NO IORG
نووترين نووچه
Authors Posts by عـەدنـان ئـەحمەد مـزووری

عـەدنـان ئـەحمەد مـزووری

عـەدنـان ئـەحمەد مـزووری
4 POSTS 0 COMMENTS

7

عەدنان ئەحمەد مزووری

خەلاتێ نۆبل یێ ئاشتییێ یێ سالا ٢٠٢٦ێ، بوو بەهرا دادوەر و پارێزەرا ئەفریقیا باشوور، ناڤی پیلای هەر وەکی لژنەیا نۆبل یا نەرویجی ڕاگەهاندی، وەک ڕێزلێنان بۆ «بزاڤێن وێ یێن د وارێ بهێزکرنا ئاشتییێ و یاسایا نێڤدەولەتی دا» و بەڕەڤانیکرن ژ مافێن مرۆڤی.
پیلای ل سالا ١٩٤١ێ ل باژارێ دێربان ل ئەفریقیا باشوور ژدایکبوویە، ژ سالا ٢٠٠٨ تا ٢٠١٤ وەک کۆمیسەرا بلند یا نەتەوەیێن ئێکگرتی بۆ مافێن مرۆڤی کار کریە.
وەک دادوەر ل دادگەها تاوانان یا نێڤدەولەتی و سەرۆکا دادگەها تاوانان یا نێڤدەولەتی یا تایبەت ب ڕواندا کار کریە، سەرۆکاتیا لژنەیا سەربەخۆ یا نەتەوەیێن ئێکگرتی بۆ ڤەکۆلینێ ل دۆر ئەردێن فەلەستینی یێن داگیرکری کریە (٢٠٢١ – ٢٠٢٥).
ب ڕاستی ئەڤە دو سالن، ئەم یێن دبینین کو بەخشینا ڤی خەلاتی، ڕەنگڤەدانەکا مەزن ل دویڤ خۆڤە دئینیت، ئەو ژی ژ بەر پرسا هەلبژارتنا وی کەسی یە کو هەژی خەلاتی بیت، نەخاسمە کو چاڤێ سەرۆکێ ئەمریکی تڕەمپ ل نۆبلا ئاشتی یێ یە!
ژڤێرە، نۆچەیێ سەركەفتیێ‌ خەلاتی دەرکەت، ژوێراهە وەلاتێن ئێکگرتی یێن ئەمریکا سزا ل سەر دادگەها تاوانان یا نێڤدەولەتی ڕاگەهاندن، کو کار و چالاکییێن وێ یێن ڕۆژانە دکەنە ئارمانج، ب تایبەتی د بوارێن تەکنەلۆژی و بەنکی دا، و کو ئەڤ سزایە پشتی شەش هەیڤان بکەڤنە د وارێ جێبەجێکرنێ دا.
ئەو دادگەها کو بارەگایێ وێ یێ سەرەکی ل باژارێ لاهای یە، دادگەهکرنا وان کەسان دکەت یێن کو گونەهبارن ب ئەنجامدانا تاوانێن شەڕی، تاوانێن دژی مرۆڤایەتیێ، و تاوانێن جینۆسایدێ.
پیلای، وەرگرا خەلاتێ سەرکۆنەیا وان سزایان کر یێن کو ئیدارا سەرۆکێ ئەمریکا دۆنالد ترەمپ ل سەر دادگەها تاوانان یا نێڤدەولەتی سەپاندین، و ئەو وەک سزایێن «نەیاسایی» پەسنە کرن.
و گۆت کو ڕاگەهاندنا سزایێن ئەمریکا ل سەر دادگەهێ بتنێ چەند دەمژمێرەکا پشتی سەرکەفتنا وێ، نە ژ نشکێڤە بوو، و دیار کر کو ئەڤ چەندە وەک «بەرسڤەکە ژبەر کوخەلات نەدایە سەرۆک ترەمپ»ی.
د بەرسڤا پسیارەکێ دا ل دۆر وێ پەیاما کو ئاڕاستەی سەرۆکێ ئەمریکا دکەت، دادوەرا تەمەن ٨٥ سالی گۆت: «ڕاوێژکارێن خۆ یێن یاسایی بانگ بکە دا بۆ تە شڕۆڤەکەن کا یاسایا نێڤدەولەتی چیە».
یا مە ڤیای بێژین سەبارەت ڤێ ململانێ، ئەوە کو هەتا چ ڕادە، سییاسەت دەستوەردانێ د گەلەک واران دا دکەت، پێخەمەتی گوهارتنا ئاڕاستەیان، و کاریگەری یێ د بڕیاران دا بکەت، ب ڕێیا فشارێ ل سەر چەندین دام و دەزگەهان ل سەرانسەری جیهانێ، کو کارێن وان دویرن ژ سییاسەتێ و گێلەشۆکێ وێ.

11

عەدنان ئەحمەد مزووری

ئەڤە ماوەیەکێ خۆشە، دۆرهێلێ شعرێ و پاشەڕۆژا وێ، بوویی مژارەکێ کەل دناڤ جڤاتێن ئەدەبی دا، نەخاسمە پشتی بەلاڤبوونا گۆتنا دبێژیت کو دەم دەمێ ڕۆمانێ یە.
پشتی گەشتەکا خواندنێ نە یا کورت، ئەز ل سەر چەندین بۆچوونێن جیاواز ڕاوەستام، ئەو بۆچوون ژی یێن شاعرا و ڕەخنەگرا و ڤەکۆلەرا و وەرگرا بوون ژ جهێن جوداجودا ژ جیهانێ، ب هیڤییا کو « ئێشێ» دەسنیشانکەن، و چارەسەرییەکێ ب بینن دا شعر جاردی پێشەنگی یێ داگیرکەتەڤە!
ب دیتنا من، زۆربەیا ڤان بۆچوونا هەکە نە هەمی د هەڤپشکن د ناڤ چڤاکێن مە یێن ئەدەبی دا، هەما چ نەبیت ل ڕۆژهەلاتا ناڤین ب تایبەتی، هەر چەوا بیت ئەڤ پرسە دێ یا ڤەکری بیت، و پێدڤی ب دانوستاندنەکا بەردەوامە.

شعر و ڕەونەقا جاران
ب ڕاستی هندەک دبینن کو شعرێ ئەو ڕەونەق و پێگەهێ جاران د جڤاکی دا نەمایە، کو بەرێ جەماوەرەکێ مەزن ژ خواندەڤان و وەرگران هەبوو، بەلکو ئەگەر ژی جۆرەکێ دابەزین و نزمبوونێ د نڤیسینێن شعری یێن ئەڤڕۆ یێن ئەم دخوینین دا پەیدابوویە، دگەل نەبوونا ڕەخنەیا ئاڤاکەر و ئاشکرا، ڕێ ل بەر موجامەلە و بەرژەوەندی یێن کەسۆکی هاتە ڤەکرن، لەو پەیڤا «شاعر» بۆ هەر کەسەکێ کو هەژی ڤی ناسناڤی ژی نەبیت دهێتە گۆتن.
بۆچوونەکا دی دبێژیت: د ئامادەبوونا شعرێ دا، لێنێڕینێ جوانییەک هەیە، و دەما ئەم گوهداریا ژیانێ دکەین، شعریەتا مەبەستێ سەردهەلدەت و ڕێکخستنا ڕامانێ ژ دایک دبیت، چەند مرۆڤایەتی بەرەف بنی ژی بچیت، یا ڕاستتر ئەوە کو ئەم حەز ژ شعریەتا جیهانێ بکەین، و مرن د ناڤ شعرێ دا بۆ مە گەلەک چێترە ژ کو ئەم وەک کەڤری بژین.
ئێکێ دی یێ گەشبین گۆت: شعر ژەنینە ل سەر ژێیێن سۆتنا ناخێ مرۆڤی، و گونجاندنە دگەل میکانیزمێن تام و چێژا مرۆڤایەتییا جوان، و شیانەکا جوانیێ یە د چاندنا گیانی د ناڤ پەیڤان دا، و نەخشاندنەکا ئالۆزە بۆ ساناهیکرنا گەهشتنا ب مه‌ستیا ئیلهام و ئافراندنێ.

شاعر گەلەكن و شعر کێمە!
هندەکێن دی ب مخابنی ڤە دبێژن: لاوازییا ناڤەڕۆکا شعری بوویە دیاردەکا بەربەلاڤ سەرەڕای زۆرییا بەرهەمێ شعری و چاپکرنا دیوانان، ب شێوەیەکێ کو شاعر گەلەك بووینە و شعر کێم بوویە، هەروەسا نقۆبوونا شعرێ د ناڤ ڕاستەوخۆیێ دا بوویە تشتەکێ ئاسایی، ئەوا ئەڤڕۆ دهێتە نڤیسین، پڕانیا وێ، لەشەکێ بێ گیانە؛ گەلەک مژداری تێدا هەیە کو چ تشتان نابێژیت، و شێواندنەکا مەزن د جوانییا دەربڕینێ دا هەیە.
نە هەر تشتێ دهێتە چاپکرن دێ بیتە شعرەک دروستی ئەگەرچی شعر د سەرۆکانی یێن خۆ دا دهێتە گۆتن نەک نڤیسین، یان ژبەر کو ئاسانکارییەک د چاپکرن و بەلاڤکرنێ دا هەیە بێی هەبوونا ڕەخنەیەکا ڕاست بۆ وێ یا ل سەر کاغەزا ب شعر ناڤ دکەن بەلێ ل گاڤا ڕاستییێ، یان دێ پەیڤ هێتە خەلاتکرن یان ژی دێ هێتە گۆڕکرن.
دەنگەکێ دی دبێژیت: دیمەنێ شعری یێ ب قەرەبالغە تا ڕادەیێ ئالۆزیێ، بەلێ نە هەمی بەرهەمێن شعری خودان هەمان سەنگا داهێنانێ نە، و ئەڤ قەرەبالغییە ژبەر نەبوونا ڕەخنەیا ڕاستی یە، مادەم ئەم پشتبەستنێ ل سەر پرەنسیپێ هەڤسۆزیێ دگەل شاعرەکی دکەین و یێن دی پشتگوھ دهاڤێژین، بەلێ ئەز هزر ناکەم کو هێزا شاعران کز ب بیت، چونکی هەر چەرخەکی ناڤێن خۆ یێن شعری هەنە.

شاعر و دەربڕین ژ ئازارێن جڤاکی
هندەکێن دی دبینن کو شاعر کوڕێ ژینگەها خۆ یە، شاعیر زمانێ گەلێ خۆ یە: «ئەو هەرگیز ژ وێ (ئەز)ا د ناڤ کویراتییا ناخی دا دەردکەڤیت دا کو هەمی جێناڤان پێ کۆم بکەت. ئەو خودیکا خۆدی و دەوروبەرێ خۆ یە، دەربڕینێ ژ ئازارێن خۆ و ئازارێن جڤاکێ خۆ دکەت، لەو چ خێر د شاعرەکی دا نینە یێ کو خۆ ژ ژینگەها خۆ جودا بکەت و دویر ژ خەمێن جڤاکێ خۆ بژیت».
دەنگێ شاعرا بلند دبیت و دبێژن: شاعر ژبەر کو ب شێوەیەکێ تایبەت یێ هەستیارە، پتر هەست ب تشتان دکەت و پەیڤێن پێدڤی هەنە بۆ گۆتنێ. شعر د بنەڕەت دا ئامرازەکە بۆ دەربڕینا هەست و سۆزان، و دەربازبوونە بۆ جیهانێن دی و ڕەخنەگرتنە ژ کێماسی یێن جڤاکی و سیاسی.
بەلێ دشێت وەک ئەرکەکێ جوانی و خۆشییەکا سادە ژی بیت، بەلکو شاعر ژ لایێ کەسێن دی ڤە وەک بوونەوەرەکێ نامۆ بهێتە دیتن. ئەو بخۆ ژی گەلەک جاران پسیارێ ژ ماک و ئەرکێ خۆ د ناڤ جڤاکی دا دکەت».
ژبەر کو گەلەک شاعر د نڤیسینێن خۆ دا ‌ ژ خەم و دۆزێن جڤاکێن خۆ دڤەقەتیاینه: «دڤەقتیاینە ژ ناڤەڕۆکێ، ئەو ناڤەڕۆکا کو زۆربەی جاران تیشکێ دئێختە سەر خەمێن تاکەکەسی و ئەزموونێن کەسۆکی یێن شاعری، ب شێوەیەکی کو خواندەڤان ب زەحمەت د هزرا خوازیار بگەهیت و نەشێت گرێیا وێنەیێ ب هۆستایی هاتیە چێکرن ڤەکەت، وەکی کو ئارمانج ئەوبیت خواندەڤان چ تشتان تێنەگەهیت، و ئەڤ چەندە بوویە ئەگەر کو خەلکەک خۆ ژ شعر و شاعران ڤەکێشیت.
هندەکێن دی دبینن کو شعر بوویە خەمخۆرێ خۆدی، و «ئێدی گرنگیێ ب پەیاما شعرێ نادەت ئەوا دکەڤیتە د خزمەتا دۆزێن مرۆڤی دا ل سەر ئاستێ ناڤخۆیی و مرۆڤایەتیێ».
هەروەسا هندەک ڤەکۆلەر دبینن کو پاشەکشەیا پێشوازییا ل شعرێ د سەردەمێ نوی دا بوویە دیاردەکا جیهانی، بەلێ ئاستێ وێ د ناڤبەرا ڕۆژهەلات و ڕۆژئاڤا دا جودایە، و پڕانیا جارا د بەڕژەوەندییا ڕۆژئاڤا دایە، و بەلکو ئەڤ چەندە ب بهانەیا نویخوازیێ یان یا پشتی وێ بیت.
پاراستنا پێگەهی دناڤبەرا شعرێ و ڕۆمانێ دا
ل بەرانبەر، هەنە دبێژن کو شعر هێژ پێگەهێ خۆ دپارێزیت، سەرەڕای وێ گۆتنا بەربەلاڤ کو سەردەمێ داهێنانا نوکە سەردەمێ ڕۆمانێ یە؛ چونکی داهێنانا ڕۆمانێ چێنەدبوو ئەگەر ب تۆڤێ شعرێ یێ داهێنانێ نەهاتبا پیتاندن. و ئەڤ لڤینا د دیمەنێ شعری دا و زۆرییا بەرهەمێن شعری و فێستیڤال و خەلاتێن بۆ شعرێ هاتینە تەرخانکرن، ڤێکڕا باشترین گرۆڤەنە کو شعر دیوانا گەلی یە و پارێزەرێ مێژوویا وی یە.
بۆ زیندیکرنا گیانەکێ نوی د ناڤ شعرێ دا، و بۆ پالدانا گەنجێن مە، کو ڕویبکەنە شعرێ سەرەڕای زالبوونا شۆڕەشا دیجیتالی، پێدڤییە ل بەراهییێ ئەوان شارەزایی د نهێنی یێن زمانی دا هەبیت، و یا دویێ؛ پێدڤییە شاعر ب زمانەکی بنڤیسن کو کارتێکرنەکا مەزن د ژیانا ئەدەبی دا ب گشتی بکەت.
ب ڤی شێوەی – ب دیتنا گەلەکان – دێ شێن ڤی ڕەنگێ ئەدەبی یێ جوان ڕاستکەنەڤە، و بەرەف ئاسۆیان بەن کو ڕەونەق و سیحر و جەماوەرێ وی یێ مەزن بۆ بزڤڕینن.

13

عـەدنـان ئەحمەد مزووری

ناكۆكی یا د ناڤبەرا سەرۆكێ ئەمریكی (تڕەمپ)ی و سەرۆكێ ئۆكڕانی (زیلینسكی) دا چێبووی ل كۆچكا سپی، نە هەلكەفت بوو، بەلكو یا چێكری بوو، دا بۆ هەمیان دیاربیت كا سییاسەتا ئەمریكی یا دەرڤەیی، بۆ چار ساڵێن داهاتی یا چاوایە.
تڕەمپ یێ كاردكەت، دا پاڵپشتی یا ئەمریكی بۆ ئۆكڕانیایێ ڕابوەستینیت و گۆتارەكا پەسندكرنێ بۆ ڕۆسی بكاردئینیت، ب مەرەما ڤەكرنا هەڤگرێدانا ویلایەتێن ئێكگرتی دگەل هەڤپەیمانی یا ڕۆاڤای و هەلوەستێن تڕەمپی، ئاڕاستەی هەردوو گۆرەپانێن شەڕی (ئۆكڕانیا و غەززە) د گونجاینە ل گەل ڕێبازا وی، یا گرێدایی ب سەرئێخستنا یێ ب هێز ل سەر یێ لاواز ڤە، جا ل غەززە پێشنیاردكەت، كو فەلەستینی یا
ب زۆری كۆچبەركەن، ئەوا خۆ ئیسڕائیلێ نە دوێرییا ب ئاشكەرایی بێژن، سەبارەت ئۆكڕانیا، تڕەمپ زیلینسكی تۆمەتباردكەت كو ئەو «دكتاتۆرەكێ بێ شەعبییەتە»، وەكو ئەوە یێ دەست ب شەڕی كری، ئەڤە ئاخفتنەكە خۆ ڕۆسی ب خۆ ژی نەوێرن خۆ لێ بكەنە خودان.
هەمی دزانن كو ئەڤ هەلوەستێن تڕەمپی، دهەڤدژن د گەل یاسایا نێڤدەولەتی، ئەڤجا ویلایەتێن ئێكگرتی ب خۆ، ڕێكەفتنەك ل گەل ڕۆسی ئیمزاكربوو، ئێكبوونا ئەردێن ئوكڕانیا پشتی سەرخوەبوونا وێ زامن دكەت، بەرانبەری كو ژ ژێرخانەیا خۆ یا ئەتۆمی ڤەبیت، لێ وەك ڤان ڕێكەفتنا چ ڕامان نینن ل دەف تڕەمپی، جا ئەو دانپێدانێ ناكەت تنێ ب لۆژیكا هێزێ نەبیت.
د مەودایێ كورت دا، تڕامپی شیانا هەی یا وی دڤێت جێبەجێكەت، چونكی كۆماری یێن ل كۆنگرسی و دادوەرێن پارێزگار، ئەوێن د زاڵ لسەر دادگەها بلند، ل بەرانبەری سەرۆكەكێ جمهۆری یێ نوی ڕاناوەستن،
لێ تڕەمپ دێ د مەودا یێ درێژ دا سەركەڤیت؟
نڤیسەرەك (*) دبینیت كو سێ فاكتەرێن هەین دەرفەتێن وی لاوازدكەن:
ئێكەم: تڕەمپ دەسهەڵات وەرگرت ب پاڵپشتی یا نیڤا دەنگدەران و زانیاری دبێژن كو شەعبییەتا وی یا پاشڤەدهێت تا ل ژێر ٥٠٪، و سییاسەتێن وی یێن ئابۆری ل سەر دوو شەنگەستانە: یا ئێكێ زێدەكرنا ڕەسمێن گومركی نە ل بازرگانی یا نێڤدەولەتی، و یا دوویێ گەشتكرنا پشكەكا مەزن ژ كۆچبەران، و هەردو سییاسەت دێ بن سەدەمێن بلندبوونا نرخا، ل دەمێ كو تڕەمپ ژ بنەجهـ هاتە دەسهەڵاتێ ب سۆزا كێمكرنا وان و بەروڤاژی هندە كومەڵگەهێن دی، ئەمریكی دگەل تێكچوونا ئابۆری خۆش نابن.
دوویەم: ژ بلی ڕۆسی و ئیسڕائیلێ، تڕەمپی چ هەڤپەیمانێن نێڤدەولەتی نینن و د دەمەكێ كێم دا نێزیكترین هەڤسویێن خۆ كو كەنەدایە ژ خۆ كر و ل گەل هەڤپەیمانێن خۆ یێن ئەوڕۆپی نەخۆشكر و ژبەر خراببوونا پەیوەندی یێن دەرڤەیی دێ خەملاندنەكا ئابۆری یا گرانبها كەفتە لسەر كۆمپانییێن ئەمریكی، جا ویلایەتێن ئێكگرتی نەشێن بەردەوام بن. ب دەسڤەئینانا مفایێن ئابۆری یێ جیهانی ل دەمێ كو یا كاردكەت بۆ وێرانكرنا وی سیستەمێ خۆ پێڤە دگریت.
سێیەم: تڕەمپ یێ ڤێ هەمیێ دكەت د سییاسەتا دەرڤەیی دا، ل دەمێ كو دیمەنێ ناڤخۆیی د ڕەوشەكا ئاڵۆز دا دژیت، جا یێ فەرمانبەرێن میری ب ژمارەیێن مەزن ژكاردكەن ب بەهانە یا كێمكرنا خەملاندنا و ئەڤە وێ دگەهینیت كو ڕێڤەبەریا تڕەمپی شێوازەكێ ڕویبڕویبوونێ ب خۆڤەدگریت چ ل ناڤخۆ و چ ل دەرڤە.

(*) ئەو نڤیسەر ئەڤە یە: د. ئەحمەد كۆرۆ/ ویلایەتێن ئێكگرتی یێن ئەمریكی. مامۆستایێ زانستێن سییاسی
ل ویلایەتێن ئێكگرتی.

10

عـەدنـان ئـەحمەد مـزووری

ل كەسێ ناهێتە ڤەشارتن، كو جیهان هەمی یا ل بەرانبەر بەرهنگاری یەكا مەزن، ئەو ژی گوهۆرینا سەقایە، ئەوا بوویی مەتڕسیەك گەفێ ل خەلكێ جیهانێ دكەت و پێخەمەت ڕویبڕویبوون ژ ڤێ دیادەیا مەتڕسیدار، گەلەك پێنگاڤ هاتنە ل سەر ئاستێ دەولەتان هاڤێتن.
ئێك ژ وان پێنگاڤان، ڕێكەفتنا سەقایە، ئەوا ویلایەتێن ئێكگرتی ژی ل سەر ئیمزا كری ل دەمێ ئۆبامای، لێ وەسا دیارە كو ئەڤ ڕێكەفتنە، وەكی یارییەكێ لێ هات، د دەستێن هەر سێ ڕێڤەبەری یێن پشتی ئۆبامای هاتینە كۆچكا سپی.
ل ماوەیێ سەرۆكاتیا خۆ یا ئێكێ‌، تڕامپی ب لەز ڤەكێشانا وەڵاتێ خۆ ژ ڕێكەفتنێ ڕاگەهاند، سەرەڕای كو ڕێڤەبەری یا بەری وی ئاهەنگ گێڕابوو ب ئیمزاكرنا ڕێكەفتنێ، و جۆن كێری وەزیرێ دەرڤە یێ ئۆبامای، دەمێ چوویە پاریس، دا ڕێكەفتنێ ئیمزا كەت نەڤیا خۆ دگەل خۆ بر و دانا پێشیا خۆ ل سەر مێزێ، د دیمەنەكی دا، ئاجانسێن نووچەیان ڤەگوهاست.
و مەبەست ژ دانانا نەڤیێ ل سەر مێزێ، ئەوبوو كو ئەڤ ڕێكەفتنە گرێدای نەوەیێن داهاتی نە، و ئەڤە بتنێ بەسە كو
ڕێكەفتن ب بیت جهێ پێگیریێ و ڕێزێ ژ لایێ هەمی دەولەتێن ئیمزا ل سەر كری.
و دەمێ ڕێڤەبەری یا سەرۆك بایدن هاتی، ژ بڕیارا ڤەكێشانێ لێڤەبوون و ویلایەتێن ئێكگرتی ڤەگەڕاندەف جهێ وێ، و بۆ هەمیان ڕۆنبوو كو ڕێڤەبەری یا نوی نیازەكا هەی كو پێگیر بیت ب ڕێكەفتنێ، و ژ نیشانێن وێ نیازێ ئامادەبوونا بایدن بوو ل كۆنگرێ سەقای ل مسرێ، و بەخشینا كوژمەكێ پارەی بۆ ئەفریقیا، ژ بۆ چارەسەركرنا دەرئەنجامێن گوهۆڕینێن سەقای ل كیشوەرێ.
لێ بەختی نەڤیا كەیفا جیهانێ درێژ بیت، ب ڤەگەڕیانێ و پێگیریێ، چونكی چاوا تڕەمپ بۆ جارا دویێ، هاتە د كۆچكا سپی ڤە، ئەو دوبارەكر یا جارا ئێكێ كری و جارەكا دی ڤەكێشانا وەلاتێ خۆ ڕاگەهاند!
وەك بەهانە بۆ بڕیارا خۆ، گۆت كو چین یا بەردەوامە د پیسكرنا سەقایێ جیهانێ دا، ب پیشەسازی یێن خۆ یێن مەزن و ئەو نەشێت پیشەسازی یێن وەلاتێ خۆ زەمكەت، ب یا ڕێكەفتن دسەپینیت، ئەڤەیە یا تڕەمپی گۆتی و ئەو قەت نەبەهانە یە بۆ دوبارەكرنا ڤەكێشانێ، چونكی یا باشتر ئەوە كو جیهان كاركەت ل سەر پێگیریا چینێ ب خالێن ڕێكەفتنێ، نەك ب ڤەكێشانێ.
ئاژانسا نۆچەیان یا فەڕەنسی، ڕاگەهاند كو دەسهەڵاتێن تایلەندی (٢٥٠) قوتابخانە ل بانكۆكا پایتەخت دائێخستن، ب سەدەما ئاستێن بلند یێن پیسبوونا بای، ئاژانسێ گۆت ژی، كو دەسهەڵاتان ب ملیۆنان ئاكنجی پاڵدان كو د ماڵێن خۆ ڤە كاركەن، ژ ئەگەرێ پیسبوونێ ب خۆ یا ئەڤە ژ سالا ا ٢٠٢٠ نە گەهشتیە ڤی ئاستی.
ئەڤە ل هەیڤا چوویی بوو، پشتی وێ ب چەند ڕۆژان ئاژانسا نووچەیێن ئەنەدۆلێ، ژ كاترین ڕاسل سەرۆكا ڕێكخراوا «یۆنیسێف» ڤەگوهاست، كو باهۆز و لەهی بوون سەدەما نەچوونا (٢٥٠) ملیۆن زارۆكان بۆ قوتابخانەیێن خۆ ل سالا ٢٠٢٤، ب ڕێژەیا زارۆكەكی ژ هەر حەفت زارۆكان ل جیهانێ.
ئەڤە ژی تنێ دو نموونەنە، ل سەر ئەوا جیهان تووشی دبیت، ژ بەر گوهۆڕینێن سەقای، ژ ئەنجامێ پیسكرنێ ل سەر ڕویێ ئەردی، دەولەت ژی سەرقالی هەڤڕكیێ نە، و چ پێ نەڤێت، دەمێ یێن مەزن ب نافئێك دكەڤن، یێن بچویك بەرپێیا دچن!

website security