نەهلا ئەحمەد
ژ بو وەرزشڤانان گەلەك یا گرنگە كو كەسێن شارەزایی د وەرزشێ دا هەبیت شرۆڤەكرنێن زانستی یێن وەرزشی یێن باش بۆ هەر یارییەكێ یا روودانەكا چالاكیێن وەرزشی بكەت، ئەرێ هەمی كەس دشێن ببنە شرۆڤەكارێن وەرزشی؟ ل ڤێرێ دێ بێژین نەخێر هەمی كەس نەشێن ببنە شرۆڤەكارێن وەرزشی یێن سەركەفتی، چونكی ئەڤ مەیدانە پێدڤی ب كومەكا كارامەیی و زانست و پێگوهرینێن پیشەیی هەیە. ئانكو ل ڤێرێ بو مە دیار دبیت كو پێدڤیە كەسێ پێشەیا وی ئەڤ بوارە بیت تا بشێت ببیتە شرۆڤەكارەكێ وەرزشی یێ باش، هەر چەندە د نوكە دا ل سەر تورێن كومەلایەتی هەمی كەس دشێن بۆچوونا خۆ بێژن لێ جوداهیەكا مەزن یا دناڤبەرا حەز ژێكەرەكێ وەرزشێ و شرۆڤەكارەكێ كو پیشەیا وی وەرزش بیت دا هەیی، یا گرنگ ئەوە كو كەسێ دبیتە شرۆڤەكارێ وەرزشی تێگەهشتنەكا كوور بۆ خۆیندەڤانان د نەخشە و پلان و گوهۆڕانكاریێن تەكتیكی یێن راهێنەرا دا هەبیت، نە بتنێ وەسفا روویدانان بكەت، خالەكا دی یا گرنگ پێدڤیە لدەف شرۆڤەكارێ وەرزشی هەبیت ئەوژی ئەوە كو یێ بێ لایەن بیت ژ بۆ هندێ نەكو ئەو پشتەڤانێ یانەكێ یان یاریزانەكی بیت و بتنێ پەسنا وێ یانەیێ یان ژی یاریزانی بكەت ژ بەكۆ حەزژێكرن بو ئەوان هەیە ئانكو یا گرنگە ب بێ لایەنی تەماشەیی یاریێ بكەت، خالەكا دی یا گرنگ ئەوژی ئەوە كو دڤێت شیانێت گەهاندنا پێزانینان ب دروستی و ب زمانەكێ روون و سەرنج راكێش بو بینەران یا خویندەڤانان بدەتە دیاركرن، ب بەردەوامی دیڤ چونا دەنگ و باسێن روژانە یێن یانە و یاریزانان بكەت كو ئەڤەژی خالەكا گرنگە و یا پێدڤیە لدەف شرۆڤەكارێ وەرزشی هەبیت، ئانكو دڤێت كەسێ ب ڤی ئەركی راببیت كەسەكێ ئەكادیمی ببیت چێنابیت هەر كەسەك بێژیت ئەز دشێم ببمە شرۆڤەكارەكێ باش و بتنێ پێزانین ل سەر یاریزانەكی یان یانەیەكێ هەبن.
