سالح محه‌مه‌د ته‌یڕۆ
گه‌ر ئه‌م هنده‌كىً بزڤرینه‌ڤه بۆ دیرۆكا شۆره‌شێن رزگاریخوازیا كوردستانێ كو هه‌رده‌م سه‌ركردایه‌تیا بزاڤا رزگاریخوازیا كوردستانێ و نه‌مازه د شۆرشێن ئیلۆن و گولانێ دا و ب سه‌ركردایه‌تیا پارتى دیمۆكراتى كوردستان و ب رێبه‌رایه‌تیا بارزانیێ نه‌مر و سه‌رۆك مه‌سعود بارزانى، د گه‌ل هندێ دا بووینه كو دۆزا ره‌وایا گه‌لێ كوردستانێ ب شێوه‌یه‌كێ دانوستاندن و دایه‌لۆك و دوور ل شه‌ڕى بهێته چاره‌سه‌ركرن، لێ هه‌رده‌م ئه‌ڤ په‌یوه‌ندیه چووبنه پێش ده‌ستهه‌لاتێن حوكمرانیا عیراقێ یا ئێك ل دووڤ ئێك و بگره هه‌تا ئه‌ڤرۆ ژى د گه‌ل دا بیت خوه ل كوردان ڤه‌كێشایه و هه‌ر جاره‌كێ ژى مه‌رجێن وه‌ها ڤیانه ب سه‌ر سه‌ركردایه‌تیا سیاسى بسه‌پینن كو مه‌حاله ژ لایێ سه‌ركردایه‌تیێ ڤه بهێته قه‌بوولكرن، له‌وما گه‌ر نوكه ژى ده‌لیڤه بۆ بهێته ره‌خساندن ئه‌ز یێ پشتراستم دێ چه‌ندین جارێن دى گه‌لێ كوردستانێ جینۆساید و ئه‌نفال و كیمیاباران و قركرنه‌ڤه، چونكو هه‌كه ده‌ستهه‌لاتێن به‌رییا ڤێ ده‌ستهه‌لاتێ خودان ئێك هه‌لویستیا دژایه‌تیێ بن، كو ئه‌و ژى ب ب تنێ یا نه‌ته‌وى بیت ل هه‌مبه‌رى كورد و كوردستانێ یا ئه‌ڤرۆ بووینه دوئێك نه‌ته‌وه و یا دى مه‌زهه‌ب. له‌وما ل هه‌ر پشتى روودانێن 16 ئوكتوبه‌رێ هه‌ولا هندێ دا كو هه‌رێمه‌ك نه‌مینیت ب ناڤێ هه‌رێما كوردستانێ و زۆر جاران ژى دگۆتن پارێزگه‌هێن باكۆرێ عیراقێ كو ئه‌ڤه، خوه ب خوه ل دژى دستوورێ عیراقێ بوو، چونكو دستوورێ عیراقێ دان ب فیدرالیه‌تا كوردستانێ دایه.
لێ یا مرۆڤ پێ حێبه‌تى دبیت ئه‌وه كو دیاره هنده‌ك لایه‌ن و كه‌س دزانن و نه‌ڤێن بزانن یان دڤێن سه‌رى ل خه‌لكى ب شێوێنن كو تێكچوونا په‌یوه‌ندیێن حوكمه‌تا هه‌رێما كوردستانێ ل سه‌ر پرسا ریفراندۆمێ یه و هه‌كه مه ریفراندۆم نه‌هاتبا كرن ئه‌ڤه نه‌دهاته سه‌ر سه‌رێ خه‌لكێ كوردستانێ، لێ هه‌كه ریفراندوم ژى نه‌هاتباكرن دا ب ڤان كریاران رابن ئه‌گه‌ر ده‌لیڤه بۆ هاتبا ره‌خساندن، به‌لگه‌ه ل سه‌ر گۆتنا ل ده‌مێ كو به‌ریا هاتنا تیرۆریستێن داعش ژى و ل سالا 2014 هه‌ولا داگیركرنا كه‌ركووك و ده‌ڤه‌رێن هه‌رێما كوردستانێ ئه‌وێن ل ده‌رڤه‌یى هه‌رێمێ دا وهێز به‌ر ب وان ده‌ڤه‌ران ئینان خوه هینگى هیچ ریفراندۆم نه‌هاتبووكرن، لێ هێزێن پێشمه‌رگه‌هێن قه‌هره‌مان به‌رسینگێ وان گرتوون و نه‌هێلان ئه‌و پیلان سه‌ر بگرن، لێ ئه‌و رێكه‌فتنا كو ل 16 ئوكتوبه‌رێ هاتیه‌كرن د ناڤبه‌را حوكمه‌تا ناڤه‌ندیا عیراقێ و گرۆپه‌كێ سه‌ر ب لایه‌نه‌كێ سیاسى یێ كوردستانى بوون ول پێش سۆپایى عیراقێ و حه‌شدا شه‌عبى كه‌فتین بۆ داگیركرنا ده‌ڤه‌رێن كوردستانێ ئه‌وێن ب خوینا زیده‌تر ژ 1800 شه‌هیدان و ب هزاره‌ها برینداران و خوه و ماندیبوونا پێشمه‌رگه‌هێن قه‌هره‌مان هاتیه رزگاركرن، ب هه‌ر حال ئها ئه‌ڤه جهێ داخه‌كا گران و مه‌زن و دیرۆك دێ ل به‌رپه‌رێن خوه ڤێ رێكه‌فتنا خیانه‌تكارى ب خامه‌یه‌ك ره‌ش و چه‌په‌ل نڤیسیت.
ئه‌ڤه ژى دزڤریته‌ڤه بۆ وێ چه‌ندى كو هه‌تا نوكه و سه‌ره‌راى ڤان 27 سالێن حوكمرانیێ سه‌ركردایه‌تیا سیاسى نه‌شیاینه خوه رێك بێخن و ببنه خودان ئێك گۆتار و ئێك هه‌لۆیستیا نه‌ته‌وى و نیشتیمانى، ئه‌ڤجا ب هه‌ر ئه‌گه‌ره‌ك و سه‌ده‌مه‌كێ بیت.
له‌وما یاكو ئه‌ڤرۆ ژى دئێته روودان نه‌ك كێشه‌یا هه‌رێما كوردستانێ ل سه‌ر مووچه و بۆدجه‌یه، به‌لكو ل سه‌ر وى مافێ یه وى یه ئه‌وێ د دستوورێ عیراقا فیدرال دا بۆ نه‌ته‌وێ كورد هاتیه په‌سه‌ندكرن و دیاركرن كو ژلایێ پتریا خه‌لكێ عیراقێ ب گشتى و ل سالا 2005 ڤه ده‌نگ ل سه‌ر هاتیه‌دان كو كورد و عه‌ره‌ب هه‌ڤپشكن ب رێڤه‌برنا حوكمرانیا عیراقێ، نه‌ك كورد هه‌ڤوه‌لاتیێ پله دو بیت، كو مه‌حاله ئه‌ڤ هزرا شاش ئه‌وا هه‌یى ل ئالیێ حوكمه‌تا ناڤه‌ندا عیراقێ ڤه، ژلایێ سه‌ركردایه‌تیا سیاسى یا كوردستانێ و نه‌مازه پارتى دیمۆكراتى كوردستان و سه‌رۆك بارزانى بهێته قه‌بوولكرن، چونكو ئه‌و شۆره‌ش و سه‌رهلدان و قوربانى و خه‌بات و تێكۆشین و به‌رخودانا هاتیه‌كرن، ل پێناڤ پاریه‌كێ نانى و مووچه‌یى و بۆدجه‌یى نه‌بوویه، به‌لكو ل پێناڤ مافێ ره‌وا یێ گه‌لێ كوردستانێ و ئازادى و سه‌رفیرازى و سه‌رخوه‌بوونا كوردستانێ بوویه. له‌وما ل دووماهیێ و ب هزرا من ئه‌ڤ پرۆپاگندا دهێته‌كرن، ژ لایێ هنده‌ك كه‌س و لایه‌ن و گرۆپان ڤه، گوایه ئه‌گه‌را ئه‌ڤێ قه‌یرانێ پرسا ریفراندۆمێ بوویه یا دووره ژ راستیێ و مه‌رامێن وان بۆ پرۆپاگندێن هه‌لبژارتنێن داهاتى یه و چى دى نه. لێ نزانن كو خه‌لكێ كوردستانێ گه‌له‌ك و گه‌له‌ك ژ ڤێ چه‌ندێ مه‌زنتره و هوشیارتره…
نووترين نووچه
- ب گرنگی دنێڕینە پێگەهێ هەرێما كوردستانێ
- مەسرور بارزانی و بەربژارێ ترەمپی بۆ شیرەتكارییا ئاسایشا نیشتمانییا ئەمریكی دووماهی پێشهاتان گەنگەشە دكەن
- ژ ناڤچوونا رژێما ئەسەدی و دەرئەنجامێن وێ دێ كارتێكرنێن ئەمنی و سیاسی ل سەر ئیراقێ هەبن
- دادگەهەكا بەغدا سكالایەكا وەزارەتا پەترۆلا ئیراقێ دژی هەرێمێ رەتكر
- سەرۆك بارزانی: ئێكەتییا ئافرەتێن كوردستانێ ئەزموونەكا سەركەفتییا پشكدارییا ئافرەتێ یە د ژیانا سیاسی و جڤاكییا كوردستانێ دا
- ئێكەتییا ئافرەتان هەڤپشكەكا سەرەكییە د گەشەپێدانا جڤاكەكێ مەدەنیدا
- ئێكەتییا ئافرەتان قوتابخانەیا پێگەهاندنا چەندین ئافرەتێن خودان شیان و سەركردە یە
- مەسرور بارزانی و وەزیرێ دەرڤەیێ بەحرەینێ پێشڤەبرنا پەیوەندییان د وارێن جۆرا و جۆر دا گەنگەشەكر
- میسال ئالۆسی: سەرۆك بارزانی دشێت هەموو ئالیێن سیاسی كۆمڤەكەت و چارەسەرییا كێشەیان بكەت
- سەرۆك بارزانی و شێخ عەبدوللا حمێدی عەجیل یاوەر رەوشا دەڤەرێن سنۆری یێن ئیراقێ و سووریێ گەنگەشەكر
سالح محه‌مه‌د ته‌يرۆ
چه‌ند پرسیارێن بێ رامان و دلته‌نگ
ساڵح محه‌مه‌د ته‌یرۆ
د هژماره‌كا رۆژناما هه‌ولێر یا رۆژانه و ل به‌رپه‌رێ (كراوه) و ل گۆشێ (ده‌رده دڵ) یێ نڤیسكار و رۆژنامه‌ڤان (شێرزاد عبدالرحمن)، بابه‌ته‌ك ل ژێر ناڤێ (پرسیاره بێ ماناكان!) هاتبوو به‌لاڤكرن، هه‌رچه‌نده پشتى كو چه‌ندین جاران من خواندى و ئه‌ز ب هه‌مى بیروبۆچوونێن خوه دگه‌ل نڤیسكارى دامه كو ب راستى هنده‌ك پرسیار ژ خه‌لكى دهێنه‌كرن، هه‌كه مرۆڤ ب هوورى هزر بكه‌ت، چو رامانه‌ك تێدا نینه و ره‌نگه‌كێ دى یێ مایتێكرنا كه‌سایه‌تیا مرۆڤى یه و بۆ دلته‌نگیا وى یه و هیچى دى نه، ل سه‌ر ڤان پرسیاران من ژى ڤیا پتر ل سه‌ر راوه‌ستم و ده‌وله‌مه‌ند بكه‌م، چونكو ئه‌ز پشتراستم كو هنده‌ك ژ ڤان پرسیارا دبنه ئه‌گه‌را هندێ كو مرۆڤى تووشى دره‌وا بكه‌ن و ب ره‌نگه‌كێ نه‌وه به‌رسڤێ ل سه‌ر بده‌ت، وه‌رن دا پێكڤه ل سه‌ر ڤان پرسیارێن بێ مه‌عنا و دلته‌نگ راوه‌ستێن، هه‌ول بده‌ین خوه ل ڤى كلتوور و دیاردێ رزگار بكه‌ین، ژ به‌ر كو هه‌ر د بنه‌ره‌ت دا ئه‌ڤان پرسیارا چ په‌یوه‌ندى ب پرسیاركه‌رى و كه‌سایه‌تیا مرۆڤى ڤه نینه كو ئه‌و ژى ئه‌ڤه‌نه:
1ـ تۆ ل كیڤه‌یى؟ ئه‌ڤ پرسیارا رۆژانه ژ مرۆڤى دهێته‌كرن و نه‌مازه ل ده‌مێ په‌یوه‌ندیێن تێله‌فۆنى ڤه، باشه ئه‌وێ په‌یوه‌ندیێ ب مرۆڤى ڤه دكه‌ت چ په‌یوه‌ندى ب جهێ مرۆڤى ڤه هه‌یه كو ئه‌ز ل كیڤه‌بم؟، ئه‌رێ ئه‌گه‌ر ئه‌ڤێ پرسیارێ ژى نه‌كه‌ت رامانا وى ناگه‌هیت یا وى دڤێت؟
2ـ ته چه‌ند زارۆ هه‌نه و ناڤێت وان چنه؟ ئها ل ڤێره دیار دبیت كو پرسیاركه‌رى دڤێت ره‌گه‌زنامه‌یا زارۆیێن مرۆڤى ژى بزانیت و ئه‌ڤه ژى میاتیكرنه‌كا خێزانى یه، ئه‌رێ مرۆڤى چه‌ند زارۆ هه‌یین یان نه‌بن چ په‌یوه‌ندى ب لایێ به‌رامبه‌رڤه هه‌یه و خوه لایه‌نێ به‌رامبه‌ر دادوه‌ر نینه تاكو لیكۆلینه‌ڤێ ل ره‌گه‌زنامه و كه‌سایه‌تیا زارۆ و خێزانا مرۆڤى دا بكه‌ت و بزانیت هژمارا سه‌ره‌خێزانێ مرۆڤى چه‌نده.
3ـ پرسیاره‌كا دى دى كو هه‌ر ل پشتى پرسیارا ئێكێ ئه‌وا من ل سه‌رى ئاماژه پێدایى دهێته‌كرن كو ئه‌و ژى دێ بێژیت (مووچێ ته چه‌نده؟ و ل ڤان قه‌یرانێن دارایى تو چاوا ژیانا خوه دبه‌یه سه‌رى و هنگ بخوه چ دكه‌ن؟)، ئها دڤێت بارێ ئابووریێ مرۆڤى ژى بزانیت، ل ڤێره ئامووژگاریه‌كا بابێ من دئێته بیرامن كو هه‌رده‌م دگۆته مه (هیچ ده‌مه‌كێ نه‌بێژه ئه‌ز یێ فه‌قیرم ومن چ نین، ئه‌و ژى ژ به‌ر دو ئه‌گه‌ران بوو، یا ئێكێ تاكو هه‌ڤالێ ته یێ هه‌رده‌مكى ب ڤێ گۆتنێ تووشى دلته‌نگیێ نه‌بیت و دوژمنێ ته ژى ب هه‌ژاریا ته دلخۆش نه‌بیت)، ڤێجا فه‌ره كو مرۆڤ ئه‌ڤێ پرسێ ژى ب كه‌س نه‌كه‌ت تاكو ئه‌وێ تو ئه‌ڤێ پرسیارێ ئێ دكه‌یى دلته‌نگ نه‌بیت و بارێ ئابووریێ وى ژى چ په‌یوه‌ندى ب ته‌ڤه نینه و مووچێ وى چه‌ند بیت یان نه ئه‌ڤه ئاریشه‌یا وى یه نه‌ك یا پرسیاركه‌رى.
3ـ بۆچى سه‌رێ ته سپى بوویه و تو پیر بوویى؟ دێ ڤێجا وه‌ره شێت نه‌به و ئه‌ڤه ژى مایتێكرنه‌كا خودایى یه، چونكو قژ سپى و پیر بین ب ده‌ستێن خودێ یه و كه‌س ژى نه‌ڤێت قژ سپى و پیرببیت، لێ د ده‌ستێن مرۆڤى دا نینه و حه‌زا خودایى یه، ئه‌رێ گه‌لۆ پێدڤى یه ئه‌ڤى پرسیارا بێ مه‌عنا مرۆڤ ژ خه‌لكى بكه‌ت و بكه‌ڤیته د نه‌خۆشیه‌كا ده‌روونى دا، چونكو ئه‌ڤ هه‌ردو خه‌سله‌ته نیشانێ دووماهیا ژیانێ نه.
4ـ ل ڤێ چه‌ندێ ژى بهێنا وان ناهێن دێ هێن پرس ب به‌ركرنا ره‌نگێن جلكا كه‌ن كو ئه‌رێ مرۆڤ پتر حه‌ز ل چ ره‌نگى یه. هه‌ركه‌سه‌كێ حه‌زه‌كا تایبه‌ت ب ره‌نگان هه‌یه، ڤێجا چ ره‌نگێن سپى یان ره‌ش یان شین و….هتد، ئه‌رێ مرۆڤ هه‌ر چ ره‌نگى ل به‌ر بكه‌ت خه‌لكى چ شۆل پێ یه، ئه‌ڤ مایتیكرنه یا گرێدایه ب سایكولۆژیا مرۆڤى ڤه و ئه‌و ره‌نگێ عه‌قلێ مرۆڤى ببریت مرۆڤ دێ ل به‌ركه‌ت و ئه‌ڤا دى چیه هوون پرس دكه‌ن.
5ـ هه‌تا هنده‌ك جاران پرسیارا زه‌عیفى و قه‌له‌ویا مرۆڤى ژى دهێته‌كرن، هه‌كه مرۆڤ یێ زه‌عیف بیت، دبێژنه مرۆڤى ئه‌ڤه ته خێره تو هنده لاوازبوویى و تو چوویه دختۆرى هه‌تا كو بزانى ته چ نه‌خۆشى هه‌نه؟، یان ئه‌گه‌ر مرۆڤ قه‌له‌وبیت دێ بێژن ئه‌ڤه ته خێره و تو چ دخویى و ئه‌ڤ قه‌له‌ویا ته دێ بیته ئه‌گه‌را تووشبوونا نه‌خۆشیێن پاله‌په‌ستۆیا خوینى و شه‌كرێ و راوه‌ستنا دلى و… هتد، ل ڤێره چوون پرسیار ب گیانێ مرۆڤى و ساخله‌مى و نه‌خۆشیا مرۆڤى ژى هاته‌كرن، دێ ڤێجا وه‌ره سه‌رێ ته ل ڤێ سوعبه‌تێ ده‌ربچیت.
6ـ دیسا ژ خه‌مۆكى و كه‌یفخۆشیا مرۆڤى ژى پرسیار دهێنه‌كرن، ئه‌گه‌ر مرۆڤ یێ عاجزبیت دێ بێژنه مرۆڤى ئه‌ڤه چ ب سه‌رێ ته هاتیه و تو بۆ هنده بارێ خوه گران دكه‌یى و دونیا به‌رهندێ ناكه‌ڤیت و دێ هه‌ر مرین، هه‌ست ناكه‌ن كو كه‌س نیه لڤێ ژیانێ یێ بێ كه‌م و كورتى و كێماسى بیت و یێ ته‌مام بیت ل ژیانێ ڤێجا ب ره‌نگه‌كێ ئه‌و كێماسى هه‌بن، ئه‌گه‌ر مرۆڤ هه‌رده‌م یێ پشكۆرین و ده‌ڤ بكه‌نى بیت، دیسا دێ بێژن بۆ وه‌ناكه‌یى مه‌كر و ته‌خار!، وه‌ها هزردكه‌ن كو وان مرۆڤ یێ بخودانكرى و مه‌زنكرى و تال و سویرى یێ ب مرۆڤى ڤه‌برى.
7ـ زۆر جاران مایتێكرنێ د ژنئینان و ژن نه‌ئینانێ دا ژى دهێته كرن ژلایێ خه‌لكه‌كێ مایتێكرنڤه، ئه‌گه‌ر زوى بینیت دێ بێژن هێشتا زوى بوو و ئه‌گه‌ر دانه‌عومر كه‌فت هه‌روه‌تۆڤ دێ بێژن فه‌قیرى هێشتا گرێیا نه‌سیبێ وى ڤه‌نه، بوویه یان كه‌س شوو پێ ناكه‌ت و كه‌سێ نه‌ڤێت.
8 ـ پرسیاره‌كا دى ئه‌رێ زارۆیێن ته خویندن ته‌مامكرى یه و كه‌س هاتیه دامه‌زراندن؟، جاره‌كا دى دێ مرۆڤى تووشى خه‌مۆكیه‌كا ده‌روونى دكه‌ته‌ڤه و ئه‌و بخوه دزانیت كو ل ڤان قه‌یرانا دامه‌زراندن نینه، یان دێ بێژیت هه‌كه تو نه‌شێى زارۆیێن خوه دابمه‌زرینى، ئه‌رێ كى دێ شێت و كه‌س هندى ته به‌رپرس و خه‌لكى نه‌ناسێت، ل ڤێره گومانێ بۆ مرۆڤى و زارۆكێن مرۆڤى دروست دكه‌ت و زارۆ ژى ره‌نگه وه‌ها بزانن كو خه‌مساریه‌ك ژ لایێ بابێ وانڤه‌یه هه‌یه، له‌وما نه‌هاتینه دامه‌زراندن، باشه ما كى حه‌ز ناكه‌ت كو هه‌ر زارۆیه‌كێ وى باوه‌رناما خوه وه‌رگرت بێته دامه‌زراندن؟
9ـ بۆچى ته هه‌تا نوكه چ ژن بۆ كورێن خوه نه‌ئیناینه یان ته كچین خوه نه‌داینه شوى؟، دێ ڤێجا وه‌ره سه‌رێ ته ژ ڤى سوعبه‌تێ ده‌ربچیت، به‌ریا هه‌مى تشته‌كێ ژنئینان و شووكرن قسمه‌ت و نه‌سیبه و ب ده‌ستێ مرۆڤى دا نینه و ئه‌م هه‌مى حه‌ز دكه‌ین كو كورێن مه ژنا بینن و كچێن مه ژى شوو بكه‌ن و بچنه سه‌ر رزقێ خوه، لى ئه‌و بخۆ دزانیت كو ل ڤان قه‌یرانا ئه‌ڤ چه‌نده ژى گه‌له‌ك یا ب ساناهى نیه و یێ هزر ناكه‌ت كۆ بۆ ڤێ مه‌ره‌مێ پێدڤى ب خه‌رجیاتێن مه‌زن هه‌یه.
ئه‌ڤه چه‌ند پرسیارێن ژ وان پرسیارێن بێ مه‌عنا و واته و دلته‌نگ ژ مرۆڤى دهێنه‌كرن، ڤێجا مرۆڤێ دڤێت به‌رسڤێ ل سه‌ر بده‌ت دێ هه‌ول ده‌ت ل هیجه‌ت و هنده‌ك جاران ل دره‌وان بگه‌رهێت تاكو به‌رسڤه‌كا ب قه‌ناعه‌ت بۆ لایه‌نێ پرسیاركه‌ر بده‌ت و خوه ژ وان پرسیاران رزگار بكه‌ت، ل دووماهیێ پێشنیاز دكه‌م كو خه‌لكێ مه خوه ژ ڤان جۆره پرسیارێن دیارده و بوویه كلتوور رزگاربكه‌ن و خه‌لكى ژى دلته‌نگ و غه‌مگین نه‌كه‌ن، بلا ئه‌ڤ كه‌سێن ڤان جۆره پرسیاران دكه‌ن خوه ژ ڤان جۆره پرسیارا دووربێخن و ل گه‌ل ڤان پێشكه‌فتنان دا بژین نه‌ك به‌روڤاژى یا دى ژى بلا به‌رسڤ بۆ خوینده‌ڤانێن هێژا بیت…
نه‌جمه‌دین یووسفى رێڤینگه‌كێ راسته‌قینه یێ رێبازا بارزانى نه‌مربوو
ساڵح محه‌مه‌د ته‌یرۆ
گه‌له‌ك كه‌س هه‌نه كو هه‌ر ل ده‌ستێكا ژیانا خوه، پیرۆزترین رێك هه‌لدبژێرن، كو ئه‌و ژى خه‌بات و تێكۆشین و به‌رخودان وخزمه‌تكرنه ل پێناڤ ئازادى و سه‌رخوه‌بوونا گه‌ل و وه‌ڵاتى كو ناڤێ ڤان جۆره كه‌سان ب خامه‌یه‌كێ زێرێن ل به‌رپه‌رێن دیرۆكێ دهێنه تۆماركرن و دبنه هێما و دیارده د ناڤ هزر و ده‌روونێ ملله‌تێ خوه دا، سه‌یدا نه‌جمه‌دین یووسفى ژى ئێك بوویه ل ڤان جۆره كه‌سان و زۆر زه‌حمه‌ته مرۆڤ خه‌بات و ماندیبوون و به‌رخودانا (61) سالان د به‌رپه‌ره‌كێ رۆژنامه‌یه‌كێ دا خوه‌یا و ئاشكرا بكه‌ت، ئه‌گه‌ر مرۆڤ ب راستگۆیانه به‌رپه‌رێن ژیانا سه‌یدانه‌جمه‌دین یووسفى هه‌لده‌ته‌ڤه دیاربیت كو ژیانا وى یا پربوو ژ خه‌بات و تێكۆشین و به‌رخودان و خزمه‌تكرن و هه‌ست نه‌كرن ب ماندیبوون و دوورنه‌كه‌فتن ل به‌رخودانێ و سه‌ره‌راى كو ئه‌ڤ خه‌بات و به‌رخودانه چه‌ند یا سه‌خت و دژوار بوو، لێ رۆژه‌كێ ل رۆژان بێ ئۆمێدیێ ده‌ست ئه‌ڤى مرۆڤێ مه‌زن نه‌گرت و هه‌رده‌م هیڤى و ئۆمێد ل ده‌ف سه‌یدایى دبلندترین ئاست دا بوو، چونكو په‌روه‌رده‌یێ راسته‌قینه یێ قوتابخانا كوردایه‌تى و دادپه‌روه‌رى و راستیێ بوو كو ئه‌و ژى قوتابخانا بارزانیێ نه‌مره، خاله‌كا دى یا هه‌ره گرنگ د ژیانا ئه‌ڤى دلسۆز و كوردپه‌روه‌ر و وه‌لاتپارێزه‌یى دا كو هێشتا د ژیه‌كێ گه‌نج و لاوینیێ دا بوویه چه‌ندین به‌رپرسیاره‌تیێن حزبى و میرى وه‌رگرتینه وه‌كو به‌رپرسێ لێژنه ناڤچه و قایمقامیا قه‌زا ئامێدى كو ئه‌ڤه ل ده‌ستپێكا سالێن شێستاندا بوویه و ئه‌ڤه ژى دزڤریته‌ڤه بۆ شیان و دلسۆزى و خه‌مخۆرى و جهێ باوه‌ریا بارزانیێ نه‌مر و سه‌ركردایه‌تیا پارتى دیمۆكراتى كوردستان, ئه‌ڤ مرۆڤه ئێك بوو ژ مرید و په‌یره‌وێ راسته‌قینه یێ رێبازا پیرۆزا بارزانیێ نه‌مر و ب دروستى په‌یڤا بارزانیێ نه‌مر په‌یره‌وكرى یه ده‌مێ كه‌ره‌مكرى و گۆتى: شانازیه‌كا مه‌زنه مرۆڤ خزمه‌تكارێ ملله‌تێ خوه بیت.. د دیرۆكێ دا من نه‌خواندى یه و من نه دیتى یه كو په‌سن و مه‌دحێن كه‌سه‌كێ بكه‌ن و بێژن ئه‌ڤى مرۆڤى خوارنه‌كا زۆر خۆش دخوار یان ل سه‌ر جهه‌كێ نه‌رم دنڤست و پ تنێ په‌سنا وان دهێته‌كرن ئه‌وێن خه‌بات و تێكۆشین ل پێناڤ گه‌لێ خوه كربیت)).
دیسا سه‌یدا نه‌جمه‌دین یووسفى چ جاران خوه د دوورى سه‌نگه‌رێن به‌ره‌ڤانیكرنێ دا نه‌دیتى یه چ ل سه‌رده‌مێ شۆره‌شا مه‌زنا ئیلۆنێ و گولانان پێشكه‌فتنخواز و سه‌رهلدانا جه‌ماوه‌رى و به‌ره‌ڤانیكرن و پاراستنا ئه‌زموونا هه‌رێما كوردستانێ و ل شه‌رێ دژى تیرۆریستێن داعش و هه‌رده‌م چ وه‌كو به‌رپرس یان كادر یان پێشمه‌رگه مل ب ملێ پێشمه‌رگه‌یى بوویه، ل سه‌رده‌مێ به‌رپرسیاره‌تیا وى ژى جوداهى دنێڤبه‌را به‌رپرسیاره‌تیى و پێشمه‌رگه‌یى دا نه‌كرى یه و وه‌كو چه‌ندین پێشمه‌رگه‌هێن هه‌ڤسه‌نگه‌رێن وى بۆ مه ڤه‌گێرایى ئه‌ڤه‌ژى خوه‌یا دكه‌ت كو سه‌یدا نه‌جمه‌دین خودان ره‌وشته‌كێ بلند و كه‌ساتیه‌كا ئاڤا و پڕ ژ سنج و ره‌وشتێن بلند و ئایین په‌روه‌ره‌كێ نه‌رم و ناڤین بوو.
كادر و پێشمه‌رگه و سه‌ركرده نه‌جمه‌دین یووسفى سه‌ره‌راى كو خزمه‌تكرنا سیاسى و شۆرشگێرى ل پێناڤ ئازادى و سه‌ربخوى و گه‌هشتنا كورد و كوردستانیان بوویه ب مافێن وان یێن ره‌وا كو ئه‌و ژى ئازادى و سه‌رخۆبوونا كوردستانێ یه، هه‌ر ل پشتى سه‌رهلدانا بهارا سالا 1991 و زڤرینه‌ڤه‌یا وى بۆ ئاخا پیرۆزا كوردستانێ هزر د ره‌نگه‌كێ دى یێ خه‌باتێ و بۆ ته‌خه‌یه‌كا دى كو سه‌ربلندترین ته‌خه د نێڤ جڤاكى داكر كو ئه‌و ژى خزمه‌تكرنا كه‌سوكارێن شه‌هیدێن سه‌ربلند و پێشمه‌رگه‌هێن قه‌هره‌مان و كه‌م ئه‌ندامایه، ئه‌ڤه ژى د ئاڤاكرنا رێكخراوه‌یه‌كا خێرخوازى دیاربوو كو ئه‌و ژى (كۆمه‌له‌یا ئاكنجیكرنا خێزانێن شه‌هیدا ل دهۆك) بوو كو هه‌ر ل دووماهیا سالێن نه‌وه‌تان دا و ل سه‌ر ده‌ستێ وى و ب سه‌رپه‌رشتیا راسته‌وخوه یا سه‌رۆك بارزانى هاته دامه‌زراندن و ل رۆژا دامه‌زراندنا ڤێ رێكخراوێ وهه‌تا نوكه ب هزاران خانى بۆ مالباتێن شه‌هید و كێم ئه‌ندامان هاتنه ئاڤاكرن و هاروكاریێن ڤێ رێكخراوێ ب به‌رده‌وامى بۆ مالباتێن شه‌هید و پێشمه‌رگه و كێم ئه‌ندام و هه‌ژارو به‌لنگاز و لێ قه‌ومایان د به‌رده‌وام بوون، دیسا ل شه‌ڕێ دژى تیرۆرستیًن داعش كۆمه‌لا ئاكنجیكرنا خێزانێن شه‌هیدا (3) ملیۆن دینار بۆ هه‌رخێزانه‌كا شه‌هیدان مه‌زاختن بێ جوداهیا نه‌ته‌وه‌یى و ئایینى و سیاسى و بۆ هه‌ر زارۆكه‌كێ پاش باب ژى (1) ئێك ملیۆن دینار مه‌زاختن و چه‌ند بریندارێن پێشمه‌رگه‌هێن قه‌هره‌مان ژى ل سه‌ر حسابا ئه‌ڤێ رێكخراوێ هاتنه هنارتن بۆ ده‌رڤه‌یى وه‌لاتى بۆ چاره‌سه‌ریێ، دیسا هاریكاریێن به‌رده‌وام بۆ سه‌نگه‌رێن پێشمه‌رگه‌هێن قه‌هره‌مان د سه‌نگه‌رێن به‌ره‌ڤانیكرنێ دا كو هه‌رده‌م سه‌یدایى دگۆت: ((ئه‌گه‌ر ئه‌ز نه‌شێم وه‌كى جاران چه‌كى هه‌لگرم و بزاڤێن له‌شى تێرا من نه‌كه‌ن كو گر و ژێهه‌لیان ببرم ئه‌ز دشێم ل پشتا به‌رۆكێن سه‌نگه‌رى خوارن و پێدڤیان بگه‌هینمه پێشمه‌رگه‌یى و ئه‌ز دشێم د ناڤ هنده‌ك خوه‌به‌خشاندا ژ به‌رۆكێن شه‌ڕى دوور نه‌كه‌ڤم …)).
لێ مخابن كو ل ئێڤاریا رۆژا 12/2/2018 ێ دلێ ئه‌ڤى مرۆڤى مه‌زن و كوردپه‌وه‌ر و وه‌لاتپارێز ل لێدانێ راوه‌ستاو ب ئێكجارى خاتر ژ مه خواست و هه‌ر چه‌نده وه‌كو گیان ل به‌رچاڤێن مه به‌رزه بوو لێ دێ هه‌مینیت د وژدانا هه‌ر كوردپه‌روه‌ره‌ك و دلسۆزه‌كێ رێبازا پیرۆزا بارزانیێ نه‌مر… سلاڤ و رێز ل گیانێ پاقژێ كادر و پێشمه‌رگه و سه‌ركرده سه‌یدایێ نه‌جمه‌دین یووسفى بن.خودێ ژێ رازى بیت.
پارتى دیمۆكراتى كوردستان گونه‌هباره ل به‌ر…!؟
ساڵح محه‌مه‌د ته‌یرۆ
ئه‌گه‌ر ب هوورى ل سه‌ر دیرۆكا پڕ سه‌روه‌ریا پارتى دیمۆكراتى كوردستان راوه‌ستین كو هه‌ر ل رۆژا دامه‌زراندنا وێ ل (16/8/1946)ێ و ل سه‌ر ده‌ستێ رێبه‌رێ نه‌ته‌وه‌یێ كورد بارزانیێ نه‌مر و هه‌تا نوكه و ل پاشه‌رۆژێ ژى ل سه‌ر ئارمانجێن نه‌گورێت نه‌ته‌وى ونیشتیمانى هاتیه ئاڤاكرن، هه‌رده‌م ئه‌ڤێ رێبازێ باوه‌رى ب چه‌سپاندنا دیمۆكراسیه‌تێ و پاراستنا مافێن مرۆڤى وه‌كهه‌ڤیێ هه‌بوویه و رۆژه‌كێ ل رۆژان ژى مساومه ل سه‌ر بهۆسته‌كا ئاخا پیرۆزا كوردستانێ نه‌كرى یه و ناكه‌ت ژى، دیسان ئه‌گه‌ر مرۆڤ دێر ب دێر مێژوویا وى بخوینیته‌ڤه ئێك پیت ژى مرۆڤ تێدا نابیت یا دژى گه‌ل و وه‌لات و نه‌ته‌وه و نیشتیمانى و هه‌ر چه‌ند خه‌بات و تێكوشێن و به‌رخودان و فیداكارى و قوربانیدان و كاودان د سه‌خت و دژوار بن، لێ رۆژه‌كێ ل رۆژان ل به‌رپرسیاره‌تیا خوه یا نه‌ته‌وى ونیشتیمانى نه‌ره‌ڤى یه به‌لكۆ هه‌رده‌م خۆ ب خودانێ دوزا ره‌وایا گه‌لێ كوردستانێ زانى یه، له‌وما دۆژمن و داگیركه‌ر و خۆفرۆش و خیانه‌تكاران هزره‌كا مه‌زن بۆ پارتى دیمۆكراتى كوردستان كرى یه ودكه‌ن و پیلان و ل دووڤ پیلانێ ژى بۆ دارێشتى یه وهه‌ر پارتى ژى ب تاوانبار دزانن، لێ هه‌رده‌م سه‌ركه‌فتن بده‌ستڤه ئینایه وشكه‌ستن وروى ره‌شى بۆ وان پیلانگیروخیانه‌تكاران مایه‌ڤه، ئه‌ڤرۆ ژى ته‌ڤایا ئه‌و پیلانێن عیراقێ و ناڤخوه‌یى و هه‌رێمى َب هه‌ڤكارى ل گه‌ل گرۆپه‌كێ سه‌ر ب لایه‌نه‌كێ سیاسیڤه ل هه‌رێما كوردستانێ ل دژى پارتى دیموكراتى كوردستان و رێبازا پیرۆزا بارزانیێ نه‌مرن و هه‌ر پارتى ژى ب تاوانبارن دهه‌ژمێر، هه‌رده‌م پارتى ژى تاوانباره، چونكو پارتى دیموكراتى كوردستان به‌حسێ سه‌ربخویا كوردستانێ كرى یه ودكه‌ت وهه‌روه‌توف نه‌هێلا رێكێ ب ئیرانێ بده‌ت كو بچه‌كڤه و ل سه‌ر ئاخا هه‌رێما كوردستانێ را به‌ره‌ڤ سووریاڤه بچیت، دیسا پارتى ل دژى فیدرالیا پارێزگه‌ها راوه‌ستا و قه‌بیل نه‌كر ئه‌و یاسا بهێته جێ به‌جێ كرن و بكه‌ڤیته دنێڤ ده‌ستوورى دا، پارتى دیموكراتى كوردستان تاوانباره ژ به‌ركۆ خوه ب خودانێ پرسا ریفراندۆرمێ زانى كو پرسه‌كا نه‌ته‌وى و نیشتیمانى یه و ب سه‌دان ساڵه خه‌بات و قوربانى ژێرا تێته كرن و دان و مێژوویه‌كا دێرین ژى ل ڤێ پرسێ بۆ كورد و كوردستانیان تومار كر ومه‌ترسیه‌كا مه‌زن ژى بۆ داگیركه‌ر و دوژمن و نه‌حه‌زێت كوردستانێ دروست كر، ل په‌یره‌و پرۆگرامێ پارتى دیمۆكراتى كوردستان ئێكه‌تیا نه‌ته‌وه‌یى ئارمانجا وێ یا سه‌ره‌كى یه، یا خوه‌یا ژى كو هه‌ر پارتى دیمۆكراتى كوردستان بوویه نه‌هێلا ئه‌و پیلانا ژلایى عیراقا فیدرال و ب هه‌ڤكارى دگه‌ل ده‌وله‌ته‌كا جیران و گرۆپه‌كێ خاكفرۆش هاتیه داریشتن بۆ دروستكرنا هیلالا شیعى ل ده‌ڤه‌رێ، دیسا پارتى دیمۆكراتى كوردستان پارتیا كرێكارێن كوردستانێ (p.K.k) ب تیرۆریست ل قه‌له‌م نه‌دان له‌وما پارتى تاوانباره، ئه‌ڤه و چه‌ندین هه‌لویستێت دى یێن نه‌ته‌وى و نیشتیمانینه كو پارتى پێ د‌وێته تاوانباركرن، لێ شانازیه‌كا مه‌زنه كو ب ڤان ئه‌گه‌روسه‌ده‌مێن مه ل سه‌رى دیار كرى پارتى دیمۆكراتى كوردستانێ پێ بهێته تاوانباركرن و ل ئیمام عه‌لى پرسى كى ل سه‌ر راستیێ یه و ئیمام عه‌لى ژى به‌رسڤ دا و گۆت: ((به‌رێ تیرى به‌ره‌ڤ سینگێ كیڤه بچیت ئه‌و ئال ل سه‌ر راستیێ یه .. )) و بارزانیێ نه‌مر كه‌ره‌مكرى یه : (( ئه‌گه‌ر به‌رگریكرن ل گه‌ل و وه‌لاتى تاوان بیت ئه‌ز مه‌زنترین تاوانبارم …. )) لێ پارتى دیمۆكراتى كوردستان خودان ئیراده‌یه‌كا ب هێزا جه‌ماورى یه و خودان هه‌لویسته‌یه‌كێ نه‌ته‌وى و نیشتیمانى و وه‌كهه‌ڤى و پاراستنا مافێ مرۆڤى یه له‌وما رۆژ ب رۆژ سه‌ركه‌فتنێ بده‌ستڤه دئینیت، لێ بۆ درێژه‌دان ب ڤى هه‌لویسته‌یى نه‌ته‌وه‌یى و نیشتیمانى و وه‌لاتپارێزى فه‌ره كو پارتى دیمۆكراتى كوردستان ژى بخودا بچیته‌ڤه و گورانكاریێن بله‌ز دسازیێن خودا بكه‌ته‌ڤه و ب وێره‌كى بێژیته گه‌نده‌لڤانا ته ئه‌ڤه ل كێرێ ئیناینه وده‌ستى دانێـته سه‌ر برینێ؟ دیسا ئه‌و دیوارى كو ب كۆنكرێـتى هاتیه ئاڤاكرن دنێڤبه‌را جه‌ماور و هه‌ڤوه‌لاتى و سه‌ركردایه‌تیا وێ بهه‌ڕفینیت و گوهدێریا ئێش و ئازارێن گه‌لێ كوردستانێ جه‌ماورێ خوه بكه‌ت و به‌س بیت ب تنێ یا كونترۆلكرى بیت ژ لایێ چه‌ند كه‌س و مالباتاڤه ل هه‌ر ده‌ڤه‌ره‌كێ و هه‌ر وان ب تنێ ب دلسۆزێن خوه بزانیت، هه‌روه‌توف بزڤریته‌ڤه بۆ رێبازا كوردایه‌تیا راسته‌قینه‌یا بارزانیێ نه‌مر كو ل پشتى مالئاڤاهیا ڤى رێبه‌رێ مه‌زن و بابێ روحى یێ نه‌ته‌وا كورد مه هیچ سه‌روه‌ت وسامان و ملك و مه‌زره‌عێن وى نه‌دیتن ل پاش خوه هێلایى و ب تنێ ئه‌و دیرۆكا پڕ سه‌روه‌رى دیت و ڤه‌خاندن كو هه‌تا ئه‌ڤرۆ ژى رێڤینگێت راسته‌قینه شانازیێ پێڤه دكه‌ین و دێ كه‌ین ژى، مافه‌كێ سروشتى یه ژى هه‌ڤوه‌لاتى گله‌و گازندا ل ڤێ پارتێ بكه‌ن ژبه‌ركو هه‌ر كورده‌كێ دلسۆز و نیشتیمانپه‌روه‌ر ئه‌ڤێ پارتێ ب نوێنه‌رێ راسته‌قینه یێ گه‌لێ كوردستانێ دزانیت، هه‌رده‌مێ ئه‌ڤ خالێن مه ئاماژه پێدایى كو د به‌رژه‌وه‌ندیا گشتى و نه‌مازه پارتى دیموكراتى كوردستانن دپشتراستین سه‌ركه‌فتنا دووماهیێ دێ ل سه‌ر ده‌ستێ وێ هێته جێبه‌جێكرن و روى وره‌شى و شه‌رمه‌زارى ژى بۆ دوژمن و داگیركه‌ر و خوه‌فرۆشان مینته‌ڤه و دپشت راستین ژى سه‌ركه‌فتن دێ بۆ ئیراده‌یا گه‌لێ كوردستانێ بیت.
بۆچى عه‌بادى ل گه‌ل حوكمه‌تا هه‌رێما كوردستانێ رێكناكه‌ڤیت؟
ساڵح محه‌مه‌د ته‌یرۆ
ئه‌گه‌ر ئه‌م هنده‌ك بزڤرینه‌ڤه بۆ وێ رێكه‌فتنا خیانه‌تكارى ئه‌وا ژلایێ هنده‌ك كه‌سێن سه‌ر ب لایه‌نه‌كێ سیاسى ڤه ل رۆژا 16/10/2017 ێ ل گه‌ل حوكمه‌تا عیراقێ و ب هه‌ڤكارى ل گه‌ل ده‌وله‌ته‌كا هه‌رێمى و گوهۆرینا هه‌لویستێن ئه‌مریكا و هنده‌ك هێزێن هه‌ڤپه‌یمانێن هه‌رێما كوردستانێ تاكو به‌رى ڤێ رێكه‌فتنێ ل هه‌مبه‌رى گه‌لێ كوردستانێ ب گشتى و نه‌مازه كه‌ركووكا دل و قودسا كوردستانێ و ده‌ڤه‌رێن كوردستانێ یێن ده‌رڤه‌یى هه‌رێما كوردستانێ هاتیه‌كرن قه‌ت یا چاڤه‌رێ كرى نه‌بوویه، پشتى كو ب هه‌ڤكاریا وى گرۆپى ووێ ده‌وله‌تا هه‌رێمێ سۆپایێ عیراقێ و حه‌شدا شه‌عبى شیان ده‌ست ب سه‌ر كه‌ركووك و چه‌ند ده‌ڤه‌ران دا بگرن و د وێ باوه‌ریێ دا بوون كو ب ئاسانى دێ كارن هه‌ڤلێرا پایته‌خت و سنۆرێن كوردستانێ ژى داگیر بكه‌ن، لێ ب خۆراگریا پێشمه‌رگه‌هێن قه‌هره‌مان و به‌رسینكگرتنا وێ هێزا داگیركه‌ر ل سنۆرێ پردێ و مه‌حموودیێ و…هتد و تۆماركرنا وان داستانێن مه‌زن له‌شكرێ عیراقێ نه‌شیان ته‌واوى وێ پیلانا دارێشتنى جێ به‌جێ بكه‌ن، هه‌ر ئه‌ڤ خۆراگرى یه بوو فاكته‌ره‌ك كو عیراق و ئه‌مریكا و ئه‌و ده‌وله‌تێن كو هه‌لویستێن وان هاتینه گوهۆرین ل به‌رامبه‌ر ب كوردستانێ بخوه دا بچنه‌ڤه و حه‌تا ئاسته‌كێ باش د هه‌لویستێن خوه دا بچنه‌ڤه، سه‌ره‌راى گوهۆرینا هه‌لویستێ هنده‌ك ده‌وله‌تێن هه‌ڤپه‌یمان و هه‌ولدان بۆ چاره‌سه‌ریا كێشه‌یا د ناڤبه‌را حوكمه‌تا عیراقا فیدرال و حوكمه‌تا هه‌رێما كوردستانێ ل دووڤ دستوورێ عیراقێ، لێ سه‌رۆكێ جڤاتا وه‌زیرێن عیراقێ عه‌بادى یێ به‌رهه‌ڤ نینه كو ل گه‌ل هه‌رێما كوردستانێ دانوستاندنان بكه‌ت، ب بۆچوونا من بۆ چه‌ندین ئه‌گه‌ران دزڤریته‌ڤه و مینا هه‌تاكو ل هه‌لبژراتنێن داهاتى یێن عیراقێ كو ل به‌ره ل سالا داهاتى بهێنه‌كرن ل عیراقێ و بكاریت زۆرینه‌یا ده‌نگان بده‌ستڤه‌بینیت و وه‌ها هزر بۆ خوه دكه‌ت كو كارى یه سه‌ركه‌قتنێ بده‌ستڤه‌بینیت و ئه‌و عه‌ره‌بێن شۆفینى ئه‌وێن ل دژى هه‌رێما كوردستانێ دێ ب زۆرینه‌یا ده‌نگان ده‌نێ، لاوازیا پێداگیركرنا ده‌وله‌تێن ئه‌مریكا و هێزێن هه‌ڤپه‌یمانان ل به‌رامبه‌ر ب چاره‌سه‌ركرنا وان كێشه‌یان ئه‌وێن دنێڤبه‌را حوكمه‌تا عیراقا فیدرال و یا هه‌رێما كوردستانێ، لاوازى و په‌رت و به‌لاڤیا لایه‌نێن سیاسى یێن كوردستانێ یه كو گه‌هشتى یه وێ باوه‌ریێ كورد دنێڤ خوه‌دا بووینه چه‌ند پشك و كه‌س ب كه‌سێ نینه و ژبلى هاریكاریكرنا گرۆپه‌كێ بۆ وى و هه‌ر وه‌كى هاتیه روودان ل 16 ئوكتوبه‌رێ كو ب ده‌مه‌كێ كێم راده‌ستكرنا نیڤه‌كا وێ ئاخا كو ب قوربانیان زیده‌تر ژ هزار حه‌فت سه‌د شه‌هیدان و ب ده‌هان هزار برینداران بده‌ستڤه‌هاتى، هه‌روه‌تۆف هنده‌ك ل به‌رپرسێن كورد ئه‌وێن بووینه دووڤه‌لانكێن وى داخواز ژ عه‌بادى دكه‌ن كو ب هیچ ره‌نگه‌كێ دانوستاندنێ ل گه‌ل پارتى دیمۆكراتى كوردستان و ئێكه‌تیا نیشتیمانى یا كوردستانێ نه‌كه‌ت و مووچه و بۆدجه‌یى نه‌هنێریت بۆ كوردستانێ كو ئه‌ڤرۆ د هه‌ستیارترین بارودۆخ دا دژیت، ره‌ڤینا هنده‌ك پارتێن سیاسى ژ به‌رپرسیاره‌تیا نیشتیمانى و نه‌ته‌وى و خۆڤه‌كێشان ل حوكمه‌تا هه‌رێما كوردستانێ، هه‌ول و بزاڤێن هنده‌ك لایه‌نێن سیاسى و ل ژێر په‌رده‌یا خۆنیشاندانا بۆ هه‌ڕڤاندنا حوكمه‌تا هه‌رێمێ و هه‌روه‌كى مه ل ڤێ دووماهیێ دیتى ل ده‌ڤه‌را سه‌وز واته ل سنۆرێ پارێزگه‌ها سلێمانیێ و حه‌له‌بچه و ل ده‌ڤه‌را گه‌رمیان و ل رانیێ، ژبلى ڤى هه‌ولا ژناڤبرنا ڤێ ئه‌زموونێ هه‌ر هه‌مان هزر داخواز ژ عه‌بادى دكه‌ن كو هێزێ بهێنێریته كوردستانێ گوایه بۆ پاراستنا گیانێ هه‌ڤوه‌لاتیان، ئها ل ڤێره دیار دبیت كو مه‌ره‌ما وان نه‌ك خۆنیشادانن، به‌لكو هه‌ڕفاندنا حوكمه‌تێ یه، ل به‌ر ڤێ چه‌ندى فه‌ره به‌ریا ئه‌م گله‌وگازندان ژ عه‌بادى بكه‌ین ئه‌م ژ خوه بكه‌ین، ژ به‌ر كو ئه‌گه‌ر كورد ل گه‌ل ئێك رێككنه‌ڤن دى چاوا دگه‌ل خه‌لكه‌كێ دى رێككه‌ڤن؟ دیسا هه‌كه ئه‌م به‌رژه‌وه‌ندیێن خوه نه‌پارێزین كى نه‌چاره كو بهێت به‌رژه‌وه‌ندیێن مه بپارێزیت نه‌مازه كو ده‌وروبه‌رێن مه دوژمن و داگیركه‌رێن كوردستانێ نه، هه‌روه‌تۆف پرسیاره‌ك ل ڤێره سه‌رێ خوه هلدده‌ت ئه‌رێ پارت و لایه‌نێن سیاسى یێن كوردستانێ حه‌ز دكه‌ن كو بارودۆخێ ئابوورى یێ كوردستانێ باش ببیت، تاكو عه‌بادى دلێ وى ب خه‌لكێ كوردستانێ ب سۆزیت و ب زمانێ دایه‌لۆك و ل دووڤ دستوورى و ل رێكێن چاره‌سه‌ریێ بگه‌رهیێت؟ ڤێجا بلا ئه‌م گله‌وگازندا ژ كه‌سێ نه‌كه‌ین و مه بڤێت یان نه‌ڤێت سه‌رێ كێشى و بنێ وێ هه‌ر كورد بخۆنه، تاكو ئه‌م نه‌بینه ئێك دێ حالێ مه ئه‌ڤه بیت، ڤێجا بلا به‌س بیت و ته‌ڤایا لایه‌نێن سیاسى د داخوازكرینه كار ل سه‌ر رێخستنه‌ڤه و ئێككرێزیا ناڤمالا كوردى و ئێكهه‌لویستیا نیشتیمانى و نه‌ته‌وى بهێته كرن و به‌رژه‌وه‌ندیا گشتى بێخنه پێش به‌رژه‌وه‌ندیێن به‌رته‌سك یێن حزبایه‌تى و كه‌سایه‌تى و زیان ل نێڤه‌كێ بزڤریته‌ڤه قازانجه و هێشتا ده‌م ژى مایه، چونكو خودێ نه‌خواسته ئه‌گه‌ر ئاگر به‌ربوو ل ێرى دێ ته‌روهشك پێكڤه هێنه سۆتن و پاش هه‌وار وفیغان و په‌شیمانى ب ده‌رد ناخوت و دێ بنه جهێن نه‌فره‌ت لێكرنێ ژلایێ دیرۆكێ ونفشێ داهاتى.
خۆنیشاندانن یان شێواندن؟
ئێك ل پره‌نسیپێن سیسته‌مێ دیموكراسیه‌تێ و وه‌كو داخواز كرن مافێن ره‌وا یێن هاوولاتیان ئه‌و ژی خوَنیشادانه كو ئه‌ڤه مافه‌كێ خوزایی یه كو ب كارین دڤێ رێكێ دا داخوازیێن خوَ یێن ره‌وا و یاسایی بگه‌هیننه ده‌ستهه‌لاتێ، لێ خوَ نیشاندانێ ژی مه‌رجێن خوَ هه‌نه كو ئه‌و ژی پێدڤی رێكخه‌رێ وێ موهله‌تێ ل جهێن په‌یوه‌ندیدار وه‌ربگریت و جه و ده‌مێ خوَنیشادانێ و هژمارا وان دگه‌ل داخوازیێن خوَنیشانده‌ران بهێنه دیاركرن، هه‌روه‌توڤ مه‌رجه‌كێ دی ئه‌وه كو جاده و كولان و رێك نه‌هێنه گرتن، پاراستنا خونیشانده‌ران ژی دكه‌ڤیته ستویێ پولیس و ده‌زگه‌هێن ئه‌منی یێن وێ حكومه‌تێ ب ڤی ره‌نگی خونیشاندانێن مه‌ده‌نی و شارستانی دهێنه سازكرن، لێ وه‌كی مروَڤ دبینیت ل هه‌رێما كوردستانێ خوَنیشادان دبنه قوربانی ل پێناڤ به‌رژه‌وه‌ندیا ڤی گروپی و گروپێ هه یێ سیاسی یان ڤێ حزبێ و حزباهه و ل پێناڤ سیاسه‌تا وان و مه‌ره‌مێن وان یێن حزبی و به‌رته‌سك به‌لگه‌ه ل سه‌ر گوتنا مه هێرش برن بوَ سه‌ر باره‌گایێ حزبه‌كێ یان گوتنێن فهێت و درویشمێن هه‌ڤدژ ل دژی وێ حزبێ و سه‌روكێ وێ یان به‌ر بارانكرنا باره‌گایێن پارتی دیموكراتی كوردستان و سووتنا وان باره‌گایا ئه‌رێ ئه‌ڤه خو نیشاندانه یان كارێن تێكده‌رانه‌نه؟ ئه‌رێ ب ڤێ قه‌رقه‌شێ دێ كارن داخوازیێن خوَ بگه‌هینن یان دێ پتر زیانێ گه‌هیننه ڤێ ره‌وشێ؟ چونكه ب ڤان كارێن تێكده‌رانه و به‌ردبارانكرن و سوتنا باره‌گایا و لێكه‌فتنا توندوتیژیێ ژبلی زیان گه‌هاندن و چنین و دروینا وی توڤێ دووبه‌ره‌كی ئه‌ڤه به‌ری چه‌ندین سالایه چاندی، هه‌لبه‌ت ئه‌ڤه ژی ئه‌م هه‌می دزانین كی ئه‌گه‌را ڤێ چه‌ندێ یه و ئه‌ڤه خه‌ونا چه‌ندین ساڵایه یا وی كه‌س و لایه‌نی یه، له‌وما ئه‌ڤه هێرشبرنه نه‌ك خوَ نیشاندانن، هه‌رچه‌ند ژ ده‌ست دانا گیانێ هه‌ر گه‌نجه‌كێ ئه‌ڤی وه‌لاتی ب هه‌موو سه‌روه‌ت و سامانێ دونیایێ ناهێته‌ڤ قه‌ره‌بوو كرن، هیچ ده‌مه‌كێ ژی ئه‌ز د گه‌ل هندێ دا نینم كو خه‌لكه‌ك بهێته كوَشتن د ڤان خوَنیشادانان دا، لێ فه‌ره ئه‌ڤه ژی ل بیرا مه بهێت كوَ به‌رگریكرن ل خوَ مافه‌كێ ئه‌خلاقی و ئایینی وشه‌رعی و یاسایی یه ژی چونكه ل ده‌مێ كوَ هێرش بوَ سه‌ر باره‌گایه‌كێ دهێته كرن كو ئه‌وی باره‌گایی ژی گه‌نج و لاوێن كورد یێن ڤی وه‌لاتی تێدا هه‌نه و هه‌رچه‌نده كو پاسه‌وان و كادر و ئه‌ندامێن پارتی دیموكراتی كوردستان ته‌قه ل خوَ پیشانده‌ران نه‌كری یه ل ده‌ڤه‌رێن خوَ نیشاندان تێنه ئه‌نجام دا و ئه‌وێن دناڤ وان باره‌گایان دا نه‌ك موچه‌یێ هه‌یڤا حه‌فت وه‌رنه‌گرتیه به‌لكو یی هه‌یڤا به‌ری ژی وه‌رنه‌گرتینه وئه‌ڤ كێشه‌یه ژی ب تنێ ئه‌و لایه‌ن به‌رپرسیار نیه یێ كو هێرشبه‌ر هێرشی دكه‌نه سه‌ر باره‌گایێن وان بوَ مه‌ره‌مێن لایه‌نه‌كی سیاسی كو سه‌روكێ وێ هه‌رده‌م پاله‌وانێ شه‌رێ براكوژی و دوو به‌ره‌كیێ بوویه و دیروك ژی ل سه‌ر شاهده. له‌وما فه‌ره كه‌س وكارێن وان كوشتی و بریندار و زیان ڤێكه‌فتیا وی كه‌س و لایه‌نی تاوانبار بزانن و داوایا یاسایی ل سه‌ر تومار بكه‌ن ئه‌وێن بووینه هانده‌ر و پالپشت كو كورێن وان ببنه قوربانی بوَ به‌رژه‌وه‌ندیێن ته‌سكێن وان و بده‌ستڤه ئینانا ده‌سكه‌فتیێن سیاسی.
له‌وما باشتر ئه‌وه كو هه‌می لایه‌نێن سیاسی خودان ئێك هه‌لویست بن و ل سه‌ر ڤێ ره‌وشێ رابوه‌ستن و ب شه‌فافی و راسته‌وخوَ به‌رسڤا پرسیارێن خه‌لكی بده‌نه‌ڤه به‌ری ره‌وش ئالوزتر ببیت، ژ به‌ر كوَ روَژ ب روَژ گورانكاریێن سیاسی ل ده‌ڤه‌رێ بگشتی دروست دبن و ئه‌م ژی دگه‌ل ڤان گورانكاریاندا بگونجیێن ب تایبه‌ت ئه‌وێن د به‌رژه‌وه‌ندیا هه‌رێما كوردستانێ دا.
شۆرشا مه‌زنا ئیلونێ. .. .. .. . شورشه‌ك ل پێناڤ ئازادی و سه‌رفرازیا گه‌له‌كێ
ئه‌گه‌ر ئه‌م به‌رپه‌رێن دیروَكا پڕ سه‌روه‌ریا بزاڤا رزگاریخوازا كوردستانێ هه‌لده‌ین و ب هویری ل سه‌ر راوه‌ستین كو ملله‌تێ كورد گه‌له‌ك سه‌رهلدان و به‌رخودان و شوَڕش به‌رپا كرینه ل پێناڤ رزگاریا كوردستانێ و گه‌هشتن ب مافێن خوه یێن ره‌وا مینا هه‌می نه‌ته‌وه‌یه‌كێ كوَ ئه‌و ژی سه‌رخوَ بوونه، لێ شوره‌شا مه‌زنا ئیلونێ كو ل 11- 9 – 1961 به‌رپابوو دهێته هژمارتن ب مه‌زنترین و رێكخستیترین شورش كو ب له‌شكره‌كێ رێك و پێك و ب باوه‌ری یه‌كا موكم ب هه‌ستا نه‌ته‌وه‌ی یا شوَڕشگێری بوویه و خودان دیروَكه‌كا پڕشنگدار و ئه‌ڤ شوَرشه نه ب تنێ بوَ رزگاریا كوردستانێ بوویه به‌لكو بوَ رزگاربوونا عیراقێ ژی بوویه ل حوكمرانیا تاكره‌وی و دكتاتوری و به‌لگه لسه‌ر گوتنا مه كو درویشمێ ڤێ شوَرشێ (دیموكراسی بوَ عیراقێ و ئوتونومیا راسته‌قینه بوَ كوردستانێ) بوو و درویشمێ پێشمه‌رگه‌یی ژی (كوردستان یان نه‌مان) بوو.
ئه‌ڤ شوَرشه ب رێبه‌رایه‌تیا پارتی دیموكراتی كوردستان و ب سه‌ركردایه‌تیا مه‌لا مسته‌فا بارزانی بوویه، هه‌رچه‌نده د دیروكا ئه‌ڤێ شوَرشێ دا زوَر جاران هه‌ول و بزاڤ دناڤبه‌را سه‌ركردایه‌تیا شوَرشێ و حكومه‌تا ناوه‌ندیا عیراقێ یا وی سه‌رده‌می دهاتنه‌كرن كو وان كێشه‌یێن د ناڤبه‌را هه‌ردوو لایاندا بهێنه چاره‌سه‌ركرن و بزڤرنه‌ڤه بوَ سه‌ر مادێ ده‌ستووری كو ل شوره‌شا 14 ته‌موزێ دا دانپێدانان ب مافێن گه‌لێ كورد هاتبوو كرن و د به‌نده‌كا ده‌ستووری دا هاتبوو كو كورد و عه‌ره‌ب هه‌ڤپشكن دعیراقێ دا، لێ ب مخابنی ڤه مروَڤ دبێژیت كو ل سه‌ر ده‌مێ حوكمرانیا عه‌بدولكه‌ریم قاسمی ل بن كارتێكرنا ده‌وروبه‌رێن وی یێن ره‌گه‌زپه‌رست و ده‌ستێن ده‌رڤه‌یی ژی ئه‌ڤ ماف و داخوازیێن ره‌وا هاتنه پاش گوه ئێخستن، دیسان ئه‌و زولم و سته‌ما ل ڤی گه‌لی دهاته كرن و هه‌روه‌ها ل پشتی نه‌مانا حوكمرانیا عه‌بدولكه‌ریم قاسم و هاتنا هه‌ر دوو برایان عه‌بدولسه‌لام و عه‌بدولره‌حمان عارفی ژی و هاتنا رژێما به‌عسا گوَر بگوَر هه‌مان هه‌لویستێ دوژمنكارانه به‌رامبه‌ر ب گه‌لێ كوردستانێ و زێده‌تر ژی ل كوردستانیان دهاتنه كرن و له‌وما روَژ ب روَژێ هه‌لویستێ نه‌ته‌وه‌یی و نیشتیمانی ل جه‌م تاكێ كورد و كوردستانی موكم دبوو و كوم ب كوم و ب هه‌می ئایین و نه‌ته‌وه و مه‌زهه‌ب و ته‌خ و چیناڤه خه‌لكێ ب شه‌ره‌فێ كورد و كوردستانێ په‌یوه‌ندی ب شوَرشێ ڤه دكر و دبوونه پێشمه‌رگه بێ به‌رامبه‌ر و ب نان و چه‌ك و پارزینكێ پڕ بیروباوه‌ر.
دڤێ شوَرشێ دا چه‌ندین داستانێن بێ وێنه ل سه‌ر ده‌ستێن پێشمه‌رگه‌ی هاتنه توماركرن و دربێن مه‌زن ل دوژمن ودویڤه‌لانكان د هاتنه وه‌شاندن مینا داستانا زاویته و مه‌تین و هندرین و زوزك . .. هتد.
ئه‌گه‌ر هنده‌ك بزڤرینه‌ڤه بوَ ده‌ستكه‌فتیێن ئه‌ڤێ شوَرشێ بوَ گه‌لێ كوردستانێ گه‌له‌كن و ئه‌وێن كو هه‌تا نوكه ئه‌م هه‌می شانازیێ پێڤه دكه‌ین ئه‌وه كو بوَ جارا ئێكێ و د مێژوویا حوكمرانیا ده‌ستهه‌لاتا عیراقێ دان پێدانا نه‌ته‌وه‌یێ كورد بوویه ل عێراقێ كو نه‌ته‌وێ كورد دووه‌م نه‌ته‌وه‌یه ل عیراقێ و هه‌ڤبه‌شكرن ل رێڤه‌برنا عێراقێ دا و ئه‌ڤه ژی ل رێكه‌فتنا دیروكیا (11/ئادارا/1970) دا بوو، هه‌روه‌سا د ڤێ شوَرشێ دا پارتی دیموكراتی كوردستان و ب رێبه‌رایه‌تیا بارزانیێ نه‌مر شیان كورد و كوردستانیان د بن ئێك چادرگه‌ه رێك بێخن و ڤێجا بگره ل خانه‌قین تا زاخوَ و ب بێ جوداهی و هه‌می د ئێك سه‌نگه‌ر دابوون كو ئه‌ڤه ژی ده‌ستكه‌فته‌كێ هه‌ره مه‌زنه بۆ ڤی شورشێ ژ به‌ر كو شوَرشێن به‌ریا وێ نه‌شیان ئه‌ڤێ چه‌ندێ په‌یدا بكه‌ن.
د ده‌مه‌كێ دا كو (54)مین ساڵڤه‌گه‌را ئه‌ڤێ شوَرشێ دكه‌ینه‌ڤه، ئه‌ڤروَ كوردستان یا د قویناغه‌كا مه‌ترسی و هه‌ستیار دا ده‌رباز دبیت كو ئه‌م دبینین كو پێشمه‌رگه‌یێن قاره‌مان ل سه‌نگه‌رێن به‌رخودان و به‌ره‌ڤانیێ دا به‌رامبه‌ر درنده‌ترین رێكخراوا تیرۆرستی كو ئه‌و ژی رێكخراوا تیرۆرستیا داعشه لێ پێشمه‌رگه‌یێن قه‌هره‌مان دویر ل بیرو بوچوونێن سیاسی كو ب راستی بیرا مروَڤی ل هه‌مان هه‌لویستێ نه‌ته‌وه‌یی و نیشتیمانی یێ شوَرشا مه‌زنا ئیلونێ دهێته ڤه ب سه‌ركردایه‌تیا سه‌روَك بارزانی و د سه‌نگه‌رێن به‌رخودانێ دانه و ب پالپشتیا خه‌لكێ كوردستانێ و ب هه‌ڤكاری د گه‌ل هێزێن هه‌ڤپه‌یمانان به‌رگریێ ل كوردستانێ و ده‌ستكه‌فتیان دكه‌ن، و قه‌یرانه‌كا دی كو ئه‌و ژی یا ئابوری یه كو ئه‌ڤه زێده‌تر دوو ساڵانه موچه و بودجه‌یێ حكومه‌تا هه‌رێما كوردستانێ ژلایێ حكومه‌تا ناڤه‌ندیا به‌غدا هاتیه برین، لێ ب خوراگری و دلسوزیا خه‌لكێ كوردستانێ شیاینه به‌رسینگێ ئه‌ڤێ قه‌یرانا ئابوری رابگرن و ئه‌ڤه‌ژی نیشانێ هه‌لویستێ نه‌ته‌وه‌یی و نیشتیمانیێ كوردستانیانه، هه‌ر ل ڤێ سالڤه‌گه‌رێ دا لایه‌نێن سیاسی یێن هه‌رێما كوردستانێ داخوازكرینه كو ب زویترین ده‌م بگه‌هنه سازان و ل هه‌ڤگه‌یشتنه‌كی ل دۆر پرسا سه‌روكایه‌تیا هه‌ریمێ و كوردستانیان ل ڤێ دوودلی و ئالوزیێ رزگار بكه‌ن.
دڤێت ئه‌م ئه‌ڤێ ژی ل بیر نه‌كه‌ین كو دشوَڕشا مه‌زنا ئیلونێ دا ب تنێ چیا و دولێن كوردستانێ هه‌ڤالێن پێشمه‌رگه‌ی بوون ، لێ ئه‌ڤروَ ده‌وله‌تێن زلهێزێن جیهانی مینا ئه‌مریكا و ده‌وله‌تێن ئه‌وروپی بووینه پشته‌ڤان كو ئه‌ڤه ژی د زڤریته‌ڤه بوَ سیاسه‌تا حه‌كیمانه یا سه‌روَك بارزانی و سیاسه‌تا سه‌ركردایه‌تیا كوردی و پێشمه‌رگه ژی بوویه سیمبوولا به‌رخودانێ و ئێكه‌م هێزا سه‌ركه‌فتی بیت ل دژی رێكخراوا تیروریستیا داعش ل جهێ هه‌می جیهانی شه‌ری بكه‌ت، له‌وما دبێژین سه‌ركه‌فتن یا مسوگه‌ره و شكه‌ستن و سه‌رشوری بوَ دوژمنێن كوردستانێ یه، ل دویماهیێ و ب هه‌لكه‌فتا بورینا (54) سالیادا هه‌لگیرساندنا چریسكا ئاگرێ شوَرشا مه‌زنا ئیلونێ سه‌رێ رێز و ته‌قدیرێ دچه‌مینین بوَ گیانێ پاقژێ شه‌هیدێن ئه‌ڤێ شوَڕشێ و شه‌هیدێن به‌رگریكرنێ ل ئاخا هه‌رێما كوردستانێ ئه‌وێن ب ده‌ستێن تیروریستێن داعش دهێنه شه‌هیدكرن و ته‌ڤایا شه‌هیدێن رزگاریخوازیا كوردستانێ و سه‌رقافلێ كاروانێ شه‌هیدان بارزانیێ نه‌مر.
شۆره‌شا گولانا پێشكه‌فتنخواز. .. ڤه‌ژاندنا هیڤی و ئۆمێدان بوو
ئه‌م هه‌می دزانین كو شۆره‌شا ئیلۆنا مه‌زن ل سالا (6/3/1975) و ب پیلانه‌كا دارێشتی یا سیاسه‌تا نێڤده‌وله‌تی یا وی سه‌رده‌می هاته هنگافتن و ب هزاران خه‌لكێ مه هزاران ملله‌تێ مه‌یێ دلسۆز و وده‌ر و ئاواره بوو بوَ ده‌وله‌تێن هه‌ڤسووی، نه‌مازه ئیرانێ، عه‌ڤره‌ك ره‌ش بالێن خوه ب سه‌ر كوردستانێ دا راكێشا و كوردستان هاته ره‌ش پوشكرن، بێگومان بێ هیڤی و ئومێدیه‌ك ژی ژ لایێ خه‌لكه‌كێ مه ڤه دروستببوو كو ئه‌ڤه شۆره‌ش بدووماهی هات وا ب ئاسانی و زه‌حمه‌ته ژی جاره‌ك دی شۆرشه‌ك ل كوردستانێ سه‌رهل بده‌ته‌ڤه و ب راستی روَژه‌كا پڕ خه‌م و كۆڤان بوو بوَ نه‌ته‌وا كورد و كوردستانیان ل باشۆرێ كوردستانێ، رژێما به‌عسا فاشیستا به‌عسا گۆر ب گۆر ژی ل عیراقێ گه‌هشت بوویه وێ باوه‌ریێ كو ئێدی چو دۆزه‌یه‌ك ب ناڤێ دۆزا كوردی ل باكۆرێ كورێ عیراقێ وه‌كی وان دگۆت به‌رپا نابنه‌ڤه له‌وما ب شێوه‌یه‌كی هۆڤانه و دوور ژ سنجێن مرۆڤاتیێ كه‌فتنه گیانێ ملله‌تێ مه ل كوردستانا عیراقێ، ئه‌ڤجا بگره ژ گرتن و سیداره‌دان و ئه‌شكه‌نجه‌دان و ڤه‌گوهاستن و ب به‌عسیكرن و عه‌ره‌بكرن و ئه‌نفال وجینۆسایدكرنا كورد و كوردستانیان، لێ ئه‌و معادلاتا وان بوو هزر دكر شاش ده‌رچوو هزر نه‌كر و نه‌د ڤیا هزر ژی بكه‌ن كو ملله‌ته‌ك خودان پارتیه‌كا مینا پارتی دیمۆكراتی كوردستان بیت و دامه‌زرێنه‌رێ وێ بارزانیێ رێبه‌رێ روحیی یێ نه‌ته‌وا كورد بیت واز ل مافێن گه‌لێ كورد نائینیت، چونكو درووشمێ وان (كوردستان یان نه‌مان) بوویه و (ل سه‌ركه‌فتنا مه‌غرۆر نه‌بن و ل شكه‌ستنان بێ ئوَمێد نه‌بن)، له‌وما هه‌ر ل پشتی ڤێ كاره‌ساتا مه‌زن بوَ ده‌مه‌كێ كێم هزر د هه‌لگیرساندنا چریسكا شۆره‌شێ دا كره ڤه و ل ژێر سه‌ركرداتیا ده‌مكی (قیاده المۆقته)، لێ سیسته‌مێ ئه‌ڤێ شۆره‌شێ و به‌رخودانا وێ یا جودا بوو ژ شۆره‌شا ئیلۆنا مه‌زن، چریسكا شۆره‌شا گولانێ ب ره‌نگه‌كێ پارتیزانی ده‌ستپێكر و گه‌ش بوو و خه‌لكێ دلسۆز و قه‌هره‌مانێن كوردستانێ ل هه‌می ئالیه‌كێڤه قه‌ستا شۆرشێ كر و ل دۆر وێ كۆمبوون و ئه‌و ئه‌ڤرێن ره‌ش و تاری هاتنه ره‌ڤاندن و جاره‌ك دن هیڤی و ئۆمێد دنێڤ دلێن كوردپه‌وره‌ر و وه‌لاتپاریز و ب هه‌سته‌كا نه‌ته‌وی و نیشتیمانی هاته ڤه‌ژاندن و گه‌ش بوونه‌ڤه و پشكۆرین كه‌ته سه‌ر لێڤێن زارۆیێن شه‌هیدێن سه‌ربلند، هه‌لبه‌ت گه‌له‌ك داستان د شۆره‌شا گولانا نیشتیمانخواز هاتنه توماركرن و دربێن مه‌زن ل دوژمن و دووڤه‌لانێن وان دان و كۆنمشك ل وان كربوونه قه‌یسه‌ری، ئه‌ڤه ژی ب هیمه‌تا پێشمه‌رگه‌هێن قه‌هره‌مانێن شۆرشا گولانێ و ب هیمه‌ت و پالپشتی و هاریكاریا خه‌لكێ دلسۆز و ب شه‌ره‌فێ كوردستانێ بوویه ل هه‌می ته‌خ و توێژاڤه، چونكو ژ ئالیه‌كێڤه خزمه‌تا پێشمه‌رگه‌یی و شۆره‌شێ دهاته‌كرن و هه‌میان ژی خوه ب پێشمه‌رگه دزانی و سه‌ره‌رای ئه‌و چاڤدێریا توندا رژێما به‌عسا گۆربه‌گوَر، هه‌ر ئه‌ڤ شۆره‌شا گۆلانا پێشكه‌فتنخواز بوو بوَ ئه‌گه‌را سه‌رهلدانا جه‌ماورێ كوردستانێ كو ل بهارا سالا (1991) كوچك و دیوانخانێن رژێمێ و داگیركه‌ران ل سه‌ر زه‌ندوباسكێن پێشمه‌رگه و جه‌ماوری ل كوردستانێ هاتنه رامالین.
ئه‌ڤروَ ژی ئه‌م خودان سه‌رۆكاتیا هه‌رێمێ و په‌رله‌مان و حوكمه‌تین كو ئه‌ڤه هه‌می ل سایه‌یا خه‌بات و به‌رخودانا شۆره‌شا ئیلۆنا مه‌زن و گۆلانا نیشتیمانخواز و بزاڤا ئازادیخوازا كوردستانێ و قوربانیا گه‌لێ مه‌یه، د ده‌مه‌كێ دا كو ئه‌م یادا (39)مین سالڤه‌گه‌را شۆرشا گوَلانێ كو شۆرشا ڤه‌ژاندنا هیڤی و ئۆمێدان بوو ساخ دكه‌ینه‌ڤه كوردستان د قووناغه‌كا هه‌ستیار دا ده‌رباز دبیت و پێشمه‌رگه‌هێن قه‌هره‌مان د سه‌نگه‌رێن به‌ره‌ڤانیكرنێ دانه ل دژی رێكخراوه‌كا تیرۆرستیا داعش كو ئه‌ڤ رێكخراوه دژی هه‌می پره‌نسیپێن ئه‌خلاقی و ئایینی و مرۆڤاتی و پێكڤه ژیانێنه، پێشمه‌رگه‌ه ژی بوویه سومبولا به‌رخودانێ ل دژی ڤێ رێكخراوی و نه‌ك ل هه‌رێما كوردستانی و روَژهه‌لاتا ناڤین به‌لكو ل جیهانێ ژی، ڤێجا بلا ئه‌ڤ یادا پیروَز پتر ببیته هانده‌ر و پالپشت كو ئه‌م هه‌می خوه بكه‌ینه ئێك سه‌نگه‌ر و ئێك هه‌لویست بوَ پاراستنا ئه‌ڤان ده‌سكه‌فتیان، ل دووماهیێ رێزگرتن بوَ پێشمه‌رگه‌هێن قه‌هره‌مان یێن شوره‌شا گولانا پێشكه‌فتنخواز و هه‌روه‌ها جه‌ماورێ خه‌لكێ گوندێن ئازادكری ل سه‌رده‌مێ شۆره‌شێ. خوه دچه‌مینین بوَ گیانێ پاقژێن شه‌هیدێن شۆره‌شا گولانێ و شه‌هیدێن ب ده‌ستێن تیرۆرستێن داعش هاتینه شه‌هیدكرن كو شه‌هیدێن به‌ره‌ڤانیكرن و پاراستنا حوكمه‌تا هه‌رێما كوردستانێنه.
به‌ربژارێن كه‌ساتیا ساڵا (2014)یه
كۆڤارا (تایم) یا ئه‌مریكی كو ئێكه ژ كۆڤارێن ب ناڤوده‌نگێن جیهانێ یه و ناڤێ به‌ربژێرێن كه‌سایه‌تیا سالێ ئاشكرا كرن و سه‌روَكێ هه‌رێما كوردستانێ ژی ئێكه ژ وان به‌ربژاران، ئه‌ڤه ژی شانازیه‌كا مه‌زنه بوَ گه‌لێ كوردستانێ، هه‌لبه‌ت كۆڤارا تایم هه‌شت كه‌ساتیێن جیهانی ده‌ست نیشانكرینه بوَ ڤی نازناڤێ كو د رێورسمه‌كێ دا دوهی روَژا چارشه‌مبیێ و ل 10/كانوونا ئێكێ ل باژێرێ نیوورك یێ ئه‌مریكی نازناڤ هاتنه ئاشكراكرن، یا گرنگ ئه‌وه بارزانی كو ژ به‌ربژارانه ومل ب ملێ فلادمیه‌رپوتنی سه‌رۆكێ رۆسیا، تیم كوكی رێڤه‌به‌رێ جێبه‌جێكارێ كۆمپانیا ئه‌پل، جاك مای دامه‌زرێنه‌رێ كۆمپانیا بازرگانی چینی، عه‌لی بابا رێڤه‌به‌رێ گشتی یێ خولا توپا پێ ئه‌مریكی روَجه‌ر گودێل و كچه سترانبێژی ئه‌مریكی تایله‌ر سۆیفت. .. . دیسا دو گرۆپێن دی ژی هاتنیه ده‌ست نیشانكرن بوَ ڤێ نازناڤێ كو ئه‌و ژی خۆنیشانده‌رێن باژێرێ فراگسیۆنی ئه‌مریكی كو یا تایبه‌ت بۆ ب نه‌رازیبوونا ڤی باژێری به‌رامبه‌ر ب سیسته‌مێ دادگه‌ها ئه‌مریكی سه‌باره‌ت ب كوشتنا گه‌نجه‌كێ ره‌ش پیستێ ئه‌مریكی ب ناڤێ مایكل براون و ژ لایێ پۆلیسه‌كێ سپی پیسته‌ڤه كو دادگه‌ها وی باژێری ئه‌و بێ تاوان ل قه‌له‌م دا، گرۆپێ دویێ ژی پێكدهێت یه ل وان كه‌سان ئه‌وێن هاریكاری و پالپشتیا تووشبوونێن نه‌خۆشیا ئیبۆلایان كری كو ئه‌ڤ نه‌خۆشیا كوشنده و ئه‌ڤ ساڵه ل چه‌ندین وه‌لاتێن كێشوه‌رێ ئه‌فریقیا په‌ره سه‌ندی و ب هزاران تووشبووی و هاتینه كوشتن، لێ فه‌ره ئه‌م بزانین كو ئه‌رێ ئه‌و چ مه‌رجێن كو كۆڤارا تایم یا ئه‌مریكی دانایی و كه‌ساتیا ساڵان ل جیهانێ ده‌ستنیشان كری و كه‌س و گرۆپ بهێنه به‌ربژاركرن؟ نانسی گێبس ئێك ژ ده‌سته‌یا رێڤه‌به‌ریا نڤیسه‌رێن ڤێ كۆڤارێ دبێژیت: به‌ربژار ل سه‌ر ڤان بنه‌مایان دهێنه ده‌ست نیشانكرن ژ لایێ كۆڤارا تایم كو نك وان وه‌ها دگه‌هینیت كاریگه‌ریه‌كا مه‌زن ل سه‌ر روودا و هه‌والێن ئیسال ل جیهانێ هه‌بوویه و گێتسی ئه‌ڤه ژی گۆتی یه ئه‌و كه‌سێ ڤێ ناسنامێ دبه‌ت ژ لایێ ده‌سته‌یا رێڤه‌به‌ریا نڤیسینا كۆڤارێ دئێته ده‌ست نیشانكرن، ئه‌ڤ ناسنامه‌یه ژی ل سه‌ر ئاستێ جیهانێ ناڤ و بانگه‌كێ زۆر هه‌یه و هه‌مه ساڵی ژی كۆڤارا تایم كه‌سایه‌تیه‌كێ جیهانی بوَ ڤێ ناسناڤێ ده‌ستنیشان دكه‌ت، ئه‌وێ سالا پار بری فرانسیس پاپای فاتیكان بوو و دو ساڵ ل به‌ر یا نوكه باراك ئوبامای سه‌رۆكێ ئه‌مریكا بوو، كۆڤارا تایم ل سالا (1927)ڤه ئه‌ڤ ناسناڤه دابه‌ش دكه‌ت و هه‌تا نوكه چه‌ندین كه‌ساتیێن ب ناڤوده‌نگ ل وه‌لاتێن جیهانێ ئه‌ڤ ناسناڤه بری یه و ب ده‌ستڤه‌ئینایه و ل وانه ژی مه‌هاتما گاندی سه‌رۆك و رابه‌رێ دیرۆكی یێ هندستانێ، فرانكلن روَسفولتی ئێك ژ سه‌رۆكێن سه‌ركه‌فتیێن ئه‌مریكا بوویه، وینستن چیرچلی سه‌رۆك وه‌زیرێن به‌ریتانیا بوویه.
په‌یڤینا شیخ سه‌عید پیرانی زێندی بوو!!
پشتی كوَ رێكخراوا تیرۆریستیا ب ناڤێ داعش چه‌ند ده‌ڤه‌رێن كوردستانا روَژ ئاڤا داگیركری هه‌ول و بزاڤ كرین كو ده‌ست ب سه‌ر باژێركێ كوبانێ ژی دا بگرن و ملله‌تێ كورد ل وێ پارچا كوردستانێ جینۆساید بكه‌ن كو ئه‌ڤ كارێن هۆڤانه و دوور ژ هه‌می پره‌نسیپێن ئه‌خلاقی و ئولی و نه‌ته‌وی و مرۆڤایه‌تی خوه ب خوه ئه‌ركێ ئه‌ڤێ رێكخراوا تیرۆریستیا داعشه و ل ژێر په‌رده‌یا ئایینێ ئیسلامێ ئه‌ڤان كارێن درندانه ئه‌نجام دده‌ن كو ئه‌م دپشت راستین ئایینێ ئیسلامێ ل ڤان كریارا یا دووره، سه‌ره‌رای كو هێزێن پێشمه‌رگه‌هێن كوردستانێ ل باشۆرێ كوردستانێ ب درێژه‌هیا زێده‌تر ل (1050)كیلۆمه‌تران د به‌رگریكرنێ دا یه ل دژی ئه‌ڤێ رێكخراوا تیروریستی یا داعش و شیان سه‌ركه‌فتن ل دووڤ سه‌ركه‌فتنێ لسه‌ر رێكخراوا تیرۆرستی تومار بكه‌ن وزوربه‌ی ده‌وله‌تێن جیهانێ ژی دان ب ڤان سه‌ركه‌فتنان دایه و سه‌ره‌رای كو ئه‌ڤروَ داعش خودان چه‌كه‌كێ مه‌زنه و مروَڤ دكاریت بێژیت چه‌كێن دو ده‌وله‌تێن مه‌زن كه‌فتینه د ده‌ستی دا.
سه‌باره‌ت ب هنارتنا هێزێن پێشمه‌رگێ كوردستانێ بوَ كوبانێ زوی ب زوی سه‌رۆكێ هه‌رێما كوردستانێ هه‌ست ب مه‌ترسیا ئه‌ڤێ رێكخراوێ كر بوَ سه‌ر باژێرێ كۆبانێ و هه‌ول و بزاڤ دگه‌ل ده‌وله‌تێن هه‌ڤپه‌یمان و كۆمارا توركیا كرن كو ره‌زامه‌ندیێ دیار بكه‌ن بوَ هنارتنا پێشمه‌رگه‌هێن كوردستانی بوَ پالپشتی و به‌رڤانیكرن ل خه‌لكێ بێگونه‌هێ كۆ بانی و پشتی ره‌زامه‌ندی هاتیه وه‌رگرتن نامه‌یه‌ك ئاراسته‌یی په‌رله‌مانێ كوردستانێ ئاراسته‌كر بوَ ره‌زامه‌ندی ل سه‌ر هنارتنا هێزێن پێشمه‌رگه‌ی بوَ كوبانێ كو هاریكار و پالپشت بن دگه‌ل شه‌رڤانێن كورد ل وێ پارچه‌یا كوردستانێ و به‌رگریێ ل وێ ئاخا پیرۆزا كوردستانێ بكه‌ن و ره‌زامه‌ندی ژلایێ په‌رله‌مانێ كوردستانێڤه هاتیه كرن، هێزه‌كا پێشمه‌رگه‌ی ب چه‌ك و ته‌قه‌مه‌نیه‌كا باش به‌ره‌ڤ كۆبانا خۆراگر و به‌رخودان كو ئه‌ڤه هه‌یامه‌كه شه‌رڤانێن وێ پارچه‌یا كوردستانێ د به‌رخودانێ دانه برێكه‌فتن بوَ به‌ره‌ڤانیكرن ل ئاخا پیروَزا وێ پارچه‌یا كوردستانێ كو بریاره‌كا نه‌ته‌وی و نیشتیمانی یه و هه‌ستكرنه‌كا نه‌ته‌وی یه ئه‌ڤه ژی د زڤریته‌ڤه بوَ سیاسه‌تا حه‌كیمانه یا سه‌رۆك بارزانی و ب هزرا من ئه‌ڤ هزر و بیر و كاره نه‌ك یا نوو یه به‌لكوَ دزڤریته بوَ سه‌ره‌تایا سالێن چه‌رخێ بیستێ كوَ بارزانیێ نه‌مر د چ ده‌مه‌كێ باوه‌ری ب ڤان سنۆرێن جوگراڤی یێن ده‌ستكرده یێن كوردستانێ نه‌بوویه و هه‌ر ده‌مێ پارچه‌یه‌كا كوردستانێ تووشی مه‌ترسیێ بوویه د هان و پالپشتی یا وێ پارچا ئاخا كوردستانێ چوویه مینا كوردستانا باكور و روَژهه‌لات وبه‌لگه‌ه ل سه‌ر گۆتنامه ب هانا چوونا شۆره‌شا شیخ سه‌عید پیرانی و كومارا مهاداتێ، دیسا كه‌ره‌مكری و گۆتی((كوردستان ئێك پارچه‌یه و ئه‌ڤ سنورێن هاتینه جوداكرن ده‌ستكرده‌نه)) چو ده‌مه‌كێ ژی بارزانیێ نه‌مر وبابیًَ روحییًَ نه‌ته‌وا كورد مسته‌فا بارزانی باوه‌ری بڤان سنوران نه‌بوویه ورێز ژی لڤان سنورێن ده‌ستكرد نه‌گرتی یه، ئه‌ڤروَ ژی سه‌روكێ هه‌رێما كوردستانێ مه‌سعودبارزانی كو په‌روه‌رده وده‌رچوویێ خاندنگه‌ها بارزانیێ نه‌مره لسه‌ر هه‌مان بیروباوه‌ر سه‌ره‌ده‌ریێ دگه‌ل ئاخا پیروَزا كوردستانێ دكه‌ت وكری یه ژی ، ئه‌ڤ پێنگاڤێن هان فه‌ره هه‌می ملله‌تێ كورد ل هه‌ر كوژیه‌كێ ڤێ گه‌ردوونێ بژیت شانازیێ بڤێ هه‌ستا نه‌ته‌وی نیشتیمانی بكه‌ن كو ئه‌ڤه خوه‌ب خوه ئاماژێ دده‌ته مه كو هه‌ر ده‌مێ ده‌لیڤه بوَ نه‌ته‌وێ كورد هه‌لبكه‌ڤیت ئێك نه‌ته‌وه‌یه وئێك وه‌لات هه‌یه كو ئه‌و ژی كوردستانه و چ ده‌مه‌كێ باوه‌ری ب ڤان سنۆران نینه ئه‌وێن ژ لایێن داگیركه‌رێن كوردستانێڤه هاتینه دانان و هه‌روه‌تۆڤ ئاماژێ دده‌ته بلندبوون و پابه‌ندبوون تاكێ كورد ب هه‌ستا نه‌ته‌وی ونیشتیمانی و ئه‌ڤه ژی دێ ل به‌رپه‌ره‌كێ دی یێ دێرین یێ بزاڤا رزگاریخوازیا كوردستانێ هێته توماركرن، دیسان چوونا هێزێن پێشمه‌رگه‌ی بوَ جیهانێ خوه‌یا دكه‌ن كو ئه‌ڤروَ پێشمه‌رگه‌هێن كوردستانێ مه‌زنترین هێزه ل دژی رێكخراوا تیرۆریستی یا داعش د شه‌ره‌كێ دانه بوَ نه‌مانا ئه‌ڤێ رێكخراوا دژی هه‌می پره‌نسیپێن دیموكراسیه‌ت و مافێن مرۆڤی وئه‌م باوه‌رین ژی سه‌ركه‌فتن دێ بوَ ئیرادا گه‌لێ كوردستانێ بیت و مرن و سه‌رشوری ژی دێ بوَ دوژمنێن مرۆڤاتیێ بیت.
نيشاندان
WP Facebook Auto Publish Powered By : XYZScripts.com