خودان دەستكەڤت و ناسناڤ بوون، پیرۆزباهیێ ل هەموویان دكەین.
باشترینێن پارێزگەهێ‌ كەیفخوەشن
هارۆن ئەحمەد ستێرێ‌ یانەیا دهۆك و باشترین یاریزانێ‌ كۆپا كەنداڤی و خەلاتێ‌ باشترین یاریزانێ‌ 2025ێ‌ یێ‌ پارێزگەهێ‌ بدەستڤە ئینایی، كەیفخوەشییا خوە دیار كر ب دەستڤەئینانا ڤێ‌ خەلاتی و گۆت: ئەڤە دەرئەنجامێ‌ هەڤكارییا كۆم دگەل ڕاهێنەر و یاریزانێن مە هاتییە، سۆپاسی بۆ لژنەیا ئۆلمپی كو ئەز ژ هەژی خەلاتی كریمە و پیرۆزباهییا هەموو سەركەڤتیان ژی دكەم، دێ‌ بیتە پالدەر بۆ داهاتی ئاستێ‌ خوە باشتر بكەم و ببمە ئێك ژ خالێن سەركەڤتنا تیما خوە.
ژلایێ‌ خوەڤە تارق سەعید ڕاهێنەرێ‌ تیما پایسكلڤانێن دهۆكێ‌ كەیفخوەشیا خوە دیاركر و گۆت: پشتی چەندین ئەنجام و دەستكەڤتێن مەزن یێن مە ب دەستخوەڤەئینایین سۆپاس بۆ خودێ‌ ئەڤرۆ ب دەستڤە ئینانا ناسناڤەكی گرنگ شادبوویم ئەوژی باشترین ڕاهێنەر، پێنەڤێت ڤەڕێژا ئەوان دەستكەڤتان ب ماندیووبنا یاریزانان و پشتەڤانییا كارگێرییا یانەیێ‌ و فدراسیۆنا پایسلڤانێن ئیراقێ‌ كو باوەر دایمە، ئەڤ خەلاتە دیرۆكی یە و جهێ‌ شانازییا منە.

قەیس وەیس:

تیما فوتبۆلا یانەیا ئافرەتێن دهۆكێ‌ بۆ فوتبۆلا شەش یاریزانی ناسناڤێ‌ قارەمانییا ئیراقێ‌ ب دەستڤە ئینا، پشتی د یارییا فینالێ‌ دا شیایی ب سەركەڤن ل سەر یانەیا ئالبدێر یا باژێرێ‌ دیوانییە ب لێدانێن پەنەلتیان 3-2، ئەوا یاری بێ‌ گۆل ب دووماهی هاتی، د یارییا واندا ئەوا دوهی ل یاریگەها یانەیا دهۆكێ‌ یا سێیێ‌ هاتیە كرن.
د فینالێ‌ دا ب بەرهەڤبوونا هەر ئێك ژ د. عەلی تەتەر پارێزگارێ‌ دهۆكێ‌، د. ڤیان سلێمان ئەنداما كۆمیتا ناڤین یا پارتی و هاریكارا مەكتەبا ڕێكخستنێ‌، د. نەوزاد عەبدوللا بەرپرسێ‌ لەقێ‌ ئێك، د. ئەحمەد قاسم سەرۆكێ‌ لژنەیا ئۆلمپی-تایێ‌ دهۆك و بریندار حەیدەر قائیممقامێ‌ قەزا دهۆك وچەند بەرپرسێن حكومی و حزبی ل ناڤا یاریگەهێ‌ دا حازربوو.
كاروانێ‌ تیما ئافرەتێن دهۆكێ‌
تیما یانەیا ئافرەتێن دهۆكێ‌ یانەیا ئافرەتێن دهۆكێ‌ ناسناڤێ‌ ئێكێ‌ د وەرزێ‌ 2026ێ‌ دا ل سەر ناڤێ‌ پارێزگەهێ‌ د قارەمانیێن ئیراقێ‌ دا تابووكر كو دبیتە ئێكەم پشكدارییا وێ‌ دڤێ‌ قارەمانیێ‌ دا، تیما فوتبۆلا یانەیا ئافرەتێن دهۆكێ‌ دەربازبوو یارییا فینالێ‌ پشتی ژ قووناغا كۆمان وەكو خودانا سەرێ‌ لیستێ‌ دەربازبوو قووناغا پێش دووماهیێ‌ و شیان ل سەر كیستێ‌ یانەیا سۆران دەربازبتە یارییا دووماهیێ‌ پشتی ب دو گۆلان سەركەڤتن ئینایی، ژلایێ‌ خوەڤە یانەیا ئالدبدێر دەربازبوو یارییا فینالی پشتی ڕێزا دویێ‌ د كۆما دویێ‌ دا هاتی و قووناغا پێش دووماهیێ‌ دا ب لێدانێن پەنەلتیان سەركەڤت بوو ل سەر یانەیا ینت ئەلعیراق ب4-3 گۆلان، ئەو هەشت یانە پشكداربووین ئەو ژی، یانەیا ئافرەتێن دهۆك، بنت ئەلعراق، رۆژهەلات، یانەیا سۆران، یانەیا قەرەقۆش، هەلەبچە، یانەیا ئالبدێر، یانەیا تلسقۆف.
ل دور ڤێ‌ دەستكەڤتی كەسكین مەسعوود مستەفا سەرۆكا یانەیا ئافرەتێن دهۆكێ‌ بۆ رۆژنامەیا ئەڤرۆ گۆت: گەلەك كەیفخوەشین ب دەستڤە ئینانا ناسناڤێ‌ ئیراقێ‌ ئەڤە ژی ب كارەكێ‌ كۆم هات، هەر ژ پشتەڤانییا بەردەوام یا پارێزگاری، قائیممقامی و ڕێكخستنا پارتی و لەقا ئێك و لژنەیا ئۆلمپی كو هەموو هاریكار و پشتەڤان بووینە هەتا بشێن ڤێ‌ ناسناڤی ب دەستڤە بینن، سەرباری تیما مە د دەمەكێ‌ كورت دا بەرهەڤی كربوون لێ‌ وەكو كارگێری، راهێنەر و یاریزان ئەم ڕژد بووین ڤێ‌ ناسناڤی ب دەستڤە بینن، ب ئانەهییا خودێ‌ ئەم ناسناڤە دێ‌ بیتە ڕێكخوشكەر بۆ قارەمانیێن داهاتی ئەم ناسناڤان بینن.
ژلایێ‌ خوەڤە سیپەل شوكر باشترین یاریزانا قارەمانیێ‌ و یانەیا ئافرەتێن دهۆكێ‌ گۆت: سۆپاس بۆ خودێ‌ ئەم گەهشتینە ئارمانجا خوە، پیرۆزە ل كارگێریێ‌ و ڕاهێنەر و هەموو یاریزانان، پیرۆزە ل خەلكێ‌ دهۆكێ‌ و هەموو پشتەڤانان، هەرچەندە دەستپێكێ‌ بۆ مە یا بزەحمەت بوو ژبەركو شێوازێ‌ قارەمانیێ‌ جودابوو ژ قارەمانیێن فوتسالێ‌، دبیت ددەمێ‌ گونجایی ژی دا مە بەرهەڤی نەكربن ژبەركو درەنگ هاتینە ئاگەهداركرن، یا گرنگ ئەم شیانین ناسناڤەكێ‌ ژ هەژی ناڤێ‌ مە بینن ئەڤ ناسناڤە ب ناڤێ‌ پارێزگەهێ‌ و كوردستانێ‌ دهێتە نەخشاندن.